預備苦幹 左丁山
2009-02-02 AppleDaily 今日正式開工，擇正吉時，精神為之一爽。除咗少數人仍然放假之外，二○○九年開工咯，今年經濟唔慌會好，大家勒緊褲頭帶，捲起衫袖，預備苦幹可也，即使係最樂觀之人，都只係敢預測今年下半年先至轉好，但經過去年八月以後發生嘅金融海嘯，將去年上半年啲牛氣冲到無影無蹤之後，o依家邊個敢相信專家之言呀？專家也者，係市升之時講升，市跌之時講跌嘅人，○八年七月油價瘋狂上升，高盛話睇油價二百元一桶；○八年十二月油價跌到似甩綫紙鳶，美林專家話睇三十美元一桶。去年信專家而大搞石油對冲嘅航空公司，無不蝕到嗌救命，現在跌到四十幾美元一桶嘞，航空公司夠唔夠膽對冲呢？溫總理在瑞士發言，不點名指責一啲消費高儲蓄低嘅經濟體系，當然係鬧美國，回敬番美國財長蓋特納指責中國操控匯率之言。溫總一言中的，美國人消費高，儲蓄少，極度倚賴貸款，造成銀行體系信貸過度膨脹，釀成大禍。睇CNBC電視訪問一位財務專家講現時借錢好難，勸美國人做好啲財務策劃。借錢點樣難法？呢位專家講：銀行收緊信貸，要求借款人（一）提供私人財務報表（financial statement），（二）提交數年稅單，（三）提供一成首期，（四）還款與月薪比率不可太高。唉吔吔，我哋香港人問銀行借錢，以上四點根本係最標準條件，首期要三成o忝，以如此條件申請信貸，有何難度呀？但對美國人嚟講，原來已經非常辛苦，唔怪得美國啲銀行壞賬，大到嚇死人。現在叫美國人依照香港水平（其實已比香港寬鬆一啲）嚟借錢，佢哋已經叫苦，正是由奢入儉難，有咁耐風流，必須有咁耐乜乜，先至可以清除佢哋嘅高借貸高消費嘅壞習慣。叫美國人調整消費儲蓄模式，唔係咁易，有排搞，在漫長調整過程中，中國香港廠商嘅訂單必然減少，故此中國要保八嘅話，只能靠自己，靠內需。中國人與美國人相反，儲蓄高，消費低，要中國人增加消費，減少儲蓄，有違民族性，亦唔係咁容易，調整過程是漫長的，我哋睇怕要苦幹幾年至得，不可輕信政府救市。