投資港股：B計劃(三) 阿牛
http://hk.myblog.yahoo.com/yomagyomag/article?mid=3999
下午講到阿牛『棄暗投明』，做左反骨仔，將22955入貨點變左22050點。
咁阿牛忽然轉舦，有義務要解釋吓點解可以咁樣，變得咁快咁得人驚。
其實之前的45%，55%，65%都喺圖表派嘅皮毛功夫，喺攞港股的近期數據計出嚟嘅。用佢個好處就喺會推算到今次大大約約會跌到乜程度，因為如果連45%都唔到，個市已經到左底嘅機會，就真喺好低好低，但要跌到55%就難啲，跌到65%又再難啲。
有 左呢個概念，我地就大約知道自己會去到乜上下位，先會有入貨嘅位。之但喺統計歸統計，只能作一個概念，上次喺咁，今次唔一定要跟足。等如你老婆日日飲檸 茶，都喺落匙半到兩匙糖，但唔表示佢明日會落番匙半到兩匙；佢落一匙或者三匙都得㗎喎。所以如果有進一步貼士出現就立即要改；例如你太太一早睇報紙，又咁 啱今日報紙話食得糖多會生腸癌，咁你小心啲喇；睇清形勢先好幫老婆落糖，唔好亂嚟；如果唔喺，分分鐘捱鬧。
亦都喺因為咁，所以話圖表派危險，就喺因為佢地攞啲統計，就當正實啱咁用，如果環境一變，就即刻瓜得。
好喇，下一個尷尬問題，就喺：
咁即喺幾時入貨呢？
呢個決定，喺要平衡兩個因素的：
1)盡平，所以要等跌多啲先好買。
2)又唔好等到過晒廟，買唔到。
要搵呢個最佳入貨點，可以用三個辦法：首先喺計日子，睇吓幾多日後會跌到底，然後買貨，或者喺用點數計算，跌夠多少點然後入貨，第三，仲有一個反彈入貨法。
我地先放大一月和五月，兩次下跌的詳圖再睇一次。如果以時間計，一月嗰次，跌了19個交易日就到了底部；五月的一次，跌了17個交易日就到了底部。如果夾硬攞嚟套用，今次底部將會跌至12月14至12月16日，星期二至星期四之間出現。
如果使用點數計算，一月的底部在跌了2776點之下，即12.4%跌幅；五月的一次，低點在跌了2123點之下，也就是10%跌幅。
值得一提的是，兩次調整都有一些像樣的反彈，一月的一次，在20033的初步底部到達後，五天就反彈上20722的高位，相等於3.4%反彈。五月的一次，在初步低位到達後，翌日就反彈上去20426的高位，相等於2.5%。
所以另外一個辦法，就是等反彈高位出現後，再下跌的時候，到下一個低位時，讓它再反彈到相若的%，就確定底部已到，然後入市。
阿牛這次建議三法俱用，到了十二月中時，大約跌了10%之後，又之前反彈過2%至3%後再跌，就到了入貨點。
為甚麼要這麼複雜呢？
明天再說。
這裡可以肯定說，明天按兵不動。
投資港股：B計劃(四) 阿牛
http://hk.myblog.yahoo.com/yomagyomag/article?mid=4008
昨日講到今次可能要用一個異常複雜嘅辦法搵入貨點，因為後市非常難估計。
今次利好利淡消息一齊出現，如果貿貿然入市，好有機會買定之後，個市繼續下跌，例如再跌一千點，咁雖然有6000點 margin，喺定過抬油，但個心就會萬分不爽。咁就無謂喇。
