📖 ZKIZ Archives

萬南 二五中環 摩通高層大戰陳豪

1 : GS(14)@2014-11-09 18:45:41

http://www.metrohk.com.hk/index.php?cmd=detail&id=251615&search=1

呢排中環豬朋狗友吹水，話題已唔敢涉及佔中，因為藍黃之間，隔條大峽谷，傾親都面阻阻，倒不如風花雪月講吓八卦嘢，A君問大家有冇留意藝人陳豪同大埔比華利山老外鄰居鬧交，老外穿上自製T恤寸陳豪，成為娛樂版頭條，不過從來冇人提老外身份。







  
             A君話老外名叫Chris W，係投資銀行摩根大通高層，不過因為佢管轄IT部門，毋需出外見人，所以行內唔算太多人認識。A君話Chris來港多年，更娶個港女做老婆，早已視香港為家，雖然廣東話唔叻，但聽得明鬧人港式粗口。講番呢單陳豪同Chris爭拗，原來每幢比華利山獨立屋只設兩個泊車位，陳豪同老婆陳茵媺又朋友多，經常屋內開P，不過朋友又貪方便將車亂泊，屢次阻到Chris車出入，向管理處投訴亦冇符，最終Chris着上自製T，寫上「MOSES CHAN STOP PARKING IN FRONT OF MY CAR PARK YOU CXCK」貼上fb，將呢件事揚開去。據聞事件曝光後愈搞愈大，陳豪兩公婆對外話係一場誤會，不過Chris卻企硬唔罷休，比華利山管理處於是搞一次調停，以為雙方都係派兩公婆出四四六六傾掂佢啦，點知陳生只派陳太，仲要係陳老太出席，令Chris覺得冇誠意，拖到依家仲未解決件事。
PermaLink: https://articles.zkiz.com/?id=286407

萬南 二五中環 U盤再起爭議

1 : GS(14)@2014-11-09 18:46:13

http://www.metrohk.com.hk/index.php?cmd=detail&id=251615&search=1

由今日（星期一）開始，夜期收市時間再度延長，由原來晚上11點收市，加時45分鐘，令到好多經紀行牙痛，事關原本生意仲係要守，依家加時肯定令開支加大，距離（夜期）收支平衡仲有好大段路。萬南聽聞港交所（388）下一浪改革有意重啟收市競價（U盤）時段，呢個被喻為「勁假時段」受到好多人非議，批評係大行屈機遊戲，所以試行冇耐便拉倒。有證券界老行尊強烈反對重推U盤，甚至覺得早上開市競價（A盤）時段亦要檢討，事關亦有好多身痕友搞小動作。佢舉例每朝首10分鐘A盤，十大升幅榜上，不時都會見某傳媒股打入榜內，而且都係同一間中資證券行，感覺好似好勁咁款，但臨尾卻又縮盤，令呢隻傳媒股打回原形。老行尊話雖然呢間行沒實質得益，但日日咁玩非常身痕，分分鐘會被證監照肺。
PermaLink: https://articles.zkiz.com/?id=286408

萬南 二五中環 謝霆鋒講大咗？

1 : GS(14)@2014-11-09 18:46:49

http://www.metrohk.com.hk/index.php?cmd=detail&id=251615&search=1

上星期五，宣布謝霆鋒（圖）入主漢傳媒（491）復牌，股價喪升1倍，「缸」湖中人指如無意外，霆鋒稍後更會晉身董事局，成為全港最靚仔上市公司主席。萬南對佢靚仔絕不懷疑，但對佢注入上市公司盤數點解變醜更有興趣。根據漢傳媒通告，霆鋒注入後期製作公司PO，由12年開始一直蝕錢至今，同佢早前對外講PO年賺1億說法，肯定係兩個極端。究竟霆鋒有兩間PO，今次只注入醜樣間，還是當日佢口爽爽講大呢，就要有勞財經記者代為問佢啦。如果係後者，萬南提醒佢日後咪制，事關身為公司董事話，公司營運數據係股價敏感資料，講要負責任飛真確無誤㗎。
PermaLink: https://articles.zkiz.com/?id=286409

萬南 二五中環 上市公司年度大獎猛人雲集

1 : GS(14)@2014-11-30 02:38:30

http://www.metrohk.com.hk/index.php?cmd=detail&id=255006&search=1

揭開報紙雜誌嘅財經版，好多時都設有擂台，搵嚟一眾分析員鬥畀冧把互較高下，雖然日日榮辱互見，但其實佢哋相當老友，不時約埋搞船P，更齊齊成立香港股票分析師協會，亦因為以往佢哋為咗研究公司前景，約見上市公司管理層，但發覺有啲人習慣吹水唔抹嘴，講就天下無敵，做就有心無力，搞到公司一鑊粥。





