ZKIZ Archives


知進識退(1) 股海無涯

http://blogcity.me/blog/reply_blog_express.asp?f=U5ESNT0PL4145585&id=212157&catID=&keyword=&searchtype=

今天用了些時間看看過去10天的市況, 再研究左一下天匯點解有88層咁高, 對天匯之後的訂價我真的很期待, 所謂富不與官爭, 我想知四叔呢次點收科.

講 番正題, 我不喜歡猜測市埸走勢, 也不相信有人可以預測市埸動向, 如果你是圖表派或不認同, 可我也並不想說服你放棄信仰, 因為你再浪費多幾年時間及交多些學費你自然明白圖表派能賺到錢的方法只有一個, 就是去收錢教人學圖表分析. 由傳奇大師江恩死前賤賣一生"心血", 被出版商看重商機,重整形向包裝後大賺一票的事例可證明這點,  唯一有根有劇有相有真相, 靠圖表炒到上天的人叫 jessie livermore, 不過最後也是破產自殺. 至於基本分析, 由於永遠知進不識退所以也無法頇測市埸的走勢.

身 為懶人, 我比勤奮向上的投資者有一些優勢, 就是我總喜歡找機會讓自已可以離埸休息, 然後告訴自己"休息是為了走更遠的路". 市埸的錢我沒本事賺到盡, 而且我天性大方, 總認為要留些水位俾人賺, 所以懶加大方的天性, 令我避開了風暴和海嘯, 也令我更明白"識退"比"知進"更重要.

身為散戶, 我們比大戶基金強的地方在於我們不用被逼投資, 想玩就玩, 想走就走, 所以要離埸休息只要心平不貪就隨時走得. 任何投資除了自住居所外都沒一樣是生活必需品, 所以首先要想通這點, 之後我們就可以出入自主, 真正的把市埸當金錢游戲來玩.

 

(待續)


知進 識退 股海 無涯
PermaLink: https://articles.zkiz.com/?id=29003

知進識退(2) 股海無涯

http://blogcity.me/blog/reply_blog_express.asp?f=U5ESNT0PL4145585&id=213143&catID=&keyword=&searchtype=

最近俾人捉去服務社群, 為某慈善單位籌款, 背後又係d豪門女子內鬥的事, 我又再一次無拉拉俾人逼還人情債. 我再講多一樣做人的道理, 就係欠錢不要緊, 千萬別欠人情, 那是還不清的


好偑服d blogger 可以keep 住寫野, 我咁得閒既人都冇咁既心機去寫野, 或者我文筆太差, 寫寫下自己都感到漸愧...

既然上篇有"待續"跟尾, 我只有續多一篇當交功課, 我是很有手尾的人.....^.^

本來講"識退", 我有好多point要寫, 但反覆想了一想, 我本意係勸人回頭是岸, 冇理由去教人"估市" 咁矛盾, "估市"呢家野網上大把高手日日都有長篇大論, 無需多我一家, 所以我決定簡單d,講下"退"完有乜可做仲好...

基 本上除非你好好彩, 否則係升市時主動收水離埸, 9成個市仲有一段去, 而且好大機會係overshoot最急最勁既一段. 本人有豐富類似經驗, 但我很少後悔, 因為我知自己做緊咩, 更知市埸做緊咩. 我只賺我能力可以賺的錢, 到手後我會耐心等待下次出手的機會, 我人懶所以比別人更有耐性, 我可以等一年半載, 日日無所事事都可以自得其樂, 而我深信每個投資都有收割期, 有花堪折, 有錢亦都要識袋. 我以前提過, 大部份投資成功的人都是一戰定江山, 股埸如賭場, 磨爛蓆最後有好收埸的人少之又少, 玩衍生工具的人更要小心.

好 啦, 講下收左水, 成手cash有乜好做. 老實講, 我真係冇乜好主意, 以前可以泊入money market fund 度收下高息, 但家陣都冇乜水位. 我就用cash去抽下新股, 用d散紙買下垃圾股, 去拍賣會睇下有冇平野執, 又買左d 保險類投資產品同企債, 有d風險但回報都有5%左右, 計下數, 好過益銀行. 

最後, 我要強調一點, 我賣樓沽股唔代表我睇淡後市, 跟據往績, 我未有一次摸頂出貨, 我只係覺得我這一轉已到位, 在物業上的回報更遠超我之前任何時期的想像. 

知進 識退 股海 無涯
PermaLink: https://articles.zkiz.com/?id=29004

財演、專家 股海無涯

http://blogcity.me/blog/reply_blog_express.asp?f=U5ESNT0PL4145585&id=214313&catID=&keyword=&searchtype=

由於hohoyee的回應, 令我睇番d舊文, 才發現我有好多"有機會再詳談"的東西都冇左下文, 所以趁有機會我就詳談一些先.

先 講"財演", 此行業由蔡東豪冠名, 依家已成專業, 由10年前d人打死唔肯出鏡到今時今日聽講d人爭住出鏡, 身份同地位好似高左好多.  我有一位朋友連某電視台座談會主持都照殺, 但求有得出鏡, 而佢本身(一個月前)係head一隻中型fund...我問佢搏咩? 佢話佢上開bloomberg, CNBC Asia, 覺得好威但可惜冇乜街坊睇, 所以想上local 台, 俾個靚樣大家睇下, 遲d可能轉行做藝人, 佢唔係吹水, 佢依家報讀緊"演藝"課程. 所以我估未來"財演"好可能會正式進身成為專業演員.