壞消息當然就喺加存款準備金，和政府打擊樓市；但好消息方面QE2又剛出左，通脹又睇升，冇樓炒，資金又擁向股市，有利股市上升。所以好消息勁，定壞消息猛，又究竟好同淡，邊個發威先，變數甚多。呢啲環境唔喺講道理嘅，因為市場講理性又得，唔講理性你都吹佢唔脹，走勢喺跟大眾感覺點樣，同有冇大戶想乘機攪嘢而決定。鹿死誰手，真喺難料。
尋日星期日嘅報紙，喺打擊樓市措施發表後，過了第一個交易日後嘅第一套報紙；就正如阿牛11月12日，第壹玖玖篇咁講，傳媒發揮左威力。昨天星期日，經濟日報例假，星島日報仍然有，而且最多人睇嘅東方日報，同蘋果日報，就全版報導，話樓市『謝晒』『食蛋』，已經到了寒冬嘅地步。
如果淨喺靠睇報紙，就只有相信個市瓜左，壽終正寢；雖然阿牛從相熟經紀口中知道，其實市場平穩，觀望，同埋淡靜；只此而已，根本就唔喺好似講得咁差。
跟住一如所料，陸續有經紀覆盤，問阿牛嗰兩個關聯單位嘅情況；覆盤為名，鋤價 為實，個個經紀講到第二句就已經想要牛嫂減價，因為有人減價，就好向佢阿頭交差；幾間大行，趕住要覆晒盤，死驚有賣家減價，俾『友行』攞到盤先，執輸行 頭，慘過敗家。佢地可能心情欠佳，阿頭又要監佢地覆晒所有盤，加上有同事落左新盤，扯薄左人手，於是乎業主唔肯減價嘅，想同佢地講多句都唔高興，嫌業主 煩。
講得肉酸啲，就好似剛剛天災地震，家家都死左人，賣棺材嗰個仲逐戶去問，喺人地傷口上灑鹽，如果有棺材賣，貴啲你買唔買。如果問佢：我肯俾錢，咁棺材有冇貨吖？(我肯減價，你有冇客要我間屋吖？)
個答案喺：冇。
幾時有呀：唔知。
然後問番你：間屋再平啲你考唔考慮賣吖？
我肯。咁有冇客吖？
都冇喎。齋噏咋。
各位有樓在手，仲想賣貨嘅朋友，阿牛奉勸一句：最後召集喇。
所以阿牛唔敢估實個市會點走，就喺咁解；因為個樓市已經受到唔公平嘅利淡消息 充斥，就恐怕佢跌得太急，拖累股市，明明股市本來輕輕跌破二萬三千點，就已經可以，偏偏市場氣氛太差，萬一指數繼續再向下陰吓陰吓，仲要慢慢跌，陰乾幾星 期嗰隻，咁如果揸滿手好倉，就會由個心一路路寒出嚟。
呢個就喺11月1號，阿牛講嘅雙鬼拍門，一隻都唔夠，整夠一對，唔喺驚佢，喺煩啫。有時啲大鱷質得兩日，見唔多跌，急抽高個市都得。
與其喺咁樣受無窮無盡嘅折磨，就倒不如隔岸觀火，到真喺個市跌定先郁。
今次採取個辦法，因為需時甚久，要等到十二月中近尾先會入市，反而仲穩陣，可以等樓市塵埃落定先再算。嚴格嚟講，喺阿牛專登揀個要等最耐嘅辦法，唔想冒險。
大家可能會覺得：咁好悶喎。
尤其喺冇乜貨喺手上嘅朋友，更覺冇癮。甚至乎如果個市唔喺好跌，迅速又爬番上去，咁就完全錯過晒今次調整可以賺錢嘅機會添。
但喺大家認為，悶同錯失機會好吖，定喺死好吖？
阿牛仲想去到熊市，可以斬瓜切菜咁賺錢，唔想在牛二不明不白咁犧牲左，冇晒副身家。
投資港股：B計劃(五) 阿牛
http://hk.myblog.yahoo.com/yomagyomag/article?mid=4082
南北韓今日炮戰。
阿牛就覺得完全冇料到。因為發生左幾個鐘之後，南韓先公報，今朝在延平島附近練過炮，而且北韓已經警告過，叫南韓唔好亂嚟，同唔好射過界，如果唔喺就唔客氣。
再夜啲，消息漸漸再明朗啲，原來南韓而家正在延平島附近，進行緊軍事演習。而且仲喺海陸空軍聯合演習，叫做『護國訓練』，即喺大規模演習，唔喺操炮咁簡單。
