2009-03-05 AppleDaily
| ||||||
| 世 姪M入咗資產管理公司（俗稱基金公司）幾個月，就被遣散，正是新嚟新豬肉，冇得好講，不過世姪M一表人才，在英國攻讀工程，假如放棄了好多青年人嘅美夢 ──加入ibank或對冲基金，從新投入機電工程行業嘅話，未嘗不是社會之福。太多工程系學生投身銀行、證券行，搞結構產品嘞，現在全世界都講緊去槓桿 化，回歸基本，如世姪M等工程科畢業生，不如再諗番做工程師吖。雷曼破產之後，再發生馬多夫騙局及史坦福醜聞，美國累人不淺，美國證監會與財政部難辭其 咎，經濟金融歷史將會記載，保爾森、伯南克、蓋特納等讓雷曼破產，見死不救，會係千古罪人。如果佢哋一早決定唔救較小規模嘅貝爾登，雷曼有所警惕，一定會 及早搵咗新老闆，不致破產收場，連累全世界。 基金生意在雷曼破產後，確實好難做，一來投資賺錢難，二來投資者「多出少入」，淨贖回額上升，基金資產（簡稱 AUM，Assets Under Management）自然萎縮，收入減少，故此世姪M這類新人就成為犧牲品。此日參加Lipper基金頒獎禮，萬豪酒店內基金經理雲集，左丁山與幾位基 金人傾起，佢哋呻到樹葉都落埋，埋怨雷曼事件政治化之後，立法會罵局長、罵監管罵得兇，牽連所及，基金產品送到上證監會審批，幾乎全部停擺，大家唔知幾時 先至會回復正常。 但佢哋明白到，部份立法會議員來勢洶洶，似乎係要一啲高官人頭落地咁款，證監會在此困難時刻，要盡量小心，審核新產品，又係可以理解嘅。 部份立法會議員似乎認為買股票嘅大戶係奸嘅，基金產品係騙人嘅，銀行係謀人寺，證監會係黃大仙，金管局係不管局；偏偏又有啲傳媒推波助瀾，於是香港金融中 心嘅形象與氣氛全部染上一層毒霧，你話點算好？一啲基金人原來幾同情陳局長，佢哋認為基金人即使日日在市場打滾，都估唔到雷曼竟然會破產，以致個個有損 失，陳局長冇「先知先覺」，十分正常。如果啲議員有先知先覺能耐，值錢咯，唔做議員嘅話，基金界會爭住請佢哋做顧問！ | ||||||
| ||||||
| 滙豐宣佈供股，十二股供五股，供股價二十八元，比未停牌前折讓五成一，幅度甚大，復牌後，股價於星期三（三月四日）收市價係四十四元二角，比宣佈前股價跌咗近23%。 滙 豐咁跌法，股東為之惆悵，正是供又死，唔供又死，左丁山持有滙豐股票，好多老友持有滙豐，由老到嫩，由大賓架以至初出道嘅OL，都有一手起碼，於是個個都 研究供還是不供。傳媒M首先嘆息：「我屋企老人家教落，股票分兩類，一類係炒股，賺錢即走，一類係穀種股，長期持有，只買不賣，係投資組合之核心。我哋本 來有四隻穀種股，就係滙豐、中電、港燈與香港電訊。如張大教授話齋，香港電訊失去專營權之後，我哋已經賣咗，變成電盈，唔關我哋事。剩番三隻揸到o依家， 本來收息好過癮，但滙豐跌成咁，死啦，勢估唔到o架嘛！中電、港燈又受到新利潤管制影響，回報率減少，以後唔會咁風光咯，我好驚呢啲穀種股買少見少，香港 退休人士穀種都冇埋！」 滙豐大跌，從高峯已回落七成有多，直情係全部香港人嘅災難。即使你手上冇滙豐，你嘅強積金一定有，你支持嘅慈善團體 一定有，你間母校嘅發展基金一定有，故此滙豐股價大跌之殺傷力，超過電盈八號仔十幾倍，超過雷曼迷你債百幾倍。傳媒M、賓架K、經紀C等等討論之後，決定 還是拼死無大害，一於供股可也。