財經CAREFREE - 順叔 海底撈鹹魚(上) (2012年08月09日)
1 :
GS(14)@2012-08-09 13:40:42http://www.am730.com.hk/article.php?article=116076&d=1816
呢期太忙，搵幾條鹹魚股望吓，即係跌得好殘，又有唔少人心郁郁博反彈的上市公司。鹹魚雖然唔識游水，但潛在海底唔易撈，博鹹魚翻生，更係高難度動作，呢期只係當打吓牙骹呃兩日稿費，即係放馬後炮。
鹹魚有好多種，有一種叫做深海鹹魚，壓在一個極深的經濟周期，要漫長的結構性變化，或者市場相信結構性變化將會發生，先至會翻生，今年最好例子，就係內地的國企電廠。
發電廠應該係近年表現最差的國企股之一，好似華電國際(1071)咁，5年時間總資產谷大2.4倍，純利反而跌咗86%，增加產能等如做蝕本生意，因為被煤公司及擁有壟斷性地位的電網公司撳住搶。
舊年底寫過幾篇《煤電網聯動》，講過中煤能源(1898)無端端同中國電力(2380)行埋，合資搞發電廠，可能因為煤企收到風，知道電力市場即將出現變革，對發電呢盤生意開始改觀。
雖然跟住大半年電企經營環境，的確好似出現結構性變化，不過，電改只係做咗小手術，電網仍然好惡，真正變化在於市場對煤價走勢轉趨悲觀，最激的講法，有人唱緊煤價十年大牛市已經玩完㖭。
內地發電市場的結構性變化，有機會再講，重點係，如果要博呢類深海鹹魚股翻生，就要超有耐性，等待漫長周期的完結，前提仲要係公司唔會爆煲，最好好似內地國企電廠咁，打腫塊面扮肥佬，年年借錢保持派息，就可以諗諗，依家唔少航運公司，都已變成深海鹹魚，幾年之後，唔排除可以好似電廠咁翻生，不過中間有冇其他更好選擇，又係另一回事。
一條在其他人眼中的鹹魚，在其他公司看來，可能好有策略價值，放落盤淡水好似就會識郁，最佳例子就係綠城中國(3900)，本來瀕臨爆煲邊緣，九龍倉(004)突然以「白武士」式的出現，營運資金雖然仍然緊絀，但最重要係，投資者相信公司最大問題已經得到解決，股價即時鹹魚翻生，反彈一倍咁滯。
近排例子仲有一個例子，就係雨潤食品(1068)，突然爆出嘉里集團持股量超過5%，即需披露的水平，股價又係爆升幾成，雖則糖王郭鶴年都有少少糧油生意，除非糖王想醃豬肉乾，否則唔似有意會收購雨潤，嘉里同豬肉檔亦似乎大纜扯唔埋，更似某種原因或交易，坐咗雨潤的衍生工具的技術性接貨。
有時策略投資者打救，或者名牌基金入股，有條水喉入股，未必代表一定會鹹魚翻生，或者點石成金式從此魚躍龍門，例如李寧(2331)，早排得到兩大基金入股借錢兼參與管理，股價一度爆升，但最近又已經打回原形，甚至更殘，最新市值，50個億港元都唔夠。
再之前亦有一個例子，叫做國美電器(493)，2008年全球融海嘯之後，大股東兼主席黃光裕又要入冊，搵咗貝恩資本入股，貝恩話事人叫竺稼，當年巨型國企排隊嚟香港上市時，呢位「造雨人」呼風喚雨，但係唔代表可以同管理層合作，貝恩資本除咗當日提供資金之外，後來國美管理層爭奪戰，以至近月國美同競爭對手的割喉減價血戰，貝恩資本都好似冇乜幫過拖，同現任管理層的默契，好似及唔上TPG在李寧咁肉緊。國美屬於突然多咗好多魚爭食、爭到個塘都乾埋條條焗住晒的鹹魚，唔單止要同蘇寧等老對手競爭，仲要面對京東商城等電子商貿新玩家，呢個塘夠晒熱鬧，聽講最近連騰訊控股(700)都玩埋一份，下回再續。臨尾賣個廣告，上次寫完篇《買褲送褲袋》之後，發現條底褲有個褲袋，寫多少少斬多幾両，掛住剪片改圖，甩咗稿要阿瞬再出山頂住，已經在網誌加開一場下集，有興趣就上順叔個Blog幫襯吓，送嘅。