淨可變現資產值已佔股價70%- Walker Shop(1386)
http://www.hkexnews.hk/listedco/ ... TN20080711065_C.pdf公司上年以高估值上市，拿了大量現金還債(現無債項)及炒股票，現每股淨可變現資產值有四億六七千萬上下(股票+現金-特許經營權-融資租貸-應付稅 項)，以現時股數622,500,000股計算，折合每股七毛多，佔股價0.90元的八成，扣除此項後，殼價不過數千萬，現價尚算合理。
但公司創辦人剛逝世，近排又見割價促銷，可見盈利下一年肯定會跌，保守預計下年盈利約三千萬(今年扣除財務收入的盈利的一半)，扣除現金後下年P/E約六倍多，在零售股中也算超值。
股價若繼續下跌，建議於現金值上下85-100%(即每股六毛至七毛)開始購入。我建議公司應該開始回購部分股票，以提升公司的價值。
稍後若有機會說說公司歷史。
Money Walker：背靠祖國受累代價
1 :
GS(14)@2016-02-02 15:56:19喺沉重嘅走資壓力之下，中國為免再消耗更多外儲，唔經唔覺做咗好多措施去防範資本外流，好似係加強資金出境審核、暫停外資銀行部份業務、凍結對外投資額度等。行到資本管制呢一步，哪怕程度幾咁輕微，都已經反映中國對於遏止走資冇乜計策。
資本管制妨礙投資
輕微嘅資本管制手段，暫未動搖市場對中國嘅信心，但難保中國喺無計可施之下，會進一步加大資本管制力度，再度觸發環球對於中國嘅恐慌情緒。縱觀國際經驗，資本管制一出就要維持好長時間先可以收返，因為一取消就隨時會再度觸發大舉走資。問題係長期嘅資本管制只會妨礙人民幣國際化，甚至會令外國公司對投資中國卻步。大陸資本管制阻住人民幣唔國際化之餘，亦會令外資俾大陸嚇親，成日話要背靠祖國嘅香港，又要做人民幣離岸中心，又要做外資進入中國嘅橋樑，想唔受累都幾難。就算唔講咁長遠，現時大陸做緊嘅資本管制措施，都會阻礙資金由大陸流入香港，間接不利本港嘅投資同消費。唔單止咁，為咗唔想資本流出，大陸甚至可能會選擇推遲深港通開通。不過上述通通都係事小，香港接下來點樣應付一班國際炒家狙擊先係問題，中港關係密切，就算炒家唔開聲，嚟緊港股同港會頻頻波動都係意料中事。幸好，根據聯儲局最近一次議息會議所發放嘅聲明指出，美國對於進一步加息嘅取態已經有所軟化，否則港股同港滙又有多個原因被質低。
El.本欄逢周二、五刊出
來源:
http://hk.apple.nextmedia.com/financeestate/art/20160202/19475329
Money Walker：環球經濟復元無期？
1 :
GS(14)@2016-02-08 02:56:33日本上周突然宣佈負利率，大行野村認為此舉反映日本相當絕望。日本之所以要行負利率，野村話係因為量寬已無法刺激通脹，事關多數消費者同私人企業根本冇興趣借錢，令央行放嘅水無法流入實體經濟。點解冇人有興趣借錢？因為個人同企業經歷過泡沫經濟時代後，對借錢呢樣嘢有創傷後遺症。另外，仲未還晒舊債，亦係唔再借新錢嘅原因之一。既然放水無助經濟係同息口高低無關，咁即係無論央行點減息放水，理論上對於刺激經濟嘅作用都係有限。
講到呢度，筆者諗起著名對沖基金Bridgewater Associates創辦人Ray Dalio嘅理論。