咁今朝護國訓練，俾北韓警告，中午就受到炮擊；大家聽完之後，諗到乜嘢？
阿牛就覺得，喺咪南韓操炮射過界，令人唔高興呀。
如果北韓真要挑釁，就唔喺炸個島仔，一定炸啲有軍事價值嘅設施，亦唔喺射完二百炮就收工，點會冇下文吖。
咁多地方唔演習，揾邊界有爭議嘅地方演習，仲要大規模行動。結果擦槍走火，人地還手，咁有乜好講呢。
簡單啲講，即喺小便射過界，整污糟人地嘅地方。
唔好以為進步，富有，識拍韓劇嗰個就實啱；窮到燶，落後，淨識做樣版戲嗰個就實錯。
未必嘅。
大家守吓規矩好啲。
投資港股：B計劃(六) 阿牛
http://hk.myblog.yahoo.com/yomagyomag/article?mid=3941
仲有Blog友問阿牛，點解要買明年六月期指，唔買即月。答案有兩個。首先我地張期指唔知要揸幾耐，如果玩即月就要幾日後『泊倉』，要轉期，比較麻煩。第二樣就喺遠期期指，通常低水啲。例如今日恆指收23637(『今日』即喺寫稿嗰日，阿牛都唔記得喺早幾日嘅邊日)，即月期指低水一百點，收23537點，而明年六月期指只有23167，低水470點。
個理由就咁樣；今日雖然反彈，但市場仍然有介心，怕佢遲啲又跌。於是乎即月期指差一百點，追唔上。六個月後就更誇張，大家連呢秒鐘都睇唔好，六個月後就『照例』再估低啲。但通常好少低幾百點咁多。例如阿牛五月廿六日買好倉；當時買十二月期指，即喺七個月後嘅，嗰秒鐘恆指19000點正，而十二月期指喺18811點，只喺低水189點。比起今日低470點真喺差好遠。
奇就奇在，人人都唔知點解要估遠期『睇淡』，而唔估佢睇好，甚至升市時，遠期期指，一樣低水。正等如今日打風落雨，點解六個月後要更大風大雨呢，六個月後風平浪靜唔得嘅咩？但喺咁既然市場鍾意咁諗嘢，我地咪由得佢咁諗囉，我地邊有quali教育個市場呢。
我地淨喺負責幫自己揾少少著數。市場點諗嘢，唔關我地事；我地顧掂自己先喇。
咁呢189點在七個月內，會點發展呢？原來就喺會漸漸變成平水，到泊倉嗰日通常平晒水，咁即喺話，每張期指無端端多左189點，或者喺HKD9450。十張就多九萬幾，五十張就多五十萬，嗰度其實都好多錢差距。
呢個月更誇張，低470點，即喺守到尾每張賺HKD23500，十張就HKD235000，五十張就一百二十萬咁滯！
咁啲錢邊度嚟嘅呢？唔會由個天跌落嚟，或者喺樹上長出嚟。股市喺零和遊戲，咁即喺沽期指嘅人貼嘅；假如今日我地揸，人地沽，大家守到尾，咁沽嗰個就要多蝕HKD23500俾揸嗰個人。所以將來到熊市，有朝一日輪到我地需要沽期指時，就一定沽即月貨，千祈咪沽遠期期指。
我地『牛黨』，只喺一介小股民，邊有能力補貼人地吖！
但喺，賺HKD23500又唔俱喎。
投資港股：B計劃(七) 阿牛
http://hk.myblog.yahoo.com/yomagyomag/article?mid=4104
尋日有Blog友提醒阿牛，遠期期指喺因為有『除淨』因素，低水喺合理嘅，所以買遠期期指唔喺白賺。
阿牛首先好多謝大家提呢個問題出嚟討論，不過除淨呢吓嘢，又喺阿牛唔明嘅東西，所以昨晚篇文冇討論，亦冇包括到呢個因素在內。
