敘利亞因有生化武器殺平民事件，令英美震怒，意欲動武，一時之間，中東戰雲密佈，但歐洲國家唔多支持轟炸敘利亞，英美人民厭戰心理濃厚，英國國會否決出兵，令奧巴馬唔敢郁手，轉軚向參眾兩院尋求支持。基於人道主義立場，美國可做世界警察，嚴懲以殘酷手段謀殺本國人民嘅敘利亞政府，但世界上大多數人得把口，破口大罵，口誅筆伐就得，真係動手動腳，有所行動呀，就等美國人打衝鋒先啦。一句講曬，西方國家係瓷器，惜身到極，又怕伊朗及伊斯蘭恐怖分子報復，睇落轟炸敘利亞之說，係一場虛驚箒，敘利亞政府可繼續閂埋門殺仔。
現實世界就是這麼殘酷的，容不下半點幻想，近日聽聞有人請求白宮過問教師講粗口之事，簡直笑死人無命賠，香港竟有如此天真之人，夏千福點回應？
呢日中午飯局上，我地講完敘利亞，忽有人講起美國會唔會幫住日本爭奪釣魚島，不惜與中國衝突？曾留學日本，娶日本老婆之貿易Ｃ話：「一定唔會，我每年有三四個月住在日本，日本係一個老化社會，老人院照顧老年人之服務員其實亦係較年輕長者，即係六十歲照顧八十歲，而年青人怕打仗到極，全無戰意，一旦打起仗上嚟，日本死得一兩萬青年，必定全國震動哀傷，邊個做首相都要下台。日本已是一個老人國，未來二三十年更加老化，只會退步不會進步，人口逐漸萎縮，一百年後都唔知點算，可以不理。」
貿易Ｃ講得咁肯定，皆因日本人生育率太低，新生人口不能抵銷老化/死亡人口之故。歐洲大國其實亦是如此，德國至今係歐洲經濟大國，亦同樣面對一個新生人口不足，長期人口總數萎縮嘅問題，德國聯邦政府已大力推廣生育，提供金錢誘因，但年青夫婦依然不為所動，奈何。愈是富裕國家，愈是生育率低，貧窮國家就生育率高，故此政府養老之擔挑幾乎半斷，二三十年後，香港亦是一樣，單是為老人提供公共醫療費用，每年恐怕會增加十億元以上（南華早報八月二十九日數字），終有一天，退休/非工作人士多過納稅人士，點算好？得一句說話：年青夫婦唔該盡嚇義務，生多幾名！
（按：「和黃負債」一文，言及和黃核數師為畢馬威，實大誤，見報之後，老友已急急來電指出錯誤，左丁山唔知點解會出錯，面都紅曬，跟住畢馬威媒體經理麥沛天及另一位讀者來郵指點。謹此道歉。） 