Money Walker：跟貴YEN去旅行
1 :
GS(14)@2016-05-08 01:42:20鍾意去旅行嘅讀者，睇住歐元同日圓呢排貴咗應該會幾傷心。其實滙率嘅嘢相當複雜，一隻貨幣短期趨勢可以係跌，但中期趨勢可以係橫行，而長期趨勢又可以係跌，美元就係例子。喺滙率走勢反反覆覆之下，要下下用最抵滙率去旅行，同喺股票最低位入市一樣超高難度，所以大家都唔好太執着自己兌嘅滙率同最抵嗰陣差幾遠，否則只會揼爛心口。由於港元同美元掛鈎，美元走勢會影響到大家揸港紙可以兌到幾多外滙，故美元走勢值得愛外遊嘅讀者深究。技術走勢顯示，美元中期而言已於去年底見頂，亦即港元兌主要外幣都見頂，所以大家都係唔好期望咁快可以重返約6港元兌到100YEN嘅黃金時期。不過由於市場對於儲局加息嘅預期並未完全消退，筆者估計美元需時多一年左右，待今輪加息周期步向尾聲，先會正式轉勢向下。換言之，歐元同日圓雖然會轉強，但未來一年應該唔會升得太厲害，有意喺未來一兩年內去歐洲同日本旅行嘅話，暫時唔需要太擔心滙率問題。講多樣嘢你知，美元一個升跌周期要成15、16年，而美元好大機會已喺去年底見咗呢輪牛市嘅頂，亦即外幣最抵時間或已喺去年出現。而要等下一次外幣最抵時間，就要等到下一波美元牛市見頂之時，亦即15、16年後。更無奈嘅係，美國不斷印銀紙下，美元超長期走勢明顯是一浪低於一浪，所以就算畀你等到203X年嘅下一個美元見頂時間，先再去旅行，外幣滙率都唔會抵得過2015年嘅低位。
El.
http://www.facebook.com/moneywalkerhk/本欄逢周二、五刊出
來源:
http://hk.apple.nextmedia.com/financeestate/art/20160506/19599446
Money Walker：L？邊度L呀？
1 :
GS(14)@2016-05-21 13:38:17權威人士話內地經濟係「L型」，此二字自此成為財經潮語。「L型」係形容經濟急跌後長期橫行，權威人士之話意味內地經濟已進入長期橫行，但筆者不才，睇唔出中國經濟符合「L型」定義。首先，中國經濟唔係突然急速下滑，而係多年來慢慢放緩，與「L型」首部份有所不同。第二，內地GDP增長仍處於放緩，亦與「L型」次部份——即增長長期平緩且停滯不前有別。中央近半年力推寬鬆政策，但多餘流動性通通谷晒去炒商品期貨、內房同企業債，實體經濟未能持續好轉。不過單憑短短半年情況，就斷言經濟行「L型」，亦拎唔出一個呈「L型」走勢嘅指標去證明有關講法，呢啲經濟觀點真係得啖笑。姑勿論中央唱淡經濟背後目的如何，亦撇開內地中長期行乜型態不談，筆者同意內地經濟首季好轉只係曇花一現。作為中國經濟領先指標嘅LME3個月期銅，技術上正營造雙頂，預示銅價將見頂回落。這意味內地銅需求麻麻，亦說明內地次季經濟好極有限。
El.
