金手指：手機已經PC化？
1 :
GS(14)@2017-10-09 03:57:54九月初，蘋果宣佈啲新手機。點知，除咗一向會謾罵嘅毒男外，連啲用開蘋果嘅人都打晒喊露。到上周，蘋果新機開售，各地保安都嚴陣以待，鐵馬陣遍全球。點知，真係小貓三四隻，好陰功，好似啲Android機上場咁。點都好，啲手機外型，其實真係十年冇變過。只係拉長吓，將啲掣郁少少。當然，過去十年，已證明個樣冇變，唔等於唔會越來越賣得。講真，座枱電腦個樣都幾廿年冇變，都一樣增長神速好多年。不過，聽啲蘋果fan屎中堅，就話要等iPhone X。我唔同意，當今最多人用電腦嘅原因，大家留意吓自己習慣，會用啲咩apps。Whatsapp、FB、Wechat等，要用嘅手機power要幾多？啲毒男最鍾意講嘅鏡頭解像度，我就想問，影相係攞來share。Whatsapp、IG、FB等，全部都會將解像度大幅降低，咁買部再勁嘅手機為乜？所以，手機睇落已開始似啲座枱PC，即舊電腦已handle到絕大部份嘅用途。咁手機增長速度永遠放慢，零件股仲唔出事？例如，最大鑊就係舜宇（2382）同瑞聲（2018）嘅股價非常之貴。升到呢個位，基本上預期每次都係iPhone6咁增長，應該有排跌。我禮拜二都會兩隻開put。就睇吓iOS11強制update時，焗唔焗到啲人出來換機了。
孫柏文獨立股評人
http://www.fb.com/shuen本欄逢周二刊出
來源:
http://hk.apple.nextmedia.com/financeestate/art/20170926/20164533
金手指：林鄭「冇料到」好嘢
1 :
GS(14)@2017-10-22 16:36:19孫柏文今次一定要讚特首林鄭月娥。真．激讚！點解？理由當然係特首林鄭嘅第一份施政報告。大家可能問：「份嘢，好似冇乜料到咁喎？」等我慢慢解釋。相信眾fan屎同我一樣，喺特首選舉嘅時候，都係撐曾俊華司長。我撐嘅理由，就係睇政績，曾司長睇落似唯一一個明點樣將香港最深層次嘅矛盾化解。最似能承繼英國人嘅管治功力。相信殖民地管治方針中，最多人記得嘅就一定係「積極不干預」。好多填鴨式教育精英，仲估呢個方針，係用來推高經濟。其實，「政府」嘅核心，就係社會中唯一能「強迫」人嘅機構。即係每個動作，都會使用「強迫」力。英國人明白，當個政權冇民意授權、認受，每次強迫市民，就會危害本身嘅政權穩健。因市民嘅反彈，冇安全排洩口。所以多唔使講，淨係見呢份施政報告居然令HK01班記者，剝去佢哋「不偏不倚」嘅糖衣，寫咗篇用「冇料到」三個字可以總結嘅文，就知，今次林鄭特首就好嘢。當然，我對施政報告嘅政策好不滿，不過林鄭之前好成功控制我嘅預期，所以今次超預期，一定激讚。更慶幸嘅係，林鄭特首同佢兩位前任一樣，仔女都能逃離本地教育魔爪，香港下一代管治班子有希望。最後，上周我篇題為「舊經濟武士復仇」嘅文中，應承過大家會分享一間諗住會因數碼科技而滅亡嘅工業，點知出現見底死唔去兼上升嘅迹象。究竟係乜？我只可以話，同當年本報社長同我講過話佢去北歐見諾基亞有關。不過今日字數有限，順延一周見。孫柏文 獨立股評人
http://fb.com/shuen本欄逢周二刊出
來源:
http://hk.apple.nextmedia.com/financeestate/art/20171017/20185693
金手指：點解瞓身抽閱文？
1 :
GS(14)@2017-11-05 15:43:52經過咗好長久、好折騰嘅思考，喺剛過嘅周末，孫柏文決定借爆瞓身抽閱文（772）。你可能話：「折乜叉騰呀？唔好話牛頭角順嫂，連佢運動會踩單車嘅鄰居都分分鐘瞓身啦！」係。我同意。大家瞌埋眼瞓身抽呢隻嘅原因，都係覺得係個（唔借錢的話）冇成本嘅大抽獎。入紙後開結果時，有就有，冇就冇。而我，今日只係想分享內心嘅掙扎。最初，我同大家一樣，都係諗住大抽獎。作為一個97年開始炒股嘅人，見過「北控（392）失控」、得個under construction網站嘅「湯得金」、「賊中賊」等等，冇理由唔入紙抽咗先，跟住得閒的話，望吓招股書。不過，人老咗，真係開始諗，亦開始問吓周圍啲人點睇。我發覺好多我好欣賞嘅炒家、投資者，都清一色唔抽，包括「小炒王」、「皮蛋王」、「玩輪員」、「老炒家」等。齋睇咁嘅唔抽陣容，我第一個反應都係唔想抽。不過佢哋唔抽嘅原因，係因佢哋覺得完全冇值博率。雖然佢哋總體都覺閱文上市嗰日會升，但如果抽就要瞓身，如果唔係配額一定唔夠食。而就算瞓身，都未必畀得多你。最後，就係筆錢鎖死成個禮拜，機會成本太高了。不過就係最後呢個因素，我決定瞓身抽。睇特朗普個twitter，喺閱文上市前，可能會宣佈聯儲局主席耶倫繼任人。一旦搵個鷹派做，美股，特別係科技股會勁插插。喺咁嘅情況，有樣嘢會鎖死我啲錢，等我唔好手痕，最後可能分幾手應該必升嘅新股，都唔係壞事。孫柏文獨立股評人
