|
||||||
退休前從未涉足飲食界的何寶瑛﹙瑛哥,六十歲﹚,怕悶學人投資串燒專門店「重慶燒」,與拍檔開分店半年蝕百多萬。他不服,深信串燒有得做,回歸偏僻的文英街總店親力親為,從頭做起。 不足三年,串燒店由一間不足二百呎的細鋪,拓展至一條街有三間,由一個廚房供應省成本之餘,看上去感覺亦甚具規模,日日爆滿,即使面對鄰近兩間後起競爭者,生意亦不減反增。 現在就從湊客、管理員工及應付競爭三方面,拆解這名飲食業新丁如何出招,月賺十萬。 上週五晚上八時許,三位女途人走到佐敦渡船角文英街的街尾,一臉遲疑的說︰「有三間鋪招牌都寫住『重慶燒』,好似好勁喎,但邊間係真?」忙着幫客人登記留 位的瑛哥見狀,立即上前解釋說︰「三間都係我哋,一間主鋪,兩間分鋪。小姐,有冇訂位o架?﹙無喎﹚暫時全場爆滿,要等多陣,請留低姓名同電話。」晚飯時 段,這間串燒專門店八十多個位已坐滿人。 打對手 ‧三招牌搶眼又搶客 ‧入平貨有門路 ‧十部電爐出品快 鋪外人頭湧湧,廚房部早已打起仗來,柯打紙機「咔咔咔」響個不停,但見這個不足六十呎的地方,竟擠了八個員工,忙着趕出品應付七時半起的晚市及九時後的消夜兩個時段。 鋪頭逢假日可賣出串燒逾千串,平日則約七百串,除了靠員工手腳快外,更重要是十部千五至三千瓦的電爐。大廚亞楊說︰「樣樣食物燒嘅時間都唔同,好似牛肉串 三、四分鐘就搞掂,但係龍蝦就要燒成半個鐘,電爐不夠,出貨一定慢!我哋十部電爐分別燒不同食物,三部專門燒肉串,兩部燒扒類,兩部燒蔬菜、一部燒龍蝦, 兩部燒蠔同埋貝殼類。」電爐操作容易,火力猛能快速烤熟食物,但就十分耗電。文英街一帶盡是舊樓,每間鋪的電力供應有限制,「重慶燒」在同街租了三間鋪 位,十部電爐靠其中兩間鋪供電,瑛哥指出︰「附近幾間燒烤鋪一樣唔夠電,佢哋得一間鋪,想加電爐都唔得,只有四、五部,所以出貨無我哋咁快,客人多都未必 做得切。」 生財工具比人多,入貨有門路也是致勝之道。「重慶燒」的另一股東斌哥從事凍肉生意,經他入貨價錢較市價折讓約百分之五。以最受歡迎、日賣四十五磅的羊肉、 羊仔架為例,來貨價三十一元,較正常便宜五元。另外,斌哥的凍肉鋪位於隔鄰街,十分就腳,慳回不少運輸成本,瑛哥笑言︰「我鋪頭幾乎不用儲貨,咁大個『貨 倉』喺隔籬街,唔夠肉便叫伙記拖架車仔過去拎。」因為便利,就連同街的另一間串燒鋪也想向斌哥拿貨,後來知道他是「重慶燒」另一股東才告吹。 留食客 ‧平價食物吸客 ‧啤酒涼茶清熱氣 ‧街邊風味 食得暢快 「重慶燒」除了主鋪外,兩間分鋪只有簡單裝修。瑛哥直言︰「客人要裝修靚,就唔會來我度,佢哋係來食味道,鍾意這裡的氣氛。」「重慶燒」的客源大部分是外 區客,年紀大多是二十至四十歲的上班一族,放工後找地方消遣,抵食才能吸引他們。點菜單上有超過一百款食物,價錢介乎十至十三元的串燒就多達四十款,主要 是豬頸肉、羊架等肉類,和翠玉瓜、茄子、菜心等蔬菜類;前者毛利雖然只有六、七成,但後者高達八成,例如一串韭菜九條賣十元,成本僅一元多,以此拉上補 下。幫襯過「重慶燒」三次的食客Donna表示︰「這裡食物價錢平,氣氛熱鬧,大聲講嘢都可以。」 此外,這群年紀的客人都喜歡嘗試新款食物,「重慶燒」又會間中加插特色食物以吸客,例如︰田雞腿、娃娃菜、墨魚嘴,見附近串燒店以龍蝦作招徠,亦要賣埋一 份。當中最受歡迎要數每日售出二、三十斤的麻辣田螺,「田螺是我們的招牌菜,來自越南的,貪其較大隻;拎番鋪頭至少要養佢二、三日,清去泥沙。煮之前,又 要將螺尾剪掉,以便入味。初初我以為田螺係我哋老一輩先興食,點知有不少客人專程揸車來買,平治、寶馬都見過。」瑛哥指,海鮮毛利都很低,勝在讓食客有更 多選擇。 