📖 ZKIZ Archives

新老闆要舊客名單 員工迫做二五仔？

1 : GS(14)@2014-09-03 18:07:34

https://hk.news.yahoo.com/%E6%96 ... B%94-224641621.html

【晴報專訊】所謂同行如敵國，有打工仔在網上訴苦，指新工上任即被僱主索取舊公司客戶資料，他不想做「二五仔」，又怕得失新老闊，感到左右做人難。人力資源顧問指，僱主「套料」的做法低劣，律師亦指員工「放料」或違法。
不少行業也要「跑數」，客戶資料猶如打工仔的一部分資產。早前有自稱做家電送貨的年輕人在討論區撰文，指新工上任一個月多，老闆便要求他交出舊客戶名單。文中指他雖然沒有跟舊公司簽署保密協議，但也擔心披露客戶資料後，一旦被發現，會被視為「二五仔」。如果不妥協，又怕得失新老闆，甚至被「炒魷魚」，於是向網民討教。

70後拒交舊客資料 即日辭職
有人指事主的新公司可能為「攞料」，猜測他交出資料後，隨時飯碗不保；要是被同行知道他做「二五仔」，日後更難在行內立足。亦有人留言回應，指需要「跑數」的銷售員帶同客戶資料「過檔」新公司，屬見慣不怪。
現實中，七十後的陳先生從事雨具銷售多年，累積不少舊客，早前他擬轉行做採購員，豈料首日上班新僱主已向他索取舊客資料。「他叫我列出所有舊客資料，包括姓名及電話，還要求交出他們的卡片。」他擔心新僱主「攞完着數」便藉詞解僱他，於是拒絕要求，更即日辭職。

文件印有標誌 屬舊公司財產
思酬智路人力資源管理顧問公司資深顧問林敬新指，大部分公司會在僱傭合約及員工守則設立保密協議，訂明僱員離職時不可取走客戶資料，否則有權追討相關損失。若僱主於新員工就職當日，便索取這些敏感資料，在情在理也不恰當。「除非資料輕易在網上找到，反之文件印有舊公司標誌，也是公司財產之一。」
卓越人力資源顧問（ExcelNet）總監梁美儀坦言，老闆期望新同事連人脈一併「過檔」，以擴展生意，是無可厚非，惟單刀直入向員工「攞料」，會令人質疑公司可信度，亦會惹來僱員反感，處理手法差劣及短視。「上司可鼓勵下屬聯絡舊客，知會已轉工，有需要可聯絡他，把選擇權交給員工及客人，他們會較易接受。」
環球管理諮詢有限公司董事總經理李漢祥建議，打工仔可先聯絡舊客，看看是否願意將資料帶到新公司。「這樣做既表現事主有人脈，亦可呈現他的誠信，未嘗不是好方法。」

未經客戶同意 轉交資料屬違法
打工仔帶走客戶資料，隨時違法也不知。執業大律師龔靜儀表示，若僱傭合約訂明離職後不可將客戶資料外洩，如果僱員違反守則，前公司可循民事途徑追討相關損失，能否成功追討需視乎證據是否足夠。

另外，她又指僱員擅自披露客戶的個人資料，可能已違反《個人資料（私隱）條例》，一經定罪，可被處罰100萬元及監禁五年。「客戶提供資料給舊公司，是基於雙方的交易及信任，即使僱員擁有這些資料，但離職後亦不可隨便轉交新公司。」
PermaLink: https://articles.zkiz.com/?id=285353