http://www.facebook.com/moneywalkerhk本欄逢周四刊出
來源:
http://hk.apple.nextmedia.com/financeestate/art/20160519/19617720
Money Walker：其實有乜好驚喎
1 :
GS(14)@2016-06-06 03:00:30美國聯儲局加息魔咒又到，不過筆者唔太擔心呢兩個月加息，因為市場已經差唔多反映晒，最驚嘅其實係唔知儲局加完一次之後會唔會收手。睇番利率期貨市場，年底前加息嘅機會有74%，顯示大部份市場人士早已對下半年加息一次無懸念，既然有關預期已幾乎完全反映，係6月份定7月份加相信都唔會造成太大震盪，最令人憂慮嘅係今年加完一次之後，仲會唔會再加。再睇番利率期貨市場，年底前加息超過一次嘅機會率只有32%，意味大部份人都認為今年唔會加多過一次息。所以如果6月份議息會議，透露出今年餘下時間加息超過一次嘅線索，咁即使6月份唔加息按兵不動，呢次議息都將會對市場帶來極大的震盪。金融市場從來都係炒預期，預期到嘅嘢一般都好快反映咗，所以尚未被市場完全反映嘅負面事件，往往先係最不利資產表現嘅魔鬼。至於一街都有人講嘅風險，聽到識背嘅嘢，到真正發生嗰陣，資產價格好大機會反高潮地係咁意震一下就算。
El.
http://www.facebook.com/moneywalkerhk本欄逢周四刊出
來源:
http://hk.apple.nextmedia.com/financeestate/art/20160602/19637245
Money Walker：冇股好炒嘅煩惱
1 :
GS(14)@2016-07-06 08:09:59話說麥格理早排出咗份報告推股，安踏體育（2020）、舜宇光學（2382）同騰訊（700）都榜上有名。該行預期呢幾間公司未來兩年盈利會有唔錯增長，而且佢地嘅業務一般都集中喺亞洲市場，較不受外部風險影響，所以獲睇高一線。其實上述幾隻股份，連通科通芯城（400）同瑞聲科技（2018），都係近期各方推股名單嘅常客，無他，全因有業績支持，但大行同基金推來推去都係呢幾隻，都咪話唔悶。有市場中人亦大呻，本港有盈利前景嘅股份唔多，市場炒來炒去不出呢堆股份，悶局一場，想分散投資亦選擇欠奉。講真，全球經濟冇乜力水，單純根據基本因素炒股的話，可揀股份一定少之又少，咁唔講基本因素，又可以循邊個方向發掘中長線潛力股？今時今日國策主題不如幾年前咁順手拈來，大家只能從宏觀經濟同估值水平兩方面尋寶。宏觀主題方面，負利率下高息股同REITs已成奇葩，大家關注再炒落去估值會唔會已經過高，咁當然高息股同REITs現估值高低與否，要視乎負利率程度係咪已經觸及央行底線。筆者就認為本地高息股同REITs短期內仲有得去，因為最少美國仲大把空間減息，意味住負利率呢個題材尚未耗盡。從估值着手都係搵股方向之一，價殘股如石油股同本地地產股，冇錯已隨油價同樓價起死回生一段時間，但前者中長期應該仲有得去。原因好簡單，筆者押注呢個加息周期，聯儲局頂多再加多一、兩次息就劃上句號，所以相信息口因素對油價同樓價未來威脅不大，由於市場仲未完全反映哂呢個睇法，石油股同地產股應該未到頂。
El.
http://fb.com/moneywalkerhk本欄逢周三刊出
來源:
http://hk.apple.nextmedia.com/financeestate/art/20160706/19682734
Money Walker：內地另類經濟指標有好轉
1 :
GS(14)@2016-08-17 07:57:01中國經濟近半年似乎回穩，但由於市場成日質疑中國經濟數據嘅真確性，所以筆者唔拎傳統經濟數據講，轉而參考吓啲做數機會較低嘅另類經濟指標。
Liv-ex紅酒100指數，一個代表二手市場上最多人尋找嘅100支佳釀價格變化嘅指數，自去年12月起至今年7月，升幅超過一成。Liv-ex紅酒100指數係追蹤指定紅酒喺全球嘅價格，而中國係全球最大嘅紅酒市場，該指數上升，多少反映內地有錢人開多咗紅酒嘆，所以呢個指數亦係內地富裕階層嘅另類消費信心指標。至於另一個內地另類經濟指標係「箱板紙」價格，「箱板紙」係內地講法，即係我哋叫嘅紙皮。用來製造紙皮箱嘅紙皮，售價之所以值得留意，係因為紙皮價格能夠間接反映零售需求，事關多舖頭定單，先會多工廠訂購紙皮箱裝貨，紙皮價格先至會搶高。行內報告指，內地紙皮售價近期上升，而且售價升幅仲超出成本漲幅，反映紙皮供需面有改善。紙皮箱供需有改善，不外乎係因為供給側改革見效，或內地消費需求好轉，所以用多咗紙皮箱去裝貨。不論紙皮價升係邊個原因，對中國經濟而言都屬正面因素。紅酒指數同內地紙皮價雙雙上升，多少反映內地消費過去幾個月有好轉，而背後原因可能同內房價格回升有關。不過筆者仍然覺得單靠逆回購呢類微放水措施，以及刺激內房價格上升，無法持續推動經濟，阿爺只係走返回頭路，咁做係可以延遲支爆來臨嘅日子，但同時亦係令中國經濟重新捲入惡性循環中。
El.
