笑到最後：如果牛三點算好？
1 :
GS(14)@2018-02-28 07:41:31咪買返囉！有咩點算好？坊間有一種意見覺得，炒股票第一日睇好就要一世睇好，淡友亦要一世睇淡，所以冇持貨就唔應該買，持貨遇跌則唔可以沽。高明第一時間諗，如果上述方法應用喺樓市可能都啱，因為買賣樓宇而搵經紀、搵律師樓、落大訂、去銀行造按揭，近年亦有印花稅考慮。更重要係，每一個單位都並非完全相同嘅貨品，風水屋沽咗就冇，升咗想食糊亦無法局部獲利，一動不如一靜。但買股票唔同，㩒幾個制，好友淡友即日做晒。買賣單位亦係大部份人可承擔水平，毋須大幅槓桿先勉強上車，真正做到可以先買一格階磚，或者賣幾呎局部食糊。舊年同今年市況明顯有唔同，舊年慢牛較值得堅持睇好，今年變數較大，一、信自己不如信市場；二、牛三最終只有一個目的，就係散水。2月大調整最後好彩冇事，好似有張股票喺你耳邊講：「乜你哋咁蠢架，我隨便跌吓你就信係股災。」一激之下嚟多兩次大調整都唔沽，往後次次死揸，可能成為《狼來了》翻版。所以寧願舖舖清，貫徹之前升就買返嘅睇法，即使只係買返少少，亦值得重新入場。2月情況最壞嘅時候，半新股、細價股其實唔弱，即係資金仍然肯博，只係避開會受美股波及嘅指數成份股。近期比較多人留意十年期美債息率，周五回落到2.867厘，同之前坊間預期會抽上3厘相反，呢個波動對長線應該冇啟示，但短線可能當不利因素解除，聯儲局下次議息係3月20日，加埋港股業績期，中間可能會有個安全期炒返轉。一般市況之下，股票係少數人賺大部份人嘅錢，牛三比率會更極端，不過點解仲覺得現階段要入市，就係當買保險，避免日後升至四五萬點，中間冇享受過，更喺高位先衝入場接火捧，不如趁唔算太高買啲先。即使高位受市場氣氛影響加貨，有貨底墊住都冇咁傷。高明
http://fb.com/bigricetea本欄逢周一刊出
來源:
https://hk.finance.appledaily.co ... e/20180226/20315829
笑到最後：再展升勢幾個疑點
1 :
GS(14)@2018-03-19 04:33:57港股「單跳」日升日跌時候過去，連升兩日加上美股上周五大升440點，但對高明嚟講，都仲係有少少懷疑。之前曾經講過，今年市況，要冇合理疑點先會再次開展升勢，最先為大市添煩添亂嘅原因係加息，但始終加息係芸芸壞消息之中，最唔可怕嘅一件事，因為一定有數得計。美國加息嘅憂慮應已跌定。最可怕係貿易戰，因為一開戰，就冇得收手。如果情況同1930年smoot hawley tariff通過一樣，當年通過後美股大跌超過七成，加劇大蕭條，最後以戰爭打開貿易壁壘。不過，特朗普轉頭已經話加拿大同墨西哥可以豁免，最後發展極有可能係只有中國申請唔到豁免。更好彩嘅係，特朗普對新經濟嘅興趣不大，暫時只搞鋼鐵類，冇話過會向入口手機甚至進口APP內任何消費徵收關稅，暫時唔會破壞新經濟增長動力。無論如何，暫時都當貿易戰疑點已釋除。未解除因素則係港匯，已經跌至接近觸及弱方兌換保證嘅港元匯價7.85，一般都係話沽港元買美元去套息，唔信走資係市場主流。不過，高明對走唔走資冇乜興趣，着眼點反而係市場點反應觸及弱方兌換保證。因為自2005年聯匯改制以來未試過觸及弱方，第一次發生，市場特別大反應。強如去年市況，兩次增發外匯票據，拆息一抽高，港股都要回調接近1,000點，短線肯定會有影響。今年市場敏感到一個冇實權嘅白宮經濟顧問離職，都會令道期跌400點，值得觀望市場嘅反應。今年另一自訂嘅準則，唔估市、升穿就買返，上星期四升穿20天線，機械式買返，至低限度都有一口好倉，始終今年政治上變化大，自己分析都可能會錯，驚個市會絕塵，惟有先買一口好倉。過往美股隔晚暴升，港股多數都高飛曲墜，惟有祈禱今次會唔一樣吧。高明
http://fb.com/bigricetea本欄逢周一刊出
來源:
https://hk.finance.appledaily.co ... e/20180312/20328989
笑到最後：點解唔畀買多過一間樓
1 :
GS(14)@2018-03-19 05:01:33港股近期出現「市底強、市面弱」格局，後市睇法過去已解釋。有關樓市討論越來越熱鬧，「點解買唔起樓」討論隨住樓價再升而再廣泛討論。不過，今日講「點解買唔起樓」，政策同5年前一樣，只需要將舊文重貼便可呃like。今日香港前途問題比5年前更複雜，更重要問題係：「點解唔畀你買多過一間樓？」買樓係最直截了當睇好當地經濟嘅方法。買一間只係有份住，買兩間或以上先至有份贏，當敢落注嘅人可以喺呢個地方贏錢，就會有動機繼續留低，政府喺樓市上嘅一舉一動，就係反映緊政府想唔想呢啲願意真金白銀睇好當地嘅人留低。過去幾年有目共睹，加辣及壓力測試之下，要買另一間樓，肯定要沽出原住物業先有可能過關，過去香港人買樓一拆二、二變四嘅香港故事已經冇得翻唱。挾升只係辣招面嗰浸作用，真正作用係，令港人再無能力成為包租公包租婆，只能有平倉盤一間，努力打工供樓。點解唔畀你買多過一間？原因係每日單程證、移民、學生，實在太多。如果普遍香港人繼續沿用過去買樓收租呢一招，香港內部人口增長放緩，最大租住需求主要嚟自北面新移民留學生，意即不論佢哋成功與否，首先要向香港業主交租，成功嘅半邊天要同香港人對分，恐怕有違特區施政方針。中國資本明知有中國留學生等嘅租住需求，與其被港人劏，不如自己食咗先，所以不難發現大陸錢狂掃本港樓，一來有錢，二來買之前已經搵到租客。再配合政府多年推出辣招聲嘶力竭「需求管理」，一般市民當然覺得係打壓樓市唔敢上車，部份更加被震走。近日傳媒翻查高官物業數目，過去數年竟然個個當辣招耳邊風，冇人「管理需求」沽剩自住嗰間，反而人人手持至少兩三間有樓住有租收，例如李國章28個，張建宗都9個。睇見高官持倉同政府決策「背馳」，你就會明白，有租收就係管治階級，點解唔畀你買多過一間樓？就係咁簡單。高明
http://fb.com/bigricetea本欄逢周一刊出
來源:
https://hk.finance.appledaily.co ... e/20180319/20336010
Next Page