收市閒情：香港人其實係超人
1 :
GS(14)@2016-10-26 08:01:34我係James，一個PR，即係「幕後玩家」。話說我出差識咗個台妹叫阿怡，終於發現，原來「香港人」三個字可以好威！「你來自香港？那你工作一定很忙。」我用廢到不得了嘅國語答，「對呀，每天工作10小時以上，很辛苦。之前有研究說，香港人工時全球最長」。阿怡碌大對眼，震驚得來似乎有啲admire，「10小時？如果每天睡8小時，那每天只有6小時私人時間，那很慘」。私人時間？10個鐘其實未計OT；朝早應付啲米飯班主，晏晝就應付班記者，仲有班大帝最鍾意臨門一腳先話轉plan！「不如event改日期」、「呢個星都係唔好，我想轉梁朝偉」……幕後玩家？玩就玩，但係俾人玩，幾乎24小時on call。不過對住新朋友，講嘢都係客氣啲。「沒甚麼，已經習慣了，而且我要供樓，沒辦法。」她問：「聽說香港的房子很小。」我上網輕輕一search，先搵幾張記者瞓窗台相，搵多張不能坐的馬桶，再搵埋新鮮熱辣太空艙，「那麼誇張？月租多少？」「大概兩萬台幣。」「香港是人住的嗎？那你現在住很小嗎？」「我剛買了500呎房子。」「那你很厲害！」我睇得出阿怡今次唔係「似乎有啲admire」，而係真係崇拜我。「還好啦！有報告說香港是全球最長壽地區，平均壽命比日本更長！」「我聽說有研究說，工時越長人會早死；但現在你說，香港人工時長、屋子小、樓很貴，不但死不去，反而最長命，那你們香港人是違反人類定律！你們是超人嗎？」工時全球最長、樓價最高，但條命最長，真正長命工夫長命做，為層樓做到死。不過呢一刻，望住阿怡眼神，佢應該不只係崇拜，完全當我係超人。呢個身份，令我前所未有地知道咩叫做自信、自豪！「還好啦！」我沾沾自喜咗。呢日開始我同阿怡就friend咗，然後之後我就有咗個台妹女友。所以唔好灰，如果閣下係香港人，而且仲生勾勾，你，其實已經係超人。千頌C
http://www.fb.com/winbigwok
來源:
http://hk.apple.nextmedia.com/financeestate/art/20161026/19812148
收市閒情：香港還保得住甚麼
1 :
GS(14)@2016-11-10 07:33:28「既然人大已作決定，希望大家用客觀及正面態度看事情。」律政司司長袁國強搖身一變做「正面L」。OK，咁我哋就用「正面L」心態，去睇香港到底保得住啲咩。三權分立、廉潔、新聞自由、言論自由……你懂的；餘下嘅就係資本、市場自由，而呢樣嘢相信香港仲會保得住一段時間。首先而家大環境係人民幣係咁貶，貶到去兌美元6.79左右，年初至今已跌超過4%。而家已出現走資潮，人人都話你精我都精，散水先最正。散水方法無限種，總之用自己方法閃得就閃。樂視神話未「神」過就已玩完。大家唔知記唔記得，樂視創辦人賈躍亭2014年曾經捲入統戰部前部長令計劃貪腐醜聞，之後就牌面上冇事甩身。甩到身就鬆毛鬆翼，上年樂視就好似《喜劇之王》入面阿叔咁，飲醉酒企起身，邊掟銀紙邊大叫「我要英超呀，我要世界盃呀！」保守估計，樂視過去一年，單係買體育賽事轉播權投資，已超過77億元。錢係真金白銀使咗，但上客量又唔見踴躍，咁點回本？有方法嘅，好似英超咁，佢選擇賣畀nowTV轉播。不過樂視要回本，應該冇可能，點解要做蝕本生意？唔合理。香港近期無論商廈定地皮，都錄得天價成交，唔合理。其實大家有眼見，房企發債買地，禁！銀聯「買保險」，閘！內地越來越多招數，去阻截走資，咁樣走資渠道自然有價有市。所以大家都出盡力，天價搶世界各地，包括香港嘅投資項目，甚至內地人而家香港買第二層樓，要畀30%印花稅咪當「買路錢」囉。當然阿爺不停封路，但你要明唔少當權者一干人等，都有唔少資金喺手。內地冇錯係搞自貿區，但香港嘅DNA，我相信佢哋點抄都抄唔到。香港既係中國唯一一個後門，當權者，又點捨得完全封死佢。未來，全球應要抓住機遇，發展「買路錢」經濟。所以，而家香港最民主嘅，已經再唔係政治，而係自由市場。千頌C
