📖 ZKIZ Archives

中環在線：羅寶文請寶Uncle品酒 李華華

2008-09-05  AppleDaily



噚 日富豪酒店（078）太子女羅寶文喺銅鑼灣富豪搞咗個「富豪御宴」，請咗唔少名人，財金界嘅有李國寶夫婦，政界就有田北俊兩公婆，華華問羅寶文之前點樣諗 邀請名單，佢話，請嘅都係識飲識食嘅朋友，Uncle Li（李國寶）識品酒，所以搵咗佢。請得寶哥哥同田少，食嘅嘢當然唔差，呢道「富豪御宴」每位盛惠兩萬八，要夠一圍先可以訂，即係一圍超過30萬銀，仲要 早一個月預訂o忝。

聽講呢個富豪御宴構思咗成年，華華問富豪酒店主席兼行政總裁羅旭瑞，條橋係咪佢度嘅，佢就話係大家一齊諗，乖女寶文都有份出主意喎。

中環在線：福布斯亞企50強思捷大跌前趕上榜 李華華

2008-09-05  AppleDaily

美 國財經雜誌《福布斯》公佈最新一年亞洲企業50強，今年總共有5間香港公司上榜，當中包括呢兩個禮拜慘遭基金洗倉，股價勁瀉近三成，市值蒸發270億嘅思 捷（330）。今次已經係思捷連續第4次入《福布斯》亞洲企業50強，雖然一手湊大思捷嘅邢李『火原』冇做公司主席兩年，今年1月佢更連非執董都唔撈，但 仍然無礙思捷入圍。

連續四年有份

據上榜準則，係要亞太區最大嘅上市公司，仲有睇埋佢哋長遠盈利能力同增長潛力，唔少得仲有股 價表現等，但由於個榜嘅股價係計算到8月頭，當時思捷嘅股價仲未勁跌，所以冇影響佢入圍。如果《福布斯》個亞洲50強企業榜遲一個月先公佈，思捷分分鐘上 唔到榜。不過，思捷主席高漢思上個禮拜話，「集團正面對佢加盟超過10年以嚟，最嚴峻嘅經濟環境，家好難估未來12個月嘅營運情況。」照咁睇，明年思捷 仲上唔上到榜都真係一大疑問。

國美蘇寧首次入圍

除咗思捷，馮國經兩兄弟揸fit嘅利豐（494）亦係第4次入選亞洲50強， 其他3間入榜嘅香港企業仲有超人李嘉誠嘅長實（001），新加坡上市嘅怡和同埋經營商品貿易嘅來寶集團。今次打入亞洲50強嘅企業以中國公司佔多，一共有 13間，比舊年多6席，當中包括香港人熟悉嘅內地電訊龍頭股中移動（941）、建行（939）、王石嘅萬科地產，鋼鐵股鞍鋼（347）、煤炭股神華能源 （1088）等，而經營電器連鎖店、黃光裕嘅國美（493）同張近東嘅蘇寧電器就首次上榜。

福布斯亞洲50強企業

-香港-長實、思捷、怡和、利豐、來寶集團-中國-鞍鋼、建行、中移動、神華能源、萬科企業、中信證券、國美電器、格力電器、聯想集團、中石化、蘇寧電器、康師傅、中興通訊

累四叔輸錢楊惠妍仍做首富

《福 布斯》仲公佈咗亞洲年輕富豪排名榜，榜首嘅係亞洲女首富碧桂園（2007）大股東楊惠妍，雖然碧桂園股價由舊年高位急跌近八成，搞到佢蒸發咗千億身家，仲 累「香港股神」李兆基蝕得好慘，但楊惠妍仍以577億銀身家，登上亞洲年輕富豪榜冧巴溫，較排第二位嘅國美電器（493）老闆黃光裕，273億身家，高出 超過一倍。

