曾醉駕被判社服令羅鈞滿2013年起冇運行
1 :
GS(14)@2017-01-14 07:54:31無綫前七線藝人羅鈞滿近日被爆有個有米女友，無懼失業。對於「羅鈞滿」呢個名呢……好事……頂多就係記得佢入行第2年，即係2010年喺台慶抽中100萬獎金獎品；衰嘢就……你懂的。2011年，羅鈞滿憑住喺《天與地》飾演年輕版林保怡，開始令觀眾有印象。不過，最多人「識」得羅鈞滿嘅係喺2013年6月，無綫主播之一黃紫盈於互動新聞台報道新聞時眼紅流淚，後來傳出因與張文采爭權受委屈而流淚。當時身為張文采男友嘅羅鈞滿，發微博力撐女友，後來黃紫盈離巢，亦因為咁，羅鈞滿同網民扛上咗，以後有咩事，都有網民「贈慶」。到2013年7月，佢參加《星夢傳奇》歌唱比賽，雖然有網民質疑佢嘅唱功冇感情、冇實力，但佢入到五強，引起網民爭議。同年10月，港府宣布免費電視發牌決定，港視遭「一男子」力阻，不獲發免費電視牌照時，羅鈞滿獨排眾議，直指王維基綑綁式「將自己商業失敗跟社會公義拉上關係」，直言「王維基先生絕對不負責任和應負全責」，又試過在網民發起「熄電視機日」向無綫霸權說不之際，在網上出po呼籲道：「希望大家可以日日熄電視，而無必要在特定日子去話比其他人知自己會/想/將會/已經熄電視。可恥。」得罪網民都唔夠，羅鈞滿喺同年4月涉違例泊車被控多條罪名，佢否認控罪，於11月成功舉證甩身。不過，2014年3月，羅鈞滿又被控揸私家車經紅磡漆咸道北落斜時，撞到前面一架的士，再將的士推前撞到另一部私家車，造成三車相撞，的士車頭嚴重損毀，其後法院裁定羅鈞滿不小心駕駛罪表證成立。事隔兩年，喺舊年3月，羅鈞滿於太子道東駕駛私家車時，遇到警方路障，被揭體內酒精含量超標逾3倍，其後羅鈞滿被判100小時社會服務令、停牌兩年及上駕駛改進課程。雖然佢喺事後於微博貼圖認錯，但無綫高層樂易玲已坦言感失望。另外，佢喺前年2月，瞞住當時女友張文采到韓國密會空姐Sylvia時，因醉酒鬧事，公然調戲江湖大佬女友，遭索償兼要道歉，羅鈞滿致電回港求救，但因籌不足款項，結果事件鬧上警局，佢仲被扣留，禁止出境兩個月，最後要由無綫高層余詠珊派律師營救。
來源:
http://hk.apple.nextmedia.com/entertainment/art/20170113/19895744