雲佩斯咒語 左丁山
http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20130824/18391910英超開鑼，二十支球會果然強弱分明，曼城先聲奪人，四比零贏紐卡素，大顯雄師本色，全隊人強馬壯，後備席上幾乎全部係國腳兼且年紀不大，正在當打之年，難怪立即被捧成今年爭冠大熱門。車路士贏侯城二比零，上半場頭三十分鐘直情係車路士進攻表演，但入咗兩球之後，全隊立即放慢，好適合以往摩連奴帶領之下，專食魚生粥嘅留力作風，留力跑長途爭冠軍，至於曼聯雖然大勝史雲斯四比一，但在雲佩斯首開紀錄之前，史雲斯其實並不輸蝕，為曼聯扯成均勢，但曼聯勝在有一個雲佩斯，個人射入兩球之外，曼聯入第二球全靠佢一個人牽制史雲斯四個後衛，令華倫西亞可輕鬆傳球俾韋碧克掃入。
講起雲佩斯，睇埋阿仙奴輸三比一俾阿士東維拉，凡係阿仙奴擁躉都嬲到唔識出聲。領隊雲格於上季前以賤價二千四百萬鎊賣咗雲佩斯俾大敵曼聯，等佢幫助曼聯上季攞冠軍，正是利人損己，笨到無倫，做足球領隊最緊要識得買賣球員，核心球員堅決不賣，再配搭有實力有朝氣之新人，先至可以講甚麼戰術，冇咗雲佩斯，阿仙奴一味識得橫傳短傳，禁區內無一位有把握嘅殺手，而且幾年來雲格一路唔理及忽視水皮龍門，紙紮中堅嘅防守問題，都唔知佢想點。
雲格想話出四千萬零一鎊撬走利物浦前鋒蘇亞雷斯，利物浦到目前為止，堅決唔制。利物浦班主叫做John Henry，係波士頓紅襪棒球隊（Boston Red Sox）嘅老闆，一定知道波士頓嘅痛苦歷史，就係美國體育界好出名嘅Curse of the Bambino。波士頓在1919/1920球季，將陣中一位主力球員Babe Ruth轉售俾紐約揚基隊，波士頓出售Ruth之前，贏咗五次World Series，出售之後Ruth在紐約大展雄威，成為一代球王，揚基隊在1920年前未贏過總冠軍，1920之後，贏咗26次，而波士頓要等到2004年，即84年後先至再嚐冠軍滋味。1990年，一位記者在波士頓環球報掟出呢個名詞──Curse of the Bambino（即Babe Ruth咒語），美國球迷無人不知，John Henry點會唔記得呀，所以點都唔肯賣蘇亞雷斯俾敵手阿仙奴。一位阿仙奴擁