所謂除淨，喺股票派息，或者紅股之後，証監規定要公報一個日子，叫『除淨日』。
在呢日之前買入隻股票，買家就享有已經公佈左嘅利息；亦即喺股息會歸新買家。但喺超過左一個叫『截止過戶日』之後，股息就歸上手，因為派息公司喺會按照截止過戶當日嘅股東名冊出支票；所以之後嘅人就冇份賺股息喇。截止過戶之後第二日，就喺除淨日。
好喇，除淨嗰日，如果個大市可以『理論上』，咁樣唔升唔跌，咁隻股票嘅股價就應該跌番紅利嗰個價出嚟。
舉個例：
假設匯豐銀行，佢公報派HKD1利息，先唔好講以股代息咁復雜，就當佢股價喺HKD81，到左除淨嗰日，佢唔升唔跌都應該喺剩番HKD80。因為早一日買都有一個銀錢利息收，俾八十一蚊買，收一蚊，實付HKD80。所以今日冇左呢一蚊，買家只肯俾HKD80。 咁匯豐股價嗰日跌左一蚊，但實在就冇跌到，由於佢喺恆指成份股，跌左一蚊喺會拖低恆指，恆指又間接拖低期指。
假設所有恆指成份股都派息，又當佢地平均派3%PA息，咁半年結算就派1.5%。我地買半年後期指就應該計佢要跌1.5%，所以價錢應該平1.5%。
23000點 X 1.5% = 345點
喺咪好啱數呀？
其實又似是疑非。
因為當初匯豐公報派息，如果個市場唔升唔跌，匯豐應該即場賣貴HKD1， 因為閣下而家買，喺會收一蚊利息嘛，嗰一蚊息會令你入貨價平一蚊，既然假設個市唔升唔跌，即喺個個都滿意匯豐值HKD80，咁即喺八十一蚊應該有人願俾 喇，因為利息會收多左嗰一蚊番嚟；咁你喺咪應該俾多一蚊上手，咁先啱數呢？如果喺咁，匯豐應該立即『升一蚊但喺實在冇升過』，咁恆指同期指就無端端升左， 直到除淨後先跌番呢一蚊出嚟，跟住恆指期指又跌番一蚊咁多嘅點數；結果即喺得個零。
如 果計條數出嚟，當匯豐未派息喺HKD80，公佈派息後變左HKD81，即喺升1.25%。以匯豐佔恆指15%計，即喺令恆指升0.18%，如果恆指 23000點即喺升43點，咁我地當日期指無端端高43點。但幾星期後，除淨之後又跌番一蚊，指數又跌番43點，即喺冇嘢發生。
所以點解遠期期指要有除淨因素，要低1.5%呢？點解唔可以計個派息因素，遠期高1.5%呢？又點解唔可以唔計派息呢吓嘢，個個月平水呢？
阿牛唔明就喺唔明呢度。
一個可能性喺，遠期期指少人買，都冇人研究；求祈照例開低幾百點，好似茶餐廳例湯咁，人客入嚟就循例俾碗佢嘆吓，關人乜事。
而且反正都唔會有人長揸期指嘅，如果你短炒，三幾日內，個差水都冇乜變，上落基本同大市同步，所以更加唔覺佢唔公道。
遠期期指真喺好少人玩，甚至有人問阿牛，遠期期指，好似冇乜人買賣，出唔出入 到貨㗎？但原來，每日開市，遠期期指就跟住跳，要買賣隨時都有，只喺冇人買賣，買賣兩閒，喺冇人買賣，唔喺冇得買賣。假設你有一億，用三十萬做一張按金， 要買三百幾張，阿牛包你十五分鐘一定做晒。而且如果買期指都要做到一億，阿牛都收左檔喇，仲得閒同你攪咩。
投資港股：B計劃(八) 阿牛
http://hk.myblog.yahoo.com/yomagyomag/article?mid=4138
等阿牛作一個最後嘗試，講一講除淨嘅觀點。
先旨聲明：
