Money Walker：「炒股可致富」的迷信
1 :
GS(14)@2017-04-28 02:09:46有人話港人總是迷信磚頭，虔誠程度猶如信教，其實港人對於「炒股可發達」嘅講法一樣執迷，否則書局投資理財類書籍點會長賣長有。唔少理財書都強調「複息的力量」，奉之為「理財的根本」。投資無可否認有機會致富，因為錢可以生錢，只要擁有第一桶金，足以分配喺能夠提供穩定現金流嘅低風險投資，例如物業、藍籌或債券，就可以坐定定唔使博，定時定候有錢入袋，原理就同年金計劃差不多。問題在於如果本錢有限，連藍籌都買唔起一手，根本不可能拎到上述錢搵錢境界嘅入場券。現實世界大多數人，其實都受到本錢有限制肘，未能享受「複息的力量」，只能有意無意地信奉另一觀念--「炒股可發達」，將全副身家投入高風險投資，以小博大求發達，於股海浮沉力爭上岸。不過如非好彩遇上大牛市，要將雞碎咁多積蓄發大，唔通真係單靠「複息」咩？於是唔少炒友都焗住透過低入場費與高槓桿嘅投資，例如細價股、窩輪、孖展等，膽博膽期望賭出第一桶金來。問題係用得槓桿，又意味投資表現會大上大落，操盤技巧要求亦更高，結果唔少股壇炒友都唔只一次炒爆輸身家，來回地獄又折返人間，只有少數人真正成功致富，登上所謂嘅「財務自由」天堂。
El.
http://fb.com/moneywalkerhk本欄逢周三刊出
來源:
http://hk.apple.nextmedia.com/financeestate/art/20170426/20001875
Money Walker：內地去槓桿猶如detox
1 :
GS(14)@2017-05-13 01:29:44A股五連跌後終於喘定，外界暫時似乎唔太擔心大陸去槓桿去出火，但有唔少人開始競猜去槓桿負面影響要發酵到幾大，當局至肯收手。有人話滬綜指跌至3000點心理關口，就係去槓桿終結嘅指標，因為維穩同去槓桿對中央而言一樣重要。亦有人相信人仔匯價受牽連時當局自會褪軚，畢竟中央唔想見到人仔日日跌、資金日日走。有人就覺得事件升級至全球性恐慌，累埋外圍股、匯、債，先係調控尾聲之時。無論如何，筆者傾向相信大陸汲取去年教訓後，對於掌握調控與增長兩者間平衡已有進步，今次調控亦會適時抽身，畢竟最快9月就係十九大，到時中國股、匯、債一齊震盪，成何體統？其實內地去槓桿有啲似時下追求健康嘅人，間唔中斷食幾日純飲果汁排毒一樣。當體內毒素（槓桿）積聚太多，久唔久detox（去槓桿）一輪，理論上對身體（金融體系）健康有幫助，但療程時間又不能太長，因為餓（流動性減）得太耐會反過來傷身。更重要嘅係，排毒（去槓桿）不需急於一時，可以視之為長期作戰，久不久清理體內毒素（槓桿）一輪。不過問題在於，就算當時人識得控制力度，唔會排毒排到傷埋身，不時斷食相信都幾難累積到脂肪。同理，當去槓桿成為反覆恒常習慣，亦意味中國經濟增長以至相關投資升勢都傾向短癮，長期難有睇頭。
El.
http://fb.com/moneywalkerhk本欄逢周三刊出
來源:
http://hk.apple.nextmedia.com/financeestate/art/20170510/20016515
Money Walker：股市開party成新常態？
1 :
GS(14)@2017-06-10 12:54:05恒指挑戰26000點之時，市場目標已放眼2015年大時代期間28588點高位。正所謂升市莫估頂，但筆者有感近排環球整體投資氣氛與兩年多前，港股與環球股市最瘋狂一刻有幾分相似。與大時代時一樣，唔止港股，放眼環球多國股市都一樣表現靚仔。MSCI AC世界指數已經升至469點歷史高，道指、標普500指數、納指、富時100指數、德國DAX指數、首爾KOSPI指數同印度Nifty指數，均正在或經已破頂，齊齊開緊party。環球股市市值更增至74.93萬億美元，超越2015年6月嘅73.27億前高位。早前轉軚由唱淡變睇好美股嘅著名淡友Jeremy Grantham話，以前套價值投資揀股法則已經唔適用。筆者認同環球低息下平錢充斥，股市必定水漲船高，的確唔能夠再用量寬前把尺去量度股市高低，否則所有資產都會一概被視作泡沫。但當基本面強勁嘅環球科技股，股價升幅都已遠超盈利升幅，本地科技股更因而惹來國際沽空機構狙擊，就無疑係一種警號，提醒大家現估值過高。不過筆者相信，港股未到見頂大調整之時，因為2007年10月及2015年4月，兩次恒指見頂大跌前數周，恒指9天RSI（相對強弱指數）都曾升到90或以上水平，其中2015年一次更逼近95，但恒指9天RSI現時只達80，未到爆炸水平，但亦不宜掉以輕心。
El.