萬南 二五中環 衍生熱爆定價留水位

1 : GS(14)@2014-10-18 23:18:53

http://www.metrohk.com.hk/index.php?cmd=detail&id=248023&search=1

衍生熱爆定價留水位




             呢排新股表現相當靚仔，一眾細細粒嘅公司，更惹嚟瘋狂認購，好似今個星期四上市嘅衍生集團(6893)，話晒係香港知名品牌，集資只係兩億幾，又食正呢排藥股當炒，自然爆到七彩，公開招股超額860倍，打入今年超倍榜頭5名，有入飛嘅芬佬已預計派得唔多，焗住上市後搶貨。招股反應靚絕，衍生絕對可以$1.2嘅招股價上限上市，但主席彭少衍係老實人，認為賣藥呢行唔鍾意賺到盡，所以上市前無將公司現金盡派自己袋，更決定預留輕微水位，以$1.18掛牌，取其意頭「日日發」，希望同股東共創雙贏，公司因此少收幾百萬元。衍生最為香港人熟悉嘅產品，係嬰幼兒飲嘅「開奶茶」，更係市場上同類產品嘅龍頭，經常見到強國人嚟香港超市藥房掃貨。老闆彭少衍更瞓身力谷呢隻王牌產品，除咗親自參與廣告度橋創作，就連自己嘅WeChat戶口，亦都以「開奶茶」做自己稱號，藉此滲入式宣傳。原來衍生仲有一大批中成藥排緊隊推出，據聞單係為咗註冊呢批藥，衍生已經花咗過千萬，彭老闆做咗好多市場研究，發現嬰幼兒發燒，依家好多家長都係餵西藥，但就食到小朋友好散，所以即將推出嘅退熱中藥，成分用咗羚羊絲，彭老闆話呢隻中藥原材料超貴，但成效顯著，所以貴一貴都值得。
PermaLink: https://articles.zkiz.com/?id=286145

萬南 二五中環 大孖沙坐港鐵避「佔中」

1 : GS(14)@2014-10-18 23:19:41

http://www.metrohk.com.hk/index.php?cmd=detail&id=248023&search=1

近排佔中搞到港島大塞車，好多藝人都改搭港鐵。閣下睇緊呢篇文章時，如果正係坐緊港鐵，不妨暫停做低頭族，望下四周，睇吓有冇明星喺附近。其實除咗娛樂圈，好多金融界或上市公司老闆，都變咗港鐵常客，貪其時間較易掌握。
好似信和(083)大老闆黃志祥咁，以前久唔久都會單拖坐港鐵，據聞近排更隔日見佢蹤影；而香港電視(1137)老闆王維基，如果要由葵涌公司總部去金鐘，亦會叫司機車佢到尖沙咀，自己坐港鐵過海。至於另外一位非常有名嘅賓架，呢排將辦公室暫搬九龍東，佢家住中半山，聽聞公司安排兩部車，一部由屋企車佢去中環，另一部喺尖沙咀接佢，仲要由一位助理跟出跟入。點解？因為賓架十幾廿年未坐過港鐵，八達通都冇張，公司驚佢搭錯綫喎。
PermaLink: https://articles.zkiz.com/?id=286146

萬南 二五中環 創板新股 好過中六合彩

1 : GS(14)@2014-10-18 23:20:09

http://www.metrohk.com.hk/index.php?cmd=detail&id=248023&search=1

上星期五，創業板有隻新股樂亞國際(8195)上市，由於係全配售，圍內人玩晒，散戶冇得認購，只有125名幸運兒獲派股份。樂亞以$0.6掛牌，首日收報$4.15，狂升5.9倍！股東真係笑到見牙唔見眼。
喺呢125位新晉股東之中，有5個係超級幸運兒，事關樂亞今次配售1億股，佢哋已瓜分咗6千2百萬股，大約每人可得千零萬股。若果以首日每股賺$3.5計，每人可執3千幾萬，仲多過中六合彩頭獎。相信你睇到呢度，最想知點可成為呢批幸運兒，答案係“guanxi”，你懂的。
PermaLink: https://articles.zkiz.com/?id=286147

萬南 二五中環 摩通高層大戰陳豪

1 : GS(14)@2014-11-09 18:45:41

http://www.metrohk.com.hk/index.php?cmd=detail&id=251615&search=1

呢排中環豬朋狗友吹水，話題已唔敢涉及佔中，因為藍黃之間，隔條大峽谷，傾親都面阻阻，倒不如風花雪月講吓八卦嘢，A君問大家有冇留意藝人陳豪同大埔比華利山老外鄰居鬧交，老外穿上自製T恤寸陳豪，成為娛樂版頭條，不過從來冇人提老外身份。







