收市閒情：當善款變擦鞋基金
1 :
GS(14)@2017-01-12 08:01:21■香港救助兒童會早前被踢爆背後抽起部份善款作行政費。 資料圖片
「每5秒鐘，就有1個小生命無奈離世」，睇到香港救助兒童會（STC）一個又一個令人悲痛嘅故事，配以震撼嘅畫面，相信已令唔少人慷慨解囊。捐錢當然係好事，不過背後佢不單抽起行政費，當中仲有啲錢可能已經成為「豪食Ritz-Carlton擦鞋基金」了。上周二《蘋果日報》頭版報道，STC大花筒，每花費100元，只有67.7元作公益用途。機構當然例牌否認自己亂揈錢，不過事實係點？用一個例子答你！STC喺2016年底搞咗個籌款晚宴，當日星光熠熠，當然STC大金主徐子淇、大使甄子丹都有出席。你可能以為慈善機構晚宴會場頂盡都係普通酒店宴會廳，咁你就錯了！當日晚宴假座Ritz-Carlton鑽石廳舉行！你又可能會話，係咪有酒店sponsor？不過據消息人士透露，STC的確曾經同Ritz-Carlton傾過sponsor，但酒店唔制。STC回覆指，「酒店以慈善優惠價出租場地，並豁免部份場地佈置費用。我們認為酒店是較適合的場地，而今次所籌得的善款數字，亦遠較過往多，證明這個決定是正確的」。咁就要講多次，STC大金主係徐子淇，如果以商業機構去類比，徐子淇等同老闆。當然，徐子淇本人就冇要求要去Ritz-Carlton搞活動，之但係世上有唔少「識撈」嘅打工仔。聽聞慈善晚宴當晚，加插一個超奇情嘅特別環節，就係唱生日歌！晚宴喺11月23日舉行，而11月29日就係徐子淇生日。明晒啦，聞說當晚救助兒童會總幹事方曉明，仲喺台上領唱生日歌。消息人士就話，上星期報道一出，STC一日內就收到超多電話要求退回捐款；方曉明都趕緊救火，親自打電話畀唔少捐款機構負責人解釋，有收到電話嘅負責人就話，救助兒童會方面話香港人「記憶好短」，只要大家不再回應傳媒，就唔會記得。香港人冇錯係善忘，不過一個人或一個機構，只要衰過一次，都會喺Google「名留青史」。千頌C
http://www.fb.com/winbigwok本欄逢周三刊出
來源:
http://hk.apple.nextmedia.com/financeestate/art/20170111/19892721
收市閒情：林鄭「故宮式」玩fb
1 :
GS(14)@2017-01-18 08:11:23一個人處事手法係點，由佢點玩facebook（fb）多多少少都有迹可尋。幾日貼一次新手袋相，加句：「今天要獎勵自己」，港女格表露無遺；「他不是男朋友，但比男朋友更親更重要」，仲唔係專業觀音？
That's why老闆們請人前會先scan吓求職者fb；而又that's why大家都認為玩fb玩到出神入化嘅財爺，夠貼地兼民望高！林鄭月娥日前嘅參選宣言，強調公眾參與、強調社會共識、強調適切回應……好似好堅咁，咁不如睇佢點玩fb。
Oh，Sorry！林鄭是沒有官方fb的，不過佢唔係冇玩㗎！林鄭個「網絡戰戰術」，四個字：隔山打牛！你去劉鳴煒fb，見到佢星期六po咗幾張奶媽去「親善探訪」嘅相（留意番，盛傳Package Lau將出任林鄭競選辦副主任）；競選辦主任陳智思星期日又幫奶媽po行山相。咁樣「隔山打牛」嘅政客應該係香港獨有！消息人士就話，林鄭公關團隊策略係，自己唔開fb，但就發相畀朋友po，然後私下通知友好媒體發放消息，話咁樣易控制輿論。噚日我打過去競選辦，問佢哋幾時開fb，佢哋都係話：「總之暫時就未有啦。」林鄭處理社交網絡嘅手法，最簡單講，其實佢咁玩fb，即係等如「假溝通、假諮詢」。之前拍板起香港故宮，然後事後再開放公眾諮詢，擺出一副「起我就起硬，最多呢幾part仔留畀你班友話事啦」嘅態度，然後大大聲聲話「我做咗諮詢啦」。今日搵自己友po親民相，網民連直接畀like畀嬲呀奶媽都冇機會，難道咁就當同網民溝通過？今日因怕「嬲」，怕見到唔想見到嘅留言，就索性唔開fb；他日當選後，遇到任何好可能惹來批評嘅政策，係咪因怕咗反對聲音，就索性「故宮式」做法，唔諮詢就拍板？想當年梁振英要選特首，都扮晒嘢聽民意。今日林太強調公眾參與、強調社會共識、強調適切回應……講咁多嘢，不如開番個fb，融入網上500萬港人用戶嘅世界先啦。
