📖 ZKIZ Archives

【馮仁昭四圍超】蕭定一四車相撞幸冇傷

1 : GS(14)@2016-07-09 06:47:42

蕭定一噚日下午2點幾坐保母車，途經天后十字路口位置，發生四車連環相撞，佢後來喺facebook貼撞車相報平安：「第一次在車內感受四車連環相撞。」


蕭定一


阿一噚日講述撞車時情況：「前面因為綠燈急停，我架車跟住佢係停得切，冇撞埋去，但後面第三架同第四架車就撞埋嚟，一架推一架，變成四車連環相撞。」阿一話當時跌咗落地，好彩係冇受傷。撰文：馮仁昭





來源: http://hk.apple.nextmedia.com/entertainment/art/20160708/19685676
PermaLink: https://articles.zkiz.com/?id=303044

【馮仁昭四圍超】泳兒畏高怕玩跳樓機

1 : GS(14)@2016-07-09 06:47:42

泳兒噚日到新城做訪問，講到月底將推出嘅新歌《我的情書》，係紀念自己入行10周年作品，佢話：「首歌係講勇氣，所以而家都同公司度緊挑戰啲平時唔敢做嘅事。」佢透露自己有畏高：「我係怕高到行樓梯都好驚，去到高嘅地方望出去會腳軟。同事叫我玩跳樓機，但我驚負荷唔到，因為見到新聞話有人玩完跳樓機後休克而死。」撰文：馮仁昭





來源: http://hk.apple.nextmedia.com/entertainment/art/20160708/19685680
PermaLink: https://articles.zkiz.com/?id=303045

【馮仁昭四圍超】蔡卓妍外婆離世

1 : GS(14)@2016-07-09 06:47:43

蔡卓妍（阿Sa）前日喺ig上載一張影着窗外雨水的黑白照，留言說要臨時改機票趕回家，希望外婆能度過難關。不過，噚日下晝兩點，阿Sa更新ig上載一張她與拍檔兼老友鍾欣潼（左）和婆婆的舊合照，然後留言：「婆婆你在天上和公公團聚了嗎？希望你現在可以沒有痛苦沒有牽掛，我會一直想念你，永遠愛你。」唔少粉絲都留言慰問阿Sa。撰文：馮仁昭





來源: http://hk.apple.nextmedia.com/entertainment/art/20160708/19685674
PermaLink: https://articles.zkiz.com/?id=303046

【馮仁昭四圍超】坤哥關心吳若希驚誤會

1 : GS(14)@2016-07-09 06:47:42

吳業坤同阮小儀噚日喺銅鑼灣出席配音電影活動，坤哥將會喺紅館舉行處男個唱，佢話：「大家對我rundown有好多揣測，保持神秘先。有好多人哋嘅歌想唱，最難係唱男前輩嘅歌，因為大家本身對歌有印象，希望大家會覺得值回票價。」吳若希喺fb對司徒夾帶有關娛圈潛規則對號入座爆粗，坤哥話：「等我關心下佢先，但佢有男朋友怕誤會喎，等我見面先問佢。」撰文：馮仁昭





來源: http://hk.apple.nextmedia.com/entertainment/art/20160708/19685668
PermaLink: https://articles.zkiz.com/?id=303047

【馮仁昭四圍超】小嶋陽菜明晚現身尖嘴

1 : GS(14)@2016-07-09 06:47:43

日本組合AKB48嘅28歲成員小嶋陽菜自從宣佈退團後，馬不停蹄鋪路單飛，唔止踩入商界推出個人婚紗系列，聽日更會重臨香港出席《櫻桃小丸子》嘅30周年活動。佢會搭JL29班機預計下晝1點半抵埗，大會話已安排小丸子去機場獻花，而花輪同學更會揸開篷跑車迎接女神！陽菜夜晚8點半到尖沙嘴The ONE出席完盛會後，就立即返日本，認真頻撲。撰文：馮仁昭





來源: http://hk.apple.nextmedia.com/entertainment/art/20160708/19685684
PermaLink: https://articles.zkiz.com/?id=303048

【馮仁昭四圍超】胡定欣搵姊妹出招催婚

1 : GS(14)@2016-07-09 06:47:43

胡定欣曾經許願希望35歲前嫁得出，今年34歲嘅佢有個46歲音樂人男友Terry（陳明道），至今仍未有結婚打算，噚日有報道指胡定欣以前同沈栢淳一齊嗰時極速同居兼見家長，仲試過催婚，但最終失敗，眼見deadline越嚟越近，胡定欣繼續出招，話佢帶男友出席胡說八道聚會，姊妹帶埋老公晒恩愛，希望可以激發男友成家之心。撰文：馮仁昭





來源: http://hk.apple.nextmedia.com/entertainment/art/20160708/19685688
PermaLink: https://articles.zkiz.com/?id=303049

