財經CAREFREE - 順叔 買褲送褲袋 (2012年08月06日)
1 :
GS(14)@2012-08-06 12:04:57http://www.am730.com.hk/article.php?article=115622&d=1813
賣樓贈窗台，買褲送褲袋，今期開樓。
長江實業(001)啲樓出晒名，型英帥平靚正，一間公司能夠對自己如此有信心，就唔怕公開自己的成功秘訣，就在上星期，副主席及董事總經理李澤鉅，竟然披露咗長實賣樓的最高商業機密，原來樓盤單位的窗台，查實賣大包益街坊，「送嘅」。
其實，能夠買樓送窗台，咁蝕底，仲可以一年賣樓賺幾十億銀，你估咁容易，唔信你試吓吖，好似做賣褲生意咁，喺條街大聲叫「買褲送褲袋」，睇吓班街坊行過，會用乜嘢表情望住你。
香港人又係嘅，吓吓針對住長實，搞到大少連最高嘅機密都要爆埋出嚟，好似屯門個盤海譽，一幅窗台大過半間房的圖片，都可以在網上瘋傳一餐，大少回應的技巧，值得所有香港公眾人物好好學習研讀，先放低一句：「買樓送窗台」的金句，震懾全場心神，然後撻句類似「net area」的術語，當記者唔知佢講乜的時候，就用唔會公開的「合約細節」，而大班小記者當然要返公司補課。
講真，整個地產市場行業，各發展商高層應付傳媒的能力相當高明，心中有好幾招交代的「答案」，已經練到出神入化，萬變不離其宗，屢見不爽，況且在賣樓和宣傳時，答案肯定早作準備，呢方面高官相信要學番兩度，市民就不會如此勞氣。咁究竟咩係「net area」，查實亦無需深究，一個住宅單位，建築面積又好，實用面積又好，「net area」都好，呎價千變萬化，只係幫助消費者衡量單位價值的工具，去到最後的買賣合約，永遠只有一個單位一個價錢。其實，地產發展商近年所建住宅樓宇，在單位設有窗台已成一種風氣，只是政府開綠燈，為配合環保需要，單位再有一個所謂「環保露台」，大家才可能有所忽略罷了。
當然，買樓難斬件，例如一個單位售價為過千萬元，唔通你可以講價，同地產發展商講，唔使佢「送」窗台，打個八折咩，掉轉頭，如果地產發展商話，一千萬元只係買一個窗台，其他面積全部「送嘅」，相信置業人士同樣難收貨。
所謂舉一反三，香港消費者學嘢喇，如果大家下次去買條牛仔褲嘅時候，記住要問吓個sales姐姐，邊幾個褲袋係「送嘅」，sales姐姐一定會被你撩得好開心，話唔定會打個折過你㖭。
查實，以前的住宅樓宇，多數係方形柱體，只不過近年絕大部分新建樓宇的設計卻走向時代尖端，變晒多邊形，物業外形仲型過變形金剛；想番起喺幾十年前，好似太古城、城市花園、同紅磡黃埔花園咁，首先係物業項目名字簡簡單單，而內裡嘅單位四四正正，邊度會話咁多窗台、工作平台、環保露台，依家新樓盤則變化多端，一個單位分分鐘送五、六個乜台物台，好似秘密基地，可能想業主各成員能夠享有獨立私人空間，阿媽響露台晾衫、阿爸喺工作平台就梗係開工、阿仔喺窗台瞓覺剛剛好，個女仲可以喺最新式無窗浴室溫書，擔保無人騷擾兼方便。
要了解呢個變化，就要講多次「非結構預製外牆」呢個概念，近年新盤所有窗台平台露台，絕大部分都係「預製組件」，唔知點解，政府認為好環保，鼓勵發展商多啲使用，豁免計算建築面積，即係唔使錢送俾地產商，所以近年新盤，「免費贈送」的窗台平台露台愈嚟愈多。
「預製組件」亦可以係貼住窗台露台、用嚟做間格的牆身，大家咪睇小一道10厘米厚、100厘米闊的牆身，如果係「預製組件」，幾十層樓，個個單位都有一道，加埋就好和味。所以，近年新盤，古怪間格特別多，大家可以諗吓，香港啲則師係咪冇晒空間感，點解要花咁多時間，畫埋晒啲鬼五馬六的圖則。相反，見到地產發展商啲總部就四平八穩，唔會搞到個變形金剛咁，呢度一忽嗰度一件，唔通做寫字樓另有一套？
「買樓送窗台」已經唔容易，能夠將幾百方呎實用面積，變大一倍成過千方呎嘅住宅單位，造成豪宅的視覺效果，難度就更加高，聽講喺傳說中的發水秘笈有一招，可以話係香港樓盤圖則的「超必standard」。版面有限，要睇全套就去順叔個Blog度，但無嘢送。
財經CAREFREE - 阿瞬 變種港交所 (2012年08月07日)
1 :
GS(14)@2012-08-07 10:59:34http://www.am730.com.hk/article.php?article=115788&d=1814
港交所(388)對上一次突變，應該喺2005年，交通銀行(3328)來香港上市，揭開大量巨型國企嚟香港上市嘅序幕。
當日一變，港交所利潤亦由本來隨住股市上上落落，一飛沖天。之前好景，每年可以賺十多億元，低潮時，盈利就得番一半。於2006年，港交所的盈利升至25億元，於2007年，更超過60億元，雖然於近年逐步回落，但純利依然有大約50億元一年。
今年6月港交所宣布斥資約13.88億英鎊(約166.7億港元)，收購倫敦金屬交易所(LME)，可以算係第二度突變，但到目前為止，今次的收購，就禍福難料。