但係分析K打電話嚟警告：「喂，年紀大嘅股東無謂再博咯，攤薄就攤薄啦，當係部份止蝕可也。」佢認為滙豐經此一役，元氣大 傷，如要恢復舊觀，可能要在十年後，老人家無謂再等，但係二十零三十歲嘅，照供無妨，可以長期抗戰吖嘛。 左丁山自認以前分 析錯誤，曾以為滙豐在○七年二月已發盈警，預報次按債券有風暴，咁先知先覺，以葛霖為首之管理層應該老早清洗有毒資產盡量解決北美問題啦。誰知不然，葛霖 讓壞蘋果一路爛下去，今日就話後悔買入Household International，佢嘅表現實在令人失望，股東大會之時，股東應要求佢及早退休。 | ||||||
2009-03-07 AppleDaily
| ||||||
| 出 席「理柏香港基金年獎2009」頒獎禮，碰到好多基金經理，亦遇上監管機構人士。恭喜得獎人之餘，順口問監管人士：「你有冇買呢啲得獎基金呀？」監管人 答：「我唔可以買香港基金，更唔可以買香港股票，咁先至係合規行為。」香港大機構對合規（compliance）素來睇得好嚴，監管人之言，當然可信。左 丁山多口再問：「唔買得香港股，恭喜晒，我哋買入滙豐，以為好穩陣，點知道會輸足七成有多！」監管人苦笑回答：「但我哋可以買美國股票呢，無謂多講咯。」 嘩，買美國股票？隨時輸得更慘。在美國讀書/做事嘅朋友，返香港後，如買美國股作長期收息之用，銀行股一定買花旗、美銀，保險股一定買AIG，科技股一定 買IBM、蘋果、微軟呢類，不幸偏重金融股嘅話，輸到眼光光都似。問曹Sir如何解救，曹Sir話：「呢排唔少朋友講兩個體育名詞，一個係保齡球之 strike（全中），一個波碌落去，十瓶全中也。一個係高爾夫球之一棒入洞內hole in one。一啲老友買銀行股，以為夠保守，但買入嘅股份係瑞銀、美銀、花旗、蘇皇、滙豐，咁就全中，三振出局（strike out，棒球術語）；又有保險界資深人物，一世人只買一隻AIG，幾十年來瞓覺瞓得好甜，點知呢勻跌入一個大黑洞，正宗hole in one。死未？」坊間流傳，保險界大老擁有二百萬股AIG，兩年前仲做緊七十幾美元，以七十五元計算，總值一億五千萬美元，近十一億七千萬港紙，五代花不 完。但最新股價只係三十五美仙，總值剩番七十萬美元，約五百四十六萬港元，唔夠大老平時做善事捐款之用，咪話唔傷也，投資真係要切戒hole in one，如果我哋只揸一隻穀種股滙豐，神話幻滅了！要再諗過。 隔咗幾日吃午飯，有一位老前輩在，與佢講起AIG之慘況，佢話：「我都中招吖，我以前揸落五 萬股AIG，平均價五十美元左右，見佢跌到落五美元，把心一橫，買多五萬股，點知再跌落五毫子，於是買多二十萬股，當係喺拉斯維加斯輸咗百家樂。唉吔，竟 然又會跌到三毫半，服咯服咯，以後唔敢再掂咯！」 | ||||||
| ||||||
| 聯 儲局主席伯南克在國會聽證會發言，話AIG內部一團糟，全無風險監控，令佢好憤怒，美國財長蓋特納亦講到AIG掛住玩對冲基金與衍生工具，好似細路玩遊 戲，冇大人監管（without adult supervision）。我哋亦好憤怒，好嬲美國監管機構對AIG玩泥沙，完全唔理會，直至出咗事先至去救亡，伯南克與蓋特納（以前係紐約聯邦儲備銀行 總裁）呢班大人在AIG玩嘢之時，死咗去邊？相形之下，香港監管機構因雷曼破產而畀議員鬧到暈，美國監管機構唔救雷曼而只係畀國會議員係咁意贈幾句，香港 啲高官實在好唔抵。 