千頌C
http://www.fb.com/winbigwok本欄逢周三刊出
來源:
http://hk.apple.nextmedia.com/financeestate/art/20170118/19900242
收市閒情：「我職業係KOL」
1 :
GS(14)@2017-01-26 18:06:47今時今日，唔使識marketing，但只要你識得marketing自己，你都可以做到所謂KOL。任憑你係素人、肥人、窮人定衰人，facebook儲夠十幾廿萬like；Instagram有一萬幾千follower，大把品牌自動送上門，廣告客戶令你身家一鳴驚人！無他，電視、平面廣告冇人睇兼無數得計，科水畀所謂KOL，出一隻post後feedback全部有晒big data，廣告同事交畀老細時又好好睇睇，「嘩！我哋今次campaign好成功呀！有咁多咁多like」。當然市面有好多KOL，真係好努力做到佢份job，因為專業所以專注，全方位幫客吸like呃like。不過你試吓同啲廣告業內人事傾多兩句，你就發現唔少「女王KOL苦主」。如果去食老麥係笑容免費供應，咁樣「同得啲KOL夾嘢，俾佢西面就預咗」。冇錯，呢句來自關公界人士肺腑之言，「其實我畀佢西面都冇所謂，但連對到個客都係西面當say hi，然後就行走，呢啲係個人修養問題」。唉，睇開啲啦，人哋係女王，你見到佢真人，行運行到落腳趾尾喇!再者KOL同品牌之間，明買明賣，講修養略嫌虛偽。好喇，marketing兄弟又講兩嘴，「你點會估到，有人今日幫我公司出個post，宣傳呢部機；然後第二日一個轉身射我三分波，同佢啲粉絲明示暗示，前一日出post部機其實唔好用呀」。人家是真性情，你懂甚麼？冇錯，喺網絡世界真性情係大晒，大到做KOL可以咁樣。講多次，有好多KOL都係有禮貌有品，但亦有人一朝得志，活喺自己世界，一句「我係KOL我有fans」，就唔記得咩叫禮貌、咩叫有品，喺玩真性情嘅世界，好易會露底。
KOL全寫「Key Opinion Leader」，呢個朵理論上講緊一個人嘅影響力大到可以影響埋其他人。邏輯上做KOL係被動而非自封，如果人哋問你做邊行，你講一句「我職業係KOL」，感覺上就好似你同人講，「我職業係聖人」一樣。千頌C
http://www.fb.com/winbigwok本欄逢周三刊出
來源:
http://hk.apple.nextmedia.com/financeestate/art/20170125/19907495
收市閒情：富豪綁架案的啟示
1 :
GS(14)@2017-02-02 02:33:04踏入雞年，正當大家同一班親戚鬥智鬥力、或討論緊看更有幾好面口之時，世界以至香港都發生緊大事。唔講美國，我講香港！內地「明日系」舵主、好可能本名叫「蕭建華」嘅肖建華，傳因涉官場貪腐案，今次連洗頭艇都唔使坐，俾人挾返大陸，仲傳係黑幫收中共order幫手挾！「嘩！係咩？碰！關我乜事？」喂！淺白啲roundup，其實係「大陸搵黑幫綁架」，事關重大呀！大到話你聽，李波事件再唔係單一個別事件，用大陸字眼，叫做「新常態」；大到係今後香港每一個人，都有「被帶走」嘅機會；大到係「一國兩制」再一次被證實玩完。當然你可以話，冇人冇物冇事冇幹係唔會得罪大陸政府，咁咪唔關我事囉！跳起Yeah！咁閣下就真係天真嬌了。講多個例子，上個月中國私募一哥徐翔，去年因涉內幕交易受查，結果上月判監五年半，罰款110億人仔。你可能話「抵死啦！炒內幕！」不過投資界靠內幕炒股大有人在，點解只係拉佢先？