| ||||||
上月以兩億元撼贏細劉同何柱國，買起《都市日報》的黃浩，係威係勢殺入報界，但同時亦低調摺埋惹到他一身蟻的雞煲鋪「台灣一品花雕雞」。據知上個禮拜他與一班股東開會，決定雞煲鋪做到今個月尾結業，求證黃浩，他直認話：「做咗（雞煲鋪）後好似行衰運，怕咗啲是非，加上租金由八萬加到十八萬，點做？」為興趣 自○一年起進軍飲食業的黃浩（Kenny），先後做過六間餐廳，雖然間間都做唔長，但數口精的他自言今次摺鋪是商業決定。「不嬲做餐廳只係為興趣，三年前係我哋首推雞煲，生意好到想同老婆食都無位。」鋪旺招風，附送連串是非，先有LMF成員炮轟食店收多咗錢，指九千元的單據中「有二千幾老作，茶芥收一百蚊位，可樂叫四罐收廿五罐錢」；之後DJ Tommy又指他的餐廳是抄台灣的假店。最大鑊當然是去年十一月，有指徐濠縈、何超儀、LMF及葉佩雯等共廿三人在店內開迷幻飯局，還被閉路電視影低，最後更蔓延到黃浩被曾志偉掌摑。 有傳黃浩將雞煲鋪關門大吉主要為避是非，黃浩不置可否，「開始時都覺得行衰運，個天可能要我經歷吓，俾我自強。要屈服定正義落去？我選擇唔屈服。 「人生中總會遇到無賴，件事不是涉及藝人，點會發到咁大？我成日都話客人是對的，如果請到個醒目的同事就可以調節，我一向都唔收酒水，幾罐可樂咪由佢，同個客argue做乜？我Kenny點會呃你汽水？平時香檳都一支支咁送啦。」 錢從何來 黃浩名下有七間公司，但持有物業的就一間都無，目前住的大埔比華利山四千三百呎別墅都是租的。忽然可以拎出兩億收購《都市日報》，外間眾說紛紜，更有指他只是出面嗰個，背後另有大水喉射住，但黃浩自有一套說法，「兩億啫，又唔係廿億！況且嗰陣我想買樓，但唔啱價冇買，咁準備買樓嘅錢，唔用可以做乜？」 至於有指他買報紙來報復，他覺得很搞笑，「我要做傳媒大亨，係就唔買呢份，要買就買狠啲；而且我不會參與編輯部，做生意無非為搵錢，《都市日報》是cash cow。」黃浩坦言睇中Apps的市場，自去年開始收購關於生活、飲食、旅遊的Apps，有了自家報紙的網上平台就方便推銷，「依家慳了幾百萬宣傳費，直接在Online就可以用。」說到底都是錢作怪。 | ||||||