http://fb.com/winbigwok本欄逢周三刊出
來源:
http://hk.apple.nextmedia.com/financeestate/art/20161109/19827388
收市閒情：一地都係染紅商廈
1 :
GS(14)@2016-11-16 05:44:19「大劉」劉鑾雄登七份頭版，大字標題講明早於2014年同呂麗君手已分。作為花生友嘅，最關注個銀碼。嘩！呂麗君收到20億元，「她現在已是超級富婆」。20億元係咩概念？係接近五分一幢「美國萬通大廈」，sorry，大家以後要改叫「中國恒大中心」。2014年華置（127）以天價125億元將美國萬通大廈賣畀恒大地產（3333）。正所謂嫁咗出去嘅女，就等如撥出去嘅水。大廈自然跟新買家姓，華置銷售及租務部最新發信件，話自今年12月1日起，華人置業集團位於「美國萬通大廈」嘅通訊地址，將會改為「中國恒大中心」。你話我崇洋都係咁話，你約個客上你office傾嘢，「你office喺邊呀？」「美國萬通囉！」你諗到咩？灣仔甲級商廈！而家改名啦，你話「喺恒大中心」。恒大少咗啲霸氣，冇咗個海景，問題唔太大嘅。咁聽埋英文，「My office is located at China Evergrande Centre」。輸晒，輸在原本個英文名好型叫「Mass Mutual Tower」。兩年前，大劉同呂麗君以及美國萬通大廈講分手。兩年後今日，前者要登報割席，後者亦改名重新出發。自從美國萬通大廈單刁後，就為香港商廈染紅之路揭開序幕。會德豐分別喺上年同今年，先後沽走One Harbour Gate西座及東座，買家又係中資。相信大家香港人都好體會到，中國人買嘢，最緊要係威。我買得你全幢，個名我話事。One Harbour Gate呢個名有意境？但意境可以當飯食嗎？所以西座已改名為更能突然買家精神嘅威武名字，就係「中國人壽中心」！至於東座，亦理所當然地要「祥祺中心」。大家都知，中資有唔少任務喺身，有啲係要走資；有啲就要幫阿爺做嘢，嚟香港插旗。That's why點解佢哋落香港掃貨，都係話要天價，甚至係癲價。嚟緊香港商廈易手成交，相信陸續有來。至於中區大廈名，我諗唔使到2047年，「中資」牌頭嘅商廈一地都係。至於「中環中心」呢個名，唔知幾時會成為歷史？千頌C
http://www.fb.com/winbigwok本欄逢周三刊出
來源:
http://hk.apple.nextmedia.com/financeestate/art/20161116/19834884
收市閒情：樓市需要一份浪漫
1 :
GS(14)@2016-11-23 07:50:30驚天動地嘅樓盤名往往令人讚嘆不絕，「咁你都改得出」。行業龍頭長實（1113）當然走在時代尖端，荃灣西新盤「海之戀」，一對小情侶行入去，「BB，我送『海之戀』畀你」。好多人話，要對住的士大佬講「海之戀」呢個名講唔出，我唔信你咁多年來，未試過喺壽司舖落order時講「我想要花之戀」。何況當你已被訓練到連「司機，我想去凱旋門」「我想去帝峰．皇殿」都講得出，「海之戀」？濕濕碎啦。地產商改名，講都尾都係標題黨，嗰期興咩咪改咩名。