【馮仁昭四圍超】「一陣涼風吹埋嚟」栢芝媽講Quintus撞鬼
1 :
GS(14)@2016-08-16 06:28:04■栢芝媽係潘紹聰嘅Fans，收聽佢主持嘅鬼古節目同參加靈異旅行團。
張栢芝媽媽戴莎莉幫「鬼王」潘紹聰嘅靈異電影《魕異》首次演出，仲擔正做女主角，套戲9月上映，佢喺戲入面飾演一位媽媽有個女，而個女經常遇人不淑，又多次大肚同墮胎，搞到嬰靈纏身最終被害，佢話想借套戲警惕少女帶眼識人。
「要搞，搞我」
栢芝媽上星期喺套戲顧問、暹茅法術研修會嘅趙師傅喺旺角嘅神壇接受訪問，親自講同栢芝嘅撞鬼經歷：「四、五年前同碧芝、栢芝以及大仔張豪龍去泰國曼谷住K字頭嗰間酒店，我哋住地下，一開玻璃門出去就係私人泳池。有晚栢芝打電話去我間房，話佢間房啲燈係咁眨，佢話『媽咪，過嚟啦，有嘢呀』，我同大仔即刻過去睇。」栢芝媽話過咗去盞燈眨得仲犀利，嚇到佢哋即刻抱埋Quintus（細仔）搬房，栢芝媽話：「搬咗去我間房之後，先記得未攞Quintus啲奶樽，我返轉頭一開門一陣涼風吹埋嚟，嗰時我講『你唔好搞細路仔呀，我過嚟攞返奶樽咋。你要搞，搞我。」
■趙師傅為栢芝媽祈福保平安，栢芝媽背脊嘅紋身可以增進人緣。
■栢芝同細仔Quintus去泰國旅行時有過靈異經歷。資料圖片
當栢芝媽攞完奶樽返自己房後，唔知點解就一個人坐咗喺泳池邊不停喊，佢話：「冇意識，唔知做乜嘢，只係不停喊，啲仔女出嚟叫我入返去，我都冇理佢哋，喊咗足足粒幾鐘，諗返喊乜嘢就唔知。」栢芝媽第二日就走人，栢芝仲叫新嚟住客小心啲。撰文：馮仁昭
來源:
http://hk.apple.nextmedia.com/entertainment/art/20160816/19737471
Quintus開7歲生日P英勇救哥哥
1 :
GS(14)@2017-05-14 10:50:56張栢芝同謝霆鋒個細仔謝振南（Quintus）前日7歲生日，姑姐謝婷婷就話已經送咗禮物畀姪仔，媽咪栢芝前日亦有喺微博貼片賀細仔，噚日，就到開生日會。有份出席嘅栢芝老友張文慈（Pinky），噚日喺微博貼出生日會啲相，佢透露有過百小朋友參加，全場最正嘅係當哥哥謝振軒（Lucas）玩遊戲輸咗要受罰被搽cream上面，壽星仔Quintus衝出嚟話要幫哥哥擋，Pinky明言「好感動」。
Pinky喺微博度話：「今天是栢芝兒子Quintus七歳的生日Party，Quintus生日快樂，除了過百兒童參加很熱鬧之外，有一件事令我很感人的，就是當Lucas玩遊戲輸了要被罰塗Cream上塊面的時候，Quintus馬上奮不顧身的護着哥哥說：讓我代替他受罰吧！這埸面真的很感人喔，接着兩兄弟又拿出一個朱古力花球送給栢芝祝； Happy mothers Day！So sweet Ceci～～你真是一個偉大的母親！也在這裏祝你母親節快樂！」咁啱得咁橋，一年前，又係Quintus生日會，Pinky都有份參加，又係佢負責貼相；到今年，多謝Pinky再度公開生日P嘅盛況，否則，大家都未必有緣見到已經7歲大嘅Quintus真係大個仔咗好多，見到栢芝抱住Quintus時，係好好臂力咁，但真係隔住個mon都feel到Quintus應該重咗唔少，難得嘅係栢芝仲好從容咁樣樣。從Pinky啲相見到，Quintus有兩個生日蛋糕，其中一個係漢堡包造型嘅，而張相信係邀請卡嘅印刷品，有Quintus被key上超人嘅卡通造型，好英吓！
來源:
http://hk.apple.nextmedia.com/entertainment/art/20170514/20021047