| ||||||
「年 廿八，洗邋遢」，係舊式俗語，左丁山本想在年廿八（一月二十三日）在辦公室展開大掃除行動，將積存甚久嘅舊報紙雜誌清除，還原一個乾淨面目，點知說易行 難，摸住啲舊剪報，發覺有篇好文章未讀；要丟一本雜誌，竟發覺封面故事吸引，不如睇多次，如是者，點掃除呀，秘書話不如我早啲出街食飯，等佢將啲舊嘢丟 晒，唔使五分鐘就搞掂，此言雖然有理，但自己聽唔落，繼續攬住啲舊剪報不放。 卒之去食午飯嘞，未去到中總俱樂部，在電車路碰到賓架S，佢個 樣好殘喎，好需要一個長假期返屋企瞓覺。問賓架S最近忙啲乜？賓架S話：「董事會話睇起我，幾個月前升咗級，原來搵笨，以前我負責做放款，日日與客戶聯 絡，出街視作等閒，現在我要做風險管理、債務重組以及睇埋合規部。原來o依家的合規（compilance），細微嘢極多，二十幾人日日做填表格，寫報 告，應付監管機構，屬百分百成本中心，完全冇收益嘅。加上調轉位置之後，我一味住放款，唔敢亂咁放，畀以前嘅放款部同事鬧，畀以前啲客戶埋怨，好慘也。」 係 咁o架嘞，金融界遇上亂世，最緊要苟存性命，那敢大展鴻圖，賓架S如平安過渡此一役，他日有資格做銀行行政總裁。賓架S嘅老友工業M亦係咁講，佢話現在有 訂單都唔敢接，誠恐對手破產退貨，累親自己，故此佢嘅策略係盡量縮皮，希望捱過嚴冬之後，競爭對手執笠執得八八九九，行業生產能力急降之後，佢就可以揀價 錢，揀客仔。咁嘅算盤打得就響嘞，是否又係知易行難嗰類就好難講！ 到中總，等『車立』之時，聽到兩位中年人細細聲講，但因 為企在左丁山隔籬，一樣聽得好清楚，佢哋入到『車立』，一樣照講，一位問：「歐洲有冇退貨？」另一位答：「衰過退貨，收貨之後唔找數，睇嚟要撇賬咯！」對 方問：「有幾多呀？」答：「兩百零。」好彩一些香港商人有啲底子，佢哋之後就講阿A去咗拉斯維加斯，佢自己就去泰國，互約年初七入馬場，撇賬兩百幾萬元， 好似視若無事。呢類事情如果入咗賓架S隻耳，睇怕佢會立即檢視客戶嘅貨物輸往歐洲嘅情況。 | ||||||
| ||||||
餐 飲M未退休前，在美國國際集團工作。呢日在街上見到一架平治汽車，有AIG PB字樣，PB就係private banking，AIG就係曼聯球衣上之三個大字，大家都知道係乜嘢意思，餐飲M話：「我在AIG集團之時，由上到下，都唔准用平治，十分慳家，點知o依 家國有化之後，使錢更加豪爽！」眾茶友大笑，餐廳R心水清，話未必係國有化之後，AIG先至用平治嘅，可能係在Greenberg下台後，公司嘅節儉文化 先至有所改變。律師W就講：「AIG三個字點解呀？就係America International Government（美國國際政府），既然係美國，高層職員唔用平治，可能覺得失禮祖國噃！」 左丁山為之失笑。美國兩大 財務機構，一間AIG，一間Bank of America，真係唔使改名，就可以成為國有企業，記得賓架羅講過，以前佢在「美國銀行」工作，有不少人行入去兌換美金或者美元滙票，好多街坊都話： 「你哋係美國銀行噃，美國吖嘛，梗係搵你哋兌換啦！」因為個名，「美國銀行」無端端多咗好多街坊生意，雖然美銀唔係好稀罕。估唔到事隔多年，美國政府真係 成為「美國銀行」股東。