中環在線：李兆基一周內轉口風 李華華
2008-09-10 AppleDaily
四 叔李兆基噚日喺上海復旦大學，出席由李兆基基金會捐錢興建嘅「李兆基圖書館」命名揭牌儀式。一向慷慨分享投資心得嘅四叔，噚日話港交所（388）一向都有 留意出口術嘅投機行為，家陣市況上落咁大，無論佢估中定估錯，都會引嚟港交所注意，所以佢以「好敏感」為由，唔再暢談投資心得。不過，佢強調：「從來都冇 一邊唱好，一邊沽貨。」其實，四叔有成千億身家，就算跌市，都不過賺少幾百億，對佢老人家嚟講絕對係小數目，使乜出口術吖！而且四叔係一個好真嘅人，淨係 睇佢上個禮拜同記者呻：「我揸住碧桂園（2007）手貨，已經蝕緊幾億元，好慘o架啦！」就知。
寄望農曆9月市況好轉
對於美國政府接管「兩房」，令恒指周一反彈超過800點，四叔話市場一早知美國政府會出手救「兩房」，所以單嘢冇乜影響力。由於美國嘅經濟仲有好多問題要解決，所以四叔修正之前所講「9月轉守為攻」嘅策略，寄望農曆9月市況會好轉。
咁上個禮拜二話會換馬嘅四叔，既然冇唱好出貨，家陣又有乜投資策略呢？四叔話「只守不攻，不買不賣」，不過「有銀紙唔怕買，借錢買就唔好」，咁究竟係咪仲睇好恒指年底會升番上兩萬三，佢就話唔敢講。
講 番噚日復旦大學個儀式，今次已經係四叔年內第二次飛去上海復旦，2月尾佢喺復旦大學校長王生洪手上攞到名譽博士學位。呢趟「李兆基圖書館」命名揭牌儀式， 四叔兩位公子家傑同家誠、靚新抱徐子淇、得力助手林高演都有出席撐場。四叔喺儀式中，同班大學生分享創業奮鬥經歷，鼓勵佢哋「勇於作為，將來貢獻社會」， 之後仲將佢本個人自傳送畀學生代表。
李華華
電郵：
[email protected]
中環在線：呂志和「對退休高官公道啲」 李華華
2008-09-11 AppleDaily
喺04年4月退休嘅民航處前處長林光宇，今年3月俾嘉華國際（173）主席呂志和招攬做營運總裁。事隔6個月，噚日佢出席嘉華業績記者會，坐喺老闆身邊，幫手重複番條問題畀老闆。
政府唔批林光宇入國航
講 起前房屋及規劃地政局常任秘書長梁展文早陣子加盟新世界中國（917），最終搞到一頭煙，本身都鍾意搵退休公務員返公司幫手嘅呂志和叫大家「公道啲」。至 於林光宇就話當年離職後，碰啱同年年底，國航（753）準備嚟香港上市，佢本來諗住加入做獨立非執董，點知最尾俾政府「Disapproval」咗！佢話 用得呢個字眼都幾嚴重，所以惟有放棄。好在塞翁失馬，最後入咗嘉華。林光宇唔肯講點睇梁展文單嘢，但佢認為公務員做完政府工之後，唔可以出外做其他嘢就唔 係咁公道喎！
中環在線：稻香鍾偉平至愛菠蘿包 李華華
2008-09-12 AppleDaily
稻 香（573）噚日舉行嘅業績記招，特別擺咗份high tea西式茶點，同稻香格格不入。伙頭主席鍾偉平解釋，佢哋之前喺深圳開咗間西餐加茶餐廳食肆叫「hi tea」，所以趁公佈業績宣傳吓。不過，鍾主席話，自己都係鍾意港式包點多啲，菠蘿包加奶茶最啱佢心水。佢仲話，7月飛咗轉去英國覓食試菜，雖然英國啲炸 魚薯條出名，但鍾偉平話晒係食家兼上市公司主席，出門試菜梗係搵靚嘢食，出發前同事已經幫佢做晒準備，不過佢就唔肯開名講邊間啲嘢好食，費事幫人宣傳。不 過，喺英國一個禮拜，鍾偉平話西餐唐餐都有食，中餐特別對一味腐皮腸粉印象深刻，呢款點心用腐皮包住蝦膠等餡料油炸，個樣似腸粉，好味之餘仲有創意。
十月北京試新菜
鍾偉平每年都會出埠四五次周圍去試食，下個月稻香會開多間中菜西食嘅「鍾菜」，所以鍾主席喺英國特別留意食肆點樣中菜西食。10月中就飛北京，佢話呢兩年北京搞奧運前後，新餐館多咗好多，所以要去試吓。
中環在線：香港飲食主席愛耍太極 李華華
2008-09-12 AppleDaily