話說2015年股災，市場所有資金都要衝去救國，當時徐翔都有被邀請去參與救國大軍，不過呢條友竟然大膽到Say No，話喺救市過程中，難免會接觸到關鍵嘅內幕消息，對私募基金旗手來講非常危險，稍有不慎就會萬劫不復。一句No下場就落得如斯田地。香港一直奉行法治，條例點寫就點判；不過中國式法治其實係人治，黨想點判行先，再搵啲條例塞落去，真正欲加之罪何患無辭。當一個人喺香港話挾就挾，證明黨嘅意志已凌駕一切法律，更證明香港法治已赤化。當日有人唔聽話，結果係被人捉痛腳重判；以後又有邊個保證到，喺香港從商嘅人，唔會受到相同遭遇？一國兩制？哈哈！香港現存嘅優勢係市場自由及所謂嘅一國兩制。當兩制消失，資金要投資嘅，去上海唔好？香港，仲剩啲咩？唔使50年，繼續溫水煮蛙，烚吓烚吓，香港分析師係咪終有日都要聽話「不准唱啖人民幣」？千頌C
http://www.fb.com/winbigwok本欄逢周三刊出
來源:
http://hk.apple.nextmedia.com/financeestate/art/20170201/19913983
收市閒情：香港「樓奴」大檢閱
1 :
GS(14)@2017-03-03 00:51:42香港樓市已經炒到high翻天，樓價進一步創新高，地價又俾中資狂掃染紅！最近有個「智者」話「有樓有高潮」，呢種MK文學真係唔識欣賞；作為有為青年，應該欣賞多啲古代詩詞，所以我會引蘇軾嘅《水調歌頭》其中一句——高處不勝寒。政府統計處噚日公佈2016中期人口統計，當然即時搵到底有乜數字，係可以用數據說服你「樓市好危險，快點回去火星吧」，終於俾我搵到幾條數OK有趣。數據一：住自置物業嘅家庭比例越來越少，由十年前嘅52.8%，減至最新48.5%。數據二：住自置物業但冇按揭，即係已供斷嘅比例越來越高，由十年前佔自置物業總家庭數目52.2%，升至最新65.7%；掉轉講，仲供緊自住層樓嘅人相對少咗，只有34.3%。數據三：自住單位係全租（唔計公屋）嘅比例係咁升，由1996年嘅10.3%，升至2006年12%，到2016年16.4%。自置物業比例跌，租私樓嘅比例升，買唔起樓肯定係原因之一。你可能會問，喂供斷嘅人比例多咗，樓市係唔係冇咁易出事呢？少年，太年輕了，呢班人自住層樓供斷，即係有閒錢去做其他投資，可能買多幾個物業。睇96年數據，當時自置物業家庭有82萬（佢冇細分有冇造按揭），到97年樓市跌到一個點係有負資產尋死！?家自置物業家庭總數122萬，銀碼、樓價完全天與地，要出事起上嚟都好可以好甘。另一樣反映到嘅係，香港有16%人、即係41萬個家庭，佢哋捱生捱死，將三成人工交租畀業主之餘，仲要睇業主面色；另外有近42萬個家庭係樓奴，單位可能只係一個劏房！曾俊華講，希望大家建立「一個似番香港嘅香港」，但現實係香港本來已經連上車都搞唔掂，樓價仲要不停升，中資地又不停搶，樓價已回不去了。想問問候選人，喺一個似番香港嘅香港入面，香港人係咪仍然不停要「水調地主」，然後繼續反智地「有樓有高潮」？千頌C
http://www.fb.com/winbigwok本欄逢周三刊出
來源:
http://hk.apple.nextmedia.com/financeestate/art/20170301/19943238
收市閒情：港鐵教會港人的事
1 :
GS(14)@2017-03-23 06:24:06港鐵（066）自1975年立足香港，40幾年嘅建樹，又點止「心繫生活每一程」咁簡單呢？多得港鐵，香港人嘅得着，遠遠超出所慳嘅腳骨力。1）港鐵繁忙時段逼爆，人人面貼面。本人比較矮，夏天時啲人大汗叠細汗行入車廂，舉高隻手，嘩！嗰陣味點？咪臭囉，但?家大個女，N年訓練有素，我唔驚啦，抗臭力練成！2）港鐵對港人期望高，最高載客量一直定於每平方米容納6個人，即係150呎嘅單位可以企90個人！咁你明白點解新盤啲單位越賣越細，我哋連港鐵都逼到入去，世上根本冇嘢難到香港人了！