| ||||||
| 港 交所決定在三月二十三日撤銷競價時段，恢復舊制，於是自○八年五月實施嘅新制就此玩完。聽本地經紀意見，就知佢哋不時反對競價，但外資大行、基金經理嘅利 益亦須維護，美其名曰追上國際最佳守則，維持香港作為國際金融中心之聲譽，故此港交所聽大唔聽細，一於推行競價時段，甚至後來俾本地傳媒譏諷為「勁假時 段」，亦不為所動。反對者可以批評港交所唔夠靈活，但贊成者可以話港交所擇善固執，堅守原則。點知其他股票收市價「勁假」就得，搞親滙豐就有後遺症咯。 經 紀S同左丁山講：「三十三蚊沽滙豐，好難查到證據嘅，可以懷疑有人夾定，但要搵齊證據，事實上會非常艱難，我相信證監會搵唔到，只能夠話一啲外資佬玩得過 龍，玩大咗啦。」滙豐股價在三月九日急跌至三十三元收市，驚動英國與香港，更令青姐在鏡頭前花容失色，曾司長要過問，於是港交所夠膽向本地經紀「擇善固 執」啫，但唔敢向政府「擇善固執」，擒擒青話取消競價，連腰骨都斷埋。 港交所口口聲聲話要追上國際標準，所以有三件大事要實施，包括（一）競價時段， （二）延長董事禁售期，（三）上市公司出季報。第一件推出之後，現受壓力而取消，第二件本來話在一月一日實施，受反對而延至四月一日，第三件仲要諮詢。以 目前世界大勢睇，港交所最好取消第二件與第三件，免生事端，否則他日可能會反口，打倒昨日之我，損害威信。 乜唔係啫，講甚麼外國準則，原來美國都冇董事禁 售期呢回事嘅，美國銀行與花旗集團未公佈今年第一季業績，第一季仲未完結之時，就已經有董事係咁買股票，直情係內幕交易，美國證監會完全唔理會。譬如花旗 一位董事Roberto Hernandez在三月二日以每股一元二角五仙買入六百萬股花旗，股價於三月五日跌至九十七仙，但花旗總裁喺三月十日出內部通告發盈喜，股價立即飆升， 上星期四收市報一元七角八仙，Hernandez賺到笑。以香港監管觀點，呢樣仲唔係內幕交易？另外，美國銀行總裁買番美銀股票，市場仲話係好消息o忝， 話對美銀股價有支持喎。在呢方面，香港實在可按自己方法行事，唔須要聽外資基金經理嗰套係要延長董事禁售期。 | ||||||
| ||||||
| 港 交所想要本地上市公司發表季度業績報告，跟隨英美，受到好多大公司反對，港交所諮詢市場意見之時，相信要諗清楚，唔好以為外國嗰套一定掂，以為季報會保護 到小投資者；好多時，理論與實際不符，當美國開始反思季報之禍害時，香港無必要在這時候學習他人。曾經有管理權威之稱嘅前GE（通用電氣）行政總裁 Jack Welch接受《金融時報》訪問，打倒昨日之我，話自己以前宣揚嘅「股東價值」（shareholder value）係錯嘅，受人誤解，又話為咗達到每季都有利潤增長嘅目標係錯誤概念，真係此一時也，彼一時也，金融海嘯之下，人性暴露無遺，Welch以前猛 咁逼僱員有表現，每年炒5%表現差嘅，逼到下屬透不過氣來，究竟為乜？ 當然係要求每季每年都達至利潤目標而已，o依家又走出嚟話人哋誤解咗佢，笑唔笑話？ 但我哋要反思之，就係季報為公司管理層帶來好大壓力，容易變成短視，不顧長期發展！人哋已經諗到季報之禍害，港交所仲以為係執到寶？以前美國有某大藍籌公 司曾經錄得二十幾季連續利潤增長，股民拍晒手掌，推高咗股價。點知後來揭發咗，會計做數o架咋，小股民、基金經理齊齊中招。 經紀S在星期五趕住去打波之前 對左丁山講：「我哋香港地方細，今天之金融界成績得來不易，事實上好依賴外資流入，故此遵從國際標準，有時禮讓吓外資，無可厚非，但係國際上之標準，受到 金融海嘯沖擊而證明無大益處之時，我哋就唔使盲目照抄啦。畢竟香港在全亞洲城市之中，有最多散戶入市，最多散戶鍾意炒窩輪、炒牛熊證，利之所在，輸死無 怨。冇咁多散戶入市，啲大基金出貨冇咁易啫；故此我哋亦須要照顧本地投資者利益，搞競價時段，延長董事禁售期以至季報等，對散戶未必有益處，有時簡直係誤 導佢哋o忝。」此言甚為中肯，香港民情（股民）獨特，與別不同，外國基金嘅意見，可以聽但未必一定要跟到足嘅。 | ||||||
