萬南 二五中環 沈大師擇吉日開舖吸強國客
1 :
GS(14)@2015-02-13 18:46:10http://www.metrohk.com.hk/index.php?cmd=detail&id=266994&search=1
訊滙證券行政總裁沈振盈，因為又識睇風水，所以綽號「沈大師」。今個星期三訊滙喺旺角開新舖，大師擇咗吉日拜神，萬南都收到請帖被邀請出席。認真望吓個地址，彌敦道地舖嚟喎，乜咁重皮大投資呀。沈大師話公司原本喺旺角都有間地舖，生意唔錯一直有錢賺，不過始終喺二線街道，吸納唔到新客。
沈大師話今次決心搬竇，每月租金由8萬銀增至18萬銀，係睇準新舖位置喺彌敦道，應該係彌敦道絕無僅有嘅地舖證券行，人流量有保證，亦可省招牌，再加上新舖喺正金都商場附近，乃中港直通巴嘅上落車熱點，易於吸納強國新客。
除咗位置有優勢，要吸客當然少不免靠甜頭，炒股最大成本就係佣金，沈大師睇勻全行嘅「泡冒唇」，發現所謂嘅免佣，原來只計買貨，沽貨照樣收。所以佢出招新客網上買賣完全零佣，但推廣期只做一個月，手快有手慢冇啦。
萬南 二五中環 理文賣廠賣屋套現8億
1 :
GS(14)@2015-02-25 10:15:30http://www.metrohk.com.hk/index.php?cmd=detail&id=268867&search=1
上星期五係農曆大年初二，維港舉行煙花匯演，今年煙花冠名贊助權由土炮公司理文造紙（2314）用咗8球奪得。理文係廠佬，客戶屬企業客為主，相信一般香港人未必認識呢間公司，但好多人唔知道舊年尾理文以4億買咗大股東嘅生產廁紙業務（但呢間廠仲未有任何收入），所以為咗打響頭炮，今次煙花以「理文衞生用紙」牌頭贊助。
其實區區幾球，對理文造紙主席李文俊家族嚟講絕對濕濕碎，就好似我哋嘅散銀咁。除咗注入廁紙廠套現4億，最近佢又以4.2億元，賣咗山頂白加道3千幾呎嘅獨立屋畀大劉，呎價高達12.7萬，呢個呎價係香港屋苑式獨立屋第2紀錄。相比佢07年以1.7億嘅買入價，8年之間足足賺咗2.4億。
萬南聽聞李文俊其實好鍾意呢間山頂大屋，唔多捨得賣，但因為佢嘅細路喺九龍返學，每日都要花好長嘅交通時間。李生最終決定仔女行先，舉家搬竇，吉咗白加道間屋未免浪費，於是善價而沽，賣番畀發展商嘅大劉。
萬南 二五中環 財仔指「富二代」借貸
1 :
GS(14)@2015-02-25 10:16:51http://www.metrohk.com.hk/index.php?cmd=detail&id=268867&search=1
年尾某大財仔公司搞年夜飯，萬南有份出席，抽獎環節自然係全晚焦點，大老闆話舊年盈利大超標，所以臨場加碼派多8皮嘢，夥計當然開心到飛起。萬南乘機問大老闆近期有聲音批評財仔亂借三丶四樓按，遲早會拖冧樓市。老闆笑笑囗話邊會咁易，按上按嘅銀碼尚小，就算真係借錢唔還，要拍賣物業套現都唔會產生骨牌效應。大老闆仲話樓按有磚頭揸手，風險高極有譜，有啲進取嘅行家愛做利息更高嘅冇扺押按揭，甚至有啲財仔睇準部分富二代洗腳唔抹腳，但尚有高堂未可經濟獨立，靠屋企每月畀家用邊處夠用，於是推出「富二代」借貸，只要查實身份背景，借幾多都冇問題，實行放長線釣大魚。
萬南 二五中環 澳門新春賭廳靜英英
1 :