1)呢樣嘢喺有爭議嘅，所以前日都想『賴猫』唔講，後來大家提起，冇辦法唔講。
2)唔喺想大家同意阿牛點諗，各人有各人諗法，歡迎大家信奉番自己嘅諗法。阿牛唔想好似攞個28蚊最低工資出嚟講咁；因為一定各人有各人意見，實打交都得喇。
3)阿牛淨喺唔想有人睇完，話唔知阿牛講乜。大家可以唔同意，但唔知講乜就唔喺幾好。
假設：
有一間舖頭仔，喺魚王兄開嘅，佢想頂讓，阿牛就想頂嚟做。傾好左頂手費連生財工具：
80萬
跟住阿牛話要考慮吓，同埋要撲水。時乃11月26日。
好喇，到11月30日，魚王兄call阿牛，話11月盤生意埋左數，賺左：
1萬
生意仔一盤，檔口冇公司銀行戶口嘅，嗰一萬銀放左喺鋪頭櫃筒裡面鎖住。阿魚王兄話，如果12月1日後，阿牛俾頂手費，就要：
81萬
有一萬現金喺櫃筒，佢唔攞走，當『對數』。
阿牛原來揾銀行借緊中小企貸款，本來報上去頂手費80萬，而家打電話改，話俾Bank聽：『起左價』，而家要81萬。銀行如果唔問清楚，就以為價錢『貴左』，市道『上升中』。
又過幾日，銀行都未批貸款俾阿牛；魚王兄又有電話到，佢話5號嗰日會同鋪頭嘅partner食晚飯，順便分左上個月嘅利潤，每月5號食飯同分錢，喺佢同佢partner嘅習慣。即喺會分左嗰一萬蚊。
魚王仲話，如果阿牛5號前俾錢，就：
81萬
但櫃筒會有一萬現金，歸阿牛嘅，對番數。但如果5號後俾錢，就實收80萬，硬掘。櫃筒嗰一萬就冇左。
於是阿牛又通知銀行，話個賣家又收番『平啲』，變番80萬。
總結：
牽涉三幫人：
1)阿牛：由頭到尾都喺80萬。12月1日之前，實付80，12月1日至12月5日，要付81，不過交吉之後去櫃筒攞番1萬。12月6日，除淨後又喺實付80萬。
2)銀行：12月1日前收到報價80，12月1日至5日收到81，以為貴左，12月6日後又收到80，即喺平番。銀行就最『亂』，因為佢記錄喺：平，貴，平。
3)魚王：由頭到尾都喺收80萬，12月1日之前，做嘅生意賺嘅利潤始終都喺歸番魚王自己。1號至5號之間，喺『技術性問題』。
阿魚王，你咁細間舖，80萬頂手，好似貴左啲喎！
投資港股：B計劃(九) 阿牛
http://hk.myblog.yahoo.com/yomagyomag/article?mid=4111
投資港股：B計劃(九)
差啲唔記得講，呢個遠期期指水位喺會收窄得相當快嘅，早些時候當個市未大跌時，阿牛趁機轉埋手上嘅12月期指倉，因為12月期指下個月到期，要趁6月期指初出，就順手轉埋。轉嗰日阿牛對住部電腦，影到當時期指嘅走勢；
由上至下喺10年11月，10年12月，11年3月，11年6月。可以見到當時嘅12月同6月嘅差距喺430點。而且當日升市，12月期指升258點，6月只喺升左188點，有70點差距。於是當日，掛左個standing instruction出去，用470差距嚟『撞』佢，由12月轉6月倉。
之後就等運到，只要有一秒鐘個12月有買盤，和6月嘅沽盤嘅差距有470點，個電腦就立即會幫我沽一張12月(即喺平倉)，然後揸一張6月嘅。