| ||||||
| 滙 豐鄭大班十幾日來為了滙控宣佈業績，供股及參加北京政協會議，忙得透不過氣來，但佢好重視與中學生交流，點都要抽出兩小時時間，喺三月十七日下午三至五 點，出席滙豐嘅「滙豐理財學堂」，講吓求學經驗與理財秘笈，有幸出席嘅二百名中學生要記住至得。鄭大班講理財，苦勸學生注意三點，（一）有一百蚊零用錢， 只用六十，其餘錢收埋做積蓄；（二）將來有積蓄就優先買樓自住，唔好買股票住，供樓要緊；（三）千祈咪碌爆卡，唔好用信用卡借錢。鄭大班自己嘅信用卡簽賬 到期必會清付，銀行賺唔到利息！咁講法，唔怪得有記者話鄭大班倒滙豐米，若人人如是，滙豐以及其他銀行賺少好多錢噃。 不過要記住，鄭大班之說話對象係中學生，學生當然唔好先使未來錢，亦唔好下下伸大手板向爸媽攞錢，佢回答一位學生問題時就講到：「你哋想父母安慰，退休快樂，好簡單啫，就係做乖仔乖女，讀書成績好，與父母共患難，咁就足以令父母好快樂，捱也捱得開心！」 鄭 大班可能係夫子自道，佢自己話小學讀書成績平凡到極，小學會考之後獲派位，到職業先修學校讀書，故此佢好早就識得金工、木工、繪圖、打字等職業技能。後來 學校改制變成九龍工業中學，佢哋因為改制得益，變成正規（文法中學）中學生，可以考會考，但對於數、理、化、生、歷史等科目，要從新嚟過，讀得好辛苦，佢 哋班人在一九六五年讀完中五，本應算係九龍工業中學第一屆畢業生，但鄭海泉成為鄭大班之後，收到九工嘅創校四十五周年特刊，揭開一睇，原來九工嘅官方紀錄 係以一九六六年為第一屆中學畢業，間接唔承認鄭海泉嗰班係學校正式畢業生。鄭大班喺三月十七日自動爆出來，語帶感慨，遺憾之情溢於言表，在座者甚為感動。 今時今日，邊個家長（講老實話呀）肯自願送子女入職業學校/工業學校o架，咁多年來，呢類學校備受歧視，但想唔到教育界竟然有人歧視番自己嘅學生。鄭大班 讀書，從職業學校至工業中學，至私立英中至考入中大，路途艱苦，卒修成正果，今天學生應以鄭大班為讀書學習對象。 | ||||||
| ||||||
| 股 市大升特升，似乎氣勢如虹，但各國發表之經濟數據就差到極，股市與實質經濟存在好大矛盾，分析師唯有話股市永遠走在經濟前頭，股市咁醒，表示經濟就快復甦 反彈咯。但願如此，希望真係下半年V字形衝上去。 玩具業大老L先生話佢間公司已經收到美國買家「警告」：「準備好生產設施，訂單將於八月急速殺到，如果準 備得唔好，你哋會蝕底，接唔到單！」L先生於是急急去搵銀行商量下半年啲買料大計，點知銀行大潑冷水，銀行家嘅態度係：「係咩，睇定一啲先，加額免問！」 L先生話銀行仲係收韁收得好緊，無放鬆跡象，與內地一聲放寬銀根，貸款就增加一萬億元人民幣比較，香港差天共地。但內地銀行聽晒命令行事嘅，壞賬撥備可以 拖得就拖，大家睇唔到嘅。 一位自稱「廠佬」嘅讀者來郵，指香港稅局玩死廠佬，希望有人主持公道。公道？去搵申訴專員啦，搵立法會議員啦，話畀左丁山聽，有 乜用呀？不過香港議會掛住用啲寶貴時間嚟討論粗口，不顧大事，確令香港市民氣餒，又即管將廠佬之稅務問題寫出嚟：「本人是正宗廠佬一名，大大話話在大陸搞 廠已經廿個年頭。幸運地，過去廿年雖然唔算事事順利，不過亦算搵到餐安樂茶飯。除咗頭幾年因為賺唔到錢所以無交稅之外，我公司年年都報足稅，亦從無拖欠。 如是者，以為無乜後患，捱多幾年就可以退休，安享晚年。