樂香園：騎呢民企混亂實錄
1 :
GS(14)@2012-09-21 00:11:16http://hk.apple.nextmedia.com/financeestate/art/20120920/18020351
內地不少民企管理混亂，呢個問題如要一一列舉，相信寫十日都寫唔完。以其中一間近年業績衰到貼地嘅民企為例，某公司老闆「失蹤」咗兩年，完全唔理業務，令管理層唔敢在營運上作出果斷決定，導致生意一落千丈，最後只識拎錢去搞埋啲不務正業嘅投資。
你以為老闆有咩難言之隱所以要淡出？非也。市傳老闆係不愛江山愛美人，兩年前戀上咗某女星，即買埋私人飛機同美人遊山玩水，至舊年中終於同老婆搞到離婚，最近先再婚，乜都搞掂曬，依家咪復出囉！投資界朋友仔同海迪講起呢個故仔時，都忍唔住咬牙切齒，私奔嘅代價就係間公司無咗幾廿億市值！你自己死唔緊要，累到人呀嘛！
另一從事體育用品公司，管理混亂亦係出曬名。業界人士形容呢間企業係退休運動員嘅天堂，冗員無數，所以當行業出現問題，呢間公司完全無辦法壯士斷臂，直到近年要搵外援出手，先拆得掂個局。
呢啲事雖已過去，但投資者對呢啲不負責任嘅行為會記喺心裡，專業啲講叫「Management Discount」。呢一轉民企風暴後縱使可雨過天晴，市場願意給予呢啲股份嘅估值（PE），相信已不復從前。
海迪