在上落市，尤其波動偏大嘅日子，做到喺機會好高的，因為6月期指成交唔多，反應緩慢，而12月喺好貼市嘅。結果當日有一個時段，恆指忽然扯高幾十點，個12月期指跟住扯上，但啲6月期指改唔切盤，一個短暫時間嚴重低水；結果就產生個更大的『擘價』，俾阿牛有機可乘，在幾分鐘內，用470點轉晒倉。
好似『警訊』咁講，一個唔覺意，俾阿牛呢啲『賊人』有機可乘。
於是本來嘅18811點12月大期，變左：
18341
當然呢個18341唔喺『真嘅』，因為阿牛唔喺真喺做左18341嘅6月期指；但喺轉倉時差額喺470點，咁數就喺咁計，減番佢出嚟。
在而家呢段稿出街前，阿牛再影多左一幅相。
大家睇到現在未開市，但昨日收市時，12月期指收22940，而6月就收22586，水位只剩354點。和上星期的四百多點比較，就已經少左百多點。幅圖最底下多左一欄，嗰個喺阿牛前日順手加插上去嘅即市恆指點數，方便參考。
如果昨日才換倉，和上星期比較，每張就已經差左HKD5800。咁十張差幾多，五十張差幾多，一百張差幾多，可想而知。
阿牛當呢啲錢，喺上天賞賜俾我嘅喇。
謝主隆恩。
所以究竟除淨喺應唔應該低水，阿牛諗唔通，但就十分支持佢低水。因為低出嚟啲水，都夠阿牛開飯囉。
投資港股：B計劃(十) 阿牛
http://hk.myblog.yahoo.com/yomagyomag/article?mid=4151
呢幾日個市上上落落，咁我地如果想睇跌，又會個心籮籮攣，開始有啲幻覺，好似有人想害我地，特登整到個市升嚟刺激我地。
此乃正常，喺常有嘅感覺。
今次因為阿牛話會等到：
12月15日
所以仲有兩個半星期捱，而且仲要冒個險，萬一呢兩星期升番，咁我地仲食白果添。
喺呢個時候，最好就喺攞啲有利我地諗法嘅證據，出嚟麻醉吓自己先。
首先當然喺加準備金喇。
人民銀行副行長胡曉煉前日話，除左要留較多準備金之外，仲要：控制好今年尾之前的信貸投放節奏和力度，使信貸投放總量符合宏觀調控要求。
咁宏觀要求又喺乜呢？原來喺中國政府規定今年的貸款總額，唔准超額。在十一月份的首三周，銀行體系又發放近六千億元貸款；咁十二月的餘額仲有幾多呢？
答案喺接近零。
跟住國內樓市。
昨日廣州又賣一塊地王，創左新高。上海、北京樓價又回升至九月之前的價錢；深圳上星期，樓宇成交量又比前星期上升四成。中央12月初就會舉行中央經濟工作會議，焦點就喺房價。房產稅據說隨時可以出臺。
第三喺朝鮮半島。
今日又話有K9自走炮嘅炮聲，美國又話開隻航母去黃海。阿牛相信都喺打唔成，但隔日嚇一嚇，個股市同匯市就好傷。
第四喺愛爾蘭。
擾擾攘攘，喺度等人打救。雖然已經喺舊聞，但喺佢令歐元又跌，外匯又波動。
到本港，前兩日升市但成交得七百億，唔配合，而且高開低收，氣勢麻麻地。
樓市就開始撻訂，做價已開始下跌，牛市需要嘅一口『真氣』已經破左；最重要喺大家已經知道政府喺會不惜代價，要樓市下跌，尤其針對炒賣活動。
最後，港匯又跌，資金好似走走地。
咁人走就茶凉，對淡友又喺好消息。
杯茶真喺凍晒？
凍晒囉，真喺凍晒！
呃完自己一輪，喺咪開心好多呀？
投資港股：B計劃(十二) 阿牛
http://hk.myblog.yahoo.com/yomagyomag/article?mid=4175
昨日列出來的日曆，真是有多少令人沮喪，因為還要捱過十多個交叉才可以去到綠剔的日子。