3）2007年地鐵出咗個廣告，係咁講「兩鐵合併，車費即減」，當然現時平均本地車資已貴過當年逾15%，過去7年年年加，累計加幅逾25%。你鬧佢呃你？其實港鐵用心良苦，想講你知「雙併貴過單併」呢一個經濟學永恒現象，連經濟學老師都做埋，真係春風化雨多謝晒。4）港鐵昨日公佈每程八達通車費回贈3%，取代回程九折。聽落去「正呀！每程都有折，仲唔係減盡生活每一程？」不過，大家都知港鐵最識玩數字遊戲玩formula，個「可加不可減機制」呃咗大家咁多年，大家都學精識計數。當你每程10蚊，舊優惠下，來回加埋係19元，喺新「優惠」下，兩程加埋係19.4元，仲未計今年港鐵好大機會又加價！講真，好在港鐵教香港明白數字遊戲嘅邪惡，唔會再俾人呃。5）睇人口報告，2016年靠港鐵返工返學人數已去到144萬，比10年前多出四成人，成為香港最主要交通工具。不過港鐵呢10年間幾乎年年加價、成日delay、高鐵超支、焗我埋單、蝦我唔識計數，最乞人憎係唔鬧水貨客，反而鬧我個背囊阻住地球轉！不過咁又點？佢食硬你嘅！多得港鐵，香港人條底線先可以越來越低。有優惠本來係好事，但港鐵再多嘅優惠，再多嘅數字遊戲，都抵銷唔到香港人多年積落嘅唔gur。千頌C
http://www.fb.com/winbigwok本欄逢周三刊出
來源:
http://hk.apple.nextmedia.com/financeestate/art/20170322/19965689
收市閒情：百般「鋒味」在心頭
1 :
GS(14)@2017-04-05 23:45:27有人講過，世界上只有酸、甜、苦、辣、甘、澀、鹹七味，冇一種味可超出七味框框。不過近來炙手可熱、人稱Chef Lé mon嘅名廚謝霆鋒，就成功搵到幾乎失落嘅味道——鋒味！謝霆鋒以謝氏獨門chok住入廚技巧，煮出難以筆墨形容嘅「鋒味」，係因為佢喺投資市場跌撞過。（1）揈蕉。能夠單手揈蕉剝蕉皮，靠嘅唔係練習，係歷練！Chef Lé mon身為擺花街舖王，單喺擺花街就有5個舖位收租。大家都知零售吹淡風，佢持有嘅擺花街26號地舖，舊租客原本以約20萬元租用，上年5月滿約後丟空半年，但Chef Lé mon有一日喺廚房揈蕉時，隻蕉無聲仿有聲點醒佢：Lé mon，揈太大力隻蕉會斷，太進取得不償失呀！一蕉驚醒，佢隨即減價一半，成功租出。謝霆鋒2013年2月以1.17億元購入上述舖位，以月租10萬元計算，回報率只有約1厘。（2）磨刀。所謂十年磨一劍，Lé mon入廚磨刀多年，終於有人見識到佢嘅磨刀功。2014年10月佢正式殺入股壇，以每股0.35元買入3.5億股漢傳媒（491）做大股東。你見佢入股後盤數蝕多咗，想笑佢磨崩刀？錯喇！漢傳媒業績崩唔崩唔係重點，重點係Chef Lé mon拎住漢傳媒兩年，上年底楊受成入股做大股東，佢先係把刀嘅主人，當你仲喺到笑Lé mon磨崩刀，其實佢拖緊時間等上主菜！謝霆鋒當年用1.23億元買入嘅漢傳媒，現市值1.07億元，累積蒸發13%。（3）獨特宣傳手法。大家睇Chef Lé mon烹飪功架，你會focus喺淋過毛巾嘅雞蛋仔，你會睇到佢用內功切定威靈頓牛扒，但有冇留意佢點壓碎餅乾？作為老恒和釀造（2226）代言人嘅佢，壓餅當然用老恒和個樽，Chef Lé mon用巧手去碌，啲餅唔單只如威化般乾脆，仲會有多一種味，無誤，當然叫「鋒味」。老恒和自9月底公佈搵謝霆鋒代言，股價由4.6元先跌去4.1元左右，再抽上5蚊樓上，跌過撞過，最新收報4.6元。總結：鋒味，甜中帶辛、辛中帶甘，就好似散戶喺魚缸、樓市七上八落嘅心情。
千頌C
http://www.fb.com/winbigwok本欄逢周三刊出
來源:
http://hk.apple.nextmedia.com/financeestate/art/20170405/19979987
收市閒情：通告早洩 心情忐忑
1 :