70、80年代經濟起飛，人人有個發達夢，銀禧花園、得寶花園，直截了當。到90年代至2000年，大家開始知咩係品味，聽濤雅苑、翰林軒呢類咁有文化氣息嘅盤名都係長實出品！到底香港樓盤名幾時開始走火入魔？個人認為，長實首個土豪feel樓盤，應該要數大坑名門，05年改嘅；新地（016）凱旋門同樣震驚全港，都係05年開始預售樓花。2005年，正正係中國滙改開始，人民幣升值，之後樓價嘅飆升；亦係呢年開始，樓盤就越來越土豪、浮誇。邪嘅係長實樓盤名改得越霸氣，出事機會越大。名門？豪宅？最新錄二手成交，1,752方呎單位4,080萬元易手，業主唔單止勁蝕700幾萬，成交價仲平過一手價。08年開售，明明唔喺何文田，但就扮係何文田地段嘅半山壹號，更加係九龍區首屈一指長蝕蟹貨豪宅！2010年開賣，聲稱「一脈相連九龍塘」，位於大圍但完全唔近港鐵站嘅名城，更堪稱新晉蝕讓王。不過對長實嚟講，只要一手開賣嘅時候滿足到市場「土豪」嘅需要，就OK啦。今次長實一改風格，「海之戀」唔土豪兼冇霸氣，唔似target內地客，仲好浪漫。樓盤名係時代嘅產物，浪漫，可能係市場需要。就好似東晉時政治腐敗，民間逃避現實，就寄情山水，發展出追求浪漫嘅時代一樣，都係市場需要。千頌C
http://www.fb.com/winbigwok本欄逢周三刊出
來源:
http://hk.apple.nextmedia.com/financeestate/art/20161123/19842421
收市閒情：為「公屋仔」鬧大交
1 :
GS(14)@2016-11-30 23:54:34房委會噚日公佈數據，話過半數公屋新申請者係30歲或以下，其中多達71%擁有專上、大專或以上學歷。冇錯，我男朋友James就係其中一個，我叫阿怡。「嘩！後生細仔就諗住公屋，冇大志！」「做人可唔可以有啲理想呀！」嗰日我同阿媽講，James已申請到公屋，我終於知道文革大概係點。每星期日同屋企人食飯，都你一句，我一句，公屋好雜、公屋冇前途……今日我終於忍唔住，「喂！明明佢哋就公屋養大我！」「作反啦！女生外向啦！」我阿媽呢個tone，明顯嬲到想殺人。「我唔係幫住佢，但你哋都唔明！」「我唔明？我哋都係為你好」。「好，你日日係咁話公屋點點點，但James得嗰29歲咋！係，佢事業啱啱起步，人工都唔差。但今時今日，就算節衣縮食，當幾年後儲到幾十萬首期，過幾年？過幾年首期要多幾十萬啦」。大家有眼睇，呢幾年，首期嗰條線，就好似你放狗時咁，你係咁搵嘢引隻狗跑，但無論隻狗點努力，你都唔會俾佢追到。我今日訂儲錢目標？個目標仲假過K11啲北極光。「女呀！我係話佢冇大志！」聽到呢句，我更扯火，「咩冇大志，佢每日都好努力做嘢，可能過多幾年，佢事業真係起飛呢？但今日唔知聽日事，佢申請定層樓有咩問題？係未雨綢謬咋，你明唔明今時今日，搵到個思想成熟啲嘅男仔，唔還神都要祈禱！佢識得兩手準備，就算未必發到達，最後應該唔會餓死我囉」。聽到呢度，我阿媽仍想盡最後一口氣去駁我，「咁我都係唔想你辛苦！」「媽呀，住公屋租平；買私樓，係要供㗎，你叫James點儲錢做生意發圍？層樓一上身，注家囚終身！再者，我要一齊供，你覺得邊個辛苦啲？」其實我又點會唔知阿媽諗咩，佢一定係想我換畫。自從香港土地問題越來越嚴重，公屋就聚居咗一班有遠見、儲到錢嘅後生仔……相信大家都知美國矽谷，世界級科技企業搖籃。矽谷之所以做到矽谷，一字記之：氣氛。將一批最有理念、有理想嘅科技人才眾埋一齊，結果就成為首屈一指富貴IT人之都。千頌C
http://www.fb.com/winbigwok本欄逢周三刊出x
來源:
