ZKIZ Archives


【迷幻特首選戰】人生太迷幻 有得揀你唔揀?

1 : GS(14)@2017-03-03 00:59:52

選擇人生。選擇生存。選擇打份牛工,朝九晚十二。趕尾班車返天水圍,同南亞醉酒佬爭關愛座。選擇射波,但同事快你一步。選擇睇急症,發現等十粒鐘原來攰過返工。選擇lunchtime游水,再潛水,畀老闆扣薪水。選擇食譚仔,要勿演凍鍊死。選擇儲蓄計劃,月儲二千,三十年先夠首期,最後選擇去日本。選擇勇武。選擇支持本民前、青政。選擇做鍵盤戰士。學做YouTuber,開fan page呃like。學做KOL,直播食屎但冇人睇、冇人share。選擇單身。選擇住劏房,call班毒男housewarming,先發現開唔到麻雀枱。選擇上高登,上香討,上facebook,睇瓊姐有冇update,再睇ex有冇update。選擇聽達哥唱歌,睇坤哥打機,睇自己打機。選擇ThisAV,但share咗條link出whatsapp group。選擇信耶穌,再去黃大仙求簽。選擇做港豬,食玩瞓再俾大財團奴役。選擇和理非非。選擇做左膠。選擇含淚。選擇啞忍。選擇妥協。選擇認命。選擇麻醉,一覺瞓醒當冇事。然後,選擇性失憶。選擇改變命運。選擇炒樓,炒股,再炒老細魷魚。選擇拎綜援住公屋,花百萬裝修再買架Benz。選擇種金做傳銷,氹公公婆婆落叠。選擇媾番個MK妹。選擇Apple Watch,iPhone7+,256G鋼琴黑,先達唔收焗用。選擇UBER。選擇脫貧。選擇靠把口搵食。選擇舔共,加入愛字頭、共青團,埋禮義廉堆。選擇做打手、做五毛。選擇勾結官商鄉黑。選擇食大茶飯。選擇做舉手機器。然後買到私樓,二百呎,豆膶客廳選擇擺部60寸4K電視,只有膠劇冇其他選擇。選擇打通廁所同睡房,唔裝門。選擇生細路,但想個仔贏在起跑線,所以選擇飛MK妹,媾富婆咬老軟。選擇幫個仔揀好學校,但避唔過TSA、國民教育同普教中。最後選擇接受個仔講普通話,同選擇放棄選擇。然後……冇選擇啦。香港人,根本好多嘢冇得選擇。高鐵超支撥唔撥款冇得選擇。起唔起三跑冇得選擇。西九起乜冇得選擇。地鐵加唔加價冇得選擇。連特首都冇得你選擇。不如今日起,選擇抵抗,選擇唔認命。選擇積極,要有獨立思考,自由意志,選擇愛惜身邊人,選擇生活,選擇未來,選擇人生。




來源: http://hk.apple.nextmedia.com/entertainment/art/20170302/19944265
迷幻 特首 選戰 人生 有得 得揀 揀你 你唔 唔揀
PermaLink: https://articles.zkiz.com/?id=327465

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019