GS(14)@2015-02-25 10:19:23http://www.metrohk.com.hk/index.php?cmd=detail&id=268867&search=1
農曆年假期萬南一家有老有嫩過大海玩兩日，發現人山人海，大三巴新馬路呢啲旅遊景點插針都插唔落，要實施人流管制，當中九成九都係強國人，萬南見到條街咁多人，於是拉大隊返酒店，小朋友去兒童天地玩，大人就食自助餐，而萬南就做逃兵去賭場玩幾手。
中場都係鬼死咁多人，不過禁煙後的確空氣清新咗，萬南打個白鴿轉又去賭廳搵叠碼仔老友。嘩！乜咁靜英英啊，疊碼老友話阿爺強勢打貪後都係咁上下，大家等多過做，公司已叫咗部分夥計放無薪假。佢聽聞有幾個原本準備砌靚盤數搞上市嘅睹廳，亦都知道達標無望，今年初開始放軟手腳，甚至準備執緊一兩個賭廳慳返啲皮費。原來賭廳生意差咗，更會大幅影響長途電話嘅通話量。因為澳門流行一種電話投注，有啲強國豪賭客唔方便去澳門，賭癮嚟就打長途電話隔空叫叠碼仔代為投注，有陣時一玩就一晚，聽聞澳門電訊因此收到嘅長途電話費曾經屢創新高，不過今時唔同往日，強國貴客謝咗，連帶長途電話費亦大幅收縮，揸住澳門電訊嘅中信國際電訊（1883）惟有度橋另搵收入。
萬南 二五中環 獅子風水師 正貨現身
1 :
GS(14)@2015-03-23 16:22:37http://www.metrohk.com.hk/index.php?cmd=detail&id=272496&search=1
今個月初獅子錢莊舉辦150周年紀念活動，喺總行門口擺咗件米型嘅藝術擺設，搵咗久未露面嘅著名風水師龍景鍂挑選吉時替巨米揭幕及開光。萬南好耐冇見龍師傅咯，當然趁機同佢打招呼，佢話身體尚好，近年開始唔接冇熟人介紹嘅新客，每年去西藏三幾次吸靈氣。不過獅子錢莊係幾十年老主顧，所以點都抽時間幫手搞150周年慶典。
正正因為龍師傅平時神龍見首不見尾，好多人都只聽過佢嘅大名，知佢曾經幫前特首煲呔曾、馬會及獅子錢莊等客睇風水，但查實根本未見過龍師傅嘅廬山真面目，所以江湖有傳香港出現咗個「A貨龍景銓」，借龍師傅個朶去幫人睇風水，萬南身邊都有幾個唔熟嘅朋友領嘢中招。
最初大家都以為呢位冒牌龍師傅會否係同門師兄弟，抑或曾經跟過龍師傅學藝嘅呢？出於好奇心，萬南忍唔住問龍師傅。佢老人家話並無師兄弟，而佢成世人就只收咗一個徒弟，呢位仁兄仲要係佢嘅公子，而小龍依家尚喺學嘢階段，仍未出道幫人睇風水，所以百分百肯定嗰位係冒牌貨。
既然係咁，點解龍師傅唔採取行動打擊翻版呢？佢話掙扎咗一段時間，並趁機搵人收風起咗呢件冒牌貨嘅身份背景。最後決定畀多次機會冒牌貨，只要佢唔再招搖撞騙，便肯放佢一馬，再犯定必法律追究。龍師傅再語重心長咁話，風水師各有門派，應該各師各法幫人，做得好自然儲到熟客，何必要做冒牌呢？
萬南 二五中環 冠忠金禧跑山贈興
1 :
GS(14)@2015-03-23 16:23:06http://www.metrohk.com.hk/index.php?cmd=detail&id=272496&search=1