  
             A君話老外名叫Chris W，係投資銀行摩根大通高層，不過因為佢管轄IT部門，毋需出外見人，所以行內唔算太多人認識。A君話Chris來港多年，更娶個港女做老婆，早已視香港為家，雖然廣東話唔叻，但聽得明鬧人港式粗口。講番呢單陳豪同Chris爭拗，原來每幢比華利山獨立屋只設兩個泊車位，陳豪同老婆陳茵媺又朋友多，經常屋內開P，不過朋友又貪方便將車亂泊，屢次阻到Chris車出入，向管理處投訴亦冇符，最終Chris着上自製T，寫上「MOSES CHAN STOP PARKING IN FRONT OF MY CAR PARK YOU CXCK」貼上fb，將呢件事揚開去。據聞事件曝光後愈搞愈大，陳豪兩公婆對外話係一場誤會，不過Chris卻企硬唔罷休，比華利山管理處於是搞一次調停，以為雙方都係派兩公婆出四四六六傾掂佢啦，點知陳生只派陳太，仲要係陳老太出席，令Chris覺得冇誠意，拖到依家仲未解決件事。
PermaLink: https://articles.zkiz.com/?id=286407

萬南 二五中環 U盤再起爭議

1 : GS(14)@2014-11-09 18:46:13

http://www.metrohk.com.hk/index.php?cmd=detail&id=251615&search=1

由今日（星期一）開始，夜期收市時間再度延長，由原來晚上11點收市，加時45分鐘，令到好多經紀行牙痛，事關原本生意仲係要守，依家加時肯定令開支加大，距離（夜期）收支平衡仲有好大段路。萬南聽聞港交所（388）下一浪改革有意重啟收市競價（U盤）時段，呢個被喻為「勁假時段」受到好多人非議，批評係大行屈機遊戲，所以試行冇耐便拉倒。有證券界老行尊強烈反對重推U盤，甚至覺得早上開市競價（A盤）時段亦要檢討，事關亦有好多身痕友搞小動作。佢舉例每朝首10分鐘A盤，十大升幅榜上，不時都會見某傳媒股打入榜內，而且都係同一間中資證券行，感覺好似好勁咁款，但臨尾卻又縮盤，令呢隻傳媒股打回原形。老行尊話雖然呢間行沒實質得益，但日日咁玩非常身痕，分分鐘會被證監照肺。
PermaLink: https://articles.zkiz.com/?id=286408

萬南 二五中環 謝霆鋒講大咗？

1 : GS(14)@2014-11-09 18:46:49

http://www.metrohk.com.hk/index.php?cmd=detail&id=251615&search=1

上星期五，宣布謝霆鋒（圖）入主漢傳媒（491）復牌，股價喪升1倍，「缸」湖中人指如無意外，霆鋒稍後更會晉身董事局，成為全港最靚仔上市公司主席。萬南對佢靚仔絕不懷疑，但對佢注入上市公司盤數點解變醜更有興趣。根據漢傳媒通告，霆鋒注入後期製作公司PO，由12年開始一直蝕錢至今，同佢早前對外講PO年賺1億說法，肯定係兩個極端。究竟霆鋒有兩間PO，今次只注入醜樣間，還是當日佢口爽爽講大呢，就要有勞財經記者代為問佢啦。如果係後者，萬南提醒佢日後咪制，事關身為公司董事話，公司營運數據係股價敏感資料，講要負責任飛真確無誤㗎。
PermaLink: https://articles.zkiz.com/?id=286409