經 我多年上網觀察的結果, 網上"有識之士"大都唔信財演, 有d財演更俾人當股海明燈咁用, 大部份上財經版既網民寧願信d仲無厘頭既blogger或網友都不屑信d財演. 財演係咪真係咁癈? 我看法是他們當中9成9係經紀角色, 理論上同我地散戶冇乜分別, 只係有d日日咁吹水法, 想準確預測短期市況根本冇可能, 而且佢地出鏡時間又有限, 唔同我呢d 網友, 沽完貨, 但個市繼續大升, 我即刻可以拿幾篇舊文同大家解釋自己一早話左升市莫估頂, 一早預左仲有得升, 不幸講完個市又即散, 咁又可以話俾大家知我一早沽左貨, 再順手讚下自己有幾靚仔. 財演冇我地咁既優勢, 所以好多俾人當係癈柴, 其實佢地只係同你我一樣, 都係冇預知未來能力既普通人....

講下以前有咩人可以上鏡吹水. 由於上local台既財演99%係來自本地經紀行或一d細行, 所以佢地點推舉d人上台我唔知, 而電台日日講warrant攻略d外資行代表, 佢地多數係sales我唔計佢地, 只講我以前幾間公司既情形. 基本上除左local d電視台, 其實仲有好多國際傳媒係香港日日call d人問野或上鏡接受訪問, cnbc, bloomberg, reuters, Dow jones Telerate 等等...日日有人找上門, 公司一向規矩係邊個得閒邊個去"應酬". 有d咩人咁得閒? 多數都係d公司可有可無既的同事又或者要當日要離台"冷靜"的人. 可有可無既人多數叻極有限, 要"冷靜"下既人好多時已迷失方向, 自己都唔知自己講緊乜. 

蔡東 豪話陸東係超班財演, 係有真材實料.... 我承認以陸東身份絕對超班, 至少佢當年係外資大行研究部head, 好少咁既人肯得閒就出鏡吹下水, 逢請必到咁過癮. 但我都曾問過人, 陸東係咪咁"堅", 那人答我" 佢好presentable....d客好仲意聽佢講野....所以公司推佢上去....多左好多客...." 我只記得呢幾句, 印像中冇蔡東豪講得咁勁, 而我相信那人一定比蔡東豪更了解陸東.

講咁多, 只係想話俾大家知, 市埸冇專家, 只有贏家和輸家. 無論你覺得財演係咪真係尃家都好, 佢地一定係贏家, 因為今時今日佢地憑知名度多左好多收入, 例如開班授課, 開下講座, 出下書寫下專欄又或者好彩有fans支持更可以開個fund用opm炒下等等.....

或 者你會問咁d係大形投行做0個d唔係財經專家係咩? 佢地係財務專家, 亦係贏錢專家, 前者要有d專業知識, 要識財技, 後者就基本上乜人都可以做, 你同我只要身在其位都可以翻手雲雨, 唔需要有特別技倆, 就正如賭埸既荷官, 佢羸你唔代表佢係賭術尃家, 大家要明白呢種分別, 唔好見到d人做金融就以為係專家可以預知個市上定落.


財演 演、 專家 股海 無涯
PermaLink: https://articles.zkiz.com/?id=29005

賣樓2 股海無涯

http://blogcity.me/blog/reply_blog_express.asp?f=U5ESNT0PL4145585&id=208880&catID=&keyword=&searchtype=

最近成日被人追問兩層樓賣左 未, 今天又有朋友call, 開口第一句就係"你就發啦, 西半山成7萬一尺..." , 我話"發毛就有我份!", 9月頭賣左一間, 見咁好景又怕d人冇樓買, 所以"加推"多兩間, 點知成個月都冇發市. 只恨我d樓唔屬於"藝術品", 冇乜收藏價值, d同胞幾平都睇唔上眼. 我依家界定所有3萬一尺以上既樓叫" 藝術品", 唔係叫"豪宅", 我眼中既"豪宅"頂盡去到2萬5一尺. 由於"藝術"無價, 佢成咩價都唔關我事, 都唔明西半山d業主反咩價, 我仲考慮緊減價傾銷. d"藝術品"價好飄忽下, 我見"名門"個價好似冇升過, 佢上年都係屬於"藝術品", 我覺得比"名鑄"好, 可能我冇乜"藝術"修養啦.....

 

我讚成曾特首話普通樓既價比97年時仲 好平, 只係佢唔記得97年時我地香港人超有錢, 我記得當年有人講過, 掟部冷氣機落街隨時掟死件千萬富翁, 今年報紙人話海潚後死剩37000個, 我當然唔信呢d統計, 我估香港有1球美金可以玩既人過去十年一路冇十萬都有八萬, 睇下本網個賭徒blogger, 係咁易本月都賺到幾百萬啦 

如 果依家買樓係為左安家, 咁我覺得任何時候, 任何價錢, 只要係心頭好又俾得起, 咁就無所謂. 但如果想炒就要三思, 睇下件貨有冇成為"藝術品"既potential,如果想買樓收租對抗低息, 我勸你千祈唔好有咁既想法, 買股搏升價唔係搏收股息, 買樓都係搏升值唔係為收租, 唔好因少失大, 要認清投資既目的.

如果依家買樓係為對抗通脹, 咁就最好想想通脹既可能性有幾大, 美國對上次通脹發生在80年中期, 之後就衰退左幾年(冇問我detail, 我唔記得), 樓價冇升過仲跌左, 中國對上次通脹發生在92年, d樓跌七彩, 之前炒到上天既海南,珠海等地更是周街爛尾樓. 如果你問我通脹下有咩係保值? 我估"食物"係最保值仲係升得最勁既product, 可惜食物唔可以buy and hold,因為會過期.......

依家香港中產一定窮過97年, 而主要國家政府除都好有調控通脹既經驗, 最緊要係有能力同手段去打壓可預期的通脹問題, 所以投資任可東西要考慮的是升值的可能性可非其它因素.

對普羅大眾來說, 買樓係人生最大的投資, 不要被那些"藝術品"的天價嚇親而慌忙入市, 記住利息末來只會上升而人工未必升咁多, 資產泡沬往往在通脹來臨前已爆破, 所以現時買樓一定要量力而為.