前面講過獅子錢莊成立150周年，順理成章特製一張150蚊紀念鈔嚟賀一賀，兼夾籌款做善事。不過唔係間間公司有咁嘅本事可以印銀紙，就好似今年成立50周年嘅冠忠巴士（306），除咗豪派特別股息報答股東外，由於佢哋專門做大嶼山專營巴士起家，所以喺早前搞咗個行山比賽慶祝金禧，地點不作他選揀番主場大嶼山，鬥快由東涌跑去大澳，總共有過千人報名參加，幫香港防癌會籌到唔少善款。呢段路全程十幾公里，話易唔易話難亦唔難，因此好多冠忠夥計都帶埋一家大細參加。身為老闆嘅黃良柏，平日着慣老西嘅佢，呢日運動裝掛埋號碼布現身。有冠忠員工背後話老闆肚腩咁大，估計老闆平日都甚少行山，以為佢會主持完開步禮後就做快閃黨鬆人。查實黃老闆好有心，即使行得慢啲，亦堅持行畢全程，更被不少夥計野生捕獲要求合照。而冠忠亦好識得乘機宣傳生意，所有完成賽事嘅參加者，都可以攞到冠忠Q版巴士模型及免費乘車票。至於冠軍咯，獎品當然唔嘢少，登登登凳，就係得到四川畢棚溝旅遊區機票連食宿套票。咁點解揀咁冷門嘅畢棚溝呢？好簡單啫，都係冠忠投資嘅項目咯。
萬南 二五中環 分家之後 福臨門愈做愈好
1 :
GS(14)@2015-03-23 16:24:26http://www.metrohk.com.hk/index.php?cmd=detail&id=271625&search=1
香港人鍾意跟著名食評去搵食，米芝蓮以個別地區為單位，而另一認受性高嘅食壇頒獎禮「亞洲50最佳餐廳」，上星期公布今年最新結果，香港總共有9間食肆入圍，排名分先後次序，最叻係食法國菜嘅Amber(第6名)，而岳少投資嘅8 1/2 Otto E Mezzzo Bombana緊接其後排第8，至於中菜則以富豪飯堂福臨門獲最高名次，排第15位。
萬南上星期到福臨門食飯，遇到太子女Janet徐淑華，佢話當日陪同行政總廚劉照成(圖右)及主廚梁燊龍(圖左)飛到新加坡領獎。原來頒獎過程都幾刺激，每間餐廳當初只知有份入圍，唔知第幾位，司儀由尾開始逐一揭曉，感覺相當刺激。
翻查資料，福臨門由2013年開始打入「亞洲50最佳餐廳」，呢年剛好係老闆兄弟經歷多年爭執後，決定正式分家，結果五哥徐沛鈞全盤掌管福記後愈做愈好，由最初入榜排名48，舊年大躍進排19，今年又再爬升幾級。Janet話做到咁好成績，全靠整個團隊，所以領獎亦由兩位大廚做代表，自己唔搶風頭，負責揸機影相。
Janet仲話只會開心一陣，嚟緊仲有大堆工作殺到，包括今年中到澳門開分店，佢期望將來可以打入「亞洲50最佳餐廳」，好似Robuchon咁各地分店亦可榜上有名。至於香港總店就希望更上一層樓，成為史上首間中菜館入選「全球50最佳餐廳」，令更多人認識粵菜精髓。
萬南 二五中環 買一手股票 可炒上五成？
1 :
GS(14)@2015-08-16 13:51:45http://www.metrohk.com.hk/index.php?cmd=detail&id=287570&search=1
萬南習慣睇實十大升跌榜，睇吓有乜異動股票喺金魚缸興波作浪，上星期五升幅榜排名冧把溫嘅大唐投資(1160)單日升54%，再望吓嗰日成交金額，原來只得14萬元。大唐一手係十萬股，亦即係全日就得呢單成交。至於今個星期，就連續兩日都零成交。
如果讀者細心留意，大唐市值僅兩億，連殼價一半都未夠，而且唔見佢伸手集資，喪失股票上市嘅功能。但睇見大股東密密增持，再加上喺市場買雞碎咁多都觸發裂口上升，可見大唐已經乾到極度龜裂，但與此同時，亦有一班市場中人暗地掃咗唔少，正喺度同大股東較量。所以有乜風吹草動，大唐股價都會非常之Chok。