Dalio提出，債務周期可維持50至70年之久，一個周期內可分為上升浪同下跌浪。出現下跌浪通常都係因為企業、家庭同金融機構嘅收入不足以還債，造成債務去槓桿化所致。而且靠減息唔可以為信貸周期下跌浪劃上句號，央行嘅寬鬆幣策只能產生短暫效果，無法幫到經濟真正復蘇。如果Dalio呢個講法正確，各國央行最近幾年勁放水，經濟都唔見顯著好轉，正正係因為環球現時處於債務周期下跌浪。而呢波由2008年金融海嘯之後展開嘅下跌浪要歷時數十年。只有經歷過債務泡沫爆破，唔再熱衷借錢嘅舊一代人老去，新一代人終於肯借錢消費投資，整個去槓桿化嘅過程先會完成，環球先會真正復元。
El.本欄逢周二、五刊出
來源:
http://hk.apple.nextmedia.com/financeestate/art/20160205/19479924
Money Walker：有關500呎的問號
1 :
GS(14)@2016-03-01 18:51:09曹仁超講過「年輕人，唔好俾500呎綁住青春」。炒股嘅人一直唔傾向買樓，因為覺得透過炒股投資將資本增值，會較買樓更有效地累積財富。不過家陣嘅年輕一輩，其實就算唔炒股都未必熱衷買樓，因為覺得死慳死抵供樓唔值得。曹Sir過身後，面書上最多年輕人畀like嘅曹Sir金句，正正就係「年輕人，唔好俾500呎綁住青春」呢句說話，可見年輕人一早已經無意跟從上一代嘅價值觀。有朋友亦覺得新一代諗法開始有變，唔再覺得買樓係人生必須做嘅事，有錢寧可去旅行見識世界，加上學歷通脹，人人中學畢業之後都會繼續讀大專或大學，搞到一畢業成身學費債，更加冇條件冇意慾買樓。由於冇計劃買樓，唔少年輕人婚後亦可能會選擇同家人同住，朋友話上述情況或會妨礙樓市長期需求。唔單止咁，筆者身邊一啲有意結婚嘅年輕朋友，亦因擔心地契問題而對上車卻步。本港唔少物業嘅地契2047年就到期，加上到時香港「五十年不變」嘅承諾亦會灰飛煙滅，朋友擔心用盡畢生時間同積蓄供返來嘅樓，到老來未必會有保障。筆者自己就覺得除咗上述原因之外，未來亦可能有其他原因令年輕人對買樓卻步。內地發展商自2011年起積極湧港競投住宅用地，大行星展唯高達分析認為，有關現象除咗係因為內地發展商要分散業務地域，亦出自內地發展商對沖人民幣貶值嘅需要。筆者唔肯定內地同本港發展商起嘅樓，比較起上來質素會唔會有好大差異，但長久以來邊啲發展商嘅樓質素好啲，邊啲差啲，大家一直心中有數，當內地發展在港嘅項目陸續落成並推售之後，呢個品牌效應相信只會更加明顯。到時香港發展商嘅樓盤會唔會被認為質素較佳，因而比起內地發展商更為搶手呢？上述問題有待專家來解答，筆者想講嘅係，影響樓市嘅因素唔止得樓價高低一個。隨住年輕一代諗法有變，同埋內地發展商大舉進軍本港樓市，長遠而言，本港樓市嘅實際需求仲係咪好似大家諗得咁強勁，值得反思。
El.本欄逢周二、五刊出
來源:
http://hk.apple.nextmedia.com/financeestate/art/20160301/19510881
Money Walker：英國脫歐或關你事
1 :