http://fb.com/moneywalkerhk本欄逢周三刊出
來源:
http://hk.apple.nextmedia.com/financeestate/art/20160817/19738920
Money Walker：遙不可及的3厘息
1 :
GS(14)@2016-09-01 06:10:03聯儲局主席耶倫（Janet Yellen）上周五喺Jackson Hole中央銀行家年會上暗示12月或會加息，但筆者相對更着眼於耶倫當日有關非常規貨幣措施嘅言論，佢提及如果美國再現衰退，除減息外或再推QE。市場早已不排除QE會再喺美國出場，所以耶倫今次論調唔算新鮮，但有關言論亦反映一點，就係耶倫唔會因為怕將來衰退時冇空間減息，就把握現時經濟不俗嘅黃金時間急住加息，因為即使將來冇buffer減息，亦可透過QE刺激經濟。換言之，儲局已經少咗個誘因加息，而美息喺呢個加息周期，見頂水平亦應該會低於以往。金融海嘯前4厘先叫正常息率水平，但儲局官員大多預期，呢輪加息周期利率會喺3厘見頂。筆者就質疑最終可能連3厘都冇，因過往經驗顯示，儲局官員嘅預測利率水平往往較實際樂觀。簡單加減乘除，現時美國息口只得0.25厘至0.5厘，以每次加息0.25厘步伐計，起碼要加夠十次先到3厘，即使以每口加半厘計亦要加夠5次。美國對上一次加息係去年12月，至今事隔近9個月都加唔到第二口，加到去3厘最快估計亦要三幾年之後，恐怕未到3厘經濟已由盛轉衰，再冇加息必要。當連全球經濟最勁嘅美國，其資產中長期都提供唔到3厘回報，就意味住現時環球債價、圓滙同高息股反覆走強、大漲小回嘅格局不改。隨住美國加息預期增強，上述資產調整，會係鎖定利潤後再趁低吸納嘅機會。
El.
http://fb.com/moneywalkerhk本欄逢周三刊出
來源:
http://hk.apple.nextmedia.com/financeestate/art/20160831/19754595
Money Walker：消費是一件認真的事
1 :
GS(14)@2016-09-07 21:44:27大家近排行街，有冇發覺品牌廣告同商場推廣都明顯target番港人？有金舖用「結婚是一件認真的事」嘅口號sell婚戒，有商場以本地貓界明星忌廉哥嘅擺設影相主題佈景以吸引人流，呢啲宣傳都反映一點，就係即使中國經濟近幾個月好轉番少少，但訪港自由行卻一去不返。可惜本地零售業過去幾年一味掛住招呼自由行，已經同港人口味有少少脫節。隨住網購運費越來越平，上網買嘢已成習慣，加上廉航崛起下，港人習慣一年外遊幾次，零售業目前所面對嘅挑戰，並非冇大陸客生意做就主力賺番港人錢咁簡單。由於競爭對手已經變成網購商與海外商戶，本地零售商如果無法提供到消費者喺網購同海外血拼時無法得到嘅價值或服務，例如係特別嘅消費體驗或超優質嘅服務，恐怕好難吸引港人打開荷包。更麻煩嘅係，新一代消費習慣明顯有變，同幾年前相比，年輕人追捧名牌熱情大減，消費風氣已變成有錢寧願拎去旅行而非買多個名牌袋。另外，喺樓價同租金高企下，港人居住面積趨向越來越細，屋企缺乏空間放置雜物，自然限制咗shopping買無謂嘢嘅興趣。唔少本地商場喺新挑戰下，開始提升餐飲租戶佔比，的確買衫可以網購，但食飯就冇得網購，所以餐飲始終會係本地消費嘅中堅。問題係呢個策略始終有個極限，商場不可能不斷擴大餐飲租戶佔比，而租戶如何適應消費模式變化，亦可能會影響到本港零售租戶中長期租金增長能力。
El.