港交所收購LME，有人讚亦有人彈。樂觀嘅就覺得，港交所此舉主要係代替祖國出面，取得世界最大商品交易所之一嘅話事權。至於中國作為世界工廠，內部消費長遠，亦將會不斷增加，對商品期貨及期權交易需求，將必有增無減。
有北京照住，他日LME成交額相信亦將會大大提高，甚至遠遠跑贏芝加哥交易所。就算買得貴一些，以及就算初期盈利可能會被攤薄，但估計倘港交所是次為執行國家任務，相信遲早會得到補償。
據報道，港交所是次收購，資金方面，已經得到國家開發銀行貸款支持，可以算係一個有中央政府撐住嘅訊號。
不過，有證券商分析認為，LME必須於中國設立貨倉，應付實物交收需要，才能可以開拓內地市場。但由於現時法例所限，目前外資企業一般難以得到批准。假設最終無法實物交收，對於客戶來說，尤其是生產商等用家，將非常不便。
另外，中國自己要培育上海期貨交易所，幫LME搵生意，有一定利益衝突。所以港交所寄望背靠中國，就能大幅增加LME嘅交易量，暫時可能性唔大，仍然存在好多不明朗因素。
樂觀派另外一個理據係，港交所買咗LME，自必然可以增加交易費用，以及增加產品種類，例如人民幣產品等。至於增加交易費用會唔會咁順利，係另一個問題。至於新產品方面，香港都講咗推出人民幣產品好耐，但由於政策、市場等等因素，香港上市的人民幣證券，到依家只不過得一千零一隻，就是匯賢產業信託(87001)。最近人民幣合格境外機構投資者(RQFII)計劃下，華夏第一個推出A股交易所買賣基金(ETF)，最多遲啲加多幾隻類似嘅ETF，但RQFII進度，始終受到該計劃額度所限。
由此可見，新產品，唔係想推出就推出。內地商品期貨市場，可能潛力無限，不過想想電動車、風電及太陽能都一樣，被認為係未來希望，咁又點，市場好現實，投資者等你一年半載都毫無表現的時候，將來潛力幾大幾多都係假。要等到潛能變成利潤，可能要同港交所鬥長命。
今次交易將會笑得最大聲嘅可能係摩根大通。有報道話，該公司數月前剛剛成為LME的大股東，手頭股份即時升值一倍。
投行大哥大高盛亦屬於大贏家之一。美資投行擅長低買高賣，將市場當提款機，假如佢哋笑騎騎，搓晒手掌等收錢，難免令人擔心交易買方嘅港交所，係咪中咗計。
另外，令人唔太安心嘅理由，係CME中途退出收購戰。如果芝加哥商品期貨老手計過度過條數，都認為諗唔過的話，點解仲未有過相關營運經驗嘅港交所，算盤又打得響。大嗱嗱約167億元， 多過港交所目前股東資金額，萬一出錯咗點算？
港交所買LME，長遠利多弊多，可以辯論十日十夜。但無論港交所行政總裁(CEO)李小加點推銷單deal，都覺得港交所會先吃眼前虧。由於要借錢兼可能發行新股收購，首先要支付利息開支。
LME市盈率(PE)比港交所貴幾倍，買得咁貴，估計LME初期回報有限，即時效果當然係降低每股盈利。
港交所以往最吸引嘅地方，係資本性開支有限，所以現金流強勁，九成利潤可以攞去派息。PE雖然高，股息率依然可以接受。但往後幾年，可能要減低派息，保留多啲現金。本來內地經濟增長放緩，股市成交額縮減，已經令港交所吸引力打折扣，考慮到併購帶來嘅不穩定因素，港交所短期嘅投資價值更加令人懷疑。
(順叔事忙請假，財經茄哩啡專欄由阿瞬代筆兩天) 逢周一至五刊出
財經CAREFREE - 阿瞬 恒安低調利錢高 (2012年08月08日)
1 :
GS(14)@2012-08-08 11:53:08http://www.am730.com.hk/article.php?article=115852&d=1815
多年之前，一個上司曾經提過，報攤非常好賺，當時初初出道，心高氣傲，不以為然，心想賣報紙、雜誌毫無專業感覺，亦冇科技成分，行業屬於低端。
不過，工作多年之後，才明白工作難度高，並不代表回報大。相反，高調又矚目嘅行業，總會吸引大批人才，你聰明，但比你更加聰明嘅人，通街都係。
公司道理一樣。產品屬高科技，公司大規模，資產雄厚等等，並不代表利潤就一定好。平平淡淡的行業，有時候將有更多增長空間，利錢更高，生意更加穩定。
例如做紙巾、衛生棉以及紙尿片嘅恒安 國際(1044)，產品屬於日常必需品，幾乎個個家庭都要使用，而且買完用完又要再買，屬於低調，卻好賺好揾嘅好例子。
恒安於2011年度賺逾26億元，毛利率近四成，淨利潤率16%，雖然成本上漲，利錢比往年遜色，但依然屬於非常好賺的生意，該集團旗下衛生棉業務利錢最深，毛利率足足高達六成，至於紙巾以及紙尿片業務，亦有三成。
比較之下，不少行業都要自歎不如，無數表面風光，投資額大大，營業額動不動就過千億元嘅公司，其實收益既低，又波動。
以航空業為例，營運一間航空公司，買架飛機閒閒哋都要億億聲，一個機隊幾百架，牽涉嘅資金有幾龐大，唔計都知。
而且機師個個要專業資格，維修飛機亦需要專門公司負責。保證公司內部運作良好要花嘅心血已經非常多。但依然唔夠，航空公司無法控制嘅變數，好似油價、匯率、經濟好壞，都對業績有極大影響。
甚至以前曾發生沙士，火山爆發等等天災，都會隨時對航空公司造成打擊。搞咁多嘢，兼顧咁多問題，如果以為好好賺，咁就大錯特錯。