http://fb.com/shuen本欄逢周二刊出
來源:
https://hk.finance.appledaily.co ... e/20171031/20200019
金手指：英國樓現在不能買
1 :
GS(14)@2017-12-04 23:47:16睇題，大家一定估孫柏文講緊脫歐、英鎊走勢、人口變遷等等。如果你咁諗，就錯晒。今年年中，倫敦有棟公屋叫Grenfell Tower發生咗一場大火，燒死80人。出事原因，係貼喺兼包圍外牆嘅保溫物料原來超易燃，當四樓一個單位嘅電器着火時，全棟大廈被焚毀。之後，英國政府推出一系列措施。首先，英國政府即刻急急腳驗七種之前話「達標」嘅保溫物料，發現六隻肥佬。咁公屋、私樓，原來好多都有用。亦因呢個情況，其中一個新措施，就係硬性要求每棟有用肥佬物料嘅高層大廈，要每日廿四小時，請啲人行行企企，睇實棟大廈有冇着火。原本冇人看守嘅大堂，忽然有個着螢光衣嘅人喺到，出緊平均100蚊港紙粒鐘嘅糧。而走火政策，亦又「Stay Put留喺到」變成「Simultaneous Evacuation合家即走」。因政策只推出一兩個月，好多管理公司未趕得切調升管理費。不過睇上周第一浪嘅加幅，一加就倍加。仲有，業主最後仲要幫外牆換物料。唔好話使費大力打擊租金回報，一旦冇換，你放租，遇火警，淨係場火燒爛租客啲嘢，你都可被告。喺英國得三層嘅樓或屋，可以諗。不過多層一定要喺情況明朗前避之則吉。有貨，建議即沽。孫柏文獨立股評人
http://fb.com/shuen本欄逢周二刊出
來源:
https://hk.finance.appledaily.co ... e/20171128/20228249
金手指 ：談李兆富與葉劉
1 :
GS(14)@2017-12-18 03:59:57對上個禮拜，葉劉淑儀同朋友李兆富個show，真係好睇。古惑仔都係挑差佬機，淨係發夢有人連差佬嘅老細，即保安局局長都唔怕，嗰吓勁！講型，陳浩南都要輸畀李兆富！不過葉劉本人，因不斷提我有份做董事嘅「獅子山學會」。所以上個禮拜我哋董事局都有傾呢單嘢。不過因李兆富2011年老早離開咗個會，我哋又冇同佢傾偈，唔知佢生意上啲嘢，所以董事局都唔使點傾。香港得一個永遠唔淆底，因永遠唔攞政府錢嘅機構，就係得我哋獅子山學會。我哋由始至終，覺得政府run嘢會好嘥。曾佔香港零售空間百分之十嘅公屋街市、商場，如果仲喺政府手，run到pat屎咁，對得住公屋居民咩？每次係啲論壇講領展（823），我聽嗰啲講到私有化前世界幾美好時。我就諗，佢哋呢啲由頭到腳都中產味濃嘅人，當年有冇落過嗰啲場？多唔好講，淨係去公屋商場廁所，嗰種溶爛、污糟。噚日睇本報講香港啲廣告公司同FB，我就真係覺得今次我哋嘥咗。一場風波，完全唔關獅子山學會事，不過就係咁loop住我哋個名。哎，如果有陶傑、田北俊、《100毛》抽水嘅能力，推政策畀市民都易好多啦！真係好可惜。為釋放更多被政府控制嘅嘢，因私有化用得更好，我哋呢個抽水力弱嘅問題，就真係要檢討。孫柏文獨立股評人
http://fb.com/shuen本欄逢周二刊出
來源:
https://hk.finance.appledaily.co ... e/20171212/20242296
金手指 ：Bitcoin應值零？
1 :