點知最近收到稅局通知，話要追回過去七年一直減免的『離岸寬免』。意思係過去所寬免的百分之五拾離 岸所得要全部追回。以我公司為例，如果要全數支付，大約為兩千萬，不要話現在的環境，就算是正常情況下，一間正常的公司如何應付這麼大的額外支出？ 令人不 明白的是，百分之五拾的離岸所得寬免是二拾幾三拾年（自有人回大陸開廠開始）一直為所有做大陸生意和會計師與稅局的共識。為何稅局可以單方面破壞承諾，還 要在這個水深火熱的時間推出，真是怕我等大陸廠佬死唔切嗎？希望左生可以為我等廠佬主持公道。一廠佬上」以上廠佬之言，明白不過，請稅務局或者立法會嘅工 商界、會計界議員跟進討論吓。 | ||||||
| ||||||
| 奧 巴馬冒起之後，西方左派當道（美國叫做自由派），主流傳媒興起一片左轉之風，歐洲本來就係左派思潮世界，事事講政治正確，愛好環保人士如果唔跟住戈爾講全 球暖化（現時改稱氣候轉變），會被視為右派；講經濟政策，如果唔仇視資本家，膽敢繼續講市場經濟嘅話，梗係大右派反動分子啦，我哋曾先生都話以後唔好講 「市場萬能，干預萬惡」咯；講法律、法治，而唔講維護甚麼公眾利益嘅話，實會被打成偏幫資本家，偏袒財團……於是乎陶傑寫吓反諷文章，就畀本地左派圍攻， 盡顯文人相輕本色，反而在網上見到唔少西人站在陶傑一邊；另外證監會就電盈私有化大打官司，談「道德」多過講法律，顯然又係講求政治正確啦。呢幾日碰到幾 個律師，佢哋對電盈私有化一案嘅高等法院判詞，都有研讀過，幾個都同聲認為關淑馨法官於法有理，但冇讀法律嘅老友就起碼有一半以上講「道德」層面。上訴庭 唔知會點判，寫稿時未知道，但無論如何，法律vs 「道德」，可以有排拗，但左丁山以為，如果多數香港人講「道德」而輕法律，我哋嘅自由就會受到嚴重威脅，走向民粹主義，滋養集權主義氣氛！ 左丁山承認係大 右派，自細讀右派中小學，右派書院，睇慣牟宗三痛批毛澤東及投共文人嘅文章；主修經濟學時，更加拒絕馬克思嗰一套，認識清楚馬克思主義會害死中國經濟，所 以自從開始寫專欄到o依家，都鼓吹資本主義，擁護自由市場，贊成佛利民嗰套。前日閱讀新鴻基地產獨家贊助嘅《讀書好》月刊三月號，內有一篇過癮訪問，就係 梁文道訪問黎智英談讀書，自己雖然認識肥佬黎好耐，知佢好讀書，但從未詳細深入傾過所讀何書；梁文道呢篇訪問，肥佬黎有問必答，方知道佢讀書之廣、之學術 性，非左丁山所能及，更了解原來佢比左丁山更加右派！肥佬話讀左派知識分子所寫嘅書，睇一半就give up（例如John Rawls），怎樣也不信左仔argument，所以只看合乎自己思想嘅書。好彩佢係大老闆啫，就算讀者投訴佢都冇用，唔似得我哋畀人投訴，就會驚一驚！ | ||||||
| ||||||
| 叫 肥仔K睇《讀書好》月刊，尤其是梁文道訪問黎智英一文。肥仔K睇完，哈哈一聲：「原來Uncle Jimmy嘅思想啟蒙書係《到奴役之路》，呢本海耶克唔流行嘅噃，大學一年班時，我讀呢本書，讀完又讀，畀同學鬧我係保守派，年幾前我喺Face Book寫我嘅favourite book係《The Road to Serfdom》，即刻畀圈內人鬧咗一輪。呢本書讀多兩次三次，想話做左派都好難！好似有人話過，三十歲之前冇左派思想，唔信馬克思，就係冇熱血與激情， 老實講，因為我一早睇完《到奴役之路》，我未到三十歲啫，啲血已經冷晒，毫無激情。」 或者因為海耶克思想先入為主，肥仔K在大三時修讀現代政治思想，教授 要佢哋讀馬克思《資本論》，肥仔K讀咗《資本論》一半，就讀不下去，肥仔K嘅大學同學、碩士班同學，以自由派居多，評論時肥仔K經常「舌戰群儒」，雙拳難 敵四手，畀人鬧到暈。佢同齡朋友之中，讀過《到奴役之路》嘅，數唔出一兩個。