注: 以上只係我個人意見, 我不擅於物業買賣, 只係當年好彩買左d平價樓, 依家d租金回報太低只好轉行唔做包租公. 想了解物業投資最好去請教本網blogger"財叔", 相比起佢, 我連業餘都稱唔上....

賣樓 股海 無涯
PermaLink: https://articles.zkiz.com/?id=29006

知足常樂 股海無涯

http://blogcity.me/blog/reply_blog_express.asp?f=U5ESNT0PL4145585&id=208312&catID=&keyword=&searchtype=

由於少讀書,所以我不知道"財務自由"呢四個字的來源, 甚至到今天我也不懂何謂"財務自由", 但這四個字似乎已是每個投資/投機人的奮鬥目標, 十幾年前還未見過呢四隻字前, 我們這種爛炒的人只認識"發達"呢兩個字...

 

根據字面解釋, "財務自由"是指不需要為財務煩惱, 可以自由自由咁生活. 如果我沒理解錯, 那約95%的人根本不用投資已可達標, 另5%在失業中......

別 以為我又發神經, 這可是我這個weekend的體會. 週六早上行山時遇到一位相熟老伯, 他82歲, 剛入完醫院通波仔, 但已行得快過我, 我要小跑至追得上他老人家. 老伯生果金加綜援, 月入不過4000大元, 住既係自已起既鐵皮屋, 一星期飲兩次早茶, 玩下馬仔, 有病唔睇醫生, 佢話通波仔係佢呢30年第一次見到醫生, 好彩佢老婆係政府度做清潔算係公務員, 所以至可以免費通波仔....老伯好樂觀又好睇得通, 40年前佢係海員, 之後冇得做, 於是就乜都唔做, 佢話佢去完全世界, 覺得做人至緊要開心, 係香港係唔會有人餓死既......(我覺得佢財務自由過我好多)

另一位呀伯七十幾歲, 住我上面, 開會計師樓, 昨日落來看我既裝修以做參考, 大家傾傾下, 佢突然好語重心長咁講:"我呢世人實在錯失太多(發達)機會...." 佢好惆悵因為佢d朋友大多係上市公司主席, 佢問我會唔會有第二波, 似乎仲未死心想發達...

同 兩個呀伯傾完, 我突然有d領悟, 所以今日即刻去左旅行社, 下星期同老婆去九寨睇秋色, 記得98年呢d時候, 曾特首都係去左九寨溝, 99年5月我第一次去九寨, 去到後終於明白點解佢係都要10月份去而唔等到我地11月死晒至去, 事隔10年, 我終於想起呢個塵封多年既心願.... 

知足 常樂 股海 無涯
PermaLink: https://articles.zkiz.com/?id=29007

十賭九輸 股海無涯

http://blogcity.me/blog/reply_blog_express.asp?f=U5ESNT0PL4145585&id=207399&catID=&keyword=&searchtype=

許多朋友都以為我的財富是靠" 炒"賺回來的, 其實這是美麗的誤會, 只因為我出身trader所以難免令人以為好炒得. 在7年職業生涯中我個人財富幾乎90%來自工作, 因為私人炒賣在行內很麻煩也很犯忌, 30歲退休時本打算做些小生意, 可惜除了"炒"我甚麼也不懂, 於是只好投資物業收租, 時至今日, 物業已佔我財富6成有多, 退休近8年, 靠炒所賺到的錢還不到我身家的1/4連買一個800尺的"名鑄"還不夠.....

 

生了女兒後, 許多人對我說後繼有人, 我總是肯定的說"我一定唔會俾佢行我條路..." 炒賣生涯是一條不歸路, 成功的人不會跟你分享幸酸, 他們多數沉默,香港也曾出過幾位國際級炒家, 但從未有一位出書教人點炒, 原因很簡單, 大家都心中有數, "炒賣" 這玩意根本冇得教. 鄧予立在一篇訪問中說:'  做金融很大壓力,每日恍如置身賭場,我開證券行,如為客戶提供賭的平台,老實講,十賭九輸,所以我不參與炒賣, 手頭上只有持有多年的滙豐控股,反而收藏品的投資價值更大,因為同一件產品的數量少,不像股票般可以無限量增發,因此收藏品長遠投資價值勝股票" (注: 或許你不知道鄧予立係邊位, 但他在80年代尾曾帶領全港數十萬師奶狂炒澳元紐元驚動兩國央行直接入市接佢盤, 最後搞到數十萬師奶坐艇幾年至上到岸, 有興趣可以參考下下網友"無端端"的一篇文, 當中有提呢段歷史.) 像他這種大炒手都同你講"十賭九輸", 我不明白點解仲有咁多高手日日望住個市, 分折上又分析落, 我也老實說, 他們當中99%不懂炒, 最可怕的是他們真的以為自己懂....

老子說" 知者不言,言者不知", 大家都係好自為之...

十賭 賭九 九輸 股海 無涯
PermaLink: https://articles.zkiz.com/?id=29008

不謀而合 股海無涯

http://blogcity.me/blog/reply_blog_express.asp?f=U5ESNT0PL4145585&id=207007&catID=&keyword=&searchtype=

看黃國英的bolg, 見佢提起蔡東豪的一段竟跟我早前的一篇文章有雷同之處, 我懷疑我有抄人文章的可能, 所以用了一些時間找蔡東豪的文章來看, 勸人炒股不如投資其它的那篇就還未找到, 但好彩找到一句話令我冇咁不安:"抄襲不是罪,自古文章一大抄,人從互抄中進步。本文54%先抄後改良,31%直接抄,15%自己想", 假使有天有人指摘我炒襲蔡先生, 我想他這句話可幫我頂下....