呢啲新聞冇乜娛樂性，睇咗只係得個嬲字。大劉講電盈私有化及種票等等，就趣味盎然。佢之突然出嚟講嘢， 唔知係唔係受到上星期「壹仔」封面故事刺激呢？以事論事，在自由市場，只要有人提出一個私有化價錢，而該價高出市價，就一定會有人做套戥，計完私有化成事 之機率後，入市掃貨。自由市場有度好，就係容納不同意見，永遠有人睇好，有人睇淡，既然有人提出以四元五角私有化電盈，但竟然有好多人願意以三個幾在市場 上賣出，咁咪造就咗大劉呢類有錢人去套戥，賺差價囉。出貨班人應該係相信私有化一定唔掂嘅，買貨班人係相信私有化有機會成功嘅。 以三個幾賣電盈，自然冇眼 睇，以三個幾入電盈，為咗私利，梗係想私有化成功啦，手上股票化為成千上萬張人頭票就最好。故此大劉話佢好後悔，點解佢用幾億銀，只得一張票！經此一役， 我哋普通人都學到嘢，原來法例不理會「一氣化三清」或「撒豆成兵」嘅，只要同「要約方」（offeror）冇關係就得o架嘞，例如大劉就透露有人叫佢班二 百張票（其實買幾百股就可以有二百票，學醒目人士David Webb就得嘞）去玩一玩方小姐。玩嚟有乜用？騎騎，如果有人刻意玩嘢，或者有人願意主動約見傾條件呢！大劉尊重邵爵士，唔肯滋擾邵氏私有化。另一方面， 佢更尊重銀紙，真金白銀拿錢出嚟博電盈私有化成功，點知o依家仲未掂，如果私有化不成，八號仔股價好大可能隨大市下跌，跌到三元以下，大劉就損失不止幾條 雞毛咯！ | ||||||
| ||||||
| 肥 佬黎在台灣意圖收購中時集團，點知畀旺旺集團蔡衍明老闆截咗糊，呢位蔡老闆跟住入股香港亞視，威風一時，大概有意做傳媒大亨啩。做傳媒其實好難賺大錢，賣 米餅反為容易盤滿缽滿，例如旺旺（0151）啱啱宣佈業績，○八年賺咗二十點四九億港元，上升四成八六，純利率雖然下跌一點五個百分點，仍有百分之十六點 九，幾和味呀。 亞視呢，據張永霖講，係蝕本無底深潭，根本係一個黑洞，蔡老闆第一次涉足傳媒，就要兩線作戰，在台灣要力保危城（中時），在香港要救活死城 （亞視），真係面對人生大挑戰，睇吓佢如何盡出武功，已經足夠寫MBA論文。肥佬黎買唔成中時，改為經營有線電視台，請咗馬英九前幕僚金溥聰（清朝末代皇 帝愛新覺羅氏後裔）為行政總裁，轟動台灣，看來又係向難度挑戰，再次考驗肥佬黎嘅營運天才。 分析K同左丁山講：「黎先生財力同蔡衍明差一大截噃，點解仲要 進軍台灣電視業呀？」何所見而云然？分析K話：「條數好易計，旺旺發行股數132.07億，星期五收市價每股三點二六元，市值430.54億元，市盈21 倍，派息率4.57%；而壹傳媒（282）發行24.12億股，星期五每股作價七毫八仙，市值18.81億元，市盈率3.5倍，息率31%；蔡老闆有旺旺 做後盾，財力大好多倍啫。 如果硬碰硬，黎老闆在台灣吃虧啲喎，不過蔡老闆或者會畀亞視累親，令佢唔能夠集中精力呢？」計死數當然係咁計，但左丁山另有見 解，肥佬黎轉入傳媒，已有十九年，早已過咗learning curve之上，而蔡先生剛入行，仲要交吓學費，並且肥佬做好佐丹奴先至建立《壹週刊》，搞好《壹週刊》，先至創辦《蘋果日報》，到香港掂晒嘞，就到台灣 搞「壹仔」，台灣「壹仔」OK嘞再出台灣《蘋果》，o依家稱霸台灣印刷媒介嘞，先至進軍電視，肥佬係一步一步嚟嘅，從不兩面作戰，不開動兩條戰線，佢好清 楚知道在甚麼時候做甚麼事，對生意focus之執着，商界罕有其匹，如果我係大學MBA課程主管，今日就會開始追縱跟進蔡黎傳媒大戰，預備寫學習個案嘞。 | ||||||
