中環在線：年報當廢紙賣好過收息 李華華
2008-09-02 AppleDaily
散 戶坐艇唔好咁愁，應該積極面對，譬如諗計點樣搵番啲錢返嚟囉。喺香港討論區，網友tim10281028就諗到個「冇本賺錢必勝法」，就係將招股書同年報 賣畀廢紙回收商，家陣廢紙回收價咁高，回報都幾和味，佢話：「今日將啲年報、招股書、中期報告拎去賣，竟然賣到33蚊，真係好開心，買股票賺唔到錢，估唔 到要靠呢啲。」原來賣年報賺外快唔係新橋，好多網友都做緊，Maximilliano老早已咁做，佢話：「賣番餐飯食吓都好。」咁又係，33蚊可以食到餐 豐富嘅晏仔。
每斤賺1.3蚊
dj.eric插嘴：「回報仲多過派息o忝。」胸毛一人話：「家吓回收價好似係1.3蚊一斤，上 次賣嘅年報都收番14蚊。」不過，拎年報去賣，始終拋頭露面，唔係人人敢做，meli就係其中一個，「雖然輸緊錢，但死要面，怕醜唔敢賣。」 James007串嘴話：「股票仲有錢賺，毋須賤賣年報。」
中環在線： 蒙能跌兩成彤叔掌櫃告急 李華華
2008-09-02 AppleDaily
彤叔鄭裕彤持有嘅蒙古能源（276）再度告急，噚日蒙能股價急跌22%，仲攞埋20大股份跌幅之冠。計埋上個禮拜四、五嘅跌勢，蒙能股價短短三個交易日急挫37%，市值蒸發近200億。
彤叔掌櫃、蒙能主席魯連城一停止公佈增持蒙能，股價即刻腳軟，所以佢即時做嘢，噚日用咗1130萬銀，再度增持200萬股蒙能，仲嗱嗱臨公告天下。
主僕齊出手
話 說8月27號嗰次入市，佢都第二日先出通告，噚日佢即日入市，即日出通告，仲係黃昏六點零五分就上到港交所個網站，咁趕，唔知係咪驚今日再跌過，所以早啲 提醒大家，有掌櫃撐住，大家今日唔好亂掟貨呢。魯連城由上個月19號至噚日，多次入市掃蒙能，合共增持1629.6萬股，使咗差唔多9000萬銀。掌櫃力 托都咪話冇用，話說蒙能喺8月中慘遭洗倉，8月18號股價急跌28%，得番3.5蚊，19號嗰日再跌，淨番3.1銀，當時市場傳出彤叔為撐蒙能，急 call好友入市，當然彤叔自己亦有親自出手，佢喺19號就以635萬銀，掃入200萬股蒙能，而魯掌櫃更連續幾日增持蒙能，將蒙能股價由低位三個幾，托 起反彈超過一倍，到上個禮拜三嘅8.95蚊。
賬面唔使輸
魯掌櫃入市撐蒙能，雖然使咗唔少錢，但由19號到家，蒙能由3.1蚊，升返到噚日5.65蚊，魯掌櫃賬面暫時睇落未使輸住，仲有大把本錢繼續再托股價！李華華電郵：
[email protected]
中環在線：李家誠先接棒美麗華 李華華
2008-09-03 AppleDaily
講開又講，噚日美麗華酒店（071）股東會，四叔俾記者捉住問港股走勢，至於本來嘅主角美麗華，就留番二公子李家誠負責。四叔話，家陣美麗華係由董事總經理李家誠打骰，等佢親自解畫喎。睇嚟四叔想畀多啲機會二少發揮，吸收經驗為日後接棒鋪路。
改名唔係想分拆
李 家誠被問到，點解將美麗華酒店改名為「The Mira」，二少解釋，係為咗配合酒店翻新後嘅新形象，加強新品牌嘅發展，並非想淡化家族色彩，或者將酒店分拆上市。佢仲話，家陣美麗華仲翻新緊，要明年 先完工，雖然翻新工程仲未完全搞掂，但酒店嘅房租每間平均加咗六嚿水，嚟緊仲有上升空間喎。美麗華酒店由楊志雲創辦，佢85年過身後，酒店股權引嚟大批富 豪爭奪，當中包括長實（001）及中信泰富（267），後尾楊志雲家族揀咗四叔入股，因為信四叔唔會將美麗華拆骨斬件。
中環在線：彤叔乖孫米蘭「獵艷」 李華華
彤叔乖孫、新世界百貨（825）執董鄭志剛（Adrian）下個禮拜會飛去意大利睇名牌。金牌運動員啱啱先嚟香港掃名牌，華華心諗，做得香港富豪第三代，要掃名牌梗係去米蘭啦，吓嘩！
香港頭炮唔衰得