 

看蔡東豪的文章對我來說是有很大樂趣, 太多東西與我的想法不謀而合, 他在"第壹流plus牛年投資哲學的迷思"中的"戲言"我覺得幾有意思, quote幾句俾各位路人溫故知新:

 

股票市場有很多百萬富翁,當中不少初次踏足股票市場的時候,是億萬富翁。

投資者發達的秘訣是無時無刻保存本金,然後把握一生之中只來一兩次的賺大錢機會。 

分析員寫長篇大論的分析報告,因為他不夠資料去寫一份簡單的分析報告。(注: 遲些我會寫下呢樣)

股票市場是賺錢的地方,因此絕對要跟紅頂白,而非鋤強扶弱。(註: 我回應時有提過呢個問題)

股市是一頭「我行我素」的動物,不管投資者的期望、地位、聲望、分析技巧等,只服從一個定律——供求 (注: 我有講過類似的話)

若有人跟你講投資,用上希臘或拉丁字母,儘快走開。(註: 我有勸人別學期權, 太多alpha, delta....唔係你同我應該識既0野)

市場不會打敗一個投資者,它只提供一個機會讓投資者打敗自己。

當所有人都拼命從股市逃出來,卻有一群人奮不顧身衝進去,很難想像他們憑藉的是什麼. (注: 大家睇下d財經blog網站d blogger, 冇左一批又有新一批)

穩賺良方只得一條:早早套現離場 (注: 回頭是岸)

 




P.S. 呢排我會重整個blog, 主要先delete左d投資組合, 更正下d錯字, 再重新整合下d文章, 希望寫多十篇左右既"回頭是岸篇"咁就完成我當初寫呢個blog既目的


不謀 謀而 而合 股海 無涯
PermaLink: https://articles.zkiz.com/?id=29009

賭徒金句 股海無涯

http://blogcity.me/blog/reply_blog_express.asp?f=U5ESNT0PL4145585&id=205814&catID=&keyword=&searchtype=

今日我兩個外傭都回來了(之前一個放大假, 一個中左h1n1俾賤內隔離左去教會), 所以我總算可以休息下, 唔洗服侍我位公主,  呢幾日至發覺我個女既公主病十分嚴重, 決定要好好整治下佢.....

 

今日得閒上網周圍八下, 見到唔少好野, 但最令我意外既係竟然頭條bolg city 都有賭徒性格既投資者, 大家都知網上d blogger 大部份都強於理論, 弱於表現, 狂賺勁蝕既blogger呢十年八載得兩三件, 估唔到呢度都有件日日幾十萬上落既人, 我真係有d意外. 由於我仲未同佢打招呼, 所以不便link佢, 大家有興趣check下個blog ring 最後個頁就見到.

佢有句野我好欣賞下, 係有人問佢要輸幾多, 佢答: "股場上, 如要贏, 首要便是輸得起. 沒太大把握, 所以只是入 20 張." 答得好好, 簡直係一個學習典範. 睇好多blogger用好多心機做功課但又要分細細注, 或運用期權斤斤計較賺d零碎錢, 呢位仁兄就盡顯氣派......

想靠股票達到你人生目標. 那就盡賭吧, 網上名blogger "市埸先生"打住財務自由的大旗亦都以身作則示範俾大家睇, 永無保留, 100% 股票咁至可以成功, 別無他法

如果你驚輸學佢地咁會輸身家, 咁不如早早回頭, 努力工作, 存多些錢去買層樓收下租吧.........


賭徒 金句 股海 無涯
PermaLink: https://articles.zkiz.com/?id=29010

比賽 股海無涯

http://blogcity.me/blog/reply_blog_express.asp?f=U5ESNT0PL4145585&id=204130&catID=&keyword=&searchtype=

 

今天蘋果李純恩的尃欄幾有趣, 同大家分享下:

 

"前些日子,南韓搞了一個「模似炒股比賽」,參賽者是十個人和一隻叫「草莓」的鸚鵡。十個參賽人都對股票有研究,他們根據自己的知識和經驗,查資料看年報,不斷地買進賣出。至於「草莓」,牠不用做那些勞什子功課和研究,只是用嘴,隨機選擇寫着股票號碼的紙片,這裏叼一張,那裏叼一張。結果,「草莓」選擇的股票組合,收益是 13.7%,而忙了半天的那十個人,平均收益為 4.6%。一場比賽,最後是鸚鵡贏了人。".

 

早在十多年前, 華爾街日報也幹過一次類似的事, 年頭找了一隻名星猩猩對住股票報價版射飛鏢, 選了10隻股票, 年尾結果是大幅跑蠃d主要基金.

 

有人或許以為圖表分柝結果會好些, 嘿....根據研究結果, 他們連臝的機會都少於一半, 更別說去跟鸚鵡或猩猩比了, 怎說基本分柝衰極還叫有錢賺....

市面有許多表現亮麉的期貨對沖基金, 大部份是用以技術分柝為基本的電腦程式執行, 但千萬別誤會那些是散戶也可以看圖做到的, 以後有機會寫"技術分析"時再詳談.

比賽 股海 無涯
PermaLink: https://articles.zkiz.com/?id=29011

內幕交易 股海無涯

http://blogcity.me/blog/reply_blog_express.asp?f=U5ESNT0PL4145585&id=203974&catID=&keyword=&searchtype=

MS 既杜軍今日俾官判左7年, 我都嚇左一跳. 我天性八掛, 呢單野我都八左好耐, 因為初初有傳聞涉及另一位識既人, 所以更有興趣..

