ZKIZ Archives


智取大市:價值投資最大敵人

1 : GS(14)@2016-03-08 00:07:02

趨勢投資同財技炒股法喺港股橫行霸道之下,價值投資法迷失咗好幾年,阿Q啲咁睇,的確令一批股份低殘到得人驚,低位任你買,平到長遠唔贏都好難輸,價值投資實在冇人理,呢啲股一直冇人願意炒起。大家唔買的原因係機會成本的問題。如果你揸隻平股,兩年股價唔郁,賺股息可能有十幾巴仙回報;與此同時,買強勢股,可能贏1倍。於是全人類去尋找升1倍嘅強勢股,而放棄一隻贏得慢嘅平股。就好似上周四公佈賣澳門舖位嘅堡獅龍(592),復牌升到0.495元,市值8.1億元,佢舊年底淨現金3.39億元,加埋賣舖套現3.46億元,淨現金至少有6.85億元。如果將賣舖套現金額當特別息派出去,每股都有0.2元。佢今次賣嘅係殷皇子大馬路嘅舖,其實佢喺人流更高嘅議事亭附近都有間舖,估計佢當年唔止買得一間,照計連議事亭嗰間都買咗,仲有其他靚舖,低價買入但一直以成本入賬,仲要年年做折舊,每股淨資產肯定嚴重被低估。事實上,堡獅龍剩係舖加埋手頭現金都肯定唔止現價,仲有一盤保持正現金流嘅生意,同埋上市公司殼價都未計。大平賣股份,喺低市值本地零售股之中大有股在,內地零售股亦有唔少揸實值錢舖位,變成資產股,只等釋放價值。只不過,要等強勢股炒到冇得炒,市場先對呢類股票重拾興趣。晉佳
https://www.facebook.com/advanceguy1/





來源: http://hk.apple.nextmedia.com/financeestate/art/20160307/19519001
PermaLink: https://articles.zkiz.com/?id=297117

Next Page

ZKIZ Archives @ 2019