【馮仁昭四圍超】利嘉兒送禮　掃十幾部芭蕉扇

1 : GS(14)@2016-07-09 07:02:11

■利嘉兒染咗一頭藍髮，前日單拖去買嘢。








曾經同港台DJ周國豐結婚，隨後改嫁做製衣及門鎖生意富商嘅利嘉兒（Lily），近年再度活躍社交圈，喺數碼電台開咪做DJ。Lily生活優閒，5月時同老公去咗日本輕井澤慶祝結婚6周年。前日約5點幾，Lily身穿白tee爛牛，獨自現身跑馬地，見佢染咗一頭藍髮，緊貼韓風look，首先去咗提款機撳錢，然後走入一間雜貨店，原來佢去買俗稱芭蕉扇嘅手提電風扇。


■入咗雜貨店後，利嘉兒一口氣掃咗十幾把芭蕉扇。

清舖頭存貨

天氣熱，買芭蕉扇消暑都好合理，不過Lily一吓掃咗十幾部，當中有唔同顏色，莫非係用嚟襯衫？Lily仲要勞煩老闆娘入倉幫佢搵夠數量，實行掃清成間舖嘅存貨，之後就獨自行到英皇駿景攞車離開。馮仁昭昨日致電Lily，佢笑住話：「梗係唔係襯衫啦！今朝一早就收到好多朋友短信，講笑咁問我仲有冇風扇多，其實啲風扇係送畀小朋友嘅，因為身邊有啲朋友成日會去探一啲低收入家庭，都想要啲物資送畀佢哋，而家天氣咁熱，所以我就買啲風扇送畀佢哋啫！」撰文：馮仁昭





來源: http://hk.apple.nextmedia.com/entertainment/art/20160709/19687282
PermaLink: https://articles.zkiz.com/?id=303134

【馮仁昭四圍超】米雪想再拍打鬥戲

1 : GS(14)@2016-07-09 07:09:53

米雪、梁小龍、顧冠忠同白彪，噚日喺尖沙嘴出席活動，佢哋之後會一齊返內地做嘢，以前佢哋喺亞視曾經一齊拍古裝武俠片，米記提議同小龍再拍打鬥戲，小龍話：「好多題材都可以拍，最近我喺內地傾緊一個劇本，同啲僆仔後生對戲，講兩代感情。」問小龍會唔會拍大台，佢好謙咁話唔會拒絕，但係今年好忙，已經推咗8套戲。撰文：馮仁昭





來源: http://hk.apple.nextmedia.com/entertainment/art/20160709/19687284
PermaLink: https://articles.zkiz.com/?id=303152

【馮仁昭四圍超】黃婉曼鬆身裙惹誤會

1 : GS(14)@2016-07-09 07:09:53

黃婉曼（圖）、JW、吳國敬、羅傑承伉儷噚晚喺中環出席餐廳周年活動，着住鬆身裙到場嘅黃婉曼，遠睇似有咗，當大家想講恭喜佢，佢話：「冇呀，我呢排開始食齋仲瘦咗㖭。」佢話結婚兩年，而家對生小朋友抱順其自然心態，而且嚟緊書展會出講愛情嘅書，到時都要忙住宣傳。JW講到黎明新女JC個樣俾網民圍插：「我初時都俾人話肥，咁咪做運動減肥囉。」撰文：馮仁昭





來源: http://hk.apple.nextmedia.com/entertainment/art/20160709/19687286
PermaLink: https://articles.zkiz.com/?id=303153

【馮仁昭四圍超】無綫35.6℃拍古裝　6演員慘中暑

1 : GS(14)@2016-07-12 03:19:30

■陳凱琳前日高溫下同大班演員着住古裝開工，結果趙永洪、李嘉同四位臨時演員齊齊中暑。








前日香港天文台錄得巿區35.6℃最高溫，係48年嚟最高溫嘅7月份單日紀錄，行落街都覺得辛苦，更何況着住古裝拍外景。嗰朝早陳凱琳孭飛嘅無綫古裝劇《翻生武林》喺將軍澳電視廣播城古裝街開工，就有6個演員熱到中暑，包括趙永洪、李嘉同埋4位臨時演員。


■李嘉前日喺fb貼咗張瞓低嘅相，話自己中暑。

臨記暈倒抽筋


陳凱琳、黃智賢、李嘉、趙永洪等前日朝喺古裝街拍嘢，聽講拍到上晝11點幾，一個臨時演員突然暈低，跟住抽筋，之後3個臨時演員同趙永洪同埋李嘉亦相繼中暑，後來李嘉同趙永洪坐埋一邊飲水休息，總算冇乜嘢大礙繼續開工，但嗰4位臨時演員就要call白車送咗去醫院。游莨維前日喺fb上載成班演員開工嘅相。至於李嘉亦喺fb貼咗自己瞓低嘅相話：「人生第一次中暑！」噚日馮仁昭打畀趙永洪，佢話：「我係接近啫，有小小症狀，未試過熱得咁交關。」係咪有4個臨時演員中暑要call白車？佢就話：「好似有一個上咗去。其實企喺度都大鑊！」





來源: http://hk.apple.nextmedia.com/entertainment/art/20160711/19689283
PermaLink: https://articles.zkiz.com/?id=303276
Next Page
ZKIZ Archives @ 2019