知己知彼：誰在爆買比特幣？
1 :
GS(14)@2017-08-18 08:32:01朝鮮半島局勢陰晴不定，金正恩8月9日揚言要射飛彈攻美國領土關島，特朗普亦冇被拋窒，擺出一幅放馬過來的姿態。戰事似乎一觸即發，雖然話金仔出口術前科多到數唔晒，但寧可信其有，環球資金都係要避一避。講到避險，黃金都唔夠佢威，就係比特幣，近年成為資金新寵，過去一個月已大漲近一倍，年初至今更飆升超過三倍。面對北韓危機，日圓唔會係我哋最好的避險工具。因為低息、融資成本低、流通性大等因素，日圓一向係環球市場嘅避險貨幣。但日本有機會捲入美國與北韓嘅戰爭中，本國貨幣會面臨貶值風險，可能會抵銷避險資金帶來嘅被動升值。好簡單，日本人都買黃金同比特幣避險，你仲會唔會去買日圓？喺日本，黃金需求一直好大，但係因為消費稅8%及黃金入口限制，黃金價偏貴，而比特幣則唔受以上因素影響，因此大受歡迎。近期比特幣的升勢，就是由日韓資金湧入所帶動。虛擬貨幣分析網站CryptoCompare的統計數據顯示，近期日圓購買量佔比特幣購買總量的42%以上，四分一為美元交易，其餘大部份是人民幣和韓圜交易。比特幣喺日本除咗可以用嚟避險之外，仲係可以真係當錢使。今年4月起，日本政府唔單止正式承認比特幣為法定支付方式，仲為比特幣交易所引進了新嘅消費者保護要求和審計要求。日本陸續有零售商，甚至航空公司接受比特幣支付。所以比特幣由4月起，短短兩個月，已經由1,100美元水平炒到上2,500美元，升值1.27倍。留意返，比特幣雖然話可以避險，但都幾高風險，價格波動可以好大。金仔前日一話唔射飛彈打關島，比特幣即急跌一成，從4,400美元歷史高位，曾回落至4,000美元附近水平。風吹知
https://www.facebook.com/windknows/
來源:
http://hk.apple.nextmedia.com/financeestate/art/20170818/20124639