金手指：真港獨如箭在弦？
1 :
GS(14)@2017-03-22 00:46:13由成個政治局常委數落，都用洪荒之力推林鄭月娥，真與否，佢哋起碼交足戲。不過如果下周日係普選，三候選人中，曾俊華贏硬。我哋點解揀支持曾俊華？除咗可打消移民念頭外，因知你中央冇藉口reject佢。有管治經驗、叫香港人接受八三一、連廿三條都肯推，你中央都reject呢個選擇？即係同香港人完全冇彎轉。用軍靴踩住普通人嘅喉嚨，預咗。不過，有如蠻族洗劫羅馬般，連香港嘅權貴都要一樣被奚落。李嘉誠都已搵咗做人大代表嘅李澤鉅，交足功課咁提名，居然都唔覺夠，係都要搵埋李澤楷出來。連一路挺現制嘅人，留一步都唔畀。問題係，香港集體EQ更高，都有頂你唔順之日。士可殺，不可辱，你勒得住啲要繼續搵食嘅人，不過點對付百萬計上咗岸嗰啲？我哋錫命，唔等於唔識同你玩。如果要死，相信可外判畀大把其他地方嘅人，結合我哋提供可敵國嘅財力同宇宙級人脈網絡，真係煩到你暈。呢個潘多拉盒子，得番千二人㩒得實唔打開。之前啲港獨派超業餘，禮拜日後嗰啲？You ain't seen nothin' yet。當然，我幻想呢場係場精心大龍鳳。中央為我哋上齣「畀面記」，特登撐個死士，仲要係根據佢哋寫嘅《基本法》方法，暗票射低咗，一鋪贏番晒港人對一國兩制嘅信心，港獨之念深埋黃土。而「代價」就係一個撐八三一、推廿三條嘅特首。呢場博弈，唔通就係豪賭千二香港權貴，有冇pride嘅底線？呢刻，似瞓身買咗金多寶，待開，畀我發吓夢吧。孫柏文獨立股評人
http://www.fb.com/shuen本欄逢周二刊出
來源:
http://hk.apple.nextmedia.com/financeestate/art/20170321/19964665
金手指：港府財政撞機成因
1 :
GS(14)@2017-04-12 22:40:07禮拜一，孫柏文睇到陳茂波司長用公帑推出老人「終身年金計劃」，令我覺得特區政府官員好似嗰啲撞機嘅飛機師，因撞機好多時都係因為機師依賴失靈嘅導航系統。當年，政府推出「貧窮線」，線下增長最快一群，就係老人。我喺獅子山學會教啲intern時，會問佢哋：「一個擁有值五百萬自住物業，同有現金五百萬嘅老夫婦，算唔算係貧窮？」佢哋反白眼都未答，我就會話：「自住物業，冇現金回報。而攞五百萬做定期存款，當佢好叻有一厘，每月收入喺貧窮線下。呢對夫婦，喺政府眼中係貧窮，因貧窮線只計收入。」唔難想像，政府推呢個計劃係跟住貧窮線嘅導航而制定。而我教嘅intern中，啲填鴨式教育尖子會覺呢個計劃好合「邏輯」。不過最大問題係，啲intern一聽完我嗰兩句說話，個個都話：「This line doesn't make sense！」香港左膠唔合常理，貧窮線就係最佳例子。就算大家都開始醒覺，工黨上次選舉近乎全軍覆沒，我都要讚，佢哋好叻騎劫政策制定，又勝一仗。政府喺呢刻推，唔知係TSA咁，定係候任特首林鄭月娥已贊成，不過靠失靈導航系統飛，撞硬。點撞？推政策嘅核心，特別喺香港，就係如何增加legitimacy，等喺冇選舉嘅情況下啲人唔造反。香港兩大撕裂，就係中港矛盾同老嫩敵對，呢個計劃只會令後者惡化。想知我有冇睇錯，橫掂啲工黨前議員喺外面冇求生能力，不如林鄭搵吓李卓仁、何秀蘭等入政府度政策，睇吓支持率升定跌？孫柏文獨立股評人
http://www.fb.com/shuen本欄逢周二刊出
來源:
http://hk.apple.nextmedia.com/financeestate/art/20170411/19986308
【Touch ID危機】「金手指」指紋 研究：破解率可達65%
1 :
