【馮仁昭四圍超】八杯水保靚樣61歲發哥跑山喼弗
1 :
GS(14)@2016-07-09 06:36:02■發哥而家逢一、三、五跑山，二、四、六就做肌肉訓練。
今年61歲嘅周潤發越來越fit，有乜嘢秘訣？原來佢近年愛上跑山，人哋就喺平地跑步，但佢就走去郊外跑山，而且仲跑到上癮，每日唔跑番半粒鐘會周身唔舒服，發哥話：「跑嘅時候有個胺多酚走咗出嚟，我入面隻鬼到時到候就叫你，如果唔去周身唔舒服，跑完個人好開心。」原本體重185磅嘅發哥，自從開始做運動就瘦咗好多，最瘦時只得148磅。
■跑山跑上癮嘅發哥，曾喺山上遇到劉嘉玲。資料圖片
■發哥話原本體重有185磅，開始做運動後曾減到148磅。
唔食補品
問發哥會唔會同發嫂一齊跑步？佢抵死咁笑話：「我唔同得佢跑，佢跑得好快，佢爭啲貴利數多嘛，佢要跑山呀！你知我就好少借錢啦，我就冇乜爭貴利數，所以好悠悠閒閒咁跑。佢就大鑊喇，借落好多通街數，一走起嚟最快嗰個劉易斯都追佢唔到。」呢個發哥噏得就噏，坐喺身邊嘅發嫂聽到都冇佢咁好氣。既然發哥個body就靠做運動keep，咁個靚仔樣又點keep先？佢話：「我乜嘢都唔食，又唔食補品，我淨係飲水，八杯水就最基本。除咗一、三、五去跑山做呢啲帶氧運動之外，二、四、六我就去做肌肉訓練，每日呢啲就係補品嚟，呢啲有時補到你標鼻血喇！」撰文：馮仁昭
來源:
http://hk.apple.nextmedia.com/entertainment/art/20160707/19684084
【馮仁昭四圍超】拉頭馬買錯場次 李施嬅：好低B
1 :
GS(14)@2016-07-09 06:47:32■李施嬅前晚喺快活谷煞科戰買中頭馬，可惜大頭蝦買錯場次。
前晚係馬季快活谷煞科戰，唔少人會把握機會博一博，李施嬅着到靚一靚咁去捧場，為馬主好友馬浚豪出賽馬「順勢寶」打氣，果然「順勢寶」跑第一，一心諗住落場拉頭馬嘅李施嬅，攞住張買「順勢寶」嘅馬飛影相留念，仲騷俾現場嘅記者睇，點知大家望真啲，佢買嗰張馬飛，係買8號，但係唔係「順勢寶」跑嗰場，佢買咗第8場，係早咗一場，呢啲咪叫空歡喜囉。
買錯場次
■有份落場拉頭馬嘅李施嬅（左二），大讚馬馬好叻仔。
倒輸80蚊
落注買錯馬嘅李施嬅，原本用80蚊買「順勢寶」win，買中第9場，扣埋本淨贏748蚊，但係而家落錯場次，要倒輸80蚊，冇咗828元呀！噚日馮仁昭打電話畀李施嬅，佢以短訊回覆話：「我平時唔賭錢，所以落注嗰陣咪大頭蝦囉！」事後佢亦喺微博話：「第二次入馬場撐好友的馬，順勢寶！買牠獨贏，但好低B，大頭蝦買錯場次！結果攞唔到$800彩金。我真是不懂買馬，不過很開心，馬馬好叻仔。讓我可以第一次拉頭馬。So lucky！」撰文：馮仁昭
來源:
http://hk.apple.nextmedia.com/entertainment/art/20160708/19685662
Next Page