http://hk.apple.nextmedia.com/financeestate/art/20161130/19849558
收市閒情：劏房變龍床俊和成佛在望
1 :
GS(14)@2016-12-01 08:01:49俊和，記住佢，股票編號711。屯門推新劏盤菁雋（TPlus），夠膽死最細單位得128方呎。Fine！係冇人性㗎啦，不過你做生意，有供有求我吹你唔漲！離譜嘅係，你走去將層樓類比做宿舍？同我講「就算皇帝都係瞓張床，紫禁城大到呢，佢都未去過……而佢擁有的空間是無限」。喂！係好嘢喎，能夠將空間問題轉化為哲學概念，咁香港人「天為被、地為床」得啦，樓？唔使㗎！道行咁高，可以成佛㗎啦！好啊！你同我講宿舍，睇番2000年立法會文件，香港嘅大學學生宿舍標準係，單人房面積約80呎；雙人房約150呎。當然之後有啲雙人房變咗三人房，人均面積係細咗，但呢個size係未計公家用嘅洗衣房、廚房、Gym房、common area！你同我講「宿舍唔坎坷」，宿舍講緊租金係1萬蚊多啲，我講全學期；家陣新樓都係1萬蚊，我講緊1呎，仲未計每月管理費。喂！宿舍梗係唔坎坷，但供樓真係好坎坷。香港人真係好慘，地產商會同我講：「皇帝都係瞓張床，你瞓囚室夠」，然後食咗我副身家；政府會同我講：「香港人要住，郊野公園你唔使要㗎啦，然後橫州就留畀商家；喂！你不如同我講，「食完飯都係痾，不如唔好食」「人出世就係等死，你不如早日上天家」。Oh Sor！不過陰宅同陰宅一樣，都係要同地產商買！唔好兩頭望快快速速磅！在商言商，我明，但sell嘢時，與其混淆視聽、指鹿為馬；不如講一句「我係賣劏房，慘得過有人買」，反而來得坦白。 千頌C
http://fb.com/winbigwok
來源:
http://hk.apple.nextmedia.com/financeestate/art/20161201/19851095
收市閒情：「小店膠」的神邏輯
1 :
GS(14)@2016-12-07 07:56:35「香港人撐小店！」呢句口號每隔一輪就會有人嗌，但「小店膠」嘅出現搞到我好慘，又係我，阿James。最近唔知邊個天才，facebook list晒美心、大家樂（341）、太興、稻香（573）旗下餐廳名單，話大部份都係「又貴又難食」。「阿怡，一陣去Cova食tea好唔好？」「好喎！」我以為實冇死，點知……「都係唔好，我上網睇Cova都係美心，畀咁貴食美心咪好灰。總之大財團就唔食！」有常識嘅人，無理由今日先知唔少品牌都係幾個集團揸住；讀過吓書嘅人，都知唔少海外品牌進攻海外市場，都會搵當地品牌合作；有正常觀察力嘅人，都知品牌為吸納唔同客戶群，會有唔同line唔同檔次嘅副牌。「吓？北京樓原來係美心？咁即係好似美心咁難食啦？但收貴咁多，唔食啦！」呢啲神邏輯如果係真，美心一早好似北京樓拎咗米豬蓮啦！好唔好食，竟然唔係憑自己味覺判斷，而係睇集團大定細？你問點解要罷食名單上嘅餐廳？「因為大財團囉」。點解要反大財團？「因為要撐小店」。大家唔鍾意領展（823），係因為佢對小商戶無情無義，唔係因為佢係大財團；唔鍾意大家樂，係因為佢對員工太刻薄，唔係因為佢係大財團。無論大集團定小店，如果犯以上罪名，都應鬧則鬧；有心有質素有品嘅，就應讚得讚。係嘅，香港唔少小店，已經喺癲價租金下俾人踢出局，不過撐還撐，可以有質素地撐。香港應該係大集團小商戶並存，大家要諗點幫到有質素嘅小店生存，而唔係針住一兩個大品牌有理無理吹雞。撐唔一定代表要反，盲目無的放矢為反而反，對香港無功，只會為人口實。既然阿怡話唔食Cova，我決定就佢：「怡，下星期周年紀念，我book咗中環Amber。」怡呢個時候心心眼，佢成日話貴一貴都要食一次，「不過大財團嘢，你唔啱，我哋都係食番樓下間茶仔算」。千頌C