| ||||||
| 分 析K之所以無端端講起蔡衍明與肥佬黎之比較，皆因睇完上星期五出版之《亞洲週刊》訪問金溥聰，標題十分吸引，就係「他和馬英九黎智英的緣份」，內容其實提 到黎智英者好少，提及馬英九者多多。分析K對馬英九冇乜興趣，但對《亞洲週刊》講：「親綠媒體分析指出，金投入壹傳媒老闆黎智英麾下，是為二○一二年馬連 任鋪路，指出馬親中，黎反共，金的大動作正好可以『淡化』馬親中色彩，壹傳媒在台灣媒體的強大影響力，更足以和綠媒體抗衡。」就大感興趣，問左丁山上述之 言有無道理，左丁山答佢：「以我所知，肥佬黎素來以市場為導向，視賺錢為企業的唯一社會責任──好似佛利民所講嘅一樣。」 金溥聰本係政治大學新聞系教授， 因曾是馬英九幕僚而備受矚目，故此加盟壹傳媒之後，引起台灣媒體炒作，諸多推測。金溥聰訪問記原文甚長，不能一一引述，但左丁山幾欣賞佢夠膽講：「……所 以他們一直在問我，會不會走回政治的路，我說，我為什麼要告訴你，為什麼有人質疑我，我就要剖開我的心給你看，我為什麼要讓自己綁手綁腳，提出這個問題的 人的動機是什麼？……他希望我給他yes或no，但我覺得我有權利不給yes或no的答案，那是我自己的自由。」 講呢番說話，要有極大信心。香港啲高官就 經常畀大狀黨或傳媒問：「答我，yes or no？」而不知所措，顧左右而言他，邊度夠膽回覆一句：「我有權利不給yes或no的答案」吖。金教授話從香港返回台北之後，更覺得台灣電視台無法吸引觀 眾，可惜記者冇追問：「點解有此感覺呀？」唔通香港電視台節目精彩過台灣好多？我哋香港人好想知道佢嘅答案。金先生曾在中大訪問教書半年，初到埗之時，大 教授在家設宴招待佢，左丁山為座上陪客，聽佢分析台灣政治局勢及馬英九與綠營之互動，講得十分詳細，佢之語言能力十分高，做佢學生聽佢講書，應該十分過 癮，如果佢在壹傳媒電視台做talk show節目主持人會好有吸引力。如此人物唔會輕易受甘詞厚幣引誘嘅，投身台灣電視業當有一番目的與理想。 | ||||||
| ||||||
| 寫稿時間，大記者突然走上嚟，話在中環採訪新聞，覺得心口唔舒服，要坐低休息一陣。左丁山連忙叫佢去睇醫生。唔好講笑，大記者十年來買埋一啲傳媒股、內銀股，及以為好穩陣嘅滙豐，點知連番股價大跌，咪話唔傷心，何況中環空氣不佳，周圍撲，好易中招。 個 零鐘頭後，大記者來電話睇完醫生，話冇乜事咯，醫生話佢胃氣脹，食吓胃藥就掂，與心臟完全無關。大記者講得語氣好平靜喎，好似放下心頭大石咁款，問多佢幾 句，原來醫生識得醫埋心病，贈送心靈雞湯，話自己買入咗滙控嘅accumulator，仲死多幾錢重，醫生話只好押後退休年齡，睇多啲街症便是。醫生好在 有強勁現金流，日日收現金，accumulator殺佢唔死嘅。大記者覺得有人仲慘過佢，有人與佢分享蝕本之苦楚，幾乎連病都冇晒。 下午茶時候，藥王T話佢識得唔少醫生買重AIG與滙豐，一位名醫甚至為兩名子女着想，每人送十萬股滙豐，當係分定部份遺產，如此好父親，幾曾得見，勢估唔到滙控會由百幾蚊跌到三十幾蚊嘅啫。 問 出口C有冇一啲振奮人心嘅消息，唔好成日講滙控，越講越傷心，「每天愛我多一些」變成「每天害我多一些」。