GS(14)@2016-03-11 12:57:42英國會喺6月23日，就係咪會脫離歐盟舉行公投，呢件事對香港人嚟講好似好離地，雖然香港係英國前殖民地，但兩哋家陣嘅經濟往來其實唔算重。不過如果你係滙控（005）、電能（006）同長建（1038）嘅股東，英國脫歐就絕對關你事。根據法巴嘅講法，無論公投結果係點，單單係公投落實舉行，都已經會有壞影響，因為公投增加咗英國嘅不確定性，繼而會損害到當地嘅消費同投資信心，亦都不利英國嘅外國直接投資。如果英國最終真係脫歐，影響就更大，因為英鎊會首當其衝下跌，當地GDP亦都難免會受累。講到喺英國有業務嘅本港上市公司，滙控一定榜上有名，事關英國同愛爾蘭，夾埋佔滙控收入28.19%，不過都唔夠電能多，電能喺兩國嘅收入合計佔公司收入49.52%。唔止喺英國做生意嘅企業，就連喺歐洲有業務嘅企業亦受牽連，因為脫歐會觸發英鎊滙價下跌，繼而間接削弱非英國企業喺歐洲嘅競爭力。新秀麗（1910）同歐舒丹（973）喺英國以外歐洲地區嘅收入，分別有19.08%同17.53%，佔比唔輕，所以英國脫歐多少都會對佢哋有影響。究竟英國脫歐機會大唔大呢？我用賠率答你。英國博彩公司Ladbroke就英國脫歐開賭盤，買英國留喺歐盟嘅賠率係1.33倍，買英國脫歐嘅賠率就係3.25倍。雖然暫時英國脫歐嘅機會睇落唔算大，但距離公投仲有三個幾月咁多，中間可以存在好多變數，揸住有英國同歐盟業務股份嘅散戶，唔能夠掉以輕心。
El.本欄逢周二、五刊出
來源:
http://hk.apple.nextmedia.com/financeestate/art/20160311/19524602
Money Walker：爆煲只係遲早問題
1 :
GS(14)@2016-03-15 14:50:54環球商品同股市最近兩個月齊齊於谷底翻生，筆者覺得唔會係長久之勢，但亦認為未必係曇花一現。內地樓市回暖，連同國際油價因憧憬油組減產而回暖，環球風險資產價格齊齊由谷底反彈，唔少人都質疑情況可以持續幾耐。撇開油價問題唔講，集中睇中國因素，內地樓市呢排出現小陽春，係大家對中國經濟由悲觀轉為樂觀嘅原因之一。話說喺內地「首付貸」大行其道下，大陸民眾買樓連首期都唔使儲，因為可以直接借。結果係內地一線城市樓市因而進入瘋狂狀態，觸發中央對於泡沫湧現嘅憂慮，並出手調控。如果大家有留意開內地經濟新聞，就會發覺上述過程似曾相識，喺內地股市同債市都已經出現過。筆者唔敢講內房會走上A股去年先升後爆嘅舊路，但就可以好肯定咁講，大陸已重返由樓市推動經濟嘅舊路。當內地樓市好轉，鋼鐵、水泥等商品自然會跟埋回春，帶動環球商品市場好轉。所以只要大陸唔介意繼續行返以往推動經濟嘅舊路、唔怕樓市泡沫形成，亦唔理會產能過剩，再加上冇其他外圍負面因素殺出，環球經濟同股市呢輪反彈就可以持續。筆者傾向相信中央為維持經濟，會放鬆經濟改革步伐，喺一定程度上對上述問題隻眼開隻眼閉，唔會重手調控樓市，所以內地經濟短期內唔會太差。基於上述原因，如果單純只睇中國基本因素，呢輪環球風險資產價格嘅反彈未必太快玩完，而實際會維持幾耐，就要視乎中央之後會唔會亂出政策調控股市、滙市同樓市。當然長遠而言，中國呢種依賴建設推動經濟發展嘅模式根本冇可能持續。即使係一線城市嘅樓市，亦都唔會一直只升不跌，而產能過剩所造成嘅殭屍企業同壞賬問題，最終難免亦會導致內銀資產質素嚴重惡化，引發危機。大陸好努力發明眾多招數，化解企業壞賬呢個炸彈。不過債轉股、打包不良貸款出售畀海外投資者呢啲招數，頂多只能拖延壞賬問題，冇可能將問題完完全全咁撇除，事關唔會有太多投資者願意長期落叠。中國累積嘅高槓桿問題遲早都要爆，一切只係時間問題。
El.本欄逢周二、五刊出
來源:
http://hk.apple.nextmedia.com/financeestate/art/20160315/19529316
Money Walker：賭徒都有政治智慧
1 :