GS(14)@2017-04-22 10:44:29有傳聞指，即將推出的iPhone8（暫名）會因移除Home鍵，而將Touch ID移走，雖然未知消息是否屬實，但如果Apple看過最近刊登於學術期刊《IEEE Transactions on Information Forensics and Security》，一則有關指紋的研究，相信當初帶頭發展指紋系統的Apple亦會有所擔心。紐約大學（New York University）和密西根州立大學（Michigan State University）今月發表研究指，學者透過分析大量指紋，製作出一種名為「MasterPrint」的程式，可破解生物識別系統。其實「MasterPrint」的概念就好像黑客，試圖使用一個常用密碼，去破解系統一樣，例如如果用「1234」登入，有4%的機會可以成功登入。研究人員收集了8,200套指紋進行分析，透過軟件發現有800套指紋可以作為「MasterPrint」的藍本，如果假設系統容許有最多五次的嘗試登入，「MasterPrint」可破解26%至65%的用戶，而破解率受用戶儲存的指紋數目所影響，故「MasterPrint」亦存在漏洞。研究人員指，如果手機用戶儲存的指紋越多，「MasterPrint」的破解率就越低。但隨著指紋識別器越來越小，必須提升識別器的分辨度，方可記錄更多的指紋特徵，讓「MasterPrint」的破解率降低。資料來源︰
Roy, A., Memon, N.,& Ross, A.(2017). MasterPrint: Exploring the Vulnerability of Partial Fingerprint-based Authentication Systems. IEEE Transactions on Information Forensics and Security.記者︰盧逸文2017果籽繼續認真知味。識買惜用。行以求知。好事多為。重修舊好。緊貼果籽報道，即like：
http://fb.me/AS.AppleDaily
緊貼「蘋果VR」熱潮，打開雙眼隨意門，讓「蘋果VR」陪您探索新世界：
https://goo.gl/b5RQAB「蘋果VR」App
App store下載：
https://goo.gl/0kW2cK
Google Play下載：
https://goo.gl/4K7EHw
來源:
http://hk.apple.nextmedia.com/su ... t/20170421/19996255
金手指：彩星斬纜定加注？
1 :
GS(14)@2017-05-18 02:06:01孫柏文舊年尾同今年初叫大家不問價追嘅彩星玩具（869），早前發盈警。第一季按年收入由3億變1億，盈利就7,000萬變近乎零。當時我叫買嘅原因，係彩星玩具喺今年初有隻「百獸王Voltron」新玩具。當時因為股價未反映，而忍者龜熱潮玩完，加埋個無敵資產負債表，股價超抵要買。當然，佢哋第一季提供嘅數據真係好驚嚇。而我同高明亦會喺禮拜四去佢哋嘅股東會，去完將會喺我FB同下周專欄再作定論。睇吓到時要唔要叫大家斬纜，或者加注。外滙市場亦有兩單要留意嘅事。第一，就係三月尾我喺網上拍片叫大家買英鎊嘅理由，即淡倉破記錄，待夾爆，喺英鎊近排升浪下，已出現大量平倉。最新淡倉量，已經返去脫歐公投前。如仲有英鎊好倉，應該平啲。另外，就係兩周前叫大家「一注獨贏沽加幣」後，估唔到全球《蘋果》讀者都萬眾一心，最新加幣嘅淡倉量急升下，已破歷史記錄。你可能問，咁係咪即加幣要升？唔係，加拿大樓價升到歷史高位，正爆破中，加幣淡倉量將會越沽越有。加幣有排跌，靜觀佢哋嘅政府點對付來緊一浪又一浪嘅金融機構出事潮。最後，我度緊網上新嘅賽馬結果節目，諗住搵贊助。咁上周三晚見邦民日本財務喺馬場出面派筆，我就喺FB問有冇人識嗰邊啲人。周末嘅時候，有個我問極都唔肯交代佢係乜水，淨係重複話自己係邦民裏small potato嘅人，不斷發短訊叫我刪post，咁unprofessional嘅做嘢方法，你邦民搞乜呀？係咪有人扮係你嘅人？
孫柏文獨立股評人
http://www.fb.com/shuen本欄逢周二刊出
來源:
http://hk.apple.nextmedia.com/financeestate/art/20170516/20022488
金手指：一定要睇《20:16》
1 :