約一個月前睇IHT，見到有一篇AIG金融產品部總裁嘅公開信，題目係 「Dear AIG, I Quit」，就佢嘅部門派發一億六千萬美元花紅一事，婉轉細說美國政府不是，傳媒寃枉收取花紅嘅同事，為自己同事辯護。 美國民粹主義揮起道德大棒，痛打收 花紅嘅AIG僱員為無恥、不道德，故此呢位先生話將佢嘅除稅後花紅全部捐作慈善，並且辭職。不過，奧巴馬知道自己反應太大，背後做功夫，故此美國眾議院之 懲罰性花紅稅稅率（90%），雖然在眾院通過，已在參議院擱置，會胎死腹中。因此事而向一位前AIG僱員傾起，佢對於泛道德主義痛罵AIG花紅一事，感慨 萬分，並且話一位高層部門主管在紐約辭職，臨走前買咗幾十本《The Road to Serfdom》派畀公司同事，點解要咁？有感而發也。 寫到呢度，一位老友來電告知，AIG香港嘅一位主管級人員決定不幹了。離職後有乜好做？入一間神學 院讀神學碩士，果真100%轉型，一場金融海嘯，衝擊全世界金融機構嘅精神面貌，各國政府以救市或道德之名，大舉干預市場，加強監控公司行為，自由派/道 德派大聲叫好，保守派中人要堅定信心，不妨重讀《到奴役之路》。 | ||||||
| ||||||
| 到四季酒店參加財務N公子之婚宴，遇到不少香港、台灣、日本商界名人，財務N在消費性貸款行業，屬教父級數，佢娶新抱，自然冠蓋滿「四季」，財務N介紹左丁山與一位台灣大亨握手，問我識唔識Jeffrey Koo，邊度敢話唔識呀，大名鼎鼎，十幾年前到台灣訪問，呢位大亨就請過我吃晚飯，見過面。 原來財務N之新抱乃台灣名門之後，故此辜先生親自來港參加婚宴。同席之中，位位老友，當然十分好傾，退休校長L之先生係外省人，雖然在香港讀書、長大，但外省口音不改，L先生突然間問：「你點睇大市呀？『廣豐行』睇得好好。」「廣豐行」？入口米商呀？還是經紀行呀？在座朋友聽到一頭霧水。 L先生話：「成日講中國投資、救市，好出名位廣先生呀？」哎，即刻知道佢係講J.P摩根大通位龔方雄。龔先生梗係醒啦，好似有天地線o忝。不過今時今日，預測市道，言人人殊，各有不同睇法，好似四月二十日之《華爾街日報》就報導，兩派分析師睇同一批美國經濟數據，樂觀派基金經理就話見底咯，標普五百會繼續升，悲觀派基金經理就話標普市盈率（現在係13倍）會跌到單位數字！ 一般投資者可以信邊一派？因而想到法官有權威，可以講私有化價錢太低，好似獨立顧問份報告係廢紙一張。如果法庭可以指點私有化如何定價，以後投資銀行唔使做咯，讀甚麼CAPM或者Discounted Cash flow或者專業估值呀？左丁山仲以為先進社會講求專業分工o忝，原來法官除講法律，仲可以講埋資產定價與外國公司控制權，認真學問高深。如果龔方雄係法官話，佢睇好中資股觀點，可能更具權威性！回應番L先生問題，其實左丁山唔識睇，目前市場狀況甚為怪異，舉例而言，報紙兩條標題：「差過911沙士，國泰推高層無薪假期」，「港人破產申請，創下五年新高」，睇到，問你驚未，但另外兩條標題：「新盤銷逾500伙，海嘯後新高」，「樓市08大旺價重現」，兩種互相矛盾情景，同時出現，睇好還是睇淡？不如請法官大人一錘定音。 | ||||||
| | ||||||