食串燒容易口渴及熱氣,瑛哥又特別入各款涼茶及啤酒,單是酒水每月生意額已佔十四、五萬,其中啤酒毛利高達七成,以比利時啤酒Hoegaarden為例,每日都賣出一桶,每月袋兩萬。 管伙記 ‧管「卒」不如管「將」 ‧年加薪四次穩軍心 ‧沒架子親力親為 從事內地運輸牌照生意二十多年的瑛哥直言對飲食業不熟悉,但對管理員工卻有一套哲學,他自豪的說︰「我○九年入股鋪頭到依家,一年內就加咗四次人工,每次 不少於百分之五。直到現在,都未試過有伙記,拎住張醫生紙同我講要請病假。」賺到錢同員工分享外,平時亦放低老闆架子,帶位、捧餐、掃地、什麼都做埋一 份,每逢出糧日,瑛哥還會帶同伙記到附近酒家消夜「鋤弟」,故意「鬆章」益下屬。 鋪頭現時有十二名全職員工和六名兼職,大部分由他接手生意跟他至今。瑛哥認為管「卒」不如管「將」,他最經典的一次是將原本負責「執碼」的亞楊升做大廚, 「前任大股東幾次想炒佢,但我見佢做嘢落力,保住咗佢。後來,鋪頭由我話事,我知道亞楊做咗飲食十幾年,曾開過麵檔,便升佢做大廚,睇住班細佬。我同佢 講,只要你搞得掂,廚房的事由你管,你話炒邊個就炒邊個。」現在瑛哥主力管理樓面,入貨及出品都交由亞楊管理,補自己經驗不足。 退休新丁搞飲食 瑛哥一家早年已移民加拿大,但他嫌那邊生活悶,決定獨自留在香港。○五年退休後,發覺「朝朝飲早茶」的日子並不適合他,「我聽朋友講,『重慶燒』生意十分 好,開業半年已有兩間鋪,咁啱當時的股東意見不合,想另覓合夥人,我便和凍肉鋪老闆斌哥齊齊入股。」○九年三月兩人入股後,鋪頭繼續賺錢,三位股東同年八 月斥資二百萬於同區開了一間三千呎分店,但短短半年已蝕了百多萬,最終結業,原創股東更退股離場。但瑛哥、斌哥認為串燒生意有得做,決定繼續經營,更於今 年初租了第三間鋪,盤踞文英街一角。 瑛哥直言,當初只想投資,沒想過做飲食要如此親力親為,「我以前經營大陸運輸牌照生意,每個月坐定定,淨係收管理費都過百萬,邊有好似依家咁『困身』?」 不過,這位飲食界新丁卻越做越有癮,本想以租金五萬多元租下街口的轉角鋪,將文英街打造成「重慶街」,可惜考慮期間被人租下。現在他看準附近一帶欠缺高級 甜品檔,正摩拳擦掌想開一間,「客人食完串燒,可以過去食甜品,潤一潤。」 開業資料(03/2008) 租金:$36,000* 裝修:$400,000 入貨:$150,000 雜費:$50,000 總投資:$636,000 * 兩個月按金,一個月上期 營業資料(10/2010) 營業額:$700,000 租金:$55,000▲ 入貨:$250,000 人工:$200,000# 雜費:$90,000 盈利:$105,000 ▲三間鋪總和 #十二名全職,六名兼職 壹點意見 趙柏衛﹙Wingo﹚ 元朗及大埔串燒店「串皇」創辦人,售賣串燒逾十年,自設食品工場。 1. 鋪頭取名「重慶燒」,嘗試從調味料着手,增添麻辣、酸辣、椒麻、麻醬等口味,加強川菜「味濃多變」的特色。 2. 燒烤時要留意灑鹽的距離,鹽樽距離食物太近,鹹味容易不均勻。 3. 食物出品部、洗碗部及洗手間,同時集中在主鋪,形成一個樽頸位,出入不便外,亦容易撞到客人,建議移走洗碗部到另一分鋪。 4. 大部分員工較年輕,老闆使用人際關係管理法,如請伙記食消夜、打牌,比硬性管理更有效,值得參考。 |
|
||||||