出口C苦笑：「我日日睇住啲單，恕我無法有好消 息奉告。今年三月來港之外國買手據各行家滙報，比去年跌咗三成，預料今年下半年出口一定大跌，商會方面消息話，近月申請產地來源證供出口用嘅，以宗數計， 跌咗三分二。另外，我有一位熟客每年派買手來港與我傾訂單及價錢，一定住在尖東帝苑或者日航，但今年夠膽死來email叫我同位買手搵尖沙咀啲賓館，係咁 多年來未見過嘅。如果買手住賓館咁鬼死慳，佢一定將我啲單價㩒到低無可低啦，正是冇訂單會死，有訂單又死！」出口C懷念九十年代初一片好景之時，買手要住 在麗晶，佢又有錢請佢哋去「大富豪」之夜生活。如今買手要住賓館，夜晚點樣招呼佢呢？藥王T話：「晚飯去食一蚊一隻雞，然後去酒吧睇波啦！」唔通真係百載 繁榮一夢消？未有咁快呀？ | ||||||
| ||||||
| 呢朝早在大道中經過H & M，畀人喝停，原來係靚太L與她親愛的老公。呢對幸福夫妻朝朝十點幾就會一齊返公司，佢哋反正已經上岸，留在家中太得閒，覺得好悶，於是十幾年來開咗一間貿易公司過吓日辰，總之年終計數，唔蝕本就得，冇錢賺無所謂。 靚 太L喝停左丁山之後，立即問：「你有冇滙豐？」左丁山笑住答：「冇嘅請舉手！」靚太L話：「你供唔供？」點答呢，一啲專家話供，一啲話早走早着，啲大富豪 話一於長期持有，究竟如何是好。呢個問題能夠好似湯家驊大狀咁問：「Yes or No？」答案可能係yes and no，好複雜！靚太L咁講，佢一定有貨在手，於是安慰佢：「供少少冇所謂啦！」點知佢的另一半搶答：「揸重貨呀！」當堂不知如何是好。揸重貨？即係揸幾多 股呀？普通人嚟講，長期積累咗鄭海泉、柯清輝咁多，即係每人有三十萬股，就叫做揸重貨，或者揸十萬股都叫做揸重貨嘅嘞。靚太L揸幾重，乃私隱問題，唔敢 問，只聞佢嘆一聲：「真係想唔返工都唔得咯！」唉吔，假設揸十萬股，以前每年收息七十萬元，資產值一千五百萬，確係返工與否悉隨尊便，o依家資產得番三百 七十萬，收息冇保證，唔認真做好一份工，勢係假。 同樣問題，困擾好多香港人，老人家講落幾十年：「怕乜呀，如果滙豐有事，香港都好唔掂啦！」呢句說話卒之應驗喇，香港人與滙豐難分難解，風雨同路，過去共富貴、收息收得過癮，如今共患難，頂硬上去供股嘅話，會陪葬？ 一 九九七年南韓國民應付亞洲金融風暴，同舟共濟，捐出黃金救國，香港人笑南韓人痴得勻循。今回香港人供股救滙豐，大有南韓人捐金之悲壯，可歌可泣。供股事件 完畢後（其實左丁山老早叫滙豐盡快供股，見本欄○八年十二月二十九日，嗰陣時滙豐仲做緊七十幾蚊），滙豐應該大做公關，大賣廣告，多謝香港人不離不棄！ | ||||||
| ||||||
| 校 友會午餐例會，搵到胡孟青講「滙豐供股要Say No」，大收旺場之效。有一位校友帶埋乖女嚟聽，吃過午餐後便一同到太古商場逛百貨店，問校友為何如此舒服，唔使做乎？校友曰：「我已退休，乖女間銀行被 吞併後，舊人遣散，佢亦回家湊我個孫！」可惜啲喎，校友之女在柏克萊畢業，哈佛MBA，曾在紐約大型投資銀行做分析師，香港監管機構工作，一流財金人才 也，投閒置散未免嘥料。世姪女話：「現在搵工難，而且我o依家先至發覺，出面人工幾低吓，大概我已俾銀行高薪縱壞咗，仲要一段時間適應，返屋企親子都係好 選擇。」好，梗係好啦，佢在屋企教子，會叻過幼稚園老師好多倍。