兩女性入首五位

黃光裕今次都算出盡風頭，除咗攞到亞洲年輕富豪榜亞軍，佢嘅國美仲打入《福布斯》亞洲企業50強。 至於第三位就係賽維LDK太陽能董事長彭小峰，香港人對佢應該唔係咁熟，佢間寶號係生產多晶硅片，家陣身家195億。經營香精生意嘅華寶國際（336）大 股東朱林瑤就排第五，身家148億銀。富豪榜頭5位有兩位係女士，證明亞洲女性賺錢能力唔輸畀男士。

福布斯亞洲年輕富豪榜*

‧排名：1年齡：26富豪：楊惠妍

公司：碧桂園身家（億元）：577.2

‧排名：2年齡：39富豪：黃光裕

公司：國美電器身家（億元）：273.0

‧排名：3年齡：33富豪：彭小峰

公司：賽維LDK太陽能身家（億元）：195.0

‧排名：5年齡：38富豪：朱林瑤

公司：華寶國際身家（億元）：148.2

‧排名：6年齡：34富豪：鮮揚

公司：恒鼎實業身家（億元）：124.8

註：*上榜中國/香港富豪

電郵：[email protected]

中環在線：國資委全球搵法律人才 李華華

2008-09-08  AppleDaily

中 國地大物博，勁人輩出，但國資委請人仍然要全球性招聘。究竟搵乜嘢人咁緊要？咪就係法律人才囉！要全球性物色人才，呢個職位要求當然嚴格，其實，過去5 年，國資委想請17個總法律顧問，但被錄用嘅只得11人，可想而知呢個崗位幾咁難搵人。遵守法紀，對法律同埋經營管理有一定認識就不在話下，仲要做到承上 啓下，可以平衡企業內外嘅各種關係。

據新華網引述一位企業總法律顧問講，作為法律顧問，要提供專業意見，企業決策合唔合法，作為法律顧問當然要負責，不 過，難就難在，法律顧問唔可以參加董事會、黨委會，只係可以列席總經理辦公會。簡單嚟講，高層次嘅會你冇份參與，淨係可以入去開啲低層次嘅會，但高層嘅決 策你都要負責，同綁住雙眼掟飛鏢冇乜分別。

要符合晒所有條件真係唔易，難怪06年到家，有成1200人報名，只有11間企業得償所願，搵到合心水嘅人 選。

中環在線：電企員工月薪兩嚿水 李華華

2008-09-08  AppleDaily

經濟衰退，最慘就係一眾打工仔，因為成為企業首先開刀嘅對象。內地《東方早報》調查咗六個行業，包括房地產、電力、證券行、機械製造、能源同紡織，都已經有裁員減成本措施。

減工資刺激員工

其 中重災區首推電力企業，由於成本上升，今年部份電力企業開始減薪，報道以大陸上市嘅豫能控股為例，睇番間公司嘅年報，上半年冇大幅裁員，但1159個員 工，半年每個員工平均工資只得1216蚊，即係每個月平均得200幾蚊。至於房地產行業，報道話，內地77間房地產上市公司中，有16間調低咗員工嘅薪 酬，其中一間叫海泰發展嘅發言人話，雖然上半年業績好咗，但未達預期，所以公司都會減工資，刺激吓員工，仲話如果下半年可以達到目標，就有獎金，否則就真 係要減薪。相關行業如房產廣告設計公司，業務都縮咗成半，搞到要跟住裁員。報道又提到能源股中石油（857），之前被內地傳媒誤指會裁8萬個員工，後嚟中 石油已有高層澄清。雖然話公司冇提過裁員，但就承認壓縮人員，同裁員嘅分別係，後者等於自然流失兼凍結人手。

