ZKIZ Archives


【男女之間】五招愛情保鮮法 每日熱戀抗寒流

1 : GS(14)@2016-01-22 16:38:42

近排搭小巴,日日都睇到方力申、鄧麗欣主演的《紀念日》電影預告片,老實講呢類七年之癢嘅題材洗腦洗到悶,次次都係你想改變佢,佢又唔肯就你,搞唔掂咪離婚囉。作為對方的終身伴侶,點解唔可以積極面對相處上的問題,而要鬥個你死我活呢?適逢近日真‧寒流,以下醒戀人們幾招,保持熱戀抗戀愛寒流,make it work but not make it worse!

1.每日肉麻多一點

大部份拍拖或結婚已久的情人,感情冷卻致命傷在於懶惰,之前左一句我愛你右一句豬豬BB,就算經歷多,感情穩固,唔代表可以懶!要哄伴侶開心,謹記3大原則,首先要了解對方喜好,投其所好,切勿send句罐頭訊息就算數;第二要記住哄對方就係要將對方寵壞,最好將每日都當成情人節,每次都有新驚喜,如將甜蜜字句寫在洗手間鏡上、放於對方衣袋內,咁就一定浪漫爆燈。



2.製定纏綿時間表

都市人生活繁忙,難就時間床上纏綿?都不過是藉口。試試與伴侶製定時間表,讓雙方信守諾言,並增加期待,更可做足準備,咁就萬無一失又可保持纏綿啦。



3.將睡房定為二人淨土

我知我知,又係土地問題吖嘛。首先冇土地問題的幸運兒,請將寵物、小孩全部趕出房,佢哋有佢哋嘅根據地,你哋有自己領土,保護二人單獨相處的最後淨土。有土地問題,咪試試半年去一次小旅行,平平地去長洲,又或將孩子寵物托人代照顧,一晚半晚應不成問題。



4.時間表共享

好多年前睇卓韻芝一本書話維繫遠距離戀愛,最好共同share一個google calendar。唔係要監控,而係至少知道你今晚返唔返屋企食飯,得個知字唔使等門,減少誤會磨擦。



5.享受每一刻

唔好諗咁多無謂事,人哋聽個電話又話出面搞搞陣,出去食個飯又話唔愛你,開講有話「千年修得共枕眠」,享受每一刻才是王道。只要二人相處開心,又何來出軌機會?記者:楊麗珊資料來源:huffington





來源: http://hk.apple.nextmedia.com/su ... t/20160122/19461747
PermaLink: https://articles.zkiz.com/?id=294816

Next Page

ZKIZ Archives @ 2019