俗語有云:「一個嬌,兩個妙,三 個吃不消,四個斷擔挑。」五個……潮州人賴國榮(Jacky)已經有四名女兒,三年前與太太生第五個,終於是小男孩。計及衣食住行,書簿雜費,經濟開支非 常大,Jacky說:「淨係買麵包都要一百五十蚊,竟然一日食晒。」本應慘過「斷擔挑」,但他卻視之為商機。一年多前,在元朗開餐廳的他,在同區開設「麵 包爸爸」,賣中高檔麵包。不過貴價麵包不為師奶所接受,最初幾個月,更月蝕十八萬。這個潮州怒漢「唔服輸」,炮製人龍、鎖定顧客群,甚至開分店,不但轉虧 為盈,更在一年內開三間分店,月賺十八萬元。 走進元朗新街這條露天街市,人流和叫賣聲不絕,幾乎間間鋪頭的裝修都十分簡陋,卻有一間裝潢光鮮的新式麵包店「麵包爸爸」。鋪面只有三百多呎,卻長時間擠 滿來買包的師奶,同一時間師傅從工房捧出一盤盤熱烘烘的麵包,「睇熱呀!」整間鋪頭變得水洩不通。「麵包爸爸」開業一年,在元朗已經有三間分店。記者見招 牌旁邊有「連鎖加盟店」,老闆Jacky雄心壯志地解釋說:「呢三間都係自己開嘅,打算遲啲喺元朗開多兩間,一間喺安寧路,一間喺YOHO Midtown,喺深圳同廣州就做加盟店,所以寫定先。」元朗的麵包店多的是,不過多是平價街坊店,而美心、聖安娜等連鎖店則以賣西餅為主。Jacky當 初開「麵包爸爸」,主打製作低糖、天然酵母粉及不用豬油的麵包,加上「新鮮出爐」,故即使同為菠蘿包,人家賣三元,他賣四元;並製作一些特色麵包,如街市 一個五、六蚊吞拿魚包,他加入生洋葱,賣九蚊一個;再用美國藍莓製作藍莓包,一個賣七蚊,以及十六元一個的紅豆麻蓉土司。不過這些特色麵包,起初並沒有吸 引到一班區內師奶,反而個個見其鋪頭裝修太光鮮,連入去看看都不願。開張初期,連續三個月蝕十多萬元,但Jacky有着潮州大男人性格「唔認輸」,堅持走 中高檔路線。反而師傅輝記對記者說,曾對鋪頭的定位感到動搖。「我好驚繼續蝕落去,同Jacky提出想減人手、用平價食材,但係佢好堅持。」 三招轉虧為盈第一招製造人群吸客 Jacky明白,先要令一班客人願意行入鋪頭,才是成功的第一步,於是在非繁忙時間推出優惠,他說:「每朝九點到十一點,每晚六點之後都會有麵包八折特價 優惠,街坊食過好味就會再嚟!」果然,每日到這個時段鋪頭就會逼滿人,有時甚至會出現人龍。其他途人一見有人龍,就會一窩蜂排隊。「啲人食過,真係食得出 我哋同平價包嘅分別,再介紹俾其他師奶知道。」另一方面,總店位於露天街市,每間鋪頭都將貨品擺出街外吸客,Jacky亦照辦煮碗在鋪頭門口擺出車仔檔賣 一些較為廉價的麵包,如十蚊四個芝士軟包,四元一個菠蘿包等。事實上,車仔檔賣的麵包根本沒有減過價,但偏偏放在門口才有人「吼」,Jacky說:「擺出 嚟先搶到門口經過嘅師奶客,佢哋會覺得係抵啲,而且又可以聚咗一班人喺鋪外。」Jacky坦言,放置車仔檔會遭食環署罰款五百元,他每月例牌被罰三至四 次,但也別無他法,唯有罰款當交租:「全條街都係咁,唔擺嘅話每日生意差幾千蚊!」 第二招鎖定時間客戶群 Jacky觀察到,早上來買麵包的公公婆婆客較多,下午買餸放學時間,則主要為師奶及學生客。為顧及不同時段的客人需要,「麵包爸爸」早上會推出較易消化 的齋包,如豬仔包、雞尾包、提子包等。「呢類齋包成本低啲,價錢較平,都吸引唔少老人家嚟買。」下午則主打有餡包,「俾買餸客買返去俾小朋友食。」這樣 做,讓新鮮出爐的麵包去得更快,「咁先可以不斷出爐,新鮮熱辣辣,就更好吃。」這亦減少了麵包的消耗,降低成本。Jacky更提出製作更多迷你麵包。「麵 包太大嘅話,啲客就唔會日日嚟買。」然而食材價格颷升,食材成本上升了最少百分之三,他們的麵包已經「貴過人」,故不可以再加價。「我哋減少用合桃呢類貴 咗好多嘅食材做包,改做提子包。寧願將麵包同餡料縮細少少,都唔可以加價。」改革五個月後,總店已經不再虧蝕。 第三招開分店減成本 由於開麵包店必須有一個較大的烘焙工房,總店後面的烘焙工房佔近千呎,整間鋪的租金達十一萬元,成為「見紅」的致命傷。