| 外國記者會於四月九日中午辦一場辯論會，現在講番，好似過時，但因為題目冇時間性，o依家先至寫，仍有趣味性。FCC當日特別邀請股壇長毛David Webb與前《南華早報》專欄作家Jake van der Kamp（下稱DW與vDK）對壘，講「延長董事禁售期」，DW素來鼓吹嚴控上市公司，一向贊成延長禁售期（black-out period），而vDK就係市場派，觀點比較接近「獅子山學會」，大力反對。左丁山坐在一位西人隔籬，佢以前係政府官員，退休後做「仲裁、調解」，專門處理建築、工程方面案件。佢問左丁山贊成還是反對，左丁山話反對，佢就話贊成，於是台上未開始，我已經辯論先。 點解會有時間呢？因為DW隨身帶住電腦，偏偏呢日佢power point以密碼言語編寫，FCC電腦投射無法啟用，故此佢急急返屋企過另一個無密碼版本，場辯論於是延遲開始。DW首先發炮，指反對者其身不正，別有用心，引美國JP摩根董事例子，人自願不在業績公佈前買賣公司股票，又話延長禁售期可以逼使公司提早宣佈業績，有益投資者，講到尾，佢認為公司董事擁有大量資訊，與股民得到之資訊極為不對稱，延長董事禁售期，有助解決「不對稱」問題。（按：DW冇講到美國根本沒有業績宣佈前禁止買賣股票呢回事，花旗集團董事在三月初買入花旗股票，之後CEO大力唱好，而第一季業績要等到四月十七日先至宣佈，但美國冇傳媒批評花旗董事。美國的月亮不一定圓。） vDK冇DW咁多準備，亦冇power point，但以前投資銀行（大摩）分析師身份，佢講得好實際，不講理論，佢指出：（一）在投行工作，如果你夠膽同上司講：「阿媽教我唔好咁做」話，想升級就幾難。對基金與投行最喜歡上市公司大股東在某段時間內不能買賣公司股票。（二）香港與亞洲上市公司，好多由家族控制，不似英美，延長董事禁售期就係忽視本地情況。（三）公司董事如果因為資訊不對稱而買賣股票獲利，就係內幕交易，可以拉人，何必延長禁售！vDK猛問DW提供確實證據在美國、英國、香港，有冇公司董事買賣股票獲利而非（ａ）做假賬或（ｂ）內幕交易？一般買買賣賣，公司董事好少賺到大錢。而（ａ）或（ｂ）根本與延長禁售期無關。DW冇直接回答。 | ||||||
| ||||||
| 分析K係Jake van der Kemp讀者，對vdK取消「南早」專欄，覺得好可惜，代替者之文筆冇咁活潑，亦冇vdK咁一針見血，讀者覺得唔過癮，畢竟vdK做過記者，做過大行分析師，實戰經驗豐富到極。 vdK講到在大投資銀行工作，要聽從上司說法，唔好聽阿媽講，十分幽默，亦好實際。分析Ｋ叫左丁山細讀前星期《新聞週刊》一篇長文，講當今自由派大將克魯明，內容十分有趣。左丁山睇完，除幾點私人資料之外，覺得其他並無新意，因為平時睇佢專欄，都知道佢批評奧巴馬，大罵蓋特納啦，奧巴馬本身係自由派，但上台後就要兼顧實際，不能左得太離譜，而克魯明就一左到底，猛烈批評奧巴馬干預得唔夠，唔到肉。 以佢背景，好應該一早畀克林頓延攬入白宮，點解冇呢？原來一九九二年克林頓上任前，在家鄉小石城召開經濟顧問論壇，克林頓問：「改革醫療保健與削減財政赤字可否並行？」克魯明答：「請你做一痛苦決定。」克林頓聽完，立即轉頭問Laura Tyson（當時加州大學柏克萊分校教授）同樣問題，泰臣答：「可兼而得之」。到克林頓入主白宮，聘任泰臣為經濟顧問，克魯明仍然留在普林斯頓教書。克魯明o依家話佢當時畀一個「對的答案」，後來克林頓醫療保健改革方案果然一敗塗地！ 對的答案，不等於是「正確的」答案，真實的話就係偏偏唔聽！想話學而優則仕呀，凱因斯學說就最政治人物聽，現在勸曾特首信市場，不信干預，一定冇官做。克魯明的故事，讀中國歷史中國人一早識晒，唔會在大老闆面前講老闆唔聽語言。 批評克魯明人就話克魯明完諾貝爾獎，學術生涯已達頂，以後好難再有突破，所以克魯明現時鍾意寫專欄，寫blog，上電視，對教書/研究興趣漸淡，專心做個公共知識分子（public intellectual），批評時政，罵走布殊之後，對奧巴馬亦唔客氣。奧巴馬白宮方面，當然親疏有別，搵人做briefing，一定冇克魯明份，全面杯葛之。 | ||||||