在陸羽飲茶，茶友講起佔領中環，意見頗多，茶友全是溫和民主派，素來不會參加激進行動，對社民連、人民力量避之則吉，反之就對公民黨、民主黨劉慧卿等有好感，大家認為何俊仁雖然笨笨地，個樣唔得醒目，也算一條有理有節嘅好漢。
佔領中環由港大法律系副教授戴耀廷提議，最初冇乜人理，點知愈講愈多人附和，相信乃西環始料所不及。律師H同我地講：「西環及建制派最叻刺激市民上街，以前曾憲梓係專家，依家吳康民、譚惠珠，甚至梁愛詩都似係曾憲梓上身，講埋啲歪理，唔聽猶自可，一聽就火都嚟埋，我亦有上街參與佔領中環嘅衝動。」左丁山大笑：「你正式係秀才，上街唔怕遇着兵，有理說不清咩？」律師H話：「你估解放軍會出動？」左丁山連忙澄清：「唔係，不過激進左派有樣學樣，組識一啲人扮梁國雄上身，專門在論壇搗亂、呼叫，不排除他日如果你有參加佔領中環，和平靜坐，就有呢類人在另一邊大叫大喊，問候你祖宗十八代，擲吓膠樽，嚇到你暈！」律師H一諗，皺晒眉頭，正是可以借用一句，樹欲靜而風不息，陰風吹來可奈何。
律師H後來講：「想嚟戴耀廷嗰班學生又幾醒，出咗幾位名人，數吓手指，港大法律系1987年畢業生有戴耀廷、律政司袁國強、廣播處長鄧忍光、明報總編輯劉進圖，我呢幾位師弟都算厲害！」唔，咁就不如辦一次大辯論，戴耀廷劉進圖一隊代表民主派，袁國強鄧忍光代表建制派，題目就係「2017年特首普選需要篩選制」，最好就係戴劉代表正方，袁鄧代表反方，互換角色，辯論必然精彩。
飲完茶步出陸羽，忽聞有人在後面講佔領中環，不知何許人也，佢地講到如果真有佔領中環（靜坐）之事發生，中環會有商戶發起義賣粥粉麵飯及樽裝水等等飲食物料，一來籌款支持義士，二來用以維持靜坐人士之飲食需要。咦，係唔係真㗎，假如是真的，都幾好睇，可能吸引更多人士加入佔領中環㖭，最怕到時有不知何方神聖收到柯打，奉旨搗蛋啫！ 