GS(14)@2018-01-08 00:28:47對上連續幾日，見David Webb先話Bitcoin係龐氏騙局，跟住就聖誕搞笑咁話佢都搞個WebbCoin。當然，如果話Bitcoin係龐氏騙局，即係佢覺得Bitcoin價值等於零。雖然佢個網站冇留言功能，不過我可以想像有幾多Bitcoin好友會話佢「大叔好懶，做多啲功課啦！」又或者係咁笑佢做「明燈」等。起碼孫柏文今年年中post過段片，解釋點解我打死唔買Bitcoin，下面啲留言係咁講。不過Webb講科技，唔係第一次揩嘢。當年有隻科技股，賣緊三十幾四十蚊股。佢就喺網站post文，話最多值12蚊股。仲話12蚊係畀多佢。點知隻嘢一年後賣到六、七十蚊股。科技股王呀！再過多半年試過見百六！明燈呀！做唔夠功課呀！嗰陣，我都仲係個學生，Webb已成為我偶像。不過我都手多，買過嗰隻股王。72蚊買，108沽。故事結局係點？禮拜一，隻嘢收4.59元一股，叫電訊盈科（008）。點都好，其實佢講Bitcoin兩篇文，我最有興趣係佢講WebbCoin同Bitcoin嘅分別。特別係對Blockchain嘅睇法。下篇，我想講吓香港已有百多年歷史用Blockchain追住段億計資產。新年再見！孫柏文獨立股評人
http://fb.com/shuen本欄逢周二刊出
來源:
https://hk.finance.appledaily.co ... e/20171219/20249453
金手指：令人振奮的日子
1 :
GS(14)@2018-02-13 03:04:06上個禮拜五，孫柏文喺倫敦一路睇實美國兩年、十年、三十年國債息率飆，一路睇住美股一吓一吓咁跌。作為一個過去十年，骨子裏覺得各國中央銀行嚴重扭曲價格訊號，喺資源分配過程嘅人。上周五嘅市況，實在是令我振奮的日子！因既有撥亂反正之感，又有炒作波幅嘅機會啊！點炒？周末拜讀《蘋果》投資版嘅專欄，曾淵倉博士話勁考大家嘅EQ。呢個我同意。我話最好將投資策略寫低，之後嚴格執行。咩策略？我嗰個好簡單。今次跌浪，係因花旗國長債息率升穿晒三十幾年來嘅下降軌。所以，首先要睇實該息率。如果維持，第二就係睇北水。張一鳴兄話就算我哋香港人，呢啲基本分析信徒，都只得維港咁多水，難鬥大陸太平洋般嘅流量。係。所以知道跌到落某個位，特別係啲技術支持位一定彈。咁咩位？禮拜一睇落好正，裂口低開八百，之後收市只跌三百。不過如果周一晚美股學周五再冧，北水頂得住？到時真係太平洋東西水流相剋啊！所以，周一臨收市我開咗沽倉買落，落到周末股榮兄所提過嘅50日平均線，恒指30500點附近，即回多千七點。中嘅成數幾高？唔知，不過我嘅策略係咁，亦都寫低。機械式執行。咁，就唔使考EQ啦！而下一步，將要落到去之後再睇。可能博一嘢大力嘅死貓彈完，再沽。孫柏文獨立股評人
http://fb.com/shuen本欄逢周二刊出
來源:
https://hk.finance.appledaily.co ... e/20180206/20296976
金手指：港交所如何見四百
1 :
GS(14)@2018-02-20 20:54:44上個禮拜一，恒指裂口低開800點後，因北水狂買，跌幅收窄至300點。孫柏文嗰日收市後「金手指」專欄，話喺臨收市前開put，第一站睇跌至50日平均線，即要跌多千七。篇文大約當晚八點喺《蘋果》即時新聞出，不出兩個鐘頭，已引來過萬點擊。好多人留言，例如「信你分析一成，全家瞓直！」結果？第日跌1,650點。留言區再冇新嘅謾罵。其實，我係可以寫得好圓滑，話「大市有機會向下整固」等。令少啲人鬧我。不過，《蘋果》叫得撰稿，我就一定要一句一句逆耳嘅忠言咁講。點都好，過幾日我喺FB post咗句「毋忘817」。同絕大多數人講2007年，都係記得「資金自由行、炒上三萬二」。叻啲，就會記得8月17日係「大奇蹟日」。其實，最要記得係817前數周嘅市況。2007年，恒指卒之升穿2000年萬八高位，7月尾見23500點。不出三周，跌近兩成。就係喺低位出現「大奇蹟日」。嗰日可V型反彈，係因有人知，一，聯儲局嗰晚會由加息周期，一吓忽然減息。二，之後個交易日有「資金自由行」。當年成手匯控（005）put輪嘅我，喺「大奇蹟日」學到最大嘅教訓，就係聯儲局同阿爺第一吓嘅出手，會彈到你唔信。所以，今次你如果學我買跌，記得記得記得，如聯儲局同阿爺忽然轉軚，要即平。因嗰吓升浪，連港交所（388）都可見四百。幾時？唔知，不過我put緊就會最驚呢樣。孫柏文獨立股評人
http://fb.com/shuen本欄逢周二刊出
來源:
https://hk.finance.appledaily.co ... e/20180213/20304204
Next Page