今天香港人識AIG、AIA，多過識「美國銀行」好多，皆因美銀已經冇晒分行，放棄咗好多業務，唔少人以為香港已經冇咗呢間銀行o 忝，其實三藩市之「美國銀行」與北卡羅連納州之NationsBank合併之後，雖然沿用舊名字，但策略改變晒，已退出咗國際市場，專注於美國本土，面目 全非。賓架羅每次返到加州，到三藩市憑弔「美國銀行」之舊總部，欷歔一番，昔日加州之「美國銀行」有度好，就是用人不論出身，不太重視名校學位，僱員以信 差入職，一樣可以憑表現升至副總裁。俱往矣，只看今天時勢環境唔同晒，餐廳R話可能追不上時代，在家中講咗一個字Paki，就畀留學英國嘅仔駡，話千祈唔 好學哈里王子！餐廳R話皇后大道東一家地氈舖頭內，一位中東人老闆同佢講Paki講咗三十年，o依家先至知道會畀人鬧。餐廳R私人覺得，香港最令佢覺得 offensive嘅語言就係近禮頓道嘅GOD宣傳口號Delay No More，佢話GOD個嗰名已令教徒不滿，呢句所謂英語更加係bad taste之至。 | ||||||
| ||||||
一 月二十一日寫「北電傷盡加人心」，收到兩封讀者電郵，其一來自Zoe Chan，係Nortel嘅Corporate Maketing and Communications職員，應該係北電香港嘅發言人。左丁山寫北電（香港譯名）之資料，取材於彭博通訊社網站，冇睇過北電之新聞稿。Zoe Chan附上中文新聞稿畀左丁山睇，謹此多謝。新聞稿話北電在亞洲地區的分公司、子公司和在加勒比海地區和拉丁美洲地區，以及北電政府解決方案業務都不會 受到這些問題（按：即破產法第十一章）的影響，將繼續正常運作。 此外又強調：「北電（Nortel）是全球公認的領先通訊業界領袖。」北電係業界領袖，冇 人懷疑，股民（特別係加拿大股民）只係驚訝、驚恐，為何一個業界領袖會由科網股高峯期嘅股價一千二百幾元（加元），下跌至今天的十零個仙，渣都冇晒！ 另一 位讀者Ｃ太大概係會計師，佢話以佢之經驗，美國好多CPA十分水皮，連香港考到倫敦商會LCC Higher識嘅佢哋都唔識，一位考美國CPA成績甚佳之人，唔識現金流報表，唔識做綜合賬，唔識做權益賬，點樣去做內部稽核與合規工作呀，Ｃ太又話： 「美國證交會平時問嘢多多，但啲問題係廢嘅，根本冇用，只係用嚟等Ｄ會計不停做，只計量不計質，只要快不要質，加上而家Ｄ audit將貨就價，Ｄ新仔又冇sense──收到季報有鬼用咩──short-termism，過咗海就係神仙……美國上市嘅股份Report有幾真， 我就慷慨Ｄ畀個大折扣！」 左丁山之會計學知識只係比LCC Higher（倫敦商會試高級會計程度）高少少，讀中五時考到Higher，已經年代久遠，入咗大學又必修會計學原理與選修成本會計，料子係咁多，如果Ｃ 太話一啲美國CPA嘅會計造詣不如香港一個會計部高級簿記員，咁就真係得人驚一啲。Ｃ太又講到美國公司之短視，當然就係每季發表業績報告之直接結果，左丁 山對季度業績發佈，甚有保留，認為一來不足以保護小投資者，二來會增加上市公司overhead（間接費用），減少公司利潤，到頭來只係益咗啲對沖基金利 用季度業績之預期嚟炒上炒落，香港交易所千祈咪搞！ | ||||||
| ||||||