經營食肆包括大滿貫、小城知味同仿膳飯莊嘅香港飲食管理（668）有兩位「鎮店之寶」，正係集團創辦人兼主席陳偉彰，同埋佢太太陳金若槿，陳太亦係集團嘅執董，兩人今年同樣70幾歲。噚日香港飲食開股東大會，由陳主席主持，陳太做左右手。
支配唔到太座
陳 主席咁精神，當然有一套養生之道，就係耍太極。陳主席話，朝朝都會耍完先返公司。咁陳太有冇一齊玩呢？陳主席話：「佢唔聽我支配。」咁唔通喺公司先聽？陳 主席答：「喺公司都唔聽，有時反而係佢支配我多啲。」真風趣。既然兩個仔喺公司幫手，陳主席有冇諗過退休？陳主席反應好快咁話：「成日諗退休，但成日退唔 到，因為慣咗返工。」不過會陸續減少工作量咁話。
中環在線：仰融搵巴曙松入局 李華華
2008-09-12 AppleDaily
曾 喺01年《福布斯》中國富豪榜排第三位、華晨汽車（1114）創辦人兼前主席仰融，家陣遙控揸fit嘅遠東金源（1188）噚日宣佈，委任巴曙松做非執行 董事。巴曙松唔係等閒之輩，佢係中國（海南）改革發展研究院金融研究中心主任，同時亦係國務院發展研究中心金融研究所副所長，可以講係中央政府嘅金融智 囊。搵到個咁有份量嘅人做非執董，華華當然有聯想，唔通同仰融有關？話說身家一度高達近70億銀嘅仰融，04年同內地政府因華晨股權出現爭拗，搞到要出走 花旗，仲俾遼寧省發通緝令緝捕。
仰融為咗證明自己清白之軀，同遼寧省政府打官司，結果仰融以「水落石不出」總結，仲話成件事就好似阿媽教仔，唔理乜嘢事， 打咗個仔先，但做仔嘅又唔可以同阿媽劃清界線，又好難要阿媽認錯，惟有仍然留喺花旗。家陣巴曙松肯做市值只有9億銀嘅遠東金源非執董，唔知係咪暗示內地唔 再追究仰融，唔使再滯留花旗，有機會返番祖國呢呵。根據通告，巴曙松唔收董事酬金，只會攞酌情花紅。
中環在線：奧運冇人賺到大錢 李華華
2008-09-16 AppleDaily
北 京奧運係中國人百年夢想，全國熱血沸騰等佢來臨，做生意嘅更加係磨拳擦掌，準備發奧運財。不過人算不如天算，今年3月以嚟開始發生藏獨同疆獨事件，中央對 奧運整個定位完全改變，做唔做到生意已經唔緊要，最緊要搞個「平安奧運」，令奧運商機大打折扣。積極參與呢次奧運嘅飛達帽業（1100）副主席兼董事總經 理顏寶鈴仲話：「邊個話奧運賺大錢肯定講大話！」講到咁激，梗有原因，對顏寶鈴嚟講，今次奧運令佢一殼眼淚。喺平安奧運嘅大前提下，外國人甚至北京以外嘅 大陸人，都好難入京，令到旅客生意大減。
補貨要三日
原本以為坐9萬人嘅鳥巢，係做生意嘅黃金地點，點知聽顏寶鈴講，裏面紀念 品店舖豆膶咁細，只可以放1500頂奧運帽，第一日雖然短短15分鐘之內賣晒，但再補貨足足要3日，點解？咪就係因為安檢理由囉，搞咗一輪先再添得 1000頂帽嚟賣。至於另一個佢期望好高嘅做生意熱點──長城八達嶺，就因為舉行單車賽對外封閉。仲有一個銷售熱點頤和園，就不時因為要招呼外國總統權 貴，對外封閉，你話點做生意。難怪顏寶鈴話，今次做奧運生意嘅商人會有人蝕錢，有啲嚴重到工廠倒閉o忝。
中環在線：許榮茂中醫道理營商 李華華
2008-09-16 AppleDaily
家陣啲富豪好多都係由低捱上嚟嘅，世茂房地產（813）主席許榮茂喺70年代，啱啱落嚟香港嗰陣，只係喺一間藥店做夥計，當年所學中醫嘅嘢，家陣成為上市公司主席嘅許榮茂，當然未必記得，但一啲理論佢仲用得上，佢仲話，學中醫對從商有好大幫助。
講究平和唔暴躁
新 浪房產轉載足球報社．勁球網報道，傳有意入主英超球隊紐卡素嘅許榮茂話，觀察到有啲人雖然好聰明，但一暴躁起嚟就好容易失控，呢個係做大事嘅大忌。許榮茂 嘅發迹史好多人都講過，佢自小受從醫嘅父母影響想做中醫師，點知當年佢嚟香港後，發現自己淨係識得講閩南話、普通話，講廣東話嘅病人同佢講病症佢都唔識 聽。不過佢都冇因為咁暴躁，而係心平氣和咁正視問題，喺間藥店做咗幾日就冇再做，一啲都冇浪費時間，就係咁，之後先有機會做證券經紀，走上富豪第一步。