南方航空(1055)最近發出盈利預警，指空運需求疲弱，燃料成本又貴，加上人民幣匯率貶值，欠落嘅外幣債相對升值，令該集團中期盈利跌幅將超過五成。
假設全年成績倒退一半，而恒安盈利保持穩定，兩者今年盈利將會非常接近。南航資產約1,200億元人民幣，恒安資產約230億元，回報差十條街。南航低單位數嘅邊際利潤，同恒安亦無得比。
至於東方航空(670)同中國國航(753)首季盈利亦齊齊大跌，最終亦逃唔過發盈警的命運。利錢唔多，生意又大上大落，投資航空股，不如做 乘客好過。
航運業嗰種大風大浪法，一樣嚇死人。波羅的海運費指數，夠膽死由接近12,000點，一度跌到1,000點樓下，可見行業風險幾大。中國遠洋(1919)於2010年，賺約68億元人民幣，2011年逆境就唔見約100億元人民幣有多。比上次2008年金融海嘯後嘅重創更傷。5年平均拉勻，1年賺約40億元人民幣。公司大嗱嗱投資超過1,500億元人民幣資產，資產回報率極低。中遠洋今年頭一季再輸27億元人民幣，股本被蠶食到剩番約3.1元人民幣一股，悲情日子，唔知幾時至完。
恒安盈利大部分時間年年錄得穩步增長，十蚊資產，得到一蚊回報。建立一支龐大船隊，中遠洋欠落一身債，恒安就持有淨現金，單單冇利息負擔，兩間公司已經相差好遠。
轉個行業，講講手機。近期手機界中，錢幾乎都比蘋果同三星賺晒，諾基亞同黑莓生產商RIM老早連影都冇。曾經冒起得最快的新星，製造HTC手機嘅宏達國際電子，連續兩季業績都按年大倒退，股價1年左右已經唔見四分三。一兩期新產品唔賣得，就兵敗如山倒，相比之下，都係類似恒安，穩定中有增長嘅業務比較好。例子仲有唔少，中交建(1800)起路起橋起碼頭起鐵路，工程就大大，但毛利率得9%，扣埋其他成本，剩低4%。中國南車(1766)利錢只有幾個百分點，石油價格近年高企，但稅務繁重，煉油生意時好時壞，中國石油(857)去年利潤率7%，中國石化(386)煉油業務比重大，每當出現大虧損，利潤率就跌至2%至3%。
(順叔事忙請假，財經茄哩啡專欄由阿瞬代筆。) 逢周一至五刊出
財經CAREFREE - 順叔 海底撈鹹魚(上) (2012年08月09日)
1 :
GS(14)@2012-08-09 13:40:42http://www.am730.com.hk/article.php?article=116076&d=1816
呢期太忙，搵幾條鹹魚股望吓，即係跌得好殘，又有唔少人心郁郁博反彈的上市公司。鹹魚雖然唔識游水，但潛在海底唔易撈，博鹹魚翻生，更係高難度動作，呢期只係當打吓牙骹呃兩日稿費，即係放馬後炮。
鹹魚有好多種，有一種叫做深海鹹魚，壓在一個極深的經濟周期，要漫長的結構性變化，或者市場相信結構性變化將會發生，先至會翻生，今年最好例子，就係內地的國企電廠。
發電廠應該係近年表現最差的國企股之一，好似華電國際(1071)咁，5年時間總資產谷大2.4倍，純利反而跌咗86%，增加產能等如做蝕本生意，因為被煤公司及擁有壟斷性地位的電網公司撳住搶。
舊年底寫過幾篇《煤電網聯動》，講過中煤能源(1898)無端端同中國電力(2380)行埋，合資搞發電廠，可能因為煤企收到風，知道電力市場即將出現變革，對發電呢盤生意開始改觀。
雖然跟住大半年電企經營環境，的確好似出現結構性變化，不過，電改只係做咗小手術，電網仍然好惡，真正變化在於市場對煤價走勢轉趨悲觀，最激的講法，有人唱緊煤價十年大牛市已經玩完㖭。
內地發電市場的結構性變化，有機會再講，重點係，如果要博呢類深海鹹魚股翻生，就要超有耐性，等待漫長周期的完結，前提仲要係公司唔會爆煲，最好好似內地國企電廠咁，打腫塊面扮肥佬，年年借錢保持派息，就可以諗諗，依家唔少航運公司，都已變成深海鹹魚，幾年之後，唔排除可以好似電廠咁翻生，不過中間有冇其他更好選擇，又係另一回事。
一條在其他人眼中的鹹魚，在其他公司看來，可能好有策略價值，放落盤淡水好似就會識郁，最佳例子就係綠城中國(3900)，本來瀕臨爆煲邊緣，九龍倉(004)突然以「白武士」式的出現，營運資金雖然仍然緊絀，但最重要係，投資者相信公司最大問題已經得到解決，股價即時鹹魚翻生，反彈一倍咁滯。
近排例子仲有一個例子，就係雨潤食品(1068)，突然爆出嘉里集團持股量超過5%，即需披露的水平，股價又係爆升幾成，雖則糖王郭鶴年都有少少糧油生意，除非糖王想醃豬肉乾，否則唔似有意會收購雨潤，嘉里同豬肉檔亦似乎大纜扯唔埋，更似某種原因或交易，坐咗雨潤的衍生工具的技術性接貨。
有時策略投資者打救，或者名牌基金入股，有條水喉入股，未必代表一定會鹹魚翻生，或者點石成金式從此魚躍龍門，例如李寧(2331)，早排得到兩大基金入股借錢兼參與管理，股價一度爆升，但最近又已經打回原形，甚至更殘，最新市值，50個億港元都唔夠。