GS(14)@2017-06-10 12:39:18Managing decline。早排孫柏文睇咗《20:16》（讀二十比十六）呢齣戲。大約講葉氏化工（408）創辦人葉志成年輕時嘅經歷。呢齣戲，我可以話每個仲記得英治香港年代嘅人，不但自己要睇，仲有責任帶下一代睇。除咗好顛覆咁笑現今大陸人，最重要係戲中偷渡嗰part。我作為個年近四十嘅香港人，一向都知游水嗰part有幾難同有幾危險，不過要睇呢齣戲，先知原來未跳落水，淨係由鄉下行去岸邊嗰段都咁難。而電影中，主角仲要話成個偷渡過程，最難其實係喺香港登陸後最尾嗰幾百米蠔田。因行嗰幾百米腳傷嘅嚴重性，引至嘅疤痕，係可以之後見工時攞出來畀個做HR嘅面試官睇，成功說服佢主角嘅鬥心。最震撼嘅地方，就係我有同過葉志成傾過戲中嘅事，真係睇佢其實同喺茶樓坐喺隔籬嘅叔叔無異，講嘢斯斯文文。呢個經歷係common，不過每一次都係special。1945年香港人口50萬，1980年500萬，35年升十倍，當中好多係偷渡來。不過，喺偷渡過程失敗死去嘅人，又幾多？100萬？200萬？有冇人知？死唔去嘅，心中團火會燒得幾熱？殖民時代嘅香港，係人類歷史中罕見嘅意外，其中就係因呢啲最終極嘅人才甄別系統。我哋大家做唔番之前嘅水準、感覺，都應該預咗，唔好留戀。最美麗嘅意外，最神奇嘅奇蹟，呢個就係97年前嘅香港。
孫柏文獨立股評人
http://www.fb.com/shuen本欄逢周二刊出
97年主權移交至今，香港前進還是倒退？「蘋果」與你細數廿載風雨。【回歸二十年】專頁：
http://hksar20.appledaily.com.hk
來源:
http://hk.apple.nextmedia.com/financeestate/art/20170606/20045416
金手指：息口加到你唔信
1 :
GS(14)@2017-07-05 03:41:01上周中，花旗國銀行監管機構宣佈最新一輪壓力測試下，所有大銀行都通過。市場直覺係可以任派息，令銀行股升，帶動連滙控（005）都升咗轉。聯儲局主席耶倫，又係喺上周中，忽然話佢相信有生之年「唔會再有金融危機」。挑戰命數，仿如鐵達尼被評為unsinkable般唔信邪。點都好，孫柏文當然唔信，亦唔信你哋作為我多年嘅粉絲，會信個底花到有佢哋咁花嘅判斷。不過，今日要分享呢兩單新聞，係因為對政策預測非常有用。雖然有啲似個千度近視四眼仔喺盲人世界般，不過大家要承認，喺眾多中央銀行中，聯儲局係全球最收緊嗰個。問題係，點解美滙指數對上半年咁弱？首先，美滙指數一半比重係歐元，歐元之前跌到落去反映歐元、甚至歐盟會即死嘅可能。咁只要死亡日延遲，歐元都要彈，令美滙指數受壓。不過更緊要嘅係，美國雖加息，不過冇因信聯儲局夠吉士真係大力加，起碼債市信佢哋加加吓要停甚至減。點解？因為短息越加，長息係咁落，令長短息差大幅收窄，即賭佢好快加完。點知，就係喺上周中嗰兩件事後，美長債息突飆。連我偶像Gundlach都喺周五話要睇實升穿200日平均線嘅十年債息，下個關鍵位係2.32厘。而穿的話，長息就有望去3厘。如果真係咁，聯儲局有望每兩個月收緊一次嘅步伐，今年、出年、大後年，即至金融危機再臨。呢個係現在冇人信，不過到真係發生時，耶倫都可能已byebye。孫柏文獨立股評人
http://www.fb.com/shuen本欄逢周二刊出
來源:
http://hk.apple.nextmedia.com/financeestate/art/20170704/20077797
金手指：港交所＄300在望
1 :
GS(14)@2017-08-02 06:12:37兩周前，孫柏文喺本欄寫咗篇題為「小時代，焗買股」嘅文。今日，我正式宣佈「小時代」變「大時代」了。憑數據，股市貴，外圍又係好貴，全世界都好貴。大冧市，如箭在弦。不過，每次大冧市前，喺全球股市到了最危險的時侯，每個股民被迫發出最後的吼聲，起來，起來，起來！我們萬眾一心，冒著貴價的炮火，前進！冒著冧市的炮火，港股，大股，前進，進！點解？因為全球有錢階級，都覺香港銀行系統係全球最穩健。所以喺外國開始缺水時，一定要最後湧港，令港股進入大時代。2007年係咁，2015年都係。耶倫畀人嘅感覺係轉咗軚，到9月落實縮表後，將會大插插，不過，8月冇理由唔炒鑊甘。Oh yeah！兩周前，我話過只買大價股，當時話過買咗五隻，分別係騰訊（700）、港交所（388）、瑞聲（2018）、惠理（806）、鴻騰（6088）。喺對上兩周，我都喺我嘅FB相繼宣佈沽貨，?家只係得騰訊同港交所。如果你要揀，就不如齋買港交所。因如果大時代，就會喺數周後見300蚊。仲要一係唔郁，一郁就每日廿蚊、廿蚊咁升。渾水話，港交所網站點擊率創新高，不過大家都見唔到成交額有咩大突破。即街邊實在有太多人只睇不買，呢批人將會數日後被貪婪焚身，佢哋一衝，買咗港交所嘅人想窮都難。各位股民，前進，進！當然，我聞到炒錯，就會即沽。留意我FB，我會同大家講我幾時沽。孫柏文獨立股評人