中環在線：朱新禮當滙源豬咁賣 李華華

2008-09-08 AppleDaily

可 口可樂豪擲近200億收購滙源果汁（1886），主席朱新禮俾大陸20萬網民勁鬧，話佢出賣民族品牌。佢首次開腔接受新浪財經訪問，話收購係正常商業行 為，唔係被迫。佢仲借超人李嘉誠過橋，話超人曾經講過，投資某個企業，前提就係要考慮以後點賣出，所以佢認為「企業應該當兒子來養，當豬一樣賣。」唔可以 將企業當仔咁養一世，咁滙源肯定係一隻槽肥待宰嘅豬。朱新禮仲話，十年前喺廣州上過一個培訓班，聽一位專家講課，呢位專家話，中國好多企業家總係將企業當 自己個仔咁養，養咗成世，養到自己死咗，個仔亦都跟住死埋。曾經有報道話，93年滙源第一批濃縮果汁生產出嚟嘅時候，朱新禮帶住煎餅同果汁，一個人走去德 國參加食品展，攞定單。一手養大滙源，朱新禮喺訪問中亦話，對滙源果汁呢個品牌感情深厚，但喺市場，絕對唔可以感情用事，要用企業家思維去處理。

把可口可樂買過來

咁 點先係企業家思維呢？佢話，04年，滙源果汁最困難嘅時候，達能秦鵬親自搵上門要買滙源，佢都唔肯賣。至於家陣要賣，只係因為三個字──價錢好。朱新禮 話：「搞企業，價錢好的時候你都不知道賣，你還叫企業嗎？雖然說搞企業都有困難，只有困難才能讓你奮進到現在。現在再困難也沒有創業初期困難，沒有上市前 那麼困難。所以收購只是正常的商業行為。」朱新禮越講越火，唔好誤會，華華只係感受到朱總內心嗰團火，佢話：「現在我們都成功舉辦奧運會，中國人已經揚眉 吐氣了，怎麼還害怕收購一個品牌。我們壯大了不但可以再把滙源買回來，把可口可樂買過來，也何樂而不可呢，不要杞人憂天。」

中環在線：摩天大廈指數勁過秋官效應 李華華

2008-09-08  AppleDaily

「秋 官效應」散戶聞之色變，原來仲有個比秋官效應更勁嘅指數──「摩天大廈指數」（Skyscraper Index）。華華睇《華夏時報（北京）》就提及呢個「摩天大廈指數」。大家唔好按字面解，以為佢係個全球摩天大廈鬥高指數，其實呢個指數由經濟學家 Andrew Lawrence建立，佢將全球最高摩天大廈落成同經濟危機聯繫起嚟，簡單嚟講，當摩天大廈落成時，即係標誌着經濟衰退來臨。

上海WFC完工股市急跌

呢 個「摩天大廈指數」唔係吹水，有數據support，仲屢應不爽o忝。遠嘅唔講住，先講大家都熟悉嘅中環國際金融中心（IFC）二期，03年落成即遇到沙 士打擊。你以為係偶然？1931年落成嘅紐約帝國大廈，就正值美國大蕭條；70年代初完工嘅紐約世貿中心同芝加哥西爾斯大廈（Sears Tower）就經歷第一次石油危機；98年落成嘅吉隆坡雙子塔就遇到亞洲金融風暴，聽落都咪話唔邪。今年，全球經濟受美國次按拖累，咁啱得咁蹺，大陸喺上 個月又有幢新嘅全球第一高摩天大廈落成，就係取代台北101嘅上海環球金融中心（WFC）。據報道，家吓內地經濟增長放緩，股市急跌超過五成，搞到WFC 家陣嘅辦公室出租率只有四成五，真陰功。其實，香港都有幢標誌性建築物落成入伙，就係由新地（016）興建嘅九龍站環球貿易廣場（ICC），將取代國金二 期（IFC）成為香港第一高商廈，無獨有偶，喺呢幢ICC落成之際，香港經濟又唔係咁掂，咁搞法，香港投資者除咗要留意「秋官效應」，家吓仲要再兼顧個 「摩天大廈指數」，兩者前後夾攻，睇嚟投資者今年都係小心為妙。

摩天大廈指數

-中國-‧摩天大廈：上海環球金融中心落成年 份：2008經濟：美國次按危機蔓延，拖累全球經濟放緩-香港-‧摩天大廈：環球貿易廣場（ICC）落成年份：2008經濟：美國次按危機蔓延，拖累全球 經濟放緩‧摩天大廈：國際金融中心二期（IFC）落成年份：2003經濟：沙士危機，打擊百業蕭條-馬來西亞-‧摩天大廈：吉隆坡雙子塔落成年 份：1998經濟：亞洲金融風暴爆發，亞太股市急瀉-美國-‧摩天大廈：芝加哥西爾斯大廈落成年份：1974經濟：石油危機，全球經濟陷入衰退‧摩天大 廈：紐約世貿中心落成年份：1972經濟：石油危機，全球經濟陷入衰退‧摩天大廈：紐約帝國大廈落成年份：1931經濟：美國經濟大蕭條電 郵：[email protected]