杜軍最令人莫名其妙既係佢既手法, 佢做得好正大光明, 毫無犯罪技術可言, 我懷疑佢真係想問人可唔可以買中信資源, 但對方誤以為佢想買中信泰富所以批準, 咁佢至用咁直接既方法. anyway, 我想講係另一問題, 近10年本地外資大行如GS, MS還有大型fund house都多左好多回流同胞身居職, 有d有背景有d就真才實料, 但聽同佢地合作過既本地同事對我呻,個個都似有好多苦水吐. 我唔係岐視d同胞, 反而好欣嘗佢地既才幹, 我見識過幾個國內頂級炒手的利害,  老實說, 我們本地真係冇咁既人才. 但國內精英給我的印像有一點很特別, 他們總好像在自信與自卑間掙扎, 對自己的才能充滿自信但同時郤對自己的身份有些不安. 或許有些人的貪念也來自這種對身份的不安.

其實我一路都唔明內部監察係點運作, 好多人都唔明, 話明既我怕已俾人炒左, 記得以前有位同事就係衰同back office個女仔拍拖而要離開. 我只係知我地每個trade都有重重"監視"核對, 電話有record, 個個月有反偷聽檢查, 好難搵到機會出古惑, 上年法興出事正是條友做過back office所以知點避, 以後我怕back office d人都再冇機會上位.


內幕 交易 股海 無涯
PermaLink: https://articles.zkiz.com/?id=29012

國債 股海無涯

http://blogcity.me/blog/reply_blog_express.asp?f=U5ESNT0PL4145585&id=203754&catID=&keyword=&searchtype=

賤內話我係度"賊喊捉賊", 自己靠炒起家卻去勸人離埸, 有人信至奇, 想想也有少少離譜, 反正依家股市氣勢如虹, 講咩都假, 搶完錢再慢慢講都未遲...

 

 

今早銀行一大早call我問我想要幾多國債, 我當埸打左個突, 心想依家係國債邊到你地話事, 最多咪分到十幾廿萬.(注:上次佢地發行俾到足我). 其實我對呢次國債冇乜興趣, 一來手上已有唔少人債, yield平均都有3.25%以上, 段估2年or 3年期國債最後標價冇咁高掛(注: 5年期冇我地份, 所以yield curve咁短一定冇得炒).  二來,  我係國內6個月定期都有1.9%息, 如無意外, 明年多數要加息, 計落未必有太大甜頭. 但為左應酬下銀行, 我都會要多少...

為左令我個blog除左睇我發神經之外有d建樹, 所以我想間中寫d有建設性既生活小tips俾大家, 令大家覺得睇我吹水都唔算太浪費時間, 心里好過d. 今次就講下如何在國內存人民幣定期.

如果你手持大量人民幣, 又不甘係本地收0.7%咁少息, 不妨匯回國內存. 但由於人民幣係香港有好多限制, 就算俾你匯回國內, 再由國內匯回香港好多時都好麻煩下. 當然如果你信得過d地下錢莊咁問題都不大, 又或者你唔怕"一咭通"有日執正做野咁都冇問題. 但如果你識驚, 咁不如去獅子總行開個國際戶口, 跟住佢地會教你點做. 佢地有樣野叫"人民幣離岸戶口", 呢家野我上年問過d中資bank都冇提供, 我以防萬一, 所以試過一次過匯回2百萬, 結果真係冇問題, 而佢地國內戶口一樣可以係網上操控, 好方便下, 大家不妨試下


國債 股海 無涯
PermaLink: https://articles.zkiz.com/?id=29013

尃家 股海無涯

http://blogcity.me/blog/reply_blog_express.asp?f=U5ESNT0PL4145585&id=203282&catID=&keyword=&searchtype=

今 朝睇TVB , 見到陸東訪問, 真係有d不吐不快既feel, 估錯市乃人之常情, 何必死撐, 股市低位比佢估低左近10000點, 關扛捍化鬼事, 港股呢十幾年有邊次大跌, 跌得少過5成0架, 根本係common sense. 至於佢話未來除非有極壞既事, 否則好難再見今年個低位, 咁同癈話有咩分別????!!!

陸東到底有幾多料, 我也不能確定, 他做analyst時好旺下, 但轉做fund manager又係另一回事, 吹水叻同炒野叻係兩回事, 大把前明星級分析員轉去做fund manager結果都係不外如是, 所以佢係咪金錢之王, 睇多兩年就知, 但以佢早前入股"華保亞洲"呢單野睇, 我都有d保留.

陸東離開UBS, 少左好多資源, 自己坐埋盤更加冇咁客觀, 仲有幾多價值真係見人見智. 我本人也一樣, 離開張交易檯, 我就同普通散戶冇分別, 都係盲毛係市埸亂撞, 俾d識既人稱為專家其實真係笑話一個, 我相信所有做過呢行既人都會認同我既講法. 但就算身在其位, 也不代表是專家, 下次有機會再祥細講下....


尃家 股海 無涯
PermaLink: https://articles.zkiz.com/?id=29014

炒垃圾股的下埸 股海無涯

http://blogcity.me/blog/reply_blog_express.asp?f=U5ESNT0PL4145585&id=201879&catID=&keyword=&searchtype=

話說幾星期前上yahoo finance 查下股價, 本來想睇(388)股價及相關新聞 , 點知按左(383)股價及相關新聞 , 天意如此又衰望多兩眼, 有段news好吸引我目光: http://hk.biz.yahoo.com/090724/263/3gmpq.html?s=0383.hk

好奇之下又走去check佢做盛行, 一check之下, 大有發現, 原來同我同行, 都係不務正業以炒股炒樓為生. 於是我足足用左成個鐘去佢個website睇下咩料, 之後又用成個week睇下日常股票買賣情況, 幾乎日日都冇乜成交, 差價闊到冇得hit咁滯, 我屈指一算, 我唔計佢d大陸物業升值, 只計d股票組合, 點都有$3(注: 佢係07年尾資產約值hkd14一股, 我當佢斬一半頭冇仇報, 個組合最衰時都有$2.82剩, 佢又號稱係價值投資者, 咁即係冇乜垃圾股係手啦, 咁大市升左成倍, 我計佢$3一股都好合理). 好啦, 做完可行性研究, 我決定入埸買入, 我日日掛幾萬bid, 但得3日有成交到, 大市插左1500點, 我都照bid冇退縮, 點知貨都未買到一半佢就停左牌. 我直覺係大股東想提出私有化, 因為d成交細到咁證明貨源極度歸邊. 今日佢出news: http://appdata2.quotepower.com/web/qpweb/attachments/HKEX-EPS_20090908_000859201-0.PDF

咁即係明屈, 我冇用機都計到佢盈利大幅上升啦, 佢唔供佈埋業績至停牌即係想低價私有化啦.....