http://fb.com/moneywalkerhk本欄逢周三刊出
97年主權移交至今，香港前進還是倒退？「蘋果」與你細數廿載風雨。【回歸二十年】專頁：
http://hksar20.appledaily.com.hk
來源:
http://hk.apple.nextmedia.com/financeestate/art/20170607/20047144
Money Walker：美科技股未瘋狂
1 :
GS(14)@2017-06-22 07:41:12環球欠缺新投資題材接力，炒來炒去都係科技股，結果牛氣沖天嘅科技股因遭過度睇好而成為crowded trade，即所謂「擠擁交易」。美銀美林月初進行嘅基金經理調查顯示，無論美國、歐洲及日本市場，科技股投資比重都係一眾板塊中最高，納指長倉喺5月及6月份均晉身「最擠擁交易」。不過值得留意嘅係，美國科技股早前雖曾出現調整，但好快回勇，筆者認為原因不外乎除科技股外有增長潛力產業不多，同埋科技股估值雖高，惟遠未至泡沫程度。睇番過去美銀美林基金經理調查結果，最擠擁嘅長倉交易一般最少可連續佔據該寶座四個月時間或以上，例如一度獲市場熱捧嘅美元長倉交易，分別連續於2015年11月至2016年2月，以及連續於2016年12月至2017年4月，登上「最擠擁交易」席位。按此推斷，最近兩個月先加入成為「最擠擁交易」嘅納指長倉，有望繼續蟬聯。另外，雖然納指年初至今累計升咗15.9%，但其實期內報升嘅成份股僅僅過半，佔全數納指成份股比例55%。上升股份比例未全面，反映美國科技股「擠擁交易」暫時只限於個別科技巨頭，瘋狂程度與爆煲仍有一段距離。
El.
http://fb.com/moneywalkerhk本欄逢周三刊出
97年主權移交至今，香港前進還是倒退？「蘋果」與你細數廿載風雨。【回歸二十年】專頁：
http://hksar20.appledaily.com.hk
來源:
http://hk.apple.nextmedia.com/financeestate/art/20170621/20062779
Money Walker：縮表加息不會逆轉
1 :
GS(14)@2017-07-01 10:18:44美銀美林首席投資策略師Michael Hartnett預言，環球流動性與企業利潤將於秋季見頂，不排除儲局明年會由收緊幣策轉為再度放寬幣策。上述預測倘成真將十分可怕，因意味包括樓價在內嘅環球資產，價格水漲船高局面永不扭轉之餘，更會加劇。筆者同意儲局加息會導致流動性減少，但會否因此產生市場震盪並導致幣策部署逆轉，則值得商榷，因為仲需要視乎市場加息預期與實際加息步伐兩者間之差距，倘差距不大，則意味加息縮表未來唔會造成市場震盪，因一切經已在市場反映。先講市場預期，年初市場普遍預計今明兩年合共加息7至8次，但今年上半年僅加息兩次，即未來一年半間理應再加5至6次，先符合市場年初預期。但市場睇法現已較年初轉鴿，最新估計係未來一年半合共再加四次，連同今年上半年嘅兩次加息，即2017及2018年間合共只加息6次。不過由於儲局加息同時亦開始縮表，所以亦要考慮縮表對流動性影響。按之前公佈嘅縮表步伐推算，2017及2018年間累計縮表規模料介乎3,000至4,200億美元，影響僅相當於一年內加息0.35厘至0.5厘，亦即等於儲局今明兩年再額外加息一至兩次。綜合而言，儲局今明兩年加息連同縮表，整體對市場流動性影響，料約相當於兩年內合共加息7至8次，此收緊程度與市場年初預期嘅兩年間加息7至8次一致，難怪縮表路線圖公佈後，股市未有大反應。講返Hartnett，倘若環球股市第三季一如佢所言出現調整，筆者相信亦只會導致儲局加息步伐放緩，而非反過來放寬幣策，畢竟儲局好不容易先開始進入收水mode，而且有需要時亦理應先考慮暫停縮表而非減息。更重要嘅係，央行永遠收唔到水，等於資產價格此後只升不跌，環球貧富懸殊勢必加劇，只識放水而唔識收水嘅央行，將需為此負上責任。
El.