為用盡烘焙工房的生產力,攤分經營 成本,賺更多的錢,Jacky決定進攻,在一街之隔的紅棉圍開設分店。「開喺同區可方便分配人手同運輸,我叫啲員工用人手運送麵包及西餅過去就得。」而分 店賣剩的麵包,亦可於當天運回總店在優惠時段繼續賣,十分具彈性。由於不須設置工房,故Jacky租下只有百餘呎的鋪位,租金二萬五千元,只需一至兩名員 工睇鋪,經營成本較低。加上Jacky睇鋪時看中這個鋪位的潛力:「紅棉圍係小巴上落客站同露天停車場,好多區內有錢人同外傭買西餅,呢間鋪嘅西餅生意佔 五成o架!」由於客路不同,故並沒有互相搶客,總店上月賺七萬元,分店賺約三萬多元。生意上了軌道,Jacky於是今年三月在西菁街開設第二間分店,正是 Jacky五年前開設的餐廳鄉村小廚原址。「呢度人流好旺o架,附近係英文幼稚園、千色廣場。客人消費力高,我開間餐廳本身係相連鋪,租九萬蚊。但其中一 個鋪位俾OK便利店用十萬蚊租咗,做唔到餐廳,咪續租改做分店。」Jacky指,這間分店的產品用料比其他分店較佳,例如蛋撻用農場鮮奶,每個撻比總店貴 三元。「呢邊嘅包平均貴過總店一至二蚊,仲有一啲專登整俾小朋友食嘅公仔造型麵包。」記者問過這間店部分客人,他們表示不會特意去總店買平包。「去開邊間 就買邊度,唔會特登格價或者等優惠時段。」西菁街分店一開即賺,更是三間鋪頭中盈利最多的,上月賺近八萬。 三間分店各有客路 三間分店之距離只有五分鐘的路程,但客路招數不盡相同,沒有自己打自己的情況。總店元朗新街位置特色:鄰近街市客群:買餸師奶客、公公婆婆招數:●早餐時 段賣齋包為主●每朝九至十一及每晚六時後打八折優惠●部分包比西菁街分店平一至兩元紅棉圍分店位置特色:往元朗豪宅及鄉村的交通小巴站客群:大棠路豪宅住 客、駕駛人士招數:●以接西餅訂單及賣袋裝麵包為主●租金最平,店鋪面積小,店員賣包速度快西菁街分店位置特色:鄰近千色廣場、英文幼稚園及時裝店客群: 消費力高的潮媽媽、學生招數:主打品質及賣相較佳且價錢較貴的麵包、精緻西點 三顧草廬請師傅 Jacky曾開過茶餐廳、泰菜館,幾年前在元朗西菁街開鄉村小廚,賣海南雞飯。他對做麵包一竅不通,以往常在餐廳對面的麵包店「棒之達人」買麵包,認識了 該店師傅李志輝(輝記)。做包門外漢Jacky竟然挑戰師傅,「我話佢知啲叉燒包有雪味,佢唔嬲仲肯聽,下次仲拎啲改善咗嘅包俾我試,真係不可多得。」為 了開設「麵包爸爸」,Jacky一心要拉攏輝記過檔。「我出兩成實股,俾兩萬蚊人工,希望佢肯幫我手。」但輝記覺得與舊公司關係良好而拒絕。Jacky不 但三顧草廬,更加碼出三成股份「利誘」。Jacky見仍未能打動輝記,便以行動證明開鋪的決心。「佢唔信我咁有興趣,我就連心水鋪位都揀埋俾佢睇。」見 Jacky盛意拳拳,輝記便決定為他「打江山」。「輝記話一開始只係話俾兩成股份,所以唔要三成,係一個君真嘅師傅。」Jacky說。除了輝 記,Jacky亦四圍物色好員工,「朋友話我知將軍澳有間麵包店嘅師傅做包掂,我試食過好味就出多兩千蚊拉佢過嚟做分店師傅。」門市的女店員,也是他在 OK便利店拉攏過來的。「見佢做嘢落力,就用多千五蚊請佢。」拉攏有經驗的夥計,為的就是讓Jacky毋須擔心鋪頭的運作,騰出更多餘閒陪伴子女,更有時 間接他們放學。「老婆無做嘢,由佢湊晒。以前開餐廳做到凌晨一兩點先收鋪,依家鋪頭收八點,可以早啲返屋企。」採訪期間,記者覺得Jacky說話直腸直 肚,連輝記也問記者:「會唔會覺得Jacky講嘢有啲倔?我成日都話佢好惡!」當跟他回家時,見他對着子女,笑不攏嘴,更輕聲的問他們:「啲包好唔好食 呀?」才看到這個爸爸溫柔的一面。 |