大唐投資僅得8名員工
如果係蠱惑莊家，睇見有人同自己過唔去，普遍會向下炒，迫令敵人無啖好食自動退場。不過大唐老闆喺香港有頭有面，創辦人李和聲(圖)係富豪御用經紀，曾喺1998年亞洲金融風暴代表港府決戰大鱷；至於李和聲兒子李德麟，就係前金銀業貿易場理事長。雖然兩位李生已經喺公司退落嚟，交由第三代接棒，但在情在理，老李、中李都會睇實小李，唔會畀佢哋亂嚟，搞壞金漆招牌。
再睇番大唐最新年報，舊年連埋3位執行董事、3名獨立非執董及1名公司秘書，全公司竟然只得8名員工，人力資源非常緊張，可以話係極級慳家。萬南好有興趣知道最後嗰位唔係高層嘅員工係咪三頭共六臂，做齊秘書、司機、茶水等工作。
萬南 二五中環 港交所網站 亂改搵錢嘥
1 :
GS(14)@2015-08-16 13:52:12http://www.metrohk.com.hk/index.php?cmd=detail&id=287570&search=1
如果要搵一個財經人必睇嘅網站，萬南相信港交所(388)旗下嘅披露易一定有份，事關所有上市公司對外公布嘅通告，都統一由呢個網站發放，難怪舊年有超過4.52億次瀏覽量。知情人士話，今年4月開始「港股大時代」，多咗好多財技公布，唔少行內人不停按F5更新披露易，希望快人一步了解單刁內情，相信今年有望打破舊年紀錄喎。
不過，披露易旗下用嚟睇上市公司股權分布嘅「披露權益」功能(圖)，卻一直被行內取笑，其複雜程度亦令唔少資深財經人投降，就好似舊年新地(016)郭氏兄弟公布股權更新，市場上竟然有唔同解讀，令人非常苦惱。
一直以來，市場都有聲音希望港交所改善「披露權益」，增加透明度。而最近港交所行政總裁李小加要求搵外判專家更新網站，呢個項目更要搞足兩年，大家都以為港交所從善如流，一併改革披露易啦，點知今次只執其他冇乜人睇嘅部分，披露易不在計劃之中，難怪畀人話應做唔做，搵錢嚟嘥。
萬南 二五中環 China Club跌落Chinese Club？
1 :
GS(14)@2015-08-23 01:01:57http://www.metrohk.com.hk/index.php?cmd=detail&id=288269&search=1
近排股市完全無魚，好多靠金魚缸搵食嘅老友大呻世界難撈，手多多掃貨博執十格八格嘅，最終損手爛腳居多，情況相當不妙。就喺呢個時候，細價股資深炒家K哥突然打電話嚟約萬南去中環食晚飯，喺咁嘅慘淡時勢，有人請食飯當然二話不說應承啦。
到咗食飯嗰晚，萬南準時到達舊中銀總行頂樓嘅中國會，K哥未到便先坐低，望望四周圍依然鬼多過人，難怪好多湊老外生意嘅都肯畀幾十萬入會呢度。冇幾耐K哥打嚟質問萬南點解仲未到，先知原來擺咗大烏龍，佢話去Chinese Club(圖)食飯，我就誤以為係China Club。
萬南幾乎忘記咗Chinese Club(華商會)嘅存在，佢哋會址喺環球大廈隔籬，屬於比較平民化嘅會所，裝修嘢食都普普通通，入會幾皮嘢已可。萬南趕到過去見K哥，都忍唔住話估佢唔到，竟然有華商會會籍，佢就笑笑口話China Club又貴又唔好食，邊及Chinese Club性價比高，呢個時勢自己友食飯，梗係慳得就慳。
Next Page