諗sir你好!
小弟剛踏入社會,為全職音樂老師,在家中教樂器。
為方便學生,正打算換樓。
父母仍在工作,家庭月入七萬,現居未補地價公屋,市值二百萬。
煩惱是應賣出此屋作套現還是租出單位(每月一萬)?
家人亦看準快要賣樓花之嵐山,請問現在購買新樓後被加息的風險大嗎?
答案
首先,將未補地價既公屋出租是犯規的。唔知要唔要坐監、不過有排煩就肯定。讀者剛踏入社會用教樂器做職業、實在不是一個好開始。明白教學器時間自由、時薪更可能比打工高,惟私人教授作業令人不懂在港辦公室打工之潛規則、亦少了機會和同事在會議桌上火併。聽落是好、惟年青人未多在工作中涉取些教訓、趁後生經歷些銘心的教訓,他日將結果同時點算、仍然是輸的!
昨日聽見客戶要將60萬轉比佢個女去開韓國化粧品店鋪、如有不從另一個選擇就係比錢佢去外國讀碩士,聽落令筆者覺得自身前景黯然、看來香港未來真係一個住唔到人既地方、怪不得移民風又再興起。好多媒體報導是外來人逼走本地人、其實本地人唔爭氣亦正令城市的質素轉差。希望大家努力一點,選擇留下來的不求貢獻、最起碼做好修身齊家、而治國之事可交予他人過問。中國人對儒家思想的尊重、就是希望人家在無法可規的情況下、多一點自律。
那講回讀者、教學器令自己零借貸力、自己要做的是幾件事:
1.去鋪頭要求教樂器有糧單報稅,解決零借貸力一事
2.未補地價公屋係近乎冇可能加按、居屋一樣。而將其補地價再加按、又係另一件愚蠢之事
3.讀者諗住方便樂器學生而想換自住樓、諗清楚此是一個理由? 筆者不少演奏級朋友既高手、自己造琴的、好少再教琴的、都選擇在名校區附近租商廈開鋪
4.無論買新樓、舊樓、如果銀行上調息口,供款人都要增加供款
5.如果問題係日後加息風險大家細? 其實加息對樓市係好事就真。你睇下97年幾高息! 當然筆者意思是如果加息、好事定壤事未能此刻定論。請不要一手定性為壤事。
6.小心不少新樓頭兩年可免供、可是日後還是要供的,二按息口更有可能一下子提高至6%
那讀者現時可想想除了教樂器外有什麼想作的行業、不妨早上返工下午教樂器。有人會覺得好辛苦? 只怕人到40時想辛苦都無力去做。此舉是為了避免他日讀者唔再執教既時候、30歲人的履歷只有「教樂器」一件事。如果讀者對音樂十分有熱誠、那比心機將學生人數倍增,將教授發展成養家的事業吧。請留意唔好叫父母幫忙生意、恐怕萬一失敗會將全家人陷入泥沼。至於父母的七萬月入、借貸力為70000/10000*2.59*50% = 9.06mil。當然要父母擔保仔女買樓是有可能做到的、亦是現時經紀開單的一大招數。但請各父母留意、他日仔女供唔掂、同開韓國鋪頭的原理一樣:「你攪出黎既事、請你幫我攪返掂佢!」留意此例子同本讀者無關、只是筆者有感中年窮中產受工作、仔女夾擊、做人真痛苦呢!