我甚至仲上google去check埋個主席係咩料, 我見佢做咁多善事, 斷估都會分d俾我掛, 唉...估唔到我咁多心血就咁冇左, 依家唯有望佢唔好學哨牙仔咁冇品.

炒垃圾股最怕就係遇人不淑, 我次次買完呢d股感覺都好似做左雞, 任人玩弄, 好鬼坎坷...........

 


垃圾股 垃圾 的下 下埸 股海 無涯
PermaLink: https://articles.zkiz.com/?id=29015

基金經理 股海無涯

http://blogcity.me/blog/reply_blog_express.asp?f=U5ESNT0PL4145585&id=201063&catID=&keyword=&searchtype=

今 朝睇蘋果財經見到西京既劉央, 我唔知d訪問係咪斷章取義寫錯野, 如果唔係, 咁呢位曾紅極一時既fund manager都係出左d問題, 佢好似連基本數學都錯,我印像中2628呢大半年一路高過601628, 照佢講3日前入市, 最低係RMB25.02, 當埋佢真係以hkd33沽2628, 差價都只係hkd4左右, 同平時差無幾, 咁呢句 "劉央更舉例說,由於當日她是以大約 33元的價格沽出國壽 H股,並以大約 22元人民幣購入國壽 A股,就算不計算反彈,一來一回已賺約 10元" 就盡顯佢本事. 我以為只有我地d散戶至吹水唔抹嘴, 原來專業人士也不外如是. 雖然我同佢本性相近, 都仲意炒垃圾股, 但我有品d, d高風險, 古古惑惑既垃圾股我唔會post個number更加唔會推介俾人.  

對家陣d財經尃業人士我真係有d驚, 之前有位歐資buy side 既分析員夠膽死問我H, A, B - shares及 red chips既分別我以為已好經典, 但都唔及今日呢件....


基金 經理 股海 無涯
PermaLink: https://articles.zkiz.com/?id=29016

炒股的正確態度 股海無涯

http://blogcity.me/blog/reply_blog_express.asp?f=U5ESNT0PL4145585&id=200659&catID=&keyword=&searchtype=

在網上看了多年, 發覺大部份寫財經的blogger都好似樣, 不是跟隨buffet就是想學livermore或 kostolany. 大部份人投資的目的係想"財務自由", 有d就想保下值, 而本網第一偶像陸sir有一句話令我印像幾深刻, 佢話佢炒股唔會點輸但發達亦冇份(something like that)

 

如果唔想發達咁又何必揀炒股票呢? 如果只係想財務自由又或者保值, 買樓又一定好過買股, 洗唔洗咁傷腦筋去揀d所謂價值股, 最後退休時唔好彩撞正風暴海嘯, 一生心血就咁冇左一大半, 如不幸買左aig,citicorp之類既"前價值股", 咁連仇都冇得報, 想財務自由都怕要等下世.

所以我個人覺得炒股的正確態度係要永遠抱住"我要發達"的理念, 只爭朝夕, 一浪而起, 從此笑看人生. 要持有 double or nothing 的賭徒心態, 還要有過人的耐性等待時機,時機一到就下狠狠下注, 毫無保留, 輸死罷就. 或許你不屑這種賭徒方式, 你認為投資不是賭博, 那我就勸你不如回頭是岸, 及早離埸. 除了股市, 還有很多更好的投資, 結果有9成機會比你投資股票回報要好, 因為在全球金融一體化之下, 由資金主導的股市比賭埸更像賭埸. 30年前股市可以出buffet , lynch之類的傅奇, 但絕對不是現在和未來, 至少由這廿年成名的如kostolany, soros或近期當紅的john paulson全都是大賭徒而不是價值投資者可見一般. 

賭徒性格是天生的, 成功的賭徒還必須依靠過人的運氣, 缺一不可! 如果你沒有賭性, 又或者空有賭性沒有賭運, 那就不要勉強, 物業, 債卷, 古董等等是更好的選擇, 不記得是誰曾研究過, 大部份可以安樂退休的人都是靠物業而非股票, 因為除了升值它還具強逼長線投資及儲蓄的特性, 即係同月供價值股異曲同工, 但穩陣同實在好多, 自住更不用多說.....

 

炒股 正確 態度 股海 無涯
PermaLink: https://articles.zkiz.com/?id=29017

回頭是岸 股海無涯

http://blogcity.me/blog/reply_blog_express.asp?f=U5ESNT0PL4145585&id=199661&catID=&keyword=&searchtype=

老婆發現我學人寫 網誌, 看了幾篇, 說我寫的東西不三不四, 叫我小心俾人鬧. 我老婆年紀輕輕, 唔知點解仲老氣過我. 我其實寫網誌 , post 組合係有一個"偉大理想", 我想有緣讀到我網誌的人可以明白"股海無涯, 回頭是岸"的道理. 當然現在未係時候講"回頭是岸", 目前我要證明左"股海無涯"先.....