陳智思太太咪堅持在家教次子，唔送佢入幼稚園囉。 過去銀行（特別係投資部門 方面）人工高，令年青人趨之若鶩，不幸碰上金融海嘯，以後唔知仲有冇呢支歌唱。高盛一位亞洲高層最近退休，佢對英文報紙記者講：「投資銀行黃金時代已一去 不復返，或者再等十年啦，我在呢個時候退休，十分適合！」年青學生請留意吓嘞，叻仔叻女入大學或者選番做工程師、醫生、科學家，而唔係一定要爭住讀商科 嘅。 參加校友午餐會嘅校友，有財務Ｗ在，原來佢位公子本在美國讀工程，畢業後立即加入銀行做衍生工具，由貝爾斯登出身，去咗東京雷曼，再回 港加入滙豐，現在呢？財務Ｗ話：「個仔上個月攞咗遣散費，繼續享受生活！」又係嘅，過往七、八年，收花紅不在小數，嘆吓未遲，只要佢對調查人員講（如果被 抽樣選中嘅話）佢唔會短期內搵工，佢就唔算失業，唔會推高失業率，令曾司長頭痛。 未被縱壞，只怕捱壞嘅記者小Ｂ一味呻窮， 佢啲同學被銀行炒魷，拿到嘅遣散費，足夠佢三年薪水。可見銀行與傳媒行業薪酬相距之大，成績標青到極嘅學生要爭住入讀中大新聞系好似冇反映到呢個wage gap。現實上，記者做三四年就轉行，有其道理。在校友午餐會上碰到一位靚女校友，佢遞上名片，係私人銀行家，已係董事級，問佢讀邊系，佢話：「我讀 Journalo架。」咦，果然醒目，讀新聞而打銀行工，識得轉膊喎。 | ||||||
| ||||||
| 胡 孟青人稱青姐，在新城財經台主持開市直擊節目，與靚仔小生鄧威信拍檔，一剛一柔，十分受聽眾歡迎，唔好以為靚仔鄧是「剛」，青姐是「柔」，其實啱啱相反， 青姐剛猛，成日鬧聽眾，靚仔卻反而要溫柔啲，呵番住。有一次餐飲M聽到唔抵得，向左丁山投訴：「喂，知你識得胡孟青，唔該你話聲佢，師奶散戶打電話問行 情，成日畀佢鬧嘅，乜咁火氣猛o架！」 騎騎，這正是胡孟青風格！兩年幾前，佢位愛兒出世，左丁山笑佢：「喂，你在新城出聲，冇人知你身材， 但在有線出鏡，快啲減肥收身先至好睇喎！」點知青姐鬧番轉頭：「關你乜事，女人唔可以有自然肥態美嘅咩，唐代女士都好肥嘅啫！」果然快人快語，唔會詐詐諦 諦，扮晒嘢，總之有嗰句就講嗰句，做人如是，講股票亦如是。 正因佢為人勇猛，所以佢在三月九日下午四時十分後，在有線電視鏡頭前出現一個為 滙豐「飲泣」嘅場面，立即轟動全城，《金融時報》都引述報導，當然更加上埋本地報紙頭版，可說「一哭成名」，有別於青姐口中之靚女「一脫求榮」。左丁山老 早搵咗佢到校友會午餐會講滙豐供股，供還是不供？青姐話佢認為供股係儍瓜，故此為佢訂咗一條題目：「滙豐供股要say no」。嘩，電郵一出，校友報名打到嚟，唯有擒擒青截止報名。到咗三月十一日星期三，青姐之哭已觸動全港，冇報名之校友亦湧到嚟，搞到要臨時加櫈，最後仲 要加枱，左丁山又試笑住蝕。 青姐首先聲明：「我冇喊呀，只不過係頭髮長，刺眼，我用手撥頭髮兼捽眼啫！」點講都好啦，大家 想知道佢為何反對供股啫，青姐話滙豐大跌，人性顯露，八十幾歲老父積積埋埋啲滙豐股票收息，唔捨得賣，叫個仔出錢供股，因為啲股票第日都係留畀乖仔嘅啫。 點知乖仔話：「老竇不如你供埋股先至留番畀我！」太多香港人攬住滙豐股票過世喇，青姐見到滙豐跌到咁殘為港人痛心，有感而發，真情流露啫，佢估計滙豐還要 陸續撇賬為商譽撥備集資一不離二，此外還有其他數據，篇幅所限，唔寫咯。青姐話供股可避則避喎。 | ||||||