ZKIZ Archives


賤男黃宗澤再出招 大婆龔嘉欣被迫到癲

1 : GS(14)@2016-11-29 07:55:28

大台台慶劇《幕後玩家》嚟緊呢個禮拜入戲肉,上星期龔嘉欣因為老公黃宗澤(Bosco)搭上「小三」劉佩玥(Moon)喊爆嗰場,人人讚好,獲讚「世界級演技」之餘,仲睇好佢有獎攞!龔嘉欣昨日接受傳媒訪問,講到佢最近好受歡迎,又有傳佢喺劇中會畀Bosco逼到癲,佢就話:「係呀!好多謝大家咁留意,來緊我會更加慘,其中一場戲仲喊到歇斯底里收唔到聲,拍完返屋企個心都唔舒服,好耐未試過有呢種感覺,希望觀眾都可以感受到,真係好多謝大家咁支持。..另一方面,《幕》劇點發展都係觀眾嘅關注點,Bosco嚟緊就會同小三阿Moon攤牌,飛甩對方;至於正印龔嘉欣呢,就會被老公逼佢離婚,之前已經有產後抑鬱症嘅佢,因為呢件事打擊太大,令佢抑鬱症復發,Bosco逼到佢癲咗,話要搶番個女。飛甩老婆嘅Bosco,為咗要入大公司,轉頭走去撬老友蕭正楠牆腳,狂追黃翠如,「雙黃」更會連成一線吞食咗間公司,翠如BB亦會越變越衰,利用完蕭正楠,轉而同Bosco喺埋一齊。嚟緊仲有兩星期就大結局《幕》劇,啲衰人會呼之欲出,除咗Bosco同翠如BB,仲有一個「幕後玩家」未「現身」……有網民對只得26歲嘅龔嘉欣演慈母狂讚好!話佢好戲,甚至評為「純得、姣又得,o依家賢妻又得」,話佢演技有進步。亦有唔少網民話睇龔嘉欣睇到好心噏,仲跟住佢喊埋一份,男女觀眾都打動到,最正嘅係有網民話要開Po推到龔嘉欣攞「最佳女配角」,甚至「視后」,睇嚟幫龔嘉欣打咗唔少強心針喎!




來源: http://hk.apple.nextmedia.com/entertainment/art/20161129/19849185
PermaLink: https://articles.zkiz.com/?id=317516

Next Page

ZKIZ Archives @ 2019