  
             所以分析師協會上星期搞咗上市公司年度大會，表揚廿間規模唔同，但共通點係高透明度、又保護小股東權益嘅公司。呢晚可謂星光雲集，除咗一眾星級分析員，仲有股壇猛人朱太、港交所(388)獨董李君豪同立法會金融服務界議員張華峰等人撐場。講番得獎名單，全部由分析師專業評審出嚟，當中長實(001)、煤氣(003)及華創(291)更係藍籌股，而好多散戶熟悉嘅化妝品公司卓悅(653)亦有入圍，老闆葉俊亨除咗親自嚟攞奬，更連同都喺卓悅做嘢嘅太太同大千金出席，葉生話因為知道呢晚有好多分析師在場，所以總動員嚟打好關係，藉此增加公司透明度，進一步提升企業管治質素。有份投票嘅資深分析師表示，今年只選了周大福(1929)同卓悅兩隻零售股攞獎，原因係貴精不貴多。佢話初入行分析師通常以零售股起步，原因好簡單，就算乜都唔識，由朝到晚企係舖頭?實，亦可大概推算銷情。而卓悅就更體貼，每逢黃金周等大節日過後，例必主動披露銷售額，而且年報亦好詳盡，所以好多分析師都會cover佢，得獎絕對實至名歸。
PermaLink: https://articles.zkiz.com/?id=286607

萬南 二五中環 向羅仲榮家人致哀

1 : GS(14)@2014-11-30 02:39:41

http://www.metrohk.com.hk/index.php?cmd=detail&id=255006&search=1
上星期一，萬南寫金山工業（040）有機會賣盤，其中一個理由係老闆羅仲榮嘅囝囝羅揚傑冇興趣接棒，而佢本人又似無心戀戰，有時間都情願陪伴頗多病痛嘅太座劉梅潔。篇文出街後，線人打嚟話畀萬南知，原來劉女士喺文章出街前3日剛剛仙遊。
萬南寫金融界八卦事多年，年中聽落唔少料，但都抱着盡量唔提啲新鮮熱辣嘅生離死別，免得勾起家屬傷痛。今次甩轆，事緣係小弟早幾日仍聽到劉女士病情尚算穩定，掉以輕心冇喺周六截稿前再向其家人跟進，先至搞出呢個小誤會，在此謹向羅仲榮及其家人致哀。
PermaLink: https://articles.zkiz.com/?id=286608

萬南 二五中環 Yen大跌遍地黃金

1 : GS(14)@2014-11-30 02:40:06

http://www.metrohk.com.hk/index.php?cmd=detail&id=255006&search=1

近期日圓匯價仆直，簡直係普天同慶嘅事，萬南知道有好多外匯炒家都贏到開巷，形容係炒dollar-yen黃金日子，只要唔包拗頸，長期沽yen，每日執7位數字美金唔難喎。
而香港好多上市公司都受惠yen跌，例如759老闆肥佬林已表示入多啲日本零食，至於旅行社專業旅運（1235）亦都話呢排生意超好，市場部總經理劉美詩話好多人想訂機位去日本血拼，估計今年聖誕嘅客人急升三成。專業旅運今個星期三公布中期業績，照計生意有穩定增長，至於近排嘅超好生意，要到全年業績先可反映，萬南索到有基金已密密掃貨，貨源極度歸邊，只欠一個藉口便可湧上去。
PermaLink: https://articles.zkiz.com/?id=286609

萬南 二五中環 用小超角度拆解長和系重組

1 : GS(14)@2015-01-18 02:32:08

http://www.metrohk.com.hk/index.php?cmd=detail&id=262509&search=1
上星期金融界嘅大事，肯定係長實（001）及和黃（013）公布重組，先將兩間公司合併再一拆為二，變成一隻「長和」搞綜合業務，另一隻「長地」專攻地產。由於事前保密功夫一流，所以消息一出立即轟動缸湖，兩間公司喺美國掛牌嘅ADR齊齊急升一成，證明市場暫時認同呢單刁。
李超人乃財技高手，而且政治智慧老練，實諗到重組後嘅新公司選擇海外註冊，會招人話撤資，但佢老人家依然拍板去馬，當然唔只佢所講希望釋放公司嘅資產價值咁簡單。更何況地產股素來有折讓，長實折讓23%，同新地（016）折讓22%算係大孖沙之中最叻，相比恒地（012）29%、九倉（004）35%及新世界（017）嘅巨折50%，長實折讓率絕對濕濕碎。

長和系沿用垂直控股方式好多年，一直被外間認為部署精密，有利超人以小控大，緊握旗下各間巨無霸企業嘅控制權。不過誠哥講到明，今次重組係鋪路小超李澤鉅接棒，換句話講未來長和系嘅架構，先至係小超心目中較理想嘅腹稿。有幫佢哋父子做過嘢嘅人都知，小超比李超人更加愛鍊數，所以諗極都唔明，點解會放棄原有呢套安全系數極高，又行之有效嘅控股方程式。