中環在線：陸東測市又中 李華華

2008-09-09  AppleDaily

上 個月正式唔做分析員，自立門戶做基金經理嘅陸東，喺上個月底幫希慎（014）搞嘅青少年活動做演講嘉賓，見到傳媒大耍太極，華華問唔到佢對個市點睇。不 過，啱啱過咗嘅禮拜六，陸東出席咗一個投資講座，就好慷慨咁公開佢點樣睇個市。陸東有基金界「股神」之稱，講嘢當然唔係流！佢話港股二萬點見底，結果噚日 恒指一開市就由上個禮拜五嘅今年低位嚟個大反彈，升番上兩萬樓上，而佢推介嘅本地銀行股同地產股更急升唔少。陸東之所以有股神美譽，正係因為近年每次發表 報告嘅時間都拿揑準確，今次又咁準，唔通佢有水晶球知美國政府會救市？

濠賭股未跌

至於陸東建議沽出嘅內房股雖然唔係隻隻跌， 但首創置業（2868）同奧園（3883）就分別急插約8%同6%。至於佢同時建議沽出嘅澳門概念股，噚日就跟隨大市回升，但咁唔代表陸東睇錯，因為佢只 係預期未來兩至三年會大瀉。其實，陸東今年初已經預測恒指走勢會「低、高、低」，結果恒指喺3月中先試低位20572點，之後嚟一個近6000點嘅反 彈，5月頭上番26000點，隨後港股反覆下瀉，上個禮拜五恒指更跌破兩萬點關口。陸東舊年多次貼中港股走勢，好似舊年5月時話恒指見兩萬三，結果港股短 短5個月就急升1萬點，到10月底時，佢發表報告話恒指會急跌4000點，結果又中。今次陸東話港股已跌近今年低位，明年恒指合理值係27500點，散戶 不妨諗諗家吓係咪入市時機。李華華電郵：[email protected]