如果大家細心再想一想，就會更加沮喪，因為大家很快就會想到，當我們接受完一輪折磨之後，入貨點只會比現在低900點；而且還會冒一個『走雞』嘅險。
呢件事要分兩面睇。
阿牛嘅睇法，喺非常奇怪嘅；阿牛覺得在投資市場打滾，首要學會忍手和堅持己 見。所以遇到現在這種情況，除了要賺錢之外，仲要乘機磨練自己。如果唔忍得手，阿牛點可以由年中開始，已經話十二月樓市要玩完，俾人指住塊面笑，背住面俾 人笑得更大聲；俾人指住大大聲話：拿又升一成喇，又賺幾多喇，摩一摩貨又賺幾十萬喇，之類之類。今次唔喺第一次，又唔喺最後一次，將來去到牛三盡頭，又要 俾人笑多一鑊：拿拿拿，點會股災吖，剛剛破四萬點，年中要炒到四萬五點添呀，啲股票日日升，日日賺呀，股災？痴嘅。
所以，今次等待廿幾日，等嗰幾百點上落，唔好話阿牛大口氣；碎料嚟咋。而家只喺我地一生中的五、六個股市循環的其中一個，的牛二階段嘅幾次例行調整，嘅其中一次，的後半段。
今次對阿牛嚟講，其實比以前更容易，因為除左牛嫂之外，仲多左好多朋友支持。所以各位老友唔好客氣成日話多謝阿牛分享，阿牛應該多謝大家支持先啱。
今日結束之前，阿牛精製左上兩次大跌市嘅十幾日詳細升跌圖，俾大家參考吓上兩次扯上扯落嘅驚險情況，以資比較。
首先喺一月：
跟住喺五月：
投資港股：B計劃(十三) 阿牛
http://hk.myblog.yahoo.com/yomagyomag/article?mid=4212
前兩日講到我地可能仲有十幾日，有排等。但喺我地仲有一個準則就喺跌近10%至12%就可以郁手；呢吓嘢，仲有啲研究嘅。
首先，我地數日子上兩次數到17日至19日見底。如果今次又數17至19日，就會去到12月13日至12月15日；之但喺我地今次加存款準備金，九日內加左兩次，上面的計算喺以第二次11月19日嚟計算嘅。但如果我地用第一次就開始計，照計數就會近好多；17至19日，就喺12月2日星期四，至12月6日星期一，因為當中嘅週末，休市喺唔計嘅。
如果喺咁，個日曆又短左好多喇。
好快就見綠色。
仲有喎，睇番上兩次，都喺到臨尾幾日跌最後一鑊金，然後到底。
一月嗰次，尾尾三日共跌：
381 + 576 + 115 = 1072點
而五月嗰次，由尾四嗰日開始跌：
366 + 33 -122 +682 = 959點
所以如果嚟緊幾日，有似樣跌幅，大家好準備郁手喇。
時間同點數都重要。
最後總結多一次，有以下可能性：
1) 任何日子，跌近22050點；或者簡單來說，跌穿22100，已經要算合格。
2) 嚟緊幾日，呢個週末，如果都喺明顯向下，雖然跌唔到22050，例如明天，後天，一日跌五、六百點，一日跌百零點，就算唔到22050，一樣算到位，照去馬。
3) 如果跌勢超勁，咁就反而要忍手，等反彈一日至兩日先買。因為如果跌得超勁，有能力跌過千點，個底都唔知喺邊；所以等反彈買就好過茂茂然買。
4) 如果呢兩日浮浮沉沉，死吓死吓，咁就等到12月13日至12月15日，最後限期；睇吓到唔到，如果跌唔到上面1)或2)嘅指標，就放棄機會。
即喺個市非典型。
咁非典冇法喇。
等下次。
Next Page