再之前亦有一個例子，叫做國美電器(493)，2008年全球融海嘯之後，大股東兼主席黃光裕又要入冊，搵咗貝恩資本入股，貝恩話事人叫竺稼，當年巨型國企排隊嚟香港上市時，呢位「造雨人」呼風喚雨，但係唔代表可以同管理層合作，貝恩資本除咗當日提供資金之外，後來國美管理層爭奪戰，以至近月國美同競爭對手的割喉減價血戰，貝恩資本都好似冇乜幫過拖，同現任管理層的默契，好似及唔上TPG在李寧咁肉緊。國美屬於突然多咗好多魚爭食、爭到個塘都乾埋條條焗住晒的鹹魚，唔單止要同蘇寧等老對手競爭，仲要面對京東商城等電子商貿新玩家，呢個塘夠晒熱鬧，聽講最近連騰訊控股(700)都玩埋一份，下回再續。臨尾賣個廣告，上次寫完篇《買褲送褲袋》之後，發現條底褲有個褲袋，寫多少少斬多幾両，掛住剪片改圖，甩咗稿要阿瞬再出山頂住，已經在網誌加開一場下集，有興趣就上順叔個Blog幫襯吓，送嘅。
財經CAREFREE - 順叔 海底撈鹹魚(下) (2012年08月10日)
1 :
GS(14)@2012-08-10 10:24:39http://www.am730.com.hk/article.php?article=116491&d=1817
呢期繼續講鹹魚股，上回講到，上市公司搵到名牌基金做策略投資者，放盤淡水入去未必一定翻生，好似國美電器(493)咁，突然有大量競爭對手加入，爭到條條都變晒鹹魚咁滯。
近排國美股價跌得好急，因為這間電器連鎖巨無霸發出咗盈利預警，一間舊年明明仲賺緊近廿億人仔的上市公司，竟然可以話今年上半年要見紅，原因話係投入大量資源發展電子商貿。
國美同埋老對手蘇寧電器，近日聯手發起地獄式割喉減價戰，成個勢，似乎想在京東商城(360buy.com)未上市之前，以本傷人，實行將呢個網上競爭對手擠走，不過，聽講內地消費者都好興在網上購買電器產品，即使他們能夠真的砌低一個又出一個，唔單止阿里巴巴的淘寶網，連同騰訊控股(700)今年先完成收購的易訊網(51buy.com)後，又話要加入減價戰戰團。
玩電子商貿大戰，唔係搭個網上平台咁簡單，最攞命嘅係要做埋倉存物流部分，呢個環節喺舊年開始出現好多新政策，斷估未有邊間公司掌握到絕對優勢，即係未來將發生一場混戰。
美國幅員唔細得過內地幾多，雖然人口較少，但網上購物流行咗好耐，不過，電子商貿到依家仍然取代唔到現實世界的零售網絡，否則Walmart都唔需要開咁多巨舖請咁多人，內地電貿戰打到飛起，血光之後，國美蘇寧等坐住幾十億銀、資產負債表又唔算單薄的鹹魚，應該有一兩條可以翻生。
有一類公司，變成鹹魚股的原因，在於擴張得太快，但又係唔肯走位，衝去曬太陽，搞到想唔變鹹魚都唔得，例如比亞迪(1211)。
咪以為比亞迪只係燒錢搞電動車，呢隻嘢放落太陽能電池的投資，亦都唔嘢少。早兩年在內地睇報紙，提到陝西省發改委有個「陝南循環經濟發展規劃」，由2009年規劃到2020年，當中「十大工程」之一，就係比亞迪投資225億元(人民幣，下同)的5,000兆瓦光伏電池項目。
比亞迪今年有113億元銀行債務到期，每年資本開支約100個億，舊年主業現金流入只有60個億，最近一單新聞，竟然係在天津起電動巴士廠，又投資20個億，好似完全唔擔心會爆煲。比亞迪及保利協鑫(3800)等公司，話佢環保節能又得，話佢科學發展又得，啱晒國策，所以應該大把地方政府搶住搵佢哋投資，亦會有唔少補貼或著數，呢樣極可能係比亞迪仲咁夠膽燒錢的主要原因。
內地得到政府支持，甚至中央政府的祝福，歐美國家近年成日追住內地光伏業，認為國家補貼構成不公平競爭，應該唔會全部老屈，加上在做光伏有著數下，個個湧住去曬太陽，國策支持最終變產能過剩，一間二間公司變晒鹹魚，發展太陽能是一個必然趨勢，內地光伏企業，最終會有幾間鹹魚翻生，不過亦有唔少會變成梅香鹹魚。
當然啦，有啲鹹魚只係扮翻生，彈兩吓就當正已經復活，好似思捷環球(330)咁，高層出名人工高兼福利好，但偏偏個個都坐唔定，出出入入好似自製股價波幅，今日升三成，幾個月後又跌番兩成，已經變成不折不扣的炒股，最新呢位行政總裁又唔知可以坐幾耐，會唔會又掟個「3年轉型計劃」出嚟，一年唔夠就拜拜嚟多過起跌循環。
要捕捉到觸發鹹魚翻生的因素，應該留意管理層在逆境時候的取態及策略，呢啲先係最有用的金融財經資訊。不過呢，由大行報告到傳媒報道，多數人都傾向一沉踩多腳，好似呢兩日提過的上市公司，股價已經跌咗幾截，大行分析員先嚟調低所謂「12個月目標價」又有乜嘢用，有時可能上內地網上論壇收收風，甚至搵啲公司管理層微博關注吓，可能比睇目標價更有用。
假設用100個億港銀做指標，依家可以買起半間保利協鑫，5間霸王國際(1338)，3間滙源果汁(1886)， 0.8間國美電器，0.7間思捷環球，兩間李寧(2331)，順叔唔係話建議大家走去撈底，只係想指出一點，依家個市夠殘，成個金魚缸都係鹹魚，查實唔需要分析都知道，未來必定有唔少鹹魚翻生的故事。
財經CAREFREE - 順叔 利豐繼續吹 (2012年08月13日)
1 :
GS(14)@2012-08-13 09:40:30http://www.am730.com.hk/article.php?article=116666&d=1818