又 話經濟不景，消費不前，但一啲低水平嘅零售店始終本色不改。年初五，沙田陳太到區內商場買熨斗，諗住無謂去電器連鎖店啦，幫襯吓街坊電器店好過。點知入到 去，售貨員態度冷冰冰，十問九唔應，陳太見到一隻P牌（據內行人講係熨斗銷量冠軍），係歐洲牌子，售價並不便宜，於是再向售貨員問清楚產品特點、保養，是 否耐用等等。點知售貨員答：「唔知道咁多嘢噃。」如此售貨員，簡直倒米，唔怪得咁多人去大商場之電器連鎖店，起碼售貨員嘅產品知識好好多，呢類街坊店舖， 遲早受淘汰，唔關人事，領匯點肯繼續在公屋商場內租地方畀呢類店舖吖。 之不過，一啲店舖生意太好，原來亦會招上麻煩。沙田陳太到土瓜灣親戚 家拜年，親戚經營地舖，因歷史悠久，熟客甚多，於是有人隔幾個舖位開番一間同樣產品嘅店舖，同親戚W爭過。本來競爭冇所謂，好難有獨市生意啫，但呢間新店 X居然冒認與親戚W有關連，搶親戚W嘅熟客，親戚W去抗議，新店X對佢講：「好叻咩，第日我哋有好嘢畀你睇o架！」何謂「有好嘢畀你睇」，陳太聽唔明，問 親戚W：「佢哋想送禮畀你呀？」親戚W為之苦笑，良家婦女係唔會明白呢啲市井之言o架嘞。 親戚W之店舖以靚貨多著稱，故此 熟客常來。供應商亦肯以優惠條件供貨，令新店X睇唔順眼。究竟內裏有何營運奧秘？親戚W話：「好簡單啫，我哋只賣代理貨，不入水貨，不在大陸設廠造貨與代 理貨競爭，人哋就在內地設廠製造，但又問代理攞貨，賣貨時就向客人講歐洲日本貨較貴，佢哋有啲平貨好啱客人用。啲代理唔係笨蛋，會巡舖嘅，發覺之後，當然 唔會益佢哋啦。」咦，萬變不離其宗，即係以前肥佬黎教落嗰條橋，自己賣T恤，造成衣，但唔會去開一間布廠，故此周圍可以買到靚布、平布。但呢個咁簡單嘅道 理，偏偏有好多人唔信，開零售店賣外國名牌，又賣自己嘅內地製造貨品，以為好聰明，點知人客唔儍，入口代理商更唔笨，呢類貨品就成為滯銷貨品，影響盈利。 | ||||||
| ||||||
政 府宣佈，○八至○九年財政年度收支截至去年十二月底，有三百零九億元盈餘，消息一出，又有人要求派糖、退稅。到今年三月底，呢筆盈餘即使仍然存在，左丁山 都認為一動不如一靜，政府收埋算嘞，無謂搞咁多嘢，過往派糖、退稅，究竟對本港經濟有何刺激？香港啲經濟學家有冇做過深入分析呀？如果有嘅話，左丁山承認 未見過，未睇過，聽好多人吹水就聽得多。 根據粗略印象，政府派糖退稅過後，本地GDP不動如山，外圍要衰退嘅話，香港難以獨善其身，派多多糖也無用。○八 /○九財政年度之稅收，係按照○七/○八年（至三月底止）嘅公司盈利，個人收入等徵收嘅，大家都知道○七年四月一日至○八年三月三十一日，非常好景，打工 仔花紅特多，公司盈利好到不得了，故此到咗○八年十一月以後交稅時期，庫房收入非常好；但係，○八年四月一日至今年三月三十一日，大家嘅收入好唔好呀？公 司盈利好唔好呀？心裏有數啦，即係話於○九年十一月以後嘅庫房稅收，與今個財政年度同期相比，只會減少，不會增加，假設政府預算不變或有輕微增加，下一個 財政年度必然有赤字，可能好大o忝。 故此今個財政年度如有盈餘，留番嚟預備下年赤字好過。咁咪好唔進取？各國紛紛增加支出，大搞基建，不惜財赤大幅度增加 喎！要知道，香港不同一般國家，香港係海島型經濟，漏斗效果（leakage effect）十分嚴重，千億元基建使費，有好多用以購買外地建材，外地顧問，外地建築專才嘅，唔會產生甚麼乘數效果（multiplier effect），唔好以為請多啲本地建築工人就達到目標。此外，香港唔可以印銀紙，發債券集資唔會大規模，邊度有資格學人哋呀。如彭定康上次來港在FCC 演講話齋，我哋要千萬注意，不可在此經濟不景時期，以挽救社會經濟之名，大搞甚麼工業政策與社會工程呢樣嘢，我哋唔會搞得叻過新加坡；哼，新加坡嘅經濟萎 縮嚴重好多呀！ | ||||||