http://www.fb.com/winbigwok本欄逢周三刊出
來源:
http://hk.apple.nextmedia.com/financeestate/art/20161207/19857160
收市閒情：逃避雖可恥但有用
1 :
GS(14)@2016-12-21 23:40:35中華上下五千年文明，近年喺創新方面成就係值得被肯定。我冇講錯，假雞蛋、假豉油……有邊樣唔令人嘆為觀止，震驚全球唔知幾多億人。展望將來，本人大膽預測，中國喺科研方面將再上另一個高峯。今時今日，你食碗叉雞飯要打卡，然後hashtag「#減肥咩嚟㗎」；睇書要打卡「#今天是文青」；跑步更加要打卡「#我喜歡堅持」、「#汗水不會白流」……如是者，唔知雞先定蛋先，馬拉松近年成為中國嘅潮流，絕大部份人跑完都會post上網展示陽光嘅一面。單係今年，中國已搞咗超過300場馬拉松；出年更可能達500場！睇返2011年，只係有22場！就係咁，聰明嘅中國人發現了搵錢新戰線──代跑產業！
只要你上淘寶，就輕易搵到專業代跑。你想將跑步App cap圖放上網？親！淘寶幫到你「10元10公里、20元半馬、40元全馬」；你想真人參加馬拉松？親！「450+個跑步勇士，遍佈中國各地，90%的人可以完成全程馬拉松，幫您實現私人訂制夢想。」甚至你想某段路加速暴走？親，明碼實價，有錢就沒問題了。自古請槍多的是，但請槍請到有產業鏈，將一個純為虛榮服務嘅行業，光明正大集團式經營，相信只有中國人先做得出；更兒戲嘅係，呢班「跑步勇士」唔理好醜，但求做跑手！剛剛周日深圳搞嘅馬拉松，女士組跑第二同第十嘅健兒，影相出嚟竟然係兩個麻甩佬！喂！做騙子都畀啲專業精神呀！至於今個月10號廈門半馬賽，有一個代跑者猝死！彷彿任何好事落入中國人手上，都會變質，甚至變成悲劇。
■深圳馬拉松女子組號碼係B字頭，但跑第二同第十（上及下）嘅都係男人。 互聯網
■親！淘寶代跑服務好全面。 互聯網
不過最近睇過一篇文章，講到中國手機支付行業行得咁前，原因唔係勇於創新，而係因為偽鈔太多，手機支付唔搞唔得。同樣，當請槍騙子殺入中國馬拉松，已經有人研究要用生物識別技術核實身份！為封殺騙徒，反而催生科研進步；呢啲叫咩，叫「逃避雖可恥但有用」！中國今時今日科網發展咁快，騙徒，絕對係功不可沒。一個痴線嘅國度，總會孕育出一啲痴線嘅成就。千頌C
http://www.fb.com/winbigwok本欄逢周三刊出
來源:
http://hk.apple.nextmedia.com/financeestate/art/20161221/19871729
收市閒情：年度財金風雲人物
1 :
GS(14)@2016-12-28 08:11:05一年容易又年尾，係，又要應節數榜。今年柒事、喜事、怪事千奇百趣一齊來，驀然回首，風雲人物就在fb處！即數今年財金風雲人物！（1）火爆CFO李書沸（Chris Lee），百富環球（327）CFO李書沸上榜無懸念，抱住分析員只許讚不許踩嘅一言堂精神，喺分析員會議用四個「Out」喝走麥格理分析員！呢一喝，喝到分析員離場；喝到其他大行都話要資金離場，「公司企業管治有問題」；喝到散戶止蝕離場，六日內蒸發6億元；最後李書沸本人都要quit，四個「Out」全中！李書沸真係大預言家。（2）蕭若元，講到大預言家，冇可能唔提蕭生。「特朗普會慘敗」、「英國會留歐」、「梁振英有機會入閘」，蕭生可以話係黑天鵝製造者！