要拆解嘅話，首先代入小超角度，睇吓由佢全盤打骰嘅長建（1038）。呢幾年長建用千零億喺海外狂買公用業務，追求只係高單位數字嘅回報，喺海外獲得唔少稱讚。

而由小超管理嘅長實本業地產，近兩年幾乎從未成功投地，麵粉有出冇入，只係最近中咗一個深水埗市建局蚊型地盤，加上近年頻頻變賣中港物業套現，可想而知佢對樓市前景都幾淡。長和市值大，好似一隻航空母艦，無可能快速轉航，如果逐啲減持地產業務，分分鐘要幾年時間，而且途中亦會被人洞悉，賣資產實畀人壓價，有違小超嘅作風。

因此小超如意算盤應該係，將航空母艦變為兩架高速艇，自己繼續做長和總舵手，至於長地就靠副手打理，逢高就減持，伺機換碼增持長和。
PermaLink: https://articles.zkiz.com/?id=287248

萬南 二五中環 好多人想睇亞視條底褲

1 : GS(14)@2015-01-18 02:33:15

http://www.metrohk.com.hk/index.php?cmd=detail&id=262509&search=1
關於亞視風暴，萬南過往一粒字都冇寫過，原因係小弟搵唔到新角度落筆。直至最近德勤獲高等法院委任做亞視經理人，有「金牌清盤人」之稱嘅德勤中國華南區主管合夥人Derek黎嘉恩宣布幫A記搵白武士，其中一着係將亞視一成股權進行招標，有興趣買家要先科水50萬按金，不設退款。消息一出，即刻畀人鬧德勤獅子開大口，旨在掠人50萬，有劫富濟貧之嫌。萬南想幫Derek平反，喺做M＆A世界，帳簿就好似女人條底褲，唔係咁容易揭開，想睇當然要畀誠意金，睇完冇興趣都總算有所安慰。事實上香港好多疊水八卦公，都想一睹A記盤帳有幾爛（亞視股東之一嘅旺旺老闆蔡衍明，之前都冇得睇），Derek惟有焗做Upper hand，趕走諸事八卦公。何況傾得成呢單刁，50萬又可以扣番嘅。
PermaLink: https://articles.zkiz.com/?id=287249

萬南 二五中環 國藏雙箭頭威力驚人

1 : GS(14)@2015-02-13 18:45:05

http://www.metrohk.com.hk/index.php?cmd=detail&id=266994&search=1

幾星期前萬南提過新股泰加保險（6161）嘅第2大股東蔡朝暉係缸湖猛人，上市後應有一番炒作，結果泰加上市至今還未滿月，股價已升咗1.3倍，跟進買咗肯定笑呵呵。



除咗泰加，蔡兄早前聯同美國光伏太陽能開發商SPI簽咗諒解備忘錄，會以12億元亦即每股3仙多啲入股國藏（559）成為大股東，當期時國藏股價大約4毫幾，舊年6月NAV都值2毫，換言之舊有大股東以賤價將隻殼兼原有生意拱手相讓。除非舊老闆是儍，否則背後肯定知道啲嘢，覺得除笨有精。
上星期國藏又有舉動，宣布收購另一股壇大炒家任德章旗下做新能源業務嘅公司，代價係印公仔紙，以每股0.36元配發5.38億股新股，事成之後任德章揸國藏13%。缸湖中人話蔡任兩位大炒家以往鮮有合作，今次突然露面打雙箭頭，威力肯定好驚人，話唔埋遲吓再有猛人加盟國藏咁話。尤其近期股市熱炒太陽能板塊，相信短期內好大機會申請改名，成為股市焦點倍升股。
PermaLink: https://articles.zkiz.com/?id=287830

萬南 二五中環 大和傳最後3個月試用期

1 : GS(14)@2015-02-13 18:45:38

http://www.metrohk.com.hk/index.php?cmd=detail&id=266994&search=1
近排好多金融機構開始瘦身，部分公司更狠到整個部門一齊摺，雖然話金融業嘅打工仔都知道現實殘酷，習慣好天收埋落雨柴，但農曆年前收大信封始終都相當無奈，其他人聽到亦人心惶惶。就好似上個月有傳窩輪商大和咳人，有幾個交易員同埋部門主管被裁走，不過後嚟又冇咗下聞。
正當大家以為係流料，萬南收到風有另一版本，據聞大和高層見到舊年盤數麻麻，有意裁員減省開支，不過窩輪揸fit人企出嚟撐，指部門過往年年賺錢，只係舊年因為某隻大股突然裂口高開，輪商嚟唔切對沖而輸大錢。最後高層buy呢番肺腑之言，願意畀多3個月試用期嘗試扭轉局勢。
PermaLink: https://articles.zkiz.com/?id=287831
Next Page
ZKIZ Archives @ 2019