 

路人"股怪"兄留言說 "覺得散戶輸未必真的認識少, 可能係識太多, 什麼都學, 講到頭頭是道, 但用起來, 最尾都是輸自己心理不斷改變, 唔得堅持", 我都基本認同佢. 但有一點我想澄清下, 表面上我寫的東西很反智, 但那是建築在我極度認知的情況下產生的另類思維. 對投資的知識我相信我絕不輸給任何一個財經專家, 但如果你問我, 這些知識對我個人投資有冇幫助, 我可以肯定答你, 可有可無.基本上任何人也可以在沒有任何專業知識下而進入股票市埸玩一餐, 先投資再求知不一定是輸家, 滿腹理論不見得是高手.   以前金融行內有句話"博士昜得, 炒鬼難求", 即是請一個博士做炒手不難, 但找一個會炒的人才郤難得很, 利森事件後, 大家更不敢請低學歷的人入行, 但偏偏炒鬼很多時都是不學無術的人. 同一個道理也解釋為甚麼大部份人初炒股總有斬獲, 之後越炒得久越差, 結果以輸錢離埸.  懂得太多某些時候限制了個人的直覺判斷, 而直覺在炒賣市埸往往是主要因素之一, 看看geroge soros, julian robertson等大炒家的經歷, 就會發現他們大部份是靠敏銳的市埸直覺下注.

再舉個例子, 一個人學會了股票期權, 在投資歷程上進入另一階斷, 表面上多了一種工具可運用, 但事實上這工具也大大限制了投資回報 (雖然大部份期權尃家會說是增加回報, 但實際操作往往未必如此), 當然我不否認這工具的存在價值, 事實我也很欣賞本網blogger"東邪"對期權運用的文章, 至少照他的方法執行操作還是很簡單又安全的, 只是我以個人經驗來看, 一入衍生市埸, 大部份人最終都會後悔莫及, 以我本月買(941)股價及相關新聞 為例, 我本身是很愛斬頭的人, 感覺很痛快, 但因為開了一個期權盤, 令我斬頭至少慢了1天, 輸多至少5元, 正常情況下, 以我個性, 跌穿$85我已斬了一大半. 理論上, 我也有許多"補救"方法, 甚至阿Q的告訴自己我買便宜了2元, 個個月run落去, 一年後我的成本價不到$50, "好股"不怕坐長線. 可惜我不太阿Q, 也不想為一個失敗的deal再做一些可能更失敗的操作, 寧願選擇面對失敗, 一了百了.

回頭 是岸 股海 無涯
PermaLink: https://articles.zkiz.com/?id=29018

股市賺錢最易的方法(1) 股海無涯

http://blogcity.me/blog/reply_blog_express.asp?f=U5ESNT0PL4145585&id=198069&catID=&keyword=&searchtype=

看了多年網上財經討論, 發覺好多人好勤力, 好積極去研究股票, 用盡方法, 又技術又基本去分柝, 依家又興上期權堂, 有d又走去上講座, 又有d用易經八掛去測下市, 但結果好似冇乜人夠膽話自己已"財務自由"(呢幾年我地散戶blogger好興呢個詞), 大部份仲努力緊.

其實係有辨法令人係股市中不勞而獲的, 由其在本地股市, 我相信成功率有99%, 賺多賺少只看你有沒有耐性.

舉個例d錢幾易賺, 股神爺爺上年尾入股(1211)股價及相關新聞 , 我地大把機會在$12-14之間入貨, 3、4倍利錢也不過大半年時間, 何必自己咁辛苦? 其它人我唔知, 我就衰手痕, 天生愛炒賣, 所以捨易取難. 當然咁既機會幾年得一次, 對上已係佢老人家買(857)股價及相關新聞 .不過我信機會不斷有, 只係你有冇膽成副身家押落去. 賺小錢的機會也不少, 上星期四打開報紙望下, 有news話 GS及MS同和黃高層傾完偈後即刻入市掃貨, 我信GS唔會死錯人, 可惜當日我同老婆過左大海玩到昨日至返, 所明早一開市我就買少少跟下.

我在第度講過, 係股市, 付出與得到並不見得成正比, 投資成敗的主要因素並不掌握在我們手中, 一旦下注, 我們可以做的其實得3樣, 坐係度等, 輸錢斬頭, 賺錢走人, 股票點行根本唔係我地控制. 所以好多時不妨捨難取易, 省些心血和心思反而更易成功. 話到尾, 如果視炒賣係一種藝術, 一種遊戲, 就不如輕輕鬆鬆去發揮下創意玩幾轉 , 到時或會明白買賣本身就很是單純的活動, 唔洗學咁多野,讀咁多書,因為就算你把buffet的讀破也不會成為第二個buffet, 不如買本八週睇下仲有趣.....

股市 賺錢 最易 易的 方法 股海 無涯
PermaLink: https://articles.zkiz.com/?id=29019

紿路人"無端端"的回應 股海無涯

http://blogcity.me/blog/reply_blog_express.asp?f=U5ESNT0PL4145585&id=198069&catID=&keyword=&searchtype=

無端端小兄弟,

 

(552)

股價及相關新聞 也好, (1800)股價及相關新聞 也好, 我都沒有留意,  也沒本事提供任何個股的意見, 但我勉強可以指出你一些問題, 聲明在先, 我不是投資高手, 只是分享一下我的炒股方法.... 

 

首先, 正如我給你的第一個回應, 不跟大市起跌的股本身就很難炒得好, (552)股價及相關新聞 以一年看絕對不跟大市, 跌不夠所以也升無力. 盡量避開類似的股票, 不幸買了那最好盡早換馬, 不要抱住"明天炒到它"的心態去等.  你要把股市當作個遊樂埸, 不好玩的東西就找另個玩, 要主動而不是被動, 不然就是股市玩你, 不是你玩它.