陸東提及的股份表現

中銀香港（2388）建議：買入昨日變幅：+6.4%

九倉（004）建議：買入昨日變幅：+6.1%

信置（083）建議：買入昨日變幅：+5.9%

滙控（005）建議：買入昨日變幅：+5.5%

新地（016）建議：買入昨日變幅：+4.9%

太古A（019）建議：買入昨日變幅：+4.7%

大新銀行（2356）建議：買入昨日變幅：+4.2%

長實（001）建議：買入 昨日變幅：+3.3%

佐丹奴（709）建議：買入昨日變幅：+1.0%

首創置業（2868）建議：沽出*昨日變幅：-7.5%

奧園地產（3883）建議：沽出*昨日變幅：-5.9%

沿海家園（1124）建議：沽出*昨日變幅：-2.7%

新濠國際（200） 建議：沽出*昨日變幅：+2.3%

銀河娛樂（027）建議：沽出*昨日變幅：+0.7%

澳博（880）建議：沽出*昨日變幅：+0.5%

註：*建議沽出內房股及澳門概念股

中環在線：航天股升空快過神七 李華華

2008-09-09  AppleDaily


噚 日內地股市唔跟大圍走，之不過，內地航天股就逆市升空，其實唔止噚日，上個禮拜三，內地嘅航天股已開始起飛。據內地《東方早報》報道，內地游資炒完奧運概 念，轉炒「神舟七號」升空，實行玩番轉升空一日遊。報道話內地流傳神七會提前喺今個月尾升空，雖然航天辦上個禮拜三澄清冇講過，但若按照佢哋原先喺上個月 嘅公佈，神七會喺10月擇日飛天，咁家陣離升空只係一個月左右，睇番3年前嘅10月神六發射，前一個月航天股就大漲，到飛行期間只係微漲，飛完後一個月就 跟番大市跌。若根據呢個經驗，家陣航空股炒上都有迹可尋。上個禮拜三，多隻航空股已經起動，升得最高嘅係航天動力同中船股份，升近一成。不過到噚日為止有 啲航空股升升吓倒跌，係得航天動力依然夠勁，升9.96%，收報8.94人仔（下同），航天機電噚日亦升2.78%，收報6.28蚊，其他如航天科技、航 天晨光就只係微升，而中船股份、洪都航天及中核科技等雖然升幅見過2%以上，但收市就回落地球，你話係咪一日遊嘞。

中環在線：Google多福布斯富豪 李華華

2008-09-10 AppleDaily

美 國財經雜誌《福布斯》公佈全球互聯網富豪榜，互聯網一哥Google兩位創辦人布林（Sergey Brin）同佩奇（Larry Page），包辦富豪榜頭兩位，身家分別高達1459億同1451億銀；而Google行政總裁施密特（Eric Schmidt）就排第五，身家515億。今次總共有34位富豪上榜，嚟自Google嘅就有7位，佔上榜名單21%。此外，中國人面孔亦佔唔少，其中巨 人網絡創辦人史玉柱仲打入頭10名，排第七，身家達218億。提起史玉柱，梗要講吓佢嘅傳奇創業經過，90年(greatsoup按:應為1989年8月)，佢喺內地成立巨人集團，經營電腦同軟件 業務，93年已經入《福布斯》內地富豪榜第八位，後嚟公司出現財務危機，差啲破產，好在後尾靠保健產品「腦白金」東山再起，還清債務。舊年更喺全球大冧市 前，將巨人網絡喺美國上市，集資80幾億銀。

楊致遠未能躋身十大

至於大家熟識嘅仲有雅虎創辦人楊致遠，不過佢只係排11位， 唔能夠躋身十大，身家約179億銀。剛晉身為恒指成份股嘅騰訊（700），公司創辦人馬化騰就排22位，身家109億。內地搜尋器一哥百度嘅李彥宏緊隨其 後，至於阿里巴巴（1688）馬雲同網易丁磊，就分別排第32同33位。

福布斯互聯網富豪榜

第1位布林(Sergey Brin)公司：Google身家：1459億港元第2位佩奇(Larry Page)公司：Google身家：1451億港元第3位貝索斯(Jeff Bezos)公司：亞馬遜身家：640億港元第4位歐米達(Pierre Omidyar)公司：eBay身家：601億港元第5位施密特(Eric Schmidt)公司：Google身家：515億港元第7位史玉柱公司：巨人網絡身家：218億港元第11位楊致遠公司：雅虎身家：179億港元第22 位馬化騰公司：騰訊身家：109億港元第23位李彥宏公司：百度身家：109億港元第32位馬雲公司：阿里巴巴身家：86億港元第33位丁磊億港元公司： 網易身家：78億港元

中環在線：李寧辦學唔及做生意 李華華

2008-09-10 AppleDaily

李寧退出體壇後，除咗創辦運動衫品牌李寧（2331），仲喺廣東佛山開咗間李寧體操學校，今年已經踏入十周年。

每年至少補貼150萬

體 操王子開體操學校，應該有好多慕名而嚟嘅學生，不過，講到搵錢，間學校就唔及上市公司李寧嘞。據內地《贏周刊》報道，李寧體操學校每年到咗8月，都要度好 下一年嘅財務計劃交畀上市公司李寧嘅董事會，過去，董事會每年都要補貼150萬至200萬人仔。雖然話上市公司李寧自90年創立以嚟，越做越大，04年仲 喺香港上市，之後每年盈利都億億聲，07年度賺4.74億人仔，大升六成，百零萬呢啲小數目，濕濕碎啦。不過，長貧難顧，唔通做教育事業真係難過做生意？ 不過，相信李寧開呢家體操學校，都只係想培育更多「體操王子」，錢賺唔賺到並唔重要。