GS(14)@2017-04-13 00:23:04「James，Check WhatsApp，即刻！」隔籬位Peter講咗呢句後，就埋頭苦幹工作，我望一望WhatsApp，就知Peter好忙落盤，WhatsApp全文如下：雪球流出。然後附加一個pdf，原來係聯眾（6899）獲全購絕密通告，要約價4蚊，當然，份通告全名叫「疑似全購通告」。我WhatsApp Peter：「買咗未？」獲覆「3蚊衝咗」，我二話不說，連潛在買家都未知係邊個就衝咗先算，結果，我跟，3蚊衝。買完心安理得，可以認真做功課，研究通告，「喂！收購方之一掌趣停牌ing！掂啦！」此時聯眾報2.8元。「冇嘢嘅，體育之窗本來就係聯眾大股東，合理呀！」此時聯眾報2.6元。「100天線3.074，就算回都唔係回好多，唔驚唔驚」聯眾開始抽返升上3.01元。「最緊要係咩呀，係通告左上角四隻大字：嚴格保密！」人類有一種壞習慣，硬係覺得傳聞就係真，認真公佈就係假。講得「嚴格保密」，仲唔係堅料！說時遲，那時快，聯眾誇啦啦，3.05元、3.10、3.20、3.25！Peter又嚟料：「我沽咗，費事一陣中午停牌。」我份人唔貪心，我mark3.22走，走唔到；低兩格3.2走，走唔到，然後，沒然後了，停牌。「本公司股份已自二零一七年四月十一日上午十一時四十一分起短暫停牌，以待刊發有關本公司潛在全面收購建議之若干謠言之公告。」謠言？你見份百度即刻剷咗份通告，就知好真啦；你睇圖？佢3月抽高嗰浸，應該係第一批春江鴨入市啦？謠言止於智者，我咁智都止唔到我，即係唔係流啦。「James，聽人講係流，唔好呃自己啦。」我淆底，但一日未出通告，都唔知我係春江鴨定水魚。更重要係，我買入價平過黎瑞剛嘅4.44元，最少我贏咗黎瑞剛。原來，中港融合之後，港股有咁嘅玩法。鼓勵香港人上多啲大陸網站？聯眾做到了。千頌C
http://www.fb.com/winbigwok本欄逢周三刊出
來源:
http://hk.apple.nextmedia.com/financeestate/art/20170412/19987445
收市閒情：FB出招網上掃黃
1 :
GS(14)@2017-04-28 02:09:45今時今日做網店要快速起家，識玩一定玩Instagram。你開IG search吓hashtag「#hkonlineshopping」，成千上萬香港網店一覽無遺！你想買新Air Jordon？咪Search「#hkjordon」；你想搵修甲舖，咪搵「#hknail」，網購消費真係Easy執！早排一間經營餐廳嘅上市公司CFO，話佢哋想吸引後生仔兼吸遊客，問我平平哋點搞好，「你哋啲嘢食賣相都幾靚，有啲仲幾有Gimmick玩著火，影到靚靚仔仔放上IG，再加#foodpornhk、#discoverhk…一大堆hashtag，用少少錢落埋IG廣告，自然有人見到啦。」「原來後生仔咁玩？」我唔是做Marketing，但作為資深IG用家，我可以肯肯定同大家講，IG係一個好膚淺嘅世界，只要靚，我話知你係普通人定係Hard sell廣告，大家都樂意望一望，更重要係，我係堅試過跟著IG食好西，「嗰次見齊昕IG post個High tea好似幾靚，我咪同朋友跟個Location去搵間餐廳食，係得㗎！」冇錯，識得用IG hashtag係好好用，特別係想搵生意…有一個Hashtag，可算係近日同「AA制」一樣咁多人討論嘅keyword－－PTGF（係呀，文章去到呢度，先到戲肉）。循例都要解釋吓，PTGF係「part-time girlfriend」簡稱，中文「兼職女友」。顧名思義，即係受薪女友。至於呢四個英文字母，更加係IG上其中一個非常熱門嘅Hashtag，最少有超過12萬張相落咗呢個Tag。其實講咩PTGF呀，懶英文懶高尚，說穿了，其實咪即係援交。呢班少女就將IG當係援交平台，貼相兼列明「職責範圍」，明碼實價。