GS(14)@2016-03-18 23:52:08今年有兩件國際政治大事——美國11月嘅總統大選同埋英國6月就脫離歐盟舉行公投，兩件事睇落都同我哋好遙遠，但其實多少都會影響到環球市場情緒，甚至乎係個別股份，唔可以唔留意。美國大選方面，市場擔心特朗普當選會不利中國經濟，因為佢喺政治同經濟上對中國嘅取態相當強硬，一旦入主白宮，對中國肯定弊多於利。至於英國，如果公投結果係「脫歐」，滙控（005）同長建（1038）呢啲喺英國有業務嘅本港上市公司，股價將難免受累。
要分析呢啲國際大事，筆者發覺除咗參考專家睇法，博彩公司所提供嘅賠率亦都好有啟示。英國博彩公司Ladbrokes不時會就呢類國際大事開出賭盤，上佢嘅網站就可以睇到賠率，而賠率高低直接反映唔同結果發生嘅機會率。好似美國大選，根據Ladbrokes嘅賭盤，買希拉莉贏嘅賠率係1.44倍，買特朗普贏嘅賠率就有3.5倍，即係話多數人都賭氣勢如虹嘅特朗普，始終不敵政壇老手希拉莉。又例如英國「脫歐」公投，買「留歐」嘅賠率係1.36倍，買「脫歐」就賠3倍。換言之，多數賭徒都相信英國「脫歐」只係虛驚一場。筆者唔係鼓吹賭博，賭盤賠率反映嘅結果唔一定準確，只係視呢啲賭徒智慧作民調以外嘅參考。其實除賭盤賠率之外，筆者亦都不時會去芝加哥商交所網站，睇利率期貨市場對聯儲局加息嘅預期機會率，因為某程度上利率期貨市場就係一個賭場，而呢班有如職業賭徒嘅交易員，睇法好多時都準過經濟師。
El.本欄逢周二、五刊出
來源:
http://hk.apple.nextmedia.com/financeestate/art/20160318/19534188
Money Walker：領展建華亂局
1 :
GS(14)@2016-04-01 15:43:17領展（823）呢期頻頻見報，事關佢引入外判商建華集團，而呢間建華唔單止接手管理領展旗下街市咁簡單，仲拒絕同現有租戶續約，兼且引入多間由集團自己經營嘅商鋪，一條龍做晒街市霸主。其實領展又點止外判呢招咁簡單，喺玩外判之前，領展已經將部份手持嘅商場賣畀私人投資者，而呢啲私人投資者買入商場後，當然又係對小商戶加租、甚至拒絕續租。撇開道德同民生問題唔講，領展咁醒目，公司前景係咪一片光明呢？瑞銀就話，領展係該行其中一隻最唔睇好嘅收租股，原因係盈利未來幾年存在下行風險。瑞銀解釋，雖然領展嘅租戶組合較同業強勁，但相信仍會受到本港失業率上升同樓價下跌所影響。該行話過往數據顯示，港人喺食品上嘅開支，同就業市場相關度極高，而領展嘅租戶主要正正係食品相關行業。隨住本港就業職位被削減，尤其是零售同旅遊業嘅職位數目減少，食品開支自然會縮減，領展業務當然難免受累。雖然領展已經開始轉型，收購內地辦公室物業，但瑞銀指收購舉動，反而會令到領展嘅槓桿水平同償債覆蓋率上升，倘若領展嘅營運現金流惡化，瑞銀相信領展將會被降級。筆者依稀記得，讀書時聽經濟學教授講過，雖然資本主義提倡由市場力量主導一切，但政府亦須扮演確保競爭環境公平嘅角色。不過理論歸理論，現實還現實，現實就係香港唔鼓勵創業，亦唔鼓勵自力更新。至於領展負面新聞多多會唔會拖累股價，坦白講筆者唔識計，只知每隻股票增長都有盡頭，領展亦唔例外。
El.本欄逢周二、五刊出
來源:
http://hk.apple.nextmedia.com/financeestate/art/20160401/19552730
Money Walker：股市明燈升到嘭嘭聲
1 :