http://fb.com/moneywalkerhk本欄逢周三刊出
97年主權移交至今，香港前進還是倒退？「蘋果」與你細數廿載風雨。【回歸二十年】專頁：
http://hksar20.appledaily.com.hk
來源:
http://hk.apple.nextmedia.com/financeestate/art/20170628/20071097
Money Walker：中港金融融合誰埋單？
1 :
GS(14)@2017-07-07 02:39:27凡事都有正反兩面，所有發展機遇都存在代價，講緊嘅係中港金融市場融合。話說內地險資苦於為投保資金尋找出路，兼需利用海外資產避開人民幣貶值影響，鑑於內地存在資產荒，加上當局不樂見資金大舉流出海外，開放險資經由滬港通及深港通進入香港市場，順理成章。中保監宣佈容許險資經由滬港通同深港通來港投資港股，既發揮阻止內地資金外流效果，亦可滿足港人對回歸廿周年送大禮嘅期待。市場對於擴大險資來港一事，即時反應係憧憬北水流入推升港股。其實香港喺扶助中國金融市場發展上有重要角色，中港金融市場融合下，本港於當中享受到嘅好處何其多，北水推郁港股只係其中一項，金融業從事員、中區寫字樓業主、香港政府庫房，個個都係受惠者。不過有利亦肯定有弊，中港股市與債市互聯互通只係第一步，中港金融甚至貨幣市場合而為一，大有機會係中國金融市場國際化嘅終點。喺呢個漫長過程中，相信香港會陸續得到唔少好處及機遇，問題係中港金融市場融合帶來嘅變化，亦需由每一個港人承受。假以時日，內地走資大閘會否由內地南移至香港？互聯互通最終目標又是否中港股市一體化？港元與人民幣掛鈎會否係人民幣達至完全自由流動前嘅其中一步？以上變化當然純屬筆者想像，但中港金融市場種種緊密聯繫，必然意味兩地金融市場於制度、運作、法規等方面，距離將不斷縮窄，今日港人落袋嘅種種好處，毫無疑問總有一日需要由全體港人一齊埋單。
El.
http://fb.com/moneywalkerhk本欄逢周三刊出
來源:
http://hk.apple.nextmedia.com/financeestate/art/20170705/20079207
Money Walker：比特幣避險變冒險
1 :
GS(14)@2017-09-17 12:51:04侵侵上台後，外圍一如預期好多事，避險需求升溫下刺激金價翻生。筆者原先以為1,300美元關口前會暫時遇阻，點知金價竟然一舉升越阻力，兼創差不多一年高。筆者預期金價短期下一波阻力喺1,350美元，係咪正式重返牛市暫時唔敢講，但中期睇法依然樂觀，就算市場將來對北韓金仔所有行動盲目晒，資金唔再需要流入黃金避險，金價中期仍有兩大支持因素。第一項支持因素就係美元走弱間接推升金價，美元年初起展開跌浪，美滙指數近期喺92關鍵位爭持，倘失守，意味美元未來跌勢有望加快，而美元下跌有利以美元計價嘅黃金。第二項因素則同Bitcoin(比特幣)遭打壓有關。「新興市場之父」鄧普頓新興市場團隊執行主席麥樸思（Mark Mobius）日前指虛擬貨幣開始失控，預期虛擬貨幣將會吸引環球政府注意，當投資者開始質疑虛擬貨幣信唔信得過嘅時候，資金就會重返黃金。唔知幾時Bitcoin俾人當咗做對沖通脹同風險嘅資產，功能與黃金重疊。無疑Bitcoin同黃金兩者係有少少共通點，就係兩者都係較易兌換成現金嘅資產，而且都係限量，所以Bitcoin被視為黃金某程度上嘅替代品並唔出奇。不過黃金同Bitcoin本質上有個好大分別，就係大吉利是一旦打仗的話，前者可以帶喺身當貨幣使用，後者打仗時就真係得啖笑，搵佢避險反變冒險。
El.
http://fb.com/moneywalkerhk本欄逢周三刊出
來源:
http://hk.apple.nextmedia.com/financeestate/art/20170906/20144513
Money Walker：非美元交叉盤點玩
1 :
GS(14)@2017-09-17 17:29:32多得歐央行收水憧憬推升歐元，美滙指數年初至今累計跌近一成，而喺美元大時代告終的同時，久違嘅環球貨幣戰已悄悄揭幕。以為美元走弱，買非美貨幣博升就實食冇黐牙，點知近排美國、歐元區及新西蘭嘅財金官員先後有意無意放鴿，用言論壓抑本國滙率升值，為非美貨幣前景增添變數。紐元兌美元就係好例子，筆者原先以為美元大勢已去之下，紐元兌美元有運行，不過新西蘭央行行長惠勒（Graeme Wheeler）早前話必須以弱紐元帶動通脹同增長，不過更重要嘅係當地9月下旬舉行嘅大選不確定性高，新西蘭加息預期經已大減，造成紐元兌美元最近一個半月顯著回吐。鑑於貨幣戰導致滙率走勢更為複雜，非美貨幣交叉盤某程度上較非美元貨幣兌美元/港元嘅直盤，有更多賺錢機會。大原則都係好景時博風險貨幣兌避險貨幣有得升，反之亦然。理論上仍處加息周期初期，又或有收水憧憬支持嘅非美風險貨幣，例如加元、澳元及歐元，中長期相較其他非美貨幣自然具有較大升值潛力；至於受政治不確定性困擾國家之貨幣，好似韓圜及紐元，中長期則傾向相對其他非美避險貨幣走弱。現時環球Risk on氣氛回復下，單睇技術走勢，澳元兌瑞郎似有蘊釀向上突破之勢，倘升穿0.771有望再上，值得留意；另加元兌日圓仍處阻力區，惟一旦突破91，則有機挑戰心理關口100。此外，如果金仔再有動作嚇窒全球，短炒避險交叉盤則可鎖定瑞郎兌韓圜。
El.