不 過問多句，原來Adrian飛意大利係為檔生意。因為尖沙嘴河內道發展項目個商場K11由Adrian擔大旗，雖然佢喺內地負責過一啲項目，但呢個 project話晒係佢喺香港嘅處男作，自然想有好表現。Adrian噚日向傳媒介紹佢呢個項目嘅發展大計，記招之後，呢位水造嘅男人連灌兩杯水，跟住先 同大家講嘢。原來佢諗頭多多，話要搵啲有生活品味嘅租戶，又話宣傳要搞藝術提高文化，目的都係希望將個場打造成「精品式商場」，所以下個禮拜咪親自飛去意 大利同潛在租客斟生意囉。咁親力親為，可以話係2字頭嘅人辦，難怪阿爺咁錫佢！之但係，精品式酒店就聽得多啫，精品式商場即係點？Adrian解釋，就係 商場嘅品牌要有「lifestyle concept」（生活品味概念）、要有生活態度，佢最希望搵到啲有創造力兼領導市場嘅品牌，仲要係香港未出現過嘅新品牌，咁先畀到人新鮮感，所以佢會同 嚟自意大利及法國嘅品牌代表傾吓……果然有要求噃！
精品商場要揀客
除咗租戶要有態度、宣傳活動亦要有品味，一向鍾意藝術嘅 Adrian話，會安排本土藝術團體，喺個場度搞活動，實行將藝術融入購物文化咁話。咁高格調，怕唔怕同附近舊建築、購物點格格不入呢？佢就唔多擔心，話 新舊對照好吖，紐約都係咁。李華華電郵：
[email protected]
中環在線：股神自傳上網可預訂
2008-09-04 AppleDaily
股 神畢菲特親自授權嘅個人自傳《The Snowball：Warren Buffett and the Business of Life》呢個月29號就會公開發售，家陣網上書店亞馬遜已經開始接受預訂。呢本股神秘笈原價硬皮賣35蚊美金（273蚊港銀），網上預訂價66折，賣 23.1蚊美金（180.2蚊港銀），海外讀者訂購當然仲未計郵費。據外電報道，股神家陣都冇諗過為新書宣傳，連佢助手亦話，股神目前唔會接受有關呢本書 嘅訪問。
今秋最值得期待新書
不過，就算股神唔親自出嚟sell書，呢本股神秘笈亦唔憂賣，全球有咁多投資者想學佢老人家嘅價 值投資法，家陣佢授權出書，仲開放埋自己嘅檔案室畀作者搜集珍貴資料，點會吸引唔到投資者搶購呢？網友某k話好期待，「雖然家有好多本書講股神，不過唔 夠股神自己講自己咁傳神，不過如果有中文版的話會更好。」大隻金亦話：「就算冇折頭，35蚊美金都值。」不過，聽講股神對作者──大摩前保險分析員 Alice Schroeder唔係咁滿意，因為佢喺新書入面深入剖析咗股神嘅第一次婚姻。呢本被《華爾街日報》稱為「今秋最值得期待的書」由Bantam Dell出版，佢哋3年前以720萬美金（5616萬港銀）稿費高價投得，市場估計佢哋最少要賣出60萬至70萬本先有錢賺。
中環在線：華燊沈家燊冇得做董事
2008-09-04 AppleDaily
曾 經喺02年上過《福布斯》中國富豪榜，仲排到67位嘅華燊燃氣（8035）前主席沈家燊，家陣連公司董事都冇得做。話說，04年華燊燃氣被證監勒令停牌， 當時嘅報道話，華燊涉嫌造假數非法滙款，華燊當時出通告，話俾外管局指佢哋旗下內地子公司華燊燃氣（中國）涉及虛假利潤，已經收到2700幾萬罰款通知。 而當時香港證監會亦都關注華燊子公司嘅盈利究竟信唔信得過。
沈家燊亦都喺華燊停牌後冇幾耐辭咗主席同首席執行官個位。華燊停牌，一停就4年幾，噚日證監會 出新聞稿，話已經尋求法院頒令，唔畀沈家燊出任公司董事或者直接間接管理任何法團。至於限期係幾耐，就要視乎法庭決定。證監會懷疑有人偽造華燊截至04年 3月底止年度嘅賬目，誇大公司喺嗰段時間嘅資產值。而沈家燊係知情人士，甚至可能參與其中，總之就係作為一個管理人，但冇做好應盡嘅本份，維護股東利益， 所以就唔畀佢再管公司。沈家燊有冇得再做上市公司主席，對投資者都仲係其次，華燊繼續停牌先至大鑊，家陣華燊要等證監會批准先至可以復牌。今年5月華燊向 市場宣佈一項重組建議，家陣要等佢喺今個月底前向股東發出通函。華燊股東繼續望天打卦。
中環在線：六福黃偉常錫女多過仔 李華華
2008-09-04 AppleDaily
上市公司老闆委任仔女入董事局，吸收經驗為接棒鋪路好正常，六福（590）噚日發出通告，公佈委任集團行政總裁兼執董黃偉常嘅兩個仔女──黃浩龍同黃蘭詩做執董，兩人嘅董事袍金每年為5.5萬蚊。
細妹人工贏阿哥