| ||||||
賓架Ｌ新年前送來一盒利是封，過年後又打電話嚟講恭喜發財，其情可感，於是請佢去陸羽同班老友飲茶敍舊，點知埋單之時，畀佢搶快一步，成班老友唯有向佢講幾聲多謝，多謝。 賓 架Ｌ間銀行宣佈咗第四季業績，外電話「勁蝕」，以此相問，賓架Ｌ笑住答：「What's new?」又係嘅。間間國際級銀行都蝕到阿媽都唔認得，宣佈虧損的確唔係新聞。賓架Ｌ話好彩佢哋仲可以頂得住，佢唔會成為公務員。銀行如果國有化，大賓架 成為公務員，花紅一定大大減少，薪酬會有上限，做事掣肘多多，邊度願意呀。花旗前主席韋爾不時成家人飛去一個小島度假，酒店費用要一萬美元一晚，坐嘅飛機 係花旗擁有嘅豪華型號，一家人不知幾嘆。呢呢，伸手問政府攞錢救亡之後，花旗以前訂下嘅新飛機，價錢五千萬美元，濕碎啦，但美國財政部官員打一個電話表示 不安啫，花旗就要取消訂單，你話幾冇面呢！ 此日吃飯，餐廳羅帶來兩位意大利粉專家，當然係意大利人，佢哋聽我哋講銀行，問吓點解美國最大嘅 銀行「美國銀行」股價點解會跌到三個幾美元？故事一疋布咁長，不知從何說起，不如講掌故，「美國銀行」（Bank of America）創辦時本來叫做Bank of Italy，創辦人當然係意大利人，後來三藩市發生大地震，呢間銀行大力協助三藩市重建，得人擁護，覺得「意大利銀行」呢個名字唔多啱用，於是改名為「美 國銀行」。 呢段掌故，兩位意大利人完全未聽過，令佢哋大為驚異，更令佢哋驚異嘅就係粵菜，佢哋話點解佢哋吃到之中國菜同佢 哋喺羅馬及米蘭中國餐廳食到嘅，完全不同，簡直係兩回事！左丁山問：「咁樣你哋在香港吃到之意大利餐與羅馬意大利菜又有乜唔同呢？」佢哋嘅意見係香港意大 利菜好多肯用意大利橄欖油，意大利製造嘅意粉，又有意大利廚師來港獻藝一段時期，故此佢哋覺得分別唔算太大。話得說回來，佢哋又唔會去到一啲環頭環尾嘅意 大利餐館嘅啫，而係多數幫襯君悅、港麗……聽講一位意大利兩星（米芝蓮）名廚今個星期會在Domani做訪問廚師，自不然係做出正宗意大利菜啦！ | ||||||
| ||||||
男 拔萃校長張灼祥對記者快人快語，講明自己會延遲退休，原因似乎只有一個，就係以一百三十五元買咗滙控，買咗幾多，無謂逼佢講咯，尊重私隱啦，但滙控近日作 價係五十九元左右，每股已蝕咗七十六元，約五十六巴仙，好傷喎。另外，葉劉淑儀議員又話揸住不少「美國銀行」與「美林證券」，因為佢親愛的已故丈夫教落， 買美股要買美銀與美林，如果呢兩間公司唔掂，美國都會好唔掂。葉生講得好鬼啱，想唔到嘅係美林唔掂，美銀被迫買入美林，變成兩個都唔掂，相信葉劉持有呢兩 隻股票，損失嚴重。 新加坡李太何晶又係投資專家，主理淡馬錫七年，去年淡馬錫資產總值損失31%，唔見幾百億港元，於是雖然佢貴為李顯龍總理夫人，一樣要退位讓賢，辭去CEO一職，由澳洲人，前Rio Tinto行政總裁Goodyear接任。 