http://fb.com/moneywalkerhk本欄逢周三刊出
來源:
http://hk.apple.nextmedia.com/financeestate/art/20160907/19762497
Money Walker：100Yen的糾纏
1 :
GS(14)@2016-09-28 05:00:18作為一個年年去日本嘅廢青，筆者同大家一樣好關心Yen嘅去向。美元兌Yen分別喺7月初、8月下旬同9月下旬，三次下試100關遇阻，而家繼續喺100水平徘徊。翻查過去廿年Yen走勢，100附近範圍長期都係Yen重要支持或阻力水平（100Yen折算港幣，即係每百日圓兌7.75港元左右）。每次美元兌日Yen上升到或下跌到100附近位置，都需要一段時間先能夠升穿或跌穿該關口，今次亦唔例外。筆者唔敢預測Yen之後會點走，始終有美國大選呢項重要變數左右滙市。市場普遍預計，特朗普上場會導致美元走強，但另一方面，倘若佢贏出大選，又會觸發市場避險情緒升溫，繼而推升圓滙。兩項因素此消彼長下，Yen大選前後會點郁法真係話唔埋。政治因素難講，但貨幣政策因素就好易估，筆者認為貨幣政策今年內唔會影響到Yen走勢。首先，日央行上周先啱啱調整完貨幣政策框架，按照以往做法，日央行出招後一、兩個月都唔會再出手住，所以日央行暫時唔會左右到Yen大走勢；其次，美國今年內加息一次嘅預期，早已反映喺Yen滙率上，故即使千呼萬喚嘅12月加息真正來臨，相信亦無法推動Yen兌美元顯著轉弱。睇遠啲出年又點？聯儲局官員估計出年全年總共會加兩次息，市場亦大概反映咗呢項預期。換言之，除非之後美國經濟數據超勁，導致市場預期美國出年有機會加多過兩次息，否則單單係美國加息呢項因素，中期相信無法成為Yen轉弱嘅催化劑。中期而言，筆者傾向認為美元強勢已見尾聲，日央行嘅寬鬆招數亦大致耗盡，Yen轉強並推動美元兌日Yen跌穿100關，其實只係時間早晚嘅問題，所以要去日本旅行嘅，建議都係盡早兌定啲Yen穩陣啲。
El.
