【致‧母親】孫柏文第一個沒有慶祝的母親節
1 :
GS(14)@2016-05-08 14:41:28提起孫柏文，你會諗起啲咩？港女論？白銀隊長？一注獨贏？定係醉酒上電視？作為一個財經分析員，過去十幾年，孫柏文推介過好多股份，每次都大大聲叫你一注獨贏，不問價追，但未必每個人相信，連拍住炒股嘅媽媽有時都會say no，唔認同他分析兼嘈到面紅耳熱。直至媽媽過身，孫柏文發現，原來堅信他推介，最忠實Fans，就是媽媽。孫柏文好記得，1993年一隻青島啤酒（168），是兩母子在股海啟航的頭炮。當年孫柏文讀緊中五，剛學識咩叫市盈率（PE Ratio），睇報紙見到青島啤PE好平，膽粗粗撩媽媽落疊。就憑一句「我知呢間公司做咩」，孫媽媽二話不說落盤，又撞正摩根士丹利有個分析員提出「Maximum Bullish on China」，身為第一隻H股的青島啤升到嘭嘭聲，成為兩母子第一隻贏錢的股份。第一役贏錢後，兩母子開始拍住上，1997年買佐丹奴（907）坐艇最令孫柏文深刻，1998年「官鱷大戰」買恒指put輪贏大錢；再去到2002年科網泡沫爆破，執到新浪網平貨…在孫柏文心目中，孫媽媽係一個好聰明，好有性格的女性。「阿媽係對於勢頭好準嘅人，個感覺好準…同佢炒股既命中率好高，因為佢會同我say no，就算揀到好股，時機唔啱都唔會買。」兩母子性格同出一轍咁火爆，當然少不免火星撞地球，互不相讓但又坦誠相對，成為兩母子獨有的intimacy（親密）。「唔好呃，唔好客氣，唔好錫住人地嘅感覺…我真係好掛住我媽，以前去親佢屋企都唔駛就住，有嗰句講嗰句，攞到咩反應都會係最真誠嘅反應。」訪問中孫柏文強調了幾次，同媽媽關係最重要的一環，就是Honesty（坦誠）。曾經為石油分析員，孫柏文笑言，問得最深入、逼得最緊要嗰位投資者係孫媽媽。對於熟識嘅公司媽媽會較為有興趣啲，唔熟嘅會問到篤，到底公司做乜，盤數點樣。「以前諗到任何一個股票概念，我都會同我阿媽講先，因為佢係一個好典型IQ好高，但係唔太留意股票市場嘅人，如果我可以令佢對呢隻股票有興趣嘅話，咁即係我個分析，唔可以話無錯，但起碼有根有據先啦！」回憶起跟媽媽炒股，孫柏文笑言，「我媽最搞笑係，跌嘅時候好冷靜，升得好緊要既時間就會『我好驚！我好驚！』…咁多投資者中，最信我亦都係最狠地插我，都應該係我媽。」市場上流傳一句說話，「投資的道路注定是孤獨」，對於獨立股評人孫柏文而言，過去咁多年投資路上，幸好有媽媽做他的舵手，陪伴在他身旁經歷一個個風浪。「人生經驗當中，每個分析員都會有一個同你好親密、人生經驗多你好多嘅人，起碼講你知以前係咁，歷史結果就係咁，有個reference，一定好過睇書或者報紙，因為有個人真真正正去feel過嗰個時候，對你本身分析及投資選擇都好好。」越想抓住，反而從緊握的手中流走。不幸地，孫媽媽去年12月因病與世長辭，在病榻上她認真同孫柏文講：「阿仔，我應該都唔可以再同你炒股票…」股票與媽媽，在孫柏文生命中佔上最重要的位置。媽媽離世，孫柏文失去摰愛的同時，亦都失去了投資路上的一個戰友，一個定風向的舵手，以及最相信他分析的投資者。「當你同阿媽，歷年來做一樣野（炒股）做好多，為大家帶來好多議題去傾計，開心唔開心…」回憶湧上心頭，眼前這個天不怕地不怕的大男人，眼淚決堤般湧出來，記者及攝影師亦頓時手足無措…孫媽媽過身後，孫柏文打開她的股票戶口，倉內只剩下一隻股票。「去到後期佢都唔敢買股票，驚放唔到。不過唯一一隻股我老早叫佢沽，佢一直都唔沽，記得嗰陣佢要同我鬥氣，話根據我嘅分析，應該唔駛沽架喎！」生離死別難免，到最後一刻，有性格的孫媽媽仍然同孫柏文鬥氣，倉內唯一一隻股票，就是孫柏文多次在專欄叫大家「一注獨羸」的珠江鋼管（1938）。
來源:
http://hk.apple.nextmedia.com/financeestate/art/20160508/19602953