今期開利豐(494)。
幾年前呢度第一次寫利豐的時候，講過呢隻嘢明明好似好高透明度，不過，睇嚟睇去，諗嚟諗去，都唔能夠諗得明白佢哋盤數，不過呢，分析員及芬佬，又個個好似好明咁！
不過一間咁「透明」、機構投資者又咁「明白」的上市公司，上星期四公佈的中期成績表時，同「市場預期」相比，竟然嚴重「甩轆」，一隻市值過千億元的藍籌公司，之後一日的股價，竟可以插兩成，成交唔係沽空，而係真金白銀掟貨居多，可以想像市場反應有幾大。講緊利豐係管理「市場預期」的高手，同分析員溝通一向良好，例如3年又3年的業務計劃，講得出叫做交到數，又例如經常有一大抽所謂「Management Guidance」，分析員跟住嚟估，唔會錯得去邊。
至於中期業績可以令全世界大跌眼鏡，除咗一句「差過市場預期」之外，仲可以咁理解，市場的極度波動，通常源於恐懼，恐懼又通常源於無知，從上星期利豐公佈業績後的市場反應來看，可以好合理咁推斷，唔少機構投資者，對利豐呢隻股票，其實只是一知半解。查實每次見到利豐的管理層，好認真咁公開研究自己條鏈，講緊的係「供應鏈」，例如出書，又例如在學術抑或金融研討會，都忍唔住好想笑出聲，因為總係諗起《史力加3》裡面，小木偶回應Prince Charming盤問時，避免鼻哥變長、講咗等如冇講的一番說話。
假如用地球話去解釋利豐呢間公司，查實好簡單，2010年前，不過做緊馮氏兄弟伯爺100年前做緊的老本行，即係「買辦」，大家問嚇有做過「採購」、「跟單」的朋友，就知道利豐唔係做緊乜嘢高技術的生意，而只是擔擔抬抬的粗重功夫，呢度唔係睇小山大斬埋有柴的辛苦錢，而係利豐盤生意，搞到又出書、又做哈佛工商管理研究案例，就誇張咗少少囉。
利豐年報話你知，公司在2010年，完成咗「歷史上最複雜的改組」，將主業一變三。
即係由「一條」供應鏈，變咗「三個」網絡，包括「貿易」、「物流」以及「本土業務」，如果再用地球話去解釋的話，亦即係同樣幫人做採購的大型競爭對手，已經被收購得七七八八，利豐的收購對象，已經轉移到最下游的零售業務，即時收買營業額，買埋買埋一大抽雜嘜品牌，在自己條供應鏈做生意，盤生意愈大愈雜，開始要撈埋物流同埋零售業務。
當利豐講緊做採購跟單的供應鏈，又識轉彎又識飛，依家做埋物流同零售業務，仲要講緊管理一大堆雜嘜零售品牌，今日利豐的管理層，要三頭六臂先搞得掂。好似做物流的UPS，做零售的Walmart，夠大未？市盈率都係講緊15倍樓下，如果利豐做物流及零售都咁出色的話，20倍市盈率當然值，不過難度唔細，利豐舊年同Walmart達成採購協議，聽講第一年採購額已經有20億美元(約156億港元)，不過，一單咁重要的生意，利豐又唔係特別講多兩句，奇奇怪怪。
利豐3年又3年的業務計劃，擴張軌跡好簡單，就係集資、收購、交數，再集資、再收購、再交數，總知三三不盡六六無窮，建基於市場認為利豐的帳目好透明、盤生意好易明，不過，近年打開利豐的業績資料的Power Points望一望，就愈嚟愈複雜，有愈睇愈難明的趨勢，唔知分析員同埋芬佬，係咪個個都繼續睇得明白。如果唔想搞到咁複雜，可以先睇睇一組最簡單的數字，利豐最新的3年計劃，該集團的目標，是在2013年核心經營溢利達到15億美元(約117億港元)，假設利豐講得出亦最後交到數，市盈率有望約20倍，市值將超過2,300億港元，如果估值重返市盈率約30倍的歷史高位，市值更加有可能超過3,500億港元。
假設利豐講得出做得到，3年又3年，一間市值二千幾億元的公司，下一個3年計劃又係點，下一步要收購乜嘢，唔通要收買UPS同埋Walmart咩？！繼續吹囉。
2 :
GS(14)@2012-08-13 09:42:52http://caijingcarefree.blogspot.hk/2012/08/blog-post_6135.html
財經CAREFREE - 順叔 放眼中電(上) (2012年08月14日)
1 :
GS(14)@2012-08-14 09:57:22http://www.am730.com.hk/article.php?article=116845&d=1819
今期開中電控股(002)。
五大國企發電公司，近月因為市場開始唱衰煤價前景，股價反彈唔少，不過，用星期一的收市價計算，A股加埋H股，市值總值仍然唔夠4,500億元，中電控股加埋電能實業(006)，兩股已經接近3,000個億，即係佔三分之二的比重。
內地電力市場廠網分家，中電以及電能旗下的港燈，一條龍垂直式壟斷市場，亦有大量海外業務，唔可以直接比較，但係本港彈丸之地共約700萬人口的電力市場，所養大的兩間電力公司，竟然可以同全球第二大經濟體系、擁有13億人口大國的五大發電國企匹敵，可以想像過去兩電有幾好搵。
兩電的香港業務，去年純利大約100個億，是否暴利尚屬其次，最緊要係穩定，每年穩袋幾十個億。