http://www.fb.com/shuen本欄逢周二刊出
來源:
http://hk.apple.nextmedia.com/financeestate/art/20170801/20107503
金手指：管ICO庸人自擾
1 :
GS(14)@2017-09-17 16:35:57啲睇淡日本嘅人（包括孫柏文），講到日本步向滅亡嘅證據，其中一個最鍾意用嘅數字，就係幾年前日本成人尿片嘅銷售量，超過咗兒童尿片。咁嘅數字，so what？要着成人尿片，即係腦已退化到連屎尿都控制唔到。當個腦係咁，又點返工生產呢？點交稅去還國債？還唔到？佢哋印銀紙去玩咪得囉！唔知係咪好多人都係咁諗，所以呢期喺日本啲以比特幣為首嘅電子貨幣非常搶手。甚至全世界都好搶手，喺大陸直情好賣到被禁。當然，呢啲電子貨幣冇成本，你鍾意聽日都可以整隻。就係因為咁，世界忽然湧現幾廿百隻。而當隻新貨幣登場，佢哋就要做個Initial Coin Offering（ICO），招幣買家。唔知係咪英文簡稱係I乜O，證監就話「可能係投資」，所以要管！咁我又真係想知，點解係投資呢？如果有國家政府有新貨幣，來香港吸引人去買，係咪要問過證監呢？當然唔使啦。原因係貨幣本身係冇回報。要成為投資，要嗰樣嘢有息、有租金收入等。齋因啲嘢嘅價升，就要管，證監上下幾千人真係開心死。當然，如果港交所（388）他朝有間公司上市，股價係用比特幣計價，呢間公司嘅股票就要管。不過算啦，香港有資產嘅人，賭乜輸咗都一定會去證監示威博政府賠。就係因為有人咁樣，證監又越多budget請人，所以香港人人被假設腦退化，要着尿片兼鎖上床。香港人喺林鄭呢十年嘅座右銘將會係「這些機會不會屬於我們的」，看吧。
孫柏文獨立股評人
http://www.fb.com/shuen本欄逢周二刊出
來源:
http://hk.apple.nextmedia.com/financeestate/art/20170912/20150200
金手指：英國佬係勁啲？
1 :
GS(14)@2017-10-09 03:12:22啱啱嘅周末，加泰羅尼亞嘅新聞喺香港FB都不斷有人post。冇辦法，獨立公投喎，跟住啲差佬衝入人群入面打到啲和平示威者頭破血流。如果唔係南歐人種，真係仲估巴塞隆納喺旺角。不過講真，今次馬德里打巴塞絕對易明，因馬德里中央政權極度依賴加泰羅尼亞嘅稅收。如果加泰羅尼亞獨立，跟住因周末發生嘅「和平被揼」事件，宣佈話馬德里政權之前累積嘅國債唔關加泰事，除非歐央行又再話做Whatever it takes，啲人就會拋售西班牙國債，令債息爆升。所以，啲中央政權要滅啲地區獨立慾望係好易明白。問題係，前大國崛起case study嘅西班牙政壇，喺周末做嘅事，唔似現代大國崛起嘅中國咩？即係強力打壓，弄巧反拙。因投票結果係近9成支持獨立。之前喺《每日電訊報》，英國政客Dan Hannan就攞咗倫敦政權點樣對付蘇格蘭獨立運動，去批評馬德里政權。由「你鍾意公投就公投啦，我哋會尊重結果」，到各路人馬真心落區去遊說，倫敦中央政權冇失過道德高地。結果係咩？冇獨立，蘇格蘭人兼全世界心服口服。所以呢啲嘢，英國佬最勁真係冇得賴。又或者咁講，鄧小平之下嘅北京都有咁嘅能力，不過家陣喺香港吹緊嘅民意風，又證明北京能力水平有幾高囉。孫柏文獨立股評人
fb.com/shuen本欄逢周二刊出
來源:
http://hk.apple.nextmedia.com/financeestate/art/20171003/20171410
Next Page