(1800)股價及相關新聞 其實整體上是跟隨大市的. 但你犯了另一個許多人也犯的毛病, 我猜你是怕大市高處不勝寒所以才選了一隻近期落後大市的"好股". 面對這種錯誤, 首先你要假設並深信, 在充裕資金下的市埸是非常有效率的, 每刻股價的變動都百分百反應了股票當時的價值. 理論上沒有落後股也沒有升過頭的股. 股票跌得多並不代表便宜, 升得多也不代表貴, 變得只是每一刻我們玩家對它的估值. 在資金市中, 好炒的股票一定不便宜而且一路領先直到最後, 如騰訊或比亞迪. 所以別怕高追, 因為要輸大家一齊輸, 買其它或輸得更慘. (別問我為何沒買1211和700,我只是看錯市, 6月尾已跑光了, 唉~)

或許你會問, 即然目前市埸是屬於高效狀態, 那為何941到尾聲才發力. 這是因為每一潮的的升跌起伏都有某些規律, 但這規律每次不同, 如03年最先潮起的是地產股, 最後也是地產股完成整個升浪. 09年則是由資源股先起步.......只要你留心觀察, 出手夠快, 換馬夠狠, 一般在一個大升浪中就算後發後至, 也多少少可以賺到些, 至少肯定賺得多過買落後股或不跟大市同步的癈股.

 

路人 端端 回應 股海 無涯
PermaLink: https://articles.zkiz.com/?id=29020

賣樓 股海無涯

http://blogcity.me/blog/reply_blog_express.asp?f=U5ESNT0PL4145585&id=198811&catID=&keyword=&searchtype=

前 兩天有地產經紀call我, 告訴我幾個月前我話會考慮放賣的一個物業已到我的"考慮價", 而且有實客可以連租約以市價買. 於是跟老婆商量下, 一如以往, 我老婆是很反對我賣樓的, 她只會不斷叫我買樓收租. 老婆的理由很簡單, 我三十歲退休至今已快7年還可以悠悠閒閒無所事事全靠有些樓收租, 股票有賺有蝕, 今日唔知聽日事, 所以有樓收租最靠得住. 但今次我好堅持下, 因為相對樓價, 那層樓的租金回報只有3.7%, 套現後全買"領匯"也有約4.5%股息又不用交稅, 比收租好. 商量一輪, 決定賣樓, 成功賣出後, 用一半資金買一個位於廣州珠江邊的樓,那樓上月我去看過, 感覺良好, 要價6百多萬, 硬件比我在杭州的物業豪華10倍有多, 但尺價只有三份一, 約3萬多一平方米, 當時已有些心動, 正好趁此時機換樓, 另一半資金會買入領匯及一些短債 , (現在許多肯定唔會執的公司短債仍有近6%息, 有些少risk既如citicorp 更有8%以上, 都可以搏下)

我買樓賣樓也很講緣份, 我目前住的樓就是個好例子, 我早在05年已看中, 可惜業主要價太高於是放棄, 怎知07年8月我老婆打電話俾經紀問野, 個經紀突然話佢有有把握壓低個價, 我唔知佢用咩辦法, 但第3日我地已簽左合約, 個業主空左個單位足足4年, 叫價未改過, 點知一放俾我, 樓下低10層冇海景的單位以接近佢之前叫價成交, 個買家知道我的成交價後同我經記(同一位經紀幫佢買)講話佢之前通過另一間代理落offer比我個價高成20%, 個業主都冇賣, 佢激到係咁問候人. (注: 07年8月股市異常波動, 之後直線升上3萬, 樓價也急升至08年3月見頂.) 雖則一年之後樓價大跌, 但亦重未見到過我的買入價, 我一家也住得很開心, 隔壁細我4百呎的單位業住話佢97年買入價比我還貴百多萬, 令我更覺得撿了個大便宜, 有時候, 緣份和運氣這些事真的很難用常理解釋. 


賣樓 股海 無涯
PermaLink: https://articles.zkiz.com/?id=29021

跟人炒股的心得 股海無涯

http://blogcity.me/blog/reply_blog_express.asp?f=U5ESNT0PL4145585&id=197277&catID=&keyword=&searchtype=

見有人跟人買股中招的遭遇, 深表同情, 今日想分享下我"跟人買股"的心得

身為一個懶人, 我不學無術但深明不恥下問的重要. 可惜現實中, 冇人睬我, 多數以為我在耍人. 好彩有internet, 五湖四海的可以周圍問人要tips. 但我選人跟是很講究的, 比我選股要慬慎十倍, 因為跟錯大佬好易出事.  

舉個例, 我買316 同716都係去問本網blogger非吾, 我睇左佢成年至向佢請教, 如果當佢初係以技術分析教我入市, 我一定沒興趣, 如果佢話佢了解間公司運作, 我也不會買, 因為兩樣都靠不住. 但佢經常以整體行業link 埋宏觀經濟去講, 令我看到一些還未被市埸炒到盡的價值存在, 計下數知道有得搏下...

網上好多專業人士, 有真有假, 陸羽仁又好, 黃國英又好, 我會睇,但未跟過, 因為呢d人都太"行", 冇乜創意, 反而有時見到d股評人好旺我又跟下, 如早幾年的蔡東豪, 當時唔知佢背景, 直覺佢好旺, 所跟佢買"大家樂", 賺左近3倍, 今年又跟佢炒左轉比亞迪, 但走早左賺唔盡. 但自從佢出左本"賺錢之神"後, 我冇打算再跟佢, 佢睇人好麻麻, 斷估都差唔多走曹仁超條路, 即係理論一大堆, 冇太大炒賣效益.

 一個炒家有冇料, 最簡單係睇身家, 空有理論, 吹到天花亂墜都係假, 如果佢自己都未發達咁最好無視佢. 但係internet上我地好難去起人底, 所以最好都係用時間去觀察.....


跟人 炒股 心得 股海 無涯
PermaLink: https://articles.zkiz.com/?id=29022

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019