挪 威方面，因石油蘊藏豐富，誠恐有枯竭之日，老早成立一個石油基金，每年由石油收益撥款過去，至今已滾存逾三千億美元，交由一隊專家投資，主管人學歷幾得 意，在奧斯陸讀經濟，到美國讀MBA，去日本神戶大學讀財務，去德國讀哲學，返挪威做大學教授，可講知識豐富，國際視野十足，非一般人可比。後來挪威石油 基金覺得投資要有「綠色」、「道德倫理」嘅規範，於是搵咗呢位先生做投資顧問，後來佢成為阿頭o忝。咁嘅背景，投資好叻嘞啩，醒過我哋張校長、葉劉議員 吖，點知唔係，去年居然重手買入雷曼股票，輸到吔吔聲，基金全年損失18%，香港所有雷曼苦主加埋嘅損失，可能唔夠呢位哲學教授咁多。 哈 佛大學叻唔叻呢？巴閉到極，係全球最富有大學，上一個十年度嘅投資回報（複利增長）係13%，稱譽全球，哈佛大學每年嘅總經費有35%來自基金投資收益， 但○八年就遇上滑鐵盧，哈佛基金由三百七十億美元跌至二百九十億美元，跌咗八十億美元或21.6%。教授Ｌ從美國電郵通知左丁山，哈佛基金將裁掉四分之一 嘅職員！從香港著名中學嘅校長到世界上最聰明醒目之人，皆於○八年投資失利，輸到直晒，怪政府呀，怪上帝呀，上街示威呀？搵民建聯伸寃呀？無謂嘞，成年人 投資風險自負，怨天怨地鬧政府，不但無補於事，仲會傷身！ | ||||||
| ||||||
保 險界元老K叔請一班老友食午飯，是日適值亞視裁員二百零七人，自然成為第一個飯局話題。K叔話時勢唔好，企業裁員實在無可奈何，只望經濟快啲好轉而已。但 退休賓架B立即話：「怕好難咯，我認為，嗱，記住，係我講嘅，今年銀行界會大裁員，現在仲未開始。」點解講得咁權威呢？皆因賓架B參加咗一個「退休之友」 會，會員全部係銀行退休員工，對各銀行嘅動態，憑各人網絡，都知道一個大概，今年銀行經營困難，因受雷曼事件打擊，理財部門賣產品幾乎停擺，乜都唔敢賣， 收益大幅度下降，而理財部門當然出現大量閒置人手，話回歸基本（back to basics）喎，點回歸呀，唔係咁易！ 賓架B話：「蔣震老先生咁老經驗，都話六十年來未見咁差嘅環境，佢間震雄一張訂單都冇，工人要放假一個月。你話 嘞，工業界、出口界點會好呀，銀行點敢借錢出去呀。」賓架B啲退休金收收埋埋，乜都唔買，但儲藏多年之股票大幅減值，未免肉痛，佢太太仲買咗雷曼迷債o 忝，冇仇報。賓架B話佢有唔少退休工友買咗雷曼迷債，曾經有三四年收息收得十分高興，點諗到雷曼竟然會破產呀，o依家個個感到十分無奈，佢哋成班人曾在銀 行打工，唔敢出嚟見記者宣稱自己係無知投資者嘅啫！賓架B大嘆一間曾經聲譽卓著，具一百五十餘年歷史，信貸評級甚高嘅投資銀行竟會破產倒閉，實在係意料所 不及，唯有嘆倒霉。K叔聽到，加一句：「買電話公司股票等退休，夠諗唔到會蝕到死咗啦，你話李小超點搞！」 外匯G立即話：「K叔，AIG資格老唔老呀？有 冇一位李小超呀！昨晚股價收九十幾仙，低於一美元，隨時會除牌，以八十美元至四十美元一股買入者，有唔少香港保險界人物，蝕到渣都冇，鬧邊個？」 K叔為之 苦笑。世界變咯，各行各業不斷改革，改朝換代，買股票唔能夠講老牌，講百年老店，而係要睇清楚二十一世紀新形勢，隨時轉換手上股票，勿與股票談戀愛。 | ||||||