在2008年之前幾十年，最多間唔中被立法會砌嚇鬧兩句，或者有人去集團總部門口示嚇威咁，既無需要擔心競爭對手出現，更無需要擔心客仔幫襯隔籬。
香港市場仲有一樣好，就係地域細，電纜可以駁少啲、駁短啲，又好少話乜嘢自然天災，十幾年先打一次10號風球，電線、電纜唔會吹斷一兩條，近年乜嘢力場好似減弱，颱風韋森特早前襲港，中電位於青山發電廠只係運煤帶其中一節鬆脫墮地，供電系統冇受影響。
不過，同樣屬於天災，中電位於澳洲的電廠，6月時煤礦場曾被洪水浸咗，發電量被迫減少，又要付出額外的重建開支，可想而知，香港對於兩電，由監管架構到自然環境，都算係福地。
市場會飽和，咩嘢力場會減弱，監管架構亦會改變，兩電在香港呢個老地盤，近年擺出嚟個姿態，好似愈嚟愈受委屈咁，例如政府唔利用08年重訂利潤管制協議的時機，加大影響力，早排兩電在商業協議容許範圍內加價，政府竟然加入輿論壓力一部分迫兩電轉軚。
在商言商又好難唔發火，近日所見，尤其係中電，同政府講數拗手瓜時候，愈見刀光劍影。
「在少數天朗氣清的日子，當我從中環的辦公室遠眺維港，我會看到西九龍填海區和啟德機場舊址，這兩幅土地已經丟空和閒置多年。假如中電在管理和營運九龍和新界供電系統方面，其決策和執行速度與效率也處於這種水平的話，那今天我大概會是在一片漆黑中和大家見面。」
中電主席米高嘉道理(Michael Kadoorie)，唔好話發火開拖，咁多年嚟公開講嘢都唔多句，以上呢幾句「怒片」香港政府的評語，出自今年5月時中電舉行的股東周年大會上，當日米高嘉道理因為喉嚨痛出唔到聲，唔係放低新聞稿算數，更要由副主席毛嘉達(William Mocatta)代為開聲發炮，務求電子傳媒可以有聲有畫，可見呢位已經植根香港的猶太富豪有幾火滾。
至於講緊的兩塊大型地皮，順叔相信用嚟種菜都可以供應嚇本地有機市場，偏偏放喺度曬太陽多年，大家試嚇想像一下，米高嘉道理遠眺維港彼岸時，映入眼簾的，又點會只係兩塊空地及政府的工作效率而已，在呢位中電主席眼中，查實好可能還見到西九、南九項目落成後，以萬計、甚至係十萬計的潛在商住用戶。
中電同港燈，一個在香港島發展，另一個就發展九龍新界區，各據壟斷一方，香港「地少人多」，可以發展空間有限的既定概念，對港燈可能仲成立到，但對於中電，又唔係咁講法。
例如西九、南九發展起嚟，就會為中電帶嚟大量的新增商住用戶，又例如政府要發展新界新市鎮衛星城市，中電又有生意做。
中電及電能市盈率不相伯仲，但相對於版圖侷限於港島的港燈，中電的香港業務，仍然存在好大的地域性擴展空間，呢個廣被忽略的因素，既然係中電未來的重要發展潛力，亦好可能成為中電為未來電力市場監管框架，同政府拗數時的重要考慮因素。
至於中電昨日收市報67.6元，升0.4%，全日總成交額5,614萬元，該集團亦將於今日公佈中期業績，且看管理層對未來發展前景有何看法。
而電能昨日收市報61.95元，升0.65元，增幅逾1%，全日成交額約9,949萬元。
下回再續。
財經CAREFREE - 順叔 放眼中電(下) (2012年08月15日)
1 :
GS(14)@2012-08-15 09:49:34http://www.am730.com.hk/article.php?article=117029&d=1820
上回講到，中電控股(002)壟斷九龍新界的電力市場，相對於侷限在港島的電能實業(006)，中電的本土市場，其實仲有相當發展的空間，例如西九及南九兩大發展項目，仲有在新界可能出現的新市鎮，都可以為該集團未來帶嚟以萬計，甚至十萬計的新增商住用戶，當中仲未計中港邊境的發展，例如河套區的發展，供電好可能都係幫襯中電。
中電本身已經有相當規模的內地業務，一直有賣電到內地，仲有25%的大亞灣核電站，中電大本營，地理環境上，連接中國內地，比起電能旗下的港燈，有更大自然增長空間。
不過，有辣亦有唔辣，同內地市場更貼近，唔需要過大海，駁條電纜過嚟都容易一點，所以中電的壟斷性優勢，亦較容易因為監管環境的轉變，例如開放電網，受到內地國企的挑戰。
除咗潛在的市場機會或競爭之外，內地市場對香港電力市場的最大影響力，在於燃料供應，香港政府近年推動更清潔能源發展，為本地發電廠設定更嚴格的排放上限，能源結構向天然氣靠攏，可以話係近年電力市場監管的最重要變化。
從中電管理層早幾年的言論，同埋年報的表述，相信中電本來有興趣染指天然氣業務，包括在大鴉洲發展液化天然氣接收站，中電亦曾經提及過，如果成事，將有助香港在國際市場入口價格更具競爭力的天然氣，再搞大啲，香港甚至可以在液化天然氣接收站市場，同新加坡爭嚇飯食。
於2008年，港府同兩電簽署新的利潤管制協議，同年電力市場的能源供應，亦出現咗一個突變因素，作為中央政府「挺港」措施之一，港府同中國國家能源局，簽署咗一項能源供應諒解備忘錄，簽咗呢個備忘錄之後，中電好快放棄咗大鴉洲起接收站的計劃。
絕大部分「挺港」措施，其實一家便宜兩家著，例如呢份能源供應備忘錄，香港叫做未來20年有穩定的能源供應，包括核電及天然氣，內地亦唔會蝕底，有關天然氣部分，中海油(883)會繼續以市價向香港供應海上天然氣20年。