http://fb.com/moneywalkerhk本欄逢周三刊出
來源:
http://hk.apple.nextmedia.com/financeestate/art/20170913/20151479
Money Walker：美元短期偏強有因
1 :
GS(14)@2017-10-09 03:09:34美元上月初突然翻生，多項因素，包括美國稅改方案、下任聯儲局主席或屬鷹派人士，以及歐元受加泰羅尼亞獨立公投困擾等，都有份推升美元。筆者認為，後兩項因素可望支持美元短期繼續走強，但對美元中期能否持續強勢則有保留。加泰羅尼亞獨立公投有九成票數支持，西班牙採取強硬態度應對該區獨立，筆者相信事件會擾攘多時，歐元未來時間可能仍要受累西班牙政治不確定性，間接會對美元有支持。至於下任儲局主席幣策立場，如果由傳言獲提名嘅聯儲局前鷹派理事沃什（Kevin Warsh）掌舵儲局，加息步伐肯定會加快，但即使耶倫連任，相信未來加息步伐亦肯定有快冇慢，原因係耶倫早前突然放鷹。耶倫9月底曾表示，組成儲局基本經濟預測嘅重要假設可能有誤，儲局或誤判就業市場強勁程度及長期通脹預期，因而導致貨幣政策前景較之前預期寬鬆。上述言論似乎暗示，儲局可能會加快加息步伐，趁經濟尚好時加息，為未來衰退時減息預留空間。至於美國稅改，對美元支持作用則相信唔會持續太耐，事關現有稅改方案有肥上瘦下成份，未必咁易順利通過。不過現方案應該仍有修改空間，除非稅改未來真係完全零進展，否則對美元拖累程度唔會太嚴重。無論如何，筆者傾向相信美元數周內會繼續呈強，技術上美匯指數亦已經做咗個圓底，嚟緊能否突破兼企穩94係關鍵，中期則仍要觀察稅改進展，以及儲局下任主席會否爆冷，由耶倫及沃什以外人士擔任。
El.
fb.com/moneywalkerhk本欄逢周三刊出
來源:
http://hk.apple.nextmedia.com/financeestate/art/20171004/20172405
Money Walker：縮表真的利樓市？
1 :
GS(14)@2017-10-09 04:02:44施永青近排對樓市嘅睇法引起熱議，佢稱唔同意縮表令樓價下跌，因為當儲局減持債券令債價下跌，其他資金會離開債市並轉投股樓，而資金流入樓市將足以抵消加息拖累。上述C觀點被指牽強，因不論量寬或縮表，施老闆都睇好樓市。講真，唔少債券投資者都屬機構投資者，喺投資選工具上有限制，例如債券基金就冇可能因債價下跌而沽晒啲債all in港樓。而且物業性質上唔係債券嘅良好代替品。首先，買賣債券遠較物業方便；其次，債券不涉維修保養，管理成本遠低於物業；第三，唔少人投資債券只為控制整體投資組合風險，故債價下跌亦唔見得會轉投物業。講升值往績港樓無疑勁過債券，筆者唔排除少數投資者會如施永青所推測般，以投資物業代替債券，但相信唔會係大勢，更不足以抵消加息影響。至於資金由債轉股，則相較由債轉樓合理，因好多基金都同時投資股債，所以股債比重於縮表後有調節唔出奇，金融市場亦有所謂股債大輪轉（Great Rotation）之說，意指資金大規模離開債市並流入股市。但現實係市場雖由2013年起憧憬股債大輪轉，但鑑於環球通脹乏力，各國央行始終欠條件大幅加息，債價持續有支持下，股債大輪轉一直未見影。筆者相信喺資金由債轉股前，施老闆憧憬嘅由債轉樓都難以出現。與其話縮表利好樓市，話大陸暫未阻截內地走資來港，所以港樓仍有北水支持，似乎更站得住腳。
El.
http://fb.com/moneywalkerhk本欄逢周三刊出
來源:
http://hk.apple.nextmedia.com/financeestate/art/20170927/20165492
Next Page