ZKIZ Archives


遲到 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20140129/18608466

上課遲到、開會遲到,返工遲到等等等,每人都有經驗,左丁山就從未見過一個永不遲到之人,只係守時之人遲到少啲,習慣不守時之人永遠遲到而已。左丁山自問十分守時,但偶然都會遲到,原因不一而足,最常見嘅事就係坐在辦公室一朝都冇電話,但一到出門口赴約時就電話響起,仲話一定要講幾句嗰種,邊度會講幾句咁短暫呀,閒閒地俾人捉住講幾十句先至收線,於是又試遲到,都冇法子向對方解釋,於是依家左丁山硬起心腸,出門時若電話響起,一於懶理,奪門而出。
遲到嘅代價好大好大。某年有歐洲富六代家族掌舵人來港視察,一位有心人瑞典賓架G特意安排左丁山同嗰位富六代在香港會一樓私人房上午八時食早餐,講吓生意合作嘅可能性。唉吔,左丁山出門一時矇查查,叫的士行紅隧,之前又在屋企打多咗兩個電話,卒之唔好彩碰上繁忙時間大塞車,去到香港會已近八時半,左丁山趕到入房,只見富六代面無表情,賓架G勉強陪笑。
飲完杯伯爵茶,人地已經要去第二個節目,就係乘直升機環繞香港一圈,老早卜好時間,九點起飛,由左丁山做「導遊」,此係左丁山一生人(到目前為止)唯一一次坐直升機在香港九龍新界上空盤旋,當時見到嘅赤鱲角機場只係一個大地盤。二十分鐘後,直升機返回灣仔,富六代與左丁山講句多謝,握手而別,以後再冇搵左丁山講生意,賓架G後來打電話嚟媽叉左丁山遲到,令佢在富六代面前冇晒面子,枉費佢一番苦心安排,左丁山只能苦笑。
塞車並非遲到理由,只係證明咗遲到人事前冇思考,冇度好出門時間及防範塞車需時,或者係不重視約會、開會,令對方不悅(是故富六代以後都唔睬左丁山)。年輕求上進者宜注意及之。一月二十一日立法會房屋事務委員會開會,因出席人數不足八位法定人數,宣告流會,試睇吓啲議員遲到或不到嘅原因:交通原因(塞車、的士司機行錯路、錯過巴士、渡輪不配合)共4人;病(4人),出席電台節目(1人),在地區工作(3人),換咗iPhone睇唔慣時間(1人,呢個藉口幾有創意),在地區工作(3人),在立法會過夜瞓過龍(1人),其餘無篇幅盡錄,總之就係個人第一,立法會第二,納稅人無謂激氣咯。

PermaLink: https://articles.zkiz.com/?id=90494

Next Page

ZKIZ Archives @ 2019