GS(14)@2016-04-12 17:44:54日YEN呢排升到「嘭嘭聲」，明顯係環球市況轉差嘅預警。日YEN自1月29日，亦即日本央行宣佈推負利率當日就開始勁飆，升咗兩個星期左右就轉為橫行整固格局，但到咗3月28日又升過，直至家陣。1月29日嗰輪抽升可以歸咎為市場覺得日本央行已經技窮，寬鬆措施到咗極限，但3月28日至今嘅一輪升勢，就明顯唔關日本自己事。除咗美國加息預期降溫造就日圓兌美元回勇之外，市場避險情緒上升亦推動資金流入日YEN避險。事實上，環球多個股市都不約而同喺3月底開始回軟，意味避險情緒最近個兩星期有所升溫。筆者相信日YEN已進入大牛市，而根據過往幾年嘅經驗，喺日YEN下跌期間，環球股市多數上升，反之亦然，所以大家要有定心理準備，未來幾年資產市場嘅大勢會係環球股市表現麻麻。短線啲，環球股市呢輪risk on行咗兩個月，作為熊市二期嘅反彈，仲會risk on多幾耐好難講，大家亦係時候考慮逐步減低風險持倉，甚至喺市場仲未相信日YEN進入大升軌前，買定日YEN博佢進一步上升。要準確time the market從來不可能，但只要不時留意啲關鍵資產嘅價格走勢，就肯定唔會係最後一個知道市場轉咗風向嘅人。要睇risk off程度，就要睇作為避險資產嘅日YEN，至於睇risk on程度，就一定要睇MSCI新興市場指數，一來因為港股被國際機構投資者視為係新興市場，二來係當連新興市場都炒起埋，環球市場多數都唔會太差。
El.本欄逢周二、五刊出
來源:
http://hk.apple.nextmedia.com/financeestate/art/20160412/19567010
Money Walker：失業率現上升先兆
1 :
GS(14)@2016-04-15 16:27:20近期頻頻有大行唱淡香港經濟，兼警告失業率會攀升。目前本港經季調嘅失業率係3.3%，大行野村指失業率今年會微升至3.6%，明年更會上升至4.3%，另一大行瑞銀就估失業率明年會升到4.5%。
就業市場滯後於經濟
本港經季調後失業率，自2014年5月至今一直維持喺3.2%至3.3%嘅水平，非常穩定，並未進入下滑勢頭。但翻查以往失業率數據，失業率喺一段長時間維持穩定狀態後，往往都會醞釀轉勢，可以係轉升，亦可能係轉跌。而睇番今時今日嘅經濟格局，失業率維持穩定近兩年後，斷估轉升嘅機會點都大過轉跌。事實上，呢幾個月有唔少大型連鎖店分店關門，小店因為貴租而結業嘅新聞又不絕，反映零售業就業市場正在惡化，只係情況仲未嚴重到反映喺整體失業率之上。事關經濟放緩的初期，企業通常都未開始炒人住，所以就業市場往往滯後於經濟情況。根據政府統計處嘅資料，如果細分行業去睇，零售業去年全年就業職位空缺已經減少咗8.7%，住宿及膳食服務，空缺去年更加縮咗13.7%。如果本港整體失業率，明年真係會一如野村所講升到4.3%至4.5%，本港就業市場相信都會幾嚴峻。2010年上半年，本港失業率就正正處於4.3%至4.6%，搵番當年有關就業市場嘅新聞，有報道話15至24歲青少年失業率超過一成，而喺長期失業者入面，40歲或以上嘅人士長期失業情況亦相當嚴重。面對接下來嘅就業市場寒冬，打工仔唯一可以做嘅，相信只有減少消費，積穀防饑。
El.本欄逢周二、五刊出
來源:
http://hk.apple.nextmedia.com/financeestate/art/20160415/19571571
Next Page