黃 偉常嘅公子黃浩龍，今年31歲，早喺02年加入六福，佢現時係集團營運經理，主要負責六福嘅海外分店，公司新形象同新店嘅設計，都由佢一手打造，相信係希 望令公司年輕化，吸引多啲後生仔。家陣黃浩龍緊32.9萬銀年薪。黃蘭詩就喺黃浩龍細妹，今年28歲，喺楓葉國多倫多大學畢業，擁有商學士學位，亦係美 國註冊執業會計師。黃蘭詩06年加入六福，主要負責六福業務策略同市場推廣。華華唔知黃蘭詩係咪黃偉常細女，點解咁諗，因為零舍錫佢囉，黃蘭詩加入兩年幾 就升做六福執董，兼且人工又高過做咗六年嘅阿哥6萬蚊，一年收38.9萬。不過，做阿哥黃浩龍嘅應該唔會計較，一家人嘛。
中環在線：王建宙京奧見財路
2008-09-04 AppleDaily
中 移動（941）首次以新媒體嘅身份贊助北京奧運會，為大會提供電訊服務，作為董事長嘅王建宙當然有唔少難忘回憶，佢出席喺泰國曼谷舉行嘅ITU亞洲會議時 接受新華網訪問，就講咗唔少京奧感受。王建宙話出席京奧開幕時，最開心係見到現場觀眾即時用手機，將場內睇到嘅最新資訊同畫面，即時向外界發放，而進場嘅 各國體育代表，亦一邊行一邊用手機同親友分享呢個歷史時刻，呢啲都令王建宙留下深刻印象。據報道講，京奧開幕禮當晚，用中移動網絡嘅手機就有26萬部，每 小時通話次數就高達22萬次，有咁多人用中移動嘅網絡，奧運嘅大贏家除咗金牌運動員，應該都輪到中移動囉。
年輕人成新動力
王建宙亦有提到中移動嘅未來策略，佢話會針對年輕用家，因為呢班人正係手機網絡最熱衷嘅使用者，所以，中移動嘅新業務將會由佢哋推動，例如音樂下載。王建宙仲留意到，家吓年輕人用手機輸入漢字嘅速度，仲快過手寫o忝。
中環在線：周凱旋契仔唔撈TOM 李華華
2008-09-04 AppleDaily
TOM 集團（2383）王雷雷唔撈傳聞，噚日終於變成事實。TOM集團出通告話，王雷雷一次過辭去副主席同執董、TOM在線首席執行官兼董事，仲有唐碼易趣中國 董事等職務，原因通告冇講明，只係話為咗個人事業發展。華華搵TOM仔問吓，回應只係話王雷雷係為咗「實踐個人抱負，再創事業另一高峯」。
人事又變散戶擔心
TOM 仔起初由張承勷揸fit，到最新話事人楊國猛，過去幾年，數度易帥。次次都引起市場唔少揣測。遠嘅唔講，先講新鮮滾熱辣呢單，王雷雷係超人紅顏知己周凱旋 嘅契仔，呢次劈炮，究竟係契媽叫嘅，定係契仔意思，華華要收吓風。不過，王雷雷一向負責集團最搵錢嗰瓣業務──TOM在線。據電訊界嘅朋友講，TOM在線 曾經喺mobile彩信上，同新浪、搜狐、QQ等，爭市場佔有率。佢一走，對TOM都唔可以話冇影響。睇番呢幾年TOM集團嘅人事變動，都唔到投資者唔擔 心，首先負責做刁、投資銀行家出身嘅王兟先走，跟住，最叻管數嘅湯美娟又話要湊仔唔做，家陣連銀嘅王雷雷都唔撈，咁TOM仔仲有乜搞作呢？
曾戲稱大股東做老頭
講 番王雷雷，佢長駐北京，好少落嚟香港。前年佢接受《北京晨報》嘅一篇訪問，可以反映王雷雷都幾快人快語，當時篇報道係有關盛傳TOM在線買起新浪，王雷雷 被問到TOM董事會有乜建議時，佢居然答：「大股東都是老頭兒老太太們，不知道TOM做的彩信彩鈴是甚麼玩意，他們只跟我聊些做人道理。」佢講嘅大股東係 邊個？大家心照。李華華電郵：
[email protected]
中環在線：許榮茂賣樓全球搵買家 李華華
2008-09-05 AppleDaily
福布斯中國富豪許榮茂旗下嘅世茂房地產（813），早幾年推出上海濱江花園，搵影帝梁朝偉做代言人，哄動一時。噚日大陸《東方早報（上海）》報道，世房拎埋濱江花園最後一幢樓王「世茂5號」出嚟賣。唔知係咪大陸樓市麻麻哋，所以呢個盤將會嚟個全球路演搵買家。
新 盤喺浦東小陸家嘴，共有414個豪華公寓，建築面積由92至315平方米，網上列出咗參考價，每平方米7.5萬銀人仔，預售現場有記者見唔少客戶都係世茂 老業主，若然想參觀，先要預約同身份認證先得，唔係點顯得高貴！之不過就算全球搵買家，但美國次按問題拖累全球經濟，華華提議許榮茂，如果怕影響銷情，不 妨再搵梁朝偉出馬，加埋梁太劉嘉玲，夠晒號召力。
Next Page