至於中國石油(857)亦會透過西氣東輸二線向香港供應液化天然氣，不過，接收站設於內地一邊。
中電目前的天然氣供應，主要是來自中海油母公司旗下的崖城氣田，合約20年前簽落時，油價約為20美元(約156港元)一桶，據中電昨日於中期業績記者會上透露，中石油將於12個月內，會向中電供氣，不過，供氣價格就相等於現時的3倍。
從中電角度睇，港府選擇內地作為長期天然氣來源，客觀效果上，避免咗興建接收站所需的巨額資本開支，降低咗加電費的誘因，不過，同時令香港電力市場的燃料供應，掌握在大型國企手中，國企市價供氣，中電將燃料成本轉嫁予香港用戶時，港府又加入輿論鬧埋一份，中電主席米高嘉道理當然氣頂。
氣頂一件事，數仍然是要講的，今年底就要進行利潤管制計劃的中期檢討。中電同電能實業同撈同煲，食同一行飯，又唔需要爭飯碗，多得長和系的強大政經力量，中電多年以來，應該慳返唔少遊說政府的財力物力精力，已經可以坐享電力市場的政策便利。
兩電在過去咁多年，同政府拗手瓜都站在同一陣線，一齊加價、一齊轉軚，連拒絕向立法會透露「機密商業資料」的理由，都一模一樣，相信兩個集團應該係好好傾。
不過，中電在香港的本業，燃料供應既握在大型國企手中，更重要係，仲有自然增長的空間，用戶增加，可以溝淡燃料上升的成本，呢個形勢上的分別，有可能反映在兩電在未來監管架構上的取態，中電同電能實業旗下的港燈，未必會站在同一陣線上。
另外，中電本來傾緊收購埃克森美孚手上的60%青山發電股權，3月時突然宣佈，南方電網在後期加入洽購，最少反映咗中電都有意思受埋南方電網一齊玩，最近中電重新委任行政會議成員羅范椒芬做董事，放眼中電近來的部署，或者可以見到未來電力市場發展的脈絡。
至於講番中電2012年度6月底止業績，受到澳洲雅洛恩礦場需要撥備等影響，上半年純利大幅倒退42%，僅賺33.5億元，第二次中期息微升1.9%，而該股昨日收市報67.75元，上揚0.2%。
http://caijingcarefree.blogspot.com/
財經CAREFREE - 順叔 電商血拼(下) (2012年08月17日)
1 :
GS(14)@2012-08-17 10:07:30http://www.am730.com.hk/article.php?article=117485&d=1822
上回講到，內地電器零售公司爆發割喉式減價戰，京東商城、國美電器(493)以及蘇寧管理層的微博，變成最佳觀戰地點，人哋噴口水，九唔搭八的SOHO中國(410)主席潘石屹亦趕住抽水，有網民索性叫呢位日日掛住在網上風花雪月的地產發展商，搞嚇減價戰，等內地同胞可以買嚇平樓。
不過，電器同樓最大的分別，在於前者可以喺好多個割裂的市場，例如電視機劈價，可以劈到血本無歸，iPhone亦可以完全唔受影響，假如國美買電飯煲送iPad，作為生產供應商的美國蘋果都唔會睬你。
「樓價」基本上可以當成一間上市公司的「股價」咁睇，一個個住宅單位的成交價，直接左右「股價」的上落。亦即係話，地產商好大程度上，坐埋同一條船，劈「樓價」等如劈自己有份的公司「股價」咁，所以，地產商劈價多數唔係為咗隊冧對手，而係為咗自保。
中國電商血拼又好唔同講法，國美、蘇寧可以趁住京東商城未上市，以競爭消滅競爭對手，以本傷人，恃住自己本帳簿仲有咁上下斤両，用短期內盈利的波動，換取競爭對手的消失。
呢場在虛擬世界進行的割喉大戰，同十幾年前壹傳媒(282)老闆黎智英推出的蘋果速銷手法非常相似，當時百佳、惠康兩大超市，曾出現過短暫惡性減價戰，最後結果係，蘋果速銷執笠收場，聽講肥佬黎因此出血十個億港銀。當日蘋果速銷挑戰超市霸權失敗，有人話，係因為香港兩大超市背後的地產財團使橫手，威迫利誘供應商唔供貨俾蘋果速銷，令肥佬黎被迫從海外入貨，最後頂唔順，物流成本高最終要執笠。呢個香港「反壟斷」的典故，相信唔少人都曾經聽過，可能程度有多高，可以睇睇家樂福在香港都生存唔到就知啦，掉轉頭，百佳在上海亦要執笠，反而擁有大量內地貨源的華潤創業(291)，旗下的超市以及便利店在香港則愈開愈多。
從香港發展的經驗，或者可以用嚟評估一嚇中國呢場電商血拼的勝負結果，電器零售公司只係銷售代理，唔似得地產發展商，本身並冇生產能力，供應商惡啲？定係零售商惡啲？邊個靠邊個，可以左右呢場電商血拼的結束時間及結果。
早排TCL多媒體(1070)及海爾電器(1169)先後撲出嚟，想叫停這場惡性競爭，出發點唔係話驚影響到本身的盈利，而係怕零售商拖長周轉找數期。網上罵戰鬥多口水，割喉減價就要鬥多血，國美及蘇寧本身已經坐住幾十億元的現金，可以打持久戰，而蘇寧一個月前，亦曾發新股俾大股東，獲注資45億元人民幣之後，日前又宣佈計劃發債集資最多80個億人仔，減價戰又點需要過百億元資金，蘇寧擺明車馬就係全力進攻姿態，為網上業務及物流配套做足準備。