http://fb.com/moneywalkerhk本欄逢周三刊出
來源:
http://hk.apple.nextmedia.com/financeestate/art/20160928/19783908
Money Walker：消失的房屋階梯
1 :
GS(14)@2016-10-19 05:23:08前幾日電視介紹一個劏房式新盤，單位實用面積不足200呎。節目主持人質疑當公屋單位面積大過私樓，公屋住戶仲會否有心向上流動。公屋同居屋都有其社會功能，居屋係公屋住戶自置私樓物業嘅跳板。當公屋住戶經濟能力改善，就會申請居屋，畀更有需要嘅人士入住公屋。當居屋住戶經濟條件進一步改善，理論上會進而遷往私樓，將自住居屋售予下一班有意脫離公屋嘅人，呢個就係所謂嘅房屋階梯。高地價政策下，香港本來擁有完善房屋階梯，畀草根階層一步步擁有自己嘅安樂窩。但當年嘅「租者置其屋計劃」同停建居屋決定，導致上述階梯斷裂。上咗樓嘅公屋居民要跳高一格，就要先買入自住單位，未來再喺自由市場放售，博跳入因停建而供應有限嘅居屋，甚至越級挑戰私樓。樓價越升越離地，加上房屋階梯消失，連同大量新移民湧港，上咗樓住公屋嘅一群人冇能力買私樓，自然無法騰出現有公屋畀更基層人士入住，結果公屋一直供不應求，造成大量基層無法上樓，被迫長期屈居貴租劏房。即使今日復建居屋又推「綠置居」，斷裂多時嘅房屋階梯亦無法一下子紓緩積壓已久嘅基層置業需求。最近一年劏房式新盤湧現，公私營單位都相當貼地，推出迷你單位迎合上車客能力。到底公屋住戶有冇興趣為做業主，每月付出較公屋租金高十幾倍嘅供樓開支，去換取酒店房式新居？結婚生子、自組家庭者當然有實際自置物業需要，至於公屋居民會否單單為向上流動呢個原因而置業脫離公屋？撇開上車盤面積細過公屋一大截嘅因素不談，喺社會向上流動階梯早已斷裂下，基層難以晉身中產，即使住屋階梯恢復，公屋住戶於住屋階梯方面向上流動嘅動力有幾大，不問而知。
El.
http://fb.com/moneywalkerhk本欄逢周三刊出
來源:
http://hk.apple.nextmedia.com/financeestate/art/20161019/19804895
Money Walker：炒散廢青生存之道
1 :
GS(14)@2016-11-10 07:33:29早排有個電視節目講廢青，自認廢青嘅主角靠炒散賺錢，閒時娛樂就係匿埋屋企煲劇上網，不花分毫，加上呢位主角本身與家人同住，所以即使間中炒散收入唔高，都一樣過到日子。拒絕全職工作並非香港獨有現象，日本有年青人由家鄉隻身到東京拼搏，但一直只能從事服務性行業或體力勞動工作。超長工時加上要應付高昂租金，最終呢個日本人頂唔順呢種生活，選擇移居市郊，兼決定此後每周只工作兩日。一星期返兩日工點夠生活？佢話寧願做少啲賺少啲，但慳得就慳減少消費，都要過番啲悠閒自在嘅日子，後來佢更犀利到出書分享自己嘅生活。每次講到呢啲case，都一定有人會話呢班年青人唔捱得、唔努力工作畀家用係不孝、老咗之後無積蓄生活要依賴納稅人供養等。但對於年青人拒絕全職工作嘅背後原因，又有幾多人願意深思一下？筆者認為年青人拒絕全職工作嘅現象之所以興起，唔單單係因為年輕人較重視work life balance，亦因為唔少企業嘅招聘條件吸引力低。返工辛苦唔係最大問題，問題係工作上無法學到有價值技能，仲要老奉OT冇補水，而所謂升職亦不過加一、兩千蚊人工但工作量就增加一倍，咁倒不如炒散賺夠生活費過一日算一日。你問佢咁後生就半退休，將來老咗冇錢養老點算？佢會話自己本身使錢唔多，而且返全職工作都會衍生好多額外開支，好似MPF等，七除八扣之後同樣唔見得有好多錢剩低儲蓄。當資本主義走向極致，一般年青人唔再相信多勞多得，但又要繼續生存，自然會發展出自己嘅生活方式。所謂炒散，某程度上係勞工認為付出嘅勞動力無法取得合理補償，於是減少勞動力供應，因而衍生出來嘅就業模式，符合經濟學上最基本嘅供應同需求概念。社會既得利益者當然唔樂見年青人減少工作同消費，但當生活成本升幅跑贏工資升幅，年青人捱極都係原地踏步，唔買樓、唔成家，甚至唔全職工作，成為崎形社會下部份年青人嘅生存之道。
El.
http://fb.com/moneywalkerhk本欄逢周三刊出
來源:
http://hk.apple.nextmedia.com/financeestate/art/20161109/19827095
Next Page