📖 ZKIZ Archives

免費報紙硬碰硬 左丁山

http://hk.apple.nextmedia.com/template/apple_sub/art_main.php?&iss_id=20110826&sec_id=12187389&art_id=15556523&cat_id=255&coln_id=22

壹傳媒即將會出版免費報紙，叫做爽報，肥佬黎聲稱要派一百萬份，頗為嚇人，開始嘅時候，會唔會派咁多呀？現時每月已有聲稱二百萬份免費報紙流通，下月再加 多一百萬份，真係滿坑滿谷。左丁山第一個想起嘅就係強哥，事關強哥乃現時派報紙大哥大，數吓手指，佢負責發行「蘋果」、「星島」、「信報」、「經濟」，負 責派「頭條新聞」、「 am730」、「晴報」，下個月又派多一份「爽報」，去邊度搵人派報紙呀？香港最新（五至七月）失業率係 3.4%，屬充分就業水平，搵工人都唔知幾艱難，今趟難為強哥咯。
呢日見到施老闆，問佢如何是好？施老闆話：「水來土掩啦。『 am730』已經有錢賺，算係企穩陣腳，依家先至再有人加入戰團，我已經多咗起碼三四年時間準備迎戰，一於冇有怕！」派報紙又如何呢？施老闆話：「我地好 俾心機㗎，為派報員搞 party，有抽獎，母親節就每人送一朵玫瑰花，今時今日，要善待所有夥計吖嘛。」
免費報紙已進入戰國時代，大戰難免，必 有損傷，至於最後仍然站立嘅會係邊個，好難講。生還者要有兩個條件，一有銀紙，二有人才，兩者皆缺嘅就會首先陣亡。據施老闆透露，「 am730」不搶突發新聞（因成本太大），倚賴編輯慎選能吸引讀者嘅新聞，以及有質素嘅專欄及評論喎。咁奇？專欄可以咁吸引？
聽完施老闆之言，即 刻收到消息，肥佬黎要親自睇過「爽報」試刊版嘅專欄，唔，可能英雄所見略同喎。左丁山日日睇免費報紙（因有人送上門），發覺免費報嘅專欄以短見稱，極少超 過五百字（施老闆專欄例外），特色係差唔多每一版有一個專欄，各種類型題材，應有盡有，唔係叫讀者睇晒嘅，自行選擇可也。總之好似自助餐咁，總有一兩款讀 者會鍾意，可以適合迎合一兩百萬位讀者嘅不同興趣，老老嫩嫩，四十後與九十後都要啱睇！既然如此，免費報紙專欄既要搵新鮮人，又要搵一啲已成名人物，幾有 挑戰性，肯在咁嘅環境下冒險打硬仗嘅，全城只有一位肥佬黎有如此魄力！

PermaLink: https://articles.zkiz.com/?id=27390
Next Page
ZKIZ Archives @ 2019