聲稱入境處 名字被盜江欣燕遇電話騙案
1 :
GS(14)@2016-11-17 11:30:38■江欣燕自爆日前遇上電話騙案，差點中招的她慶幸沒金錢損失。資料圖片
現年49歲的江欣燕日前遇到電話騙徒，以為對方真的是上海公安，竟如實報上自己的姓名、身份證和回鄉證號碼，昨日她在電話坦言：「我去報案，差人話冇財物損失唔受，我行出嚟冒住大家笑騎騎：『你係豬頭炳啦！』我都好驚其他人覺我好蠢好幼稚，但我覺得要勇敢啲，唔可以有羞恥心，呢個集團簡直無法無天，藐視法律，要嚴懲。」
■欣欣曾與自稱林警官的人對話，騙徒被識穿後仍不斷騷擾她（右圖）。
■欣欣透露當時在旁的江媽媽醒目識破騙案。
媽媽醒目識破
欣欣表示當日接到操普通話的電話，聲稱是香港入境處普通話部門，指她的名字上月被盜用，於上海幫林燕的女子申請通行證，她說：「我仲好認真咁答佢，話一定唔會係我，因為9月中後我爸爸過身，我喺香港同佢辦理喪事。」接着對方要欣欣提供個人資料及抄下案件編號、日期、當事人名，幫她轉駁電話到上海公安報警。欣欣指對方還扮好心提醒她：「佢話驚有人攞我啲資料去借錢，費事佢哋盜用我個名作奸犯科呃人。」其時江媽媽醒目識破，欣欣說：「佢（媽媽）聽到我話同上海公安報警，喺另一邊打畀我嘅屋企人：『哎吔，佢冇睇《警訊》，佢俾人呃！』媽咪寫紙畀我話呢件事係假，電話裏面嘅公安都係假，我仲叫佢唔好嘈阻住我，呢件事好緊急。」
續被騙徒騷擾
當電話轉駁到「上海公安」後，欣欣指該「公安」還給網頁link讓她看其簡介，最後對方指事件非常嚴重，叫她不要跟其他人說，欣欣終起疑：「感覺好似小朋友俾人侵犯後，叫佢唔好同媽媽講。」收線後江媽媽再指女兒被騙，欣欣說：「我睇番來電顯示係5字頭，見到有啲怯，打番去：『呢個電話沒有用戶登記』個心行雷，成件事係假，好驚！後來佢仲成日打畀我，話幾靚女喎，我忍唔住，勸佢同集團回頭是岸，佢話集團入面都有好人。」採訪：皓騫
來源:
http://hk.apple.nextmedia.com/entertainment/art/20161117/19836000