萬南 二五中環 上市公司年度大獎猛人雲集

1 : GS(14)@2014-11-30 02:38:30

http://www.metrohk.com.hk/index.php?cmd=detail&id=255006&search=1

揭開報紙雜誌嘅財經版，好多時都設有擂台，搵嚟一眾分析員鬥畀冧把互較高下，雖然日日榮辱互見，但其實佢哋相當老友，不時約埋搞船P，更齊齊成立香港股票分析師協會，亦因為以往佢哋為咗研究公司前景，約見上市公司管理層，但發覺有啲人習慣吹水唔抹嘴，講就天下無敵，做就有心無力，搞到公司一鑊粥。





  
             所以分析師協會上星期搞咗上市公司年度大會，表揚廿間規模唔同，但共通點係高透明度、又保護小股東權益嘅公司。呢晚可謂星光雲集，除咗一眾星級分析員，仲有股壇猛人朱太、港交所(388)獨董李君豪同立法會金融服務界議員張華峰等人撐場。講番得獎名單，全部由分析師專業評審出嚟，當中長實(001)、煤氣(003)及華創(291)更係藍籌股，而好多散戶熟悉嘅化妝品公司卓悅(653)亦有入圍，老闆葉俊亨除咗親自嚟攞奬，更連同都喺卓悅做嘢嘅太太同大千金出席，葉生話因為知道呢晚有好多分析師在場，所以總動員嚟打好關係，藉此增加公司透明度，進一步提升企業管治質素。有份投票嘅資深分析師表示，今年只選了周大福(1929)同卓悅兩隻零售股攞獎，原因係貴精不貴多。佢話初入行分析師通常以零售股起步，原因好簡單，就算乜都唔識，由朝到晚企係舖頭?實，亦可大概推算銷情。而卓悅就更體貼，每逢黃金周等大節日過後，例必主動披露銷售額，而且年報亦好詳盡，所以好多分析師都會cover佢，得獎絕對實至名歸。
PermaLink: https://articles.zkiz.com/?id=286607

萬南 二五中環 向羅仲榮家人致哀

1 : GS(14)@2014-11-30 02:39:41

http://www.metrohk.com.hk/index.php?cmd=detail&id=255006&search=1
上星期一，萬南寫金山工業（040）有機會賣盤，其中一個理由係老闆羅仲榮嘅囝囝羅揚傑冇興趣接棒，而佢本人又似無心戀戰，有時間都情願陪伴頗多病痛嘅太座劉梅潔。篇文出街後，線人打嚟話畀萬南知，原來劉女士喺文章出街前3日剛剛仙遊。
萬南寫金融界八卦事多年，年中聽落唔少料，但都抱着盡量唔提啲新鮮熱辣嘅生離死別，免得勾起家屬傷痛。今次甩轆，事緣係小弟早幾日仍聽到劉女士病情尚算穩定，掉以輕心冇喺周六截稿前再向其家人跟進，先至搞出呢個小誤會，在此謹向羅仲榮及其家人致哀。
PermaLink: https://articles.zkiz.com/?id=286608

萬南 二五中環 Yen大跌遍地黃金

1 : GS(14)@2014-11-30 02:40:06

http://www.metrohk.com.hk/index.php?cmd=detail&id=255006&search=1

近期日圓匯價仆直，簡直係普天同慶嘅事，萬南知道有好多外匯炒家都贏到開巷，形容係炒dollar-yen黃金日子，只要唔包拗頸，長期沽yen，每日執7位數字美金唔難喎。
而香港好多上市公司都受惠yen跌，例如759老闆肥佬林已表示入多啲日本零食，至於旅行社專業旅運（1235）亦都話呢排生意超好，市場部總經理劉美詩話好多人想訂機位去日本血拼，估計今年聖誕嘅客人急升三成。專業旅運今個星期三公布中期業績，照計生意有穩定增長，至於近排嘅超好生意，要到全年業績先可反映，萬南索到有基金已密密掃貨，貨源極度歸邊，只欠一個藉口便可湧上去。
PermaLink: https://articles.zkiz.com/?id=286609
Next Page
ZKIZ Archives @ 2019