中環在線：大陸富豪搞天價晚宴 李華華
2008-09-16 AppleDaily
如 果你係股神畢菲特，就有人不惜用200幾萬美金競投，要同你共晉午餐。大陸有位富豪，都要學股神搞個天價晚餐。據《重慶商報》報道，內地富豪嚴介和下個月 喺重慶設宴，同10位重慶老闆食飯交流生意經，每人入場費5800人仔。嚴介和係乜水？香港人唔多識，但喺大陸就有啲名氣。佢05年上過「胡潤百富榜」第 二，當年以中國太平洋建設集團主席身份，坐擁125億人仔身家，排黃光裕之後。不過06年就跌落16位，身家得番75億，07年頭50名都唔見影。
弱點是太優秀
學 股神呢一招，多少要有啲膽識，嚴介和有個綽號叫「商界狂人」，經常語出驚人，金句包括：「我的弱點就是我太優秀了。」家陣係華洋建設集團主席嘅嚴介和，去 年底搞小企業家管理培訓，經常四出演講，普通門票都要過千銀。呢餐晚宴據講會喺一家五星級酒店搞，食鮑魚同魚翅等。咪以為佢呢招唔得，據報道截至上個禮 拜，已有20幾個中小企老闆報名。
中環在線：宜家高層唔肯去印度 李華華
2008-09-16 AppleDaily
中國同印度都係亞洲最主要新興大國，好多歐美企業嚟亞洲區搵供應商同採購基地，自然會比較吓兩個國家嘅優劣。
實地考察搞到call白車
中 國最出名嘅優勢係產業鏈完善，即使係豆膶咁細嘅地區，裏面都有齊製造商所需逾百種零部件，效率異常之高。不過北歐宜家傢俬嘅亞太區高層，就唔係為咗呢個原 因選擇中國做供應商。宜家喺中國嘅主要供應商之一捷豐家居（776），總經理鮑向前同華華講，當年宜家亞太區高層到印度實地考察，結果搞到要由救護車送入 醫院，因為食咗啲唔乾淨食物搞到肚瀉。宜家高層因此誓言5年內都唔會喺印度做採購，否則寧願辭職唔do。至於另一個新興市場越南，佢話今年爆發金融危機， 當地通脹率飛升，o依家仲高企喺28%，越南工資同內地工資都唔差得幾遠，所以始終都係中國生產好。
中環在線：投行截水源賓架冇錢交際 李華華
2008-09-16 AppleDaily
經 濟有幾差，問一班喺投資銀行做嘅friends就最清楚。華華早排聽聞一位喺某歐資大行做嘅老友呻，家陣個市仲衰過2000年科網泡沫爆破，同2003年 沙士。點解會咁講？據呢位賓架朋友話，喺科網泡沫爆破同沙士時，佢哋都仲有得claim吓entertainment fee（交際費），最多都係要交個report交代吓同啲乜人交際聯誼，但家吓佢哋已收到內部通告，所有應酬費一概唔可以claim。
傳今年第四次裁員
對 啲賓架嚟講，雖然話高薪厚祿，但係正如華華個friend話齋，可以bill公司數係地位同身份嘅象徵，家陣咁搞法好影響士氣。不過，家陣影響士氣事小， 份工都保唔住就仲大件事。據聞佢間行將會再次大裁員，今次將會係呢家歐資大行今年第四次裁員，矛頭直指IBD部門，即係investment bank嗰班專係攞刁返嚟嘅精英。佢同華華講，心水清睇番之前都有報道，話佢老闆一早已經計劃分拆投行業務出嚟，擺明就係諗住賣咗去。
IPO客仲未找數
投 行咁唔掂都係因為個市唔生性，你見家吓個市升多過跌，就算有公司敢喺咁嘅時勢上市，都冇投資者接貨啦，華華個friend仲話，冇公司上市都唔止，連奀雞 placement都冇一單，你就知幾慘情。華華都聽過財經公關friend講，早排做落嘅IPO，因為家公司未上到市，家陣啲客仲未找數，除非唔諗住山 水有相逢啫，否則又唔可以追數追得太緊，真係有苦自己知。李華華電郵：
[email protected]
Next Page