京東商城聽講先後經過三輪私募集資，早幾個月更嚟香港見人，曾經傳過第三輪注資的估值，等如京東商城2007年第一輪的100倍，數目可能有出入，不過，京東商場現時面對最大的問題，係背後點樣說服唔同的基金股東拆掂呢條數。國美暫時未有任何注資行動或者集資消息，不過今個星期，幾份內地傳媒先後報導過，國美大股東黃光裕，有意大幅減價，出售在北京的國美商都地產項目，套現大約50億人仔。順叔之前亦都講過，身陷囹圄的黃光裕，又經歷早兩年的國美控制權爭奪戰，現時只係手持約三成幾國美的股權，應該冇乜安全感，如果唔想放棄盤生意，有一定誘因去提高持股比例。
不過，依家國美股價仲低過當日貝恩資本的「白武士海嘯價」，公司又存在一定注資的需要，如果黃光裕變賣私人持有的地產項目，要套現半百億元的消息屬實的話，順叔相信，係黃光裕大手增持股權的前奏。而以國美週三收市價0.67元計，今年以來，股價已經冇咗62.7%，黃光裕增持的成本其實已減低不少。
財經CAREFREE - 順叔 SOHOHOHO中國(上) (2012年08月20日)
1 :
GS(14)@2012-08-20 11:29:21http://www.am730.com.hk/article.php?article=117719&d=1823
今期開SOHO中國(410)，一間可能要抱住睇「呵呵片」心態去觀察的內地房地產公司。
首先要講一句，作為一名「金融義和團」的團民，順叔每逢見到一啲覺得老外8月15特別圓、特別鍾意咀的中國人，冇乜好感，所以對一間公司名又中又西、要用一個英文字、一個美國概念凸顯自己又「高尚」又「Posh」的中國公司，一開始已經存在偏見。
跟住又要講一句，作為一個基本分析原教主義分子，順叔由細到大，所接受的分析技巧訓練，都講緊成功的公司，有一個專注的管理層，公司不務正業，或者管理層在業務範圍以外的曝光率太高，多數有古怪，所以對於一個日日四圍吹水、抽水的上市公司高層，一開始已經存在戒心。
中國人多、網民又多，互聯網虛擬世界叫做係個相對自由空間，倒瀉屎都有百幾萬人圍觀，一個公司高層，搞個博客平台，解釋嚇自己對經濟以及行業趨勢睇法，講嚇在股東會或投資者推介會難以觸及的公司資料，當然係好事，不過，好似SOHO中國董事長潘石屹咁落力的例子又好少見，日日夜夜在博客或微博風花雪月指手劃腳，邊度出現網上熱點多人圍觀，多數會見到潘Sir身影，例如呢排電器零售公司打價格戰、口水戰，人哋在網上噴口水，潘Sir衝去抽水，股東見到，難免會問句：究竟你係咪返緊工嘅呢？
潘石屹花大量時間精神在互聯網噴口水，又出席大大小小的吹水論壇，如果因為咁就話佢不務正業，應該唔係咁公道，SOHO中國係少數董事長及行政總裁分咗工的內地上市房企，理論上係個企業管治的良好榜樣，不過分工未分家，負責實務擔任公司總裁一職者，正正係潘石屹的老婆張欣，呢位面形輪廓同「女股神」劉央有幾分相似的賢內助，聽講後生時加盟的銀行部門，啱啱被高盛收購，所以陰差陽錯在高盛香港掛單一年，履歷表從此多咗投資大行賓架的光環，有老婆主內打點一切，潘石屹可以放心出外打滾，日日「SOHO」。
地產公司砌磚頭，磚頭估值點都有個譜，固定資產又硬兜兜企喺度任人睇，要用概念包裝磚頭，仲要得到相對其他行家更高的估值，查實係超高難度動作，而SOHO中國呢方面，就做到出神入化，理得佢「SOHO」定「呵呵呵」，總之賣磚頭吹到好似賣菜咁，講品味講享受，吹到外國芬佬都相信公司有本事點磚頭成黃金，從呢個角度睇，潘石屹查實只係好專注咁做緊佢在公司的本分職責，就係吹水。
「SOHO」又好、「呵呵呵」都好，最緊要令人講得佢好有「品味」，將與別不同形象，幻化成公司別具潛力的「感覺」。
邊位對SOHO中國呢間公司有印象，但又未認真睇過公司盤數的話，不妨試嚇瞇埋眼，試諗嚇SOHO中國的「印象」係乜，然後又諗嚇呢間地產公司的「主業」係乜，如果閣下講唔出SOHO中國做住宅定係做寫字樓、收租定賣樓的話，閣下就要佩服潘石屹的吹水神技。
由當年兩本招股文件，到公司網頁資料，到舊年年報，SOHO中國介紹旗下地產項目的時候，例牌先嚟一個超凡脫俗但九唔搭八的樓盤名，搞到唔知「長城腳下的公社」定「長城公社下的腳」，「凌空SOHO」定「深洞呵呵呵」咁，香港啲凱旋門巴黎鐵塔都顯得落塵俗氣，然後就撻一抽建築師或者文化概念，吹到係「私人收藏的當代建築藝術品」，點呀？
一碟臭豆腐，拎到上枱，你可以叫佢做「遍地黃金磚」，就好似一個鬚刨，其實可以係個風筒，不過，你估佢唔到，先叫做吹水最高境界，當你以為風筒一定係鬚刨啦，點知佢真正其實係一個風筒。
吹咗咁多，SOHO中國查實賣商舖賣寫字樓，不過一件二件「當代建築藝術品」，近排唔知賣唔出，定係唔捨得賣，SOHO中國決定都係「私人收藏」，啱啱宣佈轉型做包租公。得唔得，下回再續。
2 :
GS(14)@2012-08-20 11:31:20http://caijingcarefree.blogspot.hk/2012/08/sohohoho.html
Next Page