只要你搜尋「#PTGF」，IG就即時變成圖鑑，呢班妹妹為咗錢「食飯行街300」；為咗錢「攬加錫200」……係，真係癡咗線！有啲相過份到……你真係以為自己睇緊咸網。話說，近期網上就流出一份名單，List out晒一大堆做PTGF嘅女仔相兼賬戶，甚至真實對話！當中更有唔少係十幾歲嘅學生；事件最後更令PTGF從業員反擊，網上公開大批「恩客」嘅相。呢兩份文件，對「業界」嘅震撼程度，可算係直逼「巴拿馬文件」。正所謂樹大招風，呢幾日咁多人討論#PTGF，已令Facebook官方高度關注！最新IG已經喺今日移走#ptgf、#hkptgf，即係你再搜尋呢兩個Hashtag，將會一張相都搵唔到！本人就親自問過Facebook香港，佢哋就話不時都會審查IG上嘅內容，所有不雅內容都會移走。當然，你今日鏟走一個#PTGF，仲會有千千萬萬個變種Hashtag出現，不過，至少可以畀呢「行」靜一輪。千頌C
http://www.fb.com/winbigwok本欄逢周三刊出
來源:
http://hk.apple.nextmedia.com/financeestate/art/20170426/20001408
收市閒情：銀行Sales的辛酸
1 :
GS(14)@2017-05-13 01:29:43我係H銀行小員工，好聽啲，就係「我打銀行工嘅。」說穿了，咪又係Sales一個。不過，做Sale屎做到，我要食埋自己Sell嗰嚿屎，呢啖氣我真係啃唔落。你話有咩理由，有個Plan（以下統稱S Plan）唔賣得，全世界就自己畀錢，真金白銀買番個Plan當交數？我份人就好均真嘅，食得鹹魚抵得渴，每季跑基金數，幾千萬，咪跑囉，我又唔係跑唔到！幾百萬Annual premium（全年保費）嘅保險？都得！其實，銀行啲客真係好有錢的。不過，S Plan真係搞唔掂！先講呢個Plan點來，話說我間行，就同「B保險公司」簽長約，如果某個Plan一年跑夠數，呢間保險公司就會畀番近9,000萬我間行。大嗱嗱9,000萬，佢梗係死捽爛捽捽到我連去捐血嘅資格都冇。個問題係，呢個Plan一年3,000萬保障，一年大嗱嗱要畀幾皮嘢！問世間？有幾多客會畀幾皮嘢一年銀行，去買一個無錢收番嘅保險，白畀的！仲有，要記住，係冇保險Agent跟你的！
Fine，Sell屎係作為Sales份糧包嘅，但Sell屎都要時間。「大佬呀，人哋『B保險』賣咗個Plan咁多年，都唔係賣到咁多張，你要數都要畀時間我呀老細。」然而，世界是殘酷，老細嘅世界係更殘酷，佢要你今日交，豈能等到聽朝。你上司受氣，唔通唔發洩喺你身上？結果上司A為求交數兼施壓，佢畀咗一皮嘢出來，自己買番張單，今季Target！Done！同事B為求唔畀老細煩，佢畀咗幾千蚊出來，今季Target！Done！同事C唔想俾人炒，佢畀咗幾千蚊出來，今季Target！Done！至於我，「全世界都自己買，你買唔買呀？」結果我都忍着淚，同幾千蚊說Goodbye！天呀！我係完咗今季個Target，但我冇咗個旅行呀！幾千蚊，去到個台灣喇！即係咁，S Plan係一簽就一年，而我哋以上畀嘅錢，就只係畀兩個月。兩個月之後？傻豬嚟嘅，緊係Cut單保平安喇！點Cut？Cut咗Auto pay咪得！不過，B保險仍會不停出信追你。又話說，同「B保險」合約期，今年只係第二年，「同事自己的Target自己食」情況，今季我食到？下季呢？下季你要搵「朋友」食，再下季呢？又要搵「朋友」……如是者無限出賣朋友，朋友就不斷收到追保險費嘅信。就算有咁多朋友俾我出賣，都冇咁多個幾千蚊去買保險喇。我想問，我每季都嘔咁多血出去，有人可以輸血畀我嗎？我係邊間行？你自己估啦……完
by千頌C@堆填區
千頌C
http://www.fb.com/winbigwok本欄逢周三刊出
來源:
http://hk.apple.nextmedia.com/financeestate/art/20170510/20016244
Next Page