不過又咁，能夠次次穩定地反方向中，都係一種實力！正所謂「參透最新蕭析，全家就不會窮」，蕭生預言2017大牛市，大家明啦！多謝燒山！燒出好嘢！（3）章魚城，亞洲神童張如城，今年復出推全新單曲「紅日之火」，再一次創造另一個事業高峯，講嘅當然唔係音樂方面嘅成就，而係預知能力！經我細心統計，2001年到2011年間，每次佢一出現，股壇必有巨變，幾個月內股價跌三至五成不等！至於今年，佢5月復出，6月英國就脫歐了?（4）甘比，由記者到今日正式有名有份成為劉太，仲要分享華置（127）逾200億元股份，未計私人持有嘅物業，勵志。更重要係呢單新聞高據連日蘋果動收視榜首之位！劉太冇可能唔係今年風雲人物！（5）蕭正楠，同樣係勵志故事，翠如BB爹哋做大股東之一嘅聯旺（8217）今年上市，成功譜出一段建築妖股升仙嘅故事，4月以0.26元上市，11月最高升到23蚊；更重要係，爹哋拎住4.68億股，賬面市值106億！結果蕭正楠，就好有機會成為百億千金婿，而自從佢同翠如BB一齊之後，劇一套接一套，真係今年大贏家！
千頌C
http://www.fb.com/winbigwok本欄逢周三刊出
來源:
http://hk.apple.nextmedia.com/financeestate/art/20161228/19878587
收市閒情：商台叱咤七大預言
1 :
GS(14)@2017-01-05 08:06:16每年1月1號睇叱咤，係一種情意結，邊個拎獎邊個喊關你鬼事？不過呢幾年睇叱咤，望住台上啲歌星，就好似拜年見親戚咁，幾熟口面，不過好多名都叫唔出，只係咁意去吓啦。下年叱吒會點玩其實預計到：（1）只要你聽過嘅歌，全部會入「叱咤十大」！聽過嘅歌可能佔6首，未必知歌名，但唱到時會叫：「呀！呢隻我識！」另有一至兩首歌，你好似有啲印象；剩低嘅係你聽都未聽過。（2）一定會有雞蛋。有矛盾就有收視。?家全球興對立，商台亦捉緊潮流，將歌手分為高牆同雞蛋兩派，雞蛋一定會贏！今年嘅「雞蛋」係欣宜，下年？佢做咗「女神」㗎喇，變成高牆，光環當然會掉下來。（3）坤哥變番「雞蛋」。坤哥上年係「雞蛋」，今年變「高牆」。不過放心，香港根本冇星，下年拍硬檔做番「雞蛋」。另外，相信坤哥今年一定有一首歌，以「雞蛋」做theme。（4）「獨立樂隊」湧出嚟。商台一向鋤強扶弱，只要你係「雞蛋」，勝算就會高過人！預期會有更多樂隊、甚至歌手宣佈「我要獨立、我有態度、我要做Indie」！（5）Eason會唱錯歌詞。每年叱咤，Eason都幾乎一定會唱錯歌詞，呢個應該係傳統嚟嘅，下年相信會係一樣。（6）女歌手金獎無誤：一定一定一定係容祖兒！（7）認真便輸了。曾經講過，「大家就以為『香港小姐』前面加香港兩隻字，就真係代表香港」；拎「叱咤十大」，唔通隻歌真係叱咤風雲咩（如果係咁，2014年「今天我」早就應該拎獎了）。想知一年邊十隻歌最受歡迎？每年Moov、KKBox都有年度排名，大數據比小圈子「選舉」來得更精準。呢個小圈子「選舉」以前大家鍾意睇，係因為商台識sell，sell到大家可以喺電視睇到歌手罕有嘅「真性情」。今時今日，歌手要賣「真性情」，fb、IG自己都識「造」，而且來得貼地。所以叱咤頒獎禮早已變成一個純粹情意結，仲會睇，好多時係出於咁嘅心情：「係咁意，都睇吓啦」。千頌C
http://www.fb.com/winbigwok本欄逢周三刊出
來源:
http://hk.apple.nextmedia.com/financeestate/art/20170104/19885460
Next Page