魚柳包一塊芝士好味啲
1 :
GS(14)@2015-01-06 01:03:35
【鳩嗚乜乜乜】日日去鳩嗚嘅費清，算係麥當勞粉絲，即使舊年爆出所謂「黑心」食材醜聞，都如常幫襯。行得入老麥，預咗食junk food，幫襯老麥而想食得健康，就好似一哥咁講：天方夜譚。
＃老麥應從善如流
不過對於老麥最近嘅「魚柳包半塊芝士的迷思」，費清都好有意見。老麥為洗底，最近喺官網列出所用食材來源地，當中提及「麥當勞的魚柳包用半塊芝士」就成為熱話，大家爭論老麥有冇偷工減料？老麥就權威解釋，話「每項麥當勞食品均經由專家調製出最佳滋味。而魚柳包自1975年在港推出後，一直均沿用麥當勞的全球食品份量標準，以半塊芝士製作」。費清當然唔可以好似老麥咁，請成隊專家嚟研發食品，但都做咗個土炮實驗，買咗兩個魚柳包返嚟，抽出其中一個包嘅半塊芝士，夾埋喺另一個包，自製有一塊芝士嘅魚柳包（圖）。結果係點？咪係common sense，一塊點都「滋味」過半塊囉，口感都豐富啲喎。如果老麥唔認同，咁佢又賣雙層芝士孖堡？講堅，口味好主觀嘅，費清呢個土法煉「包」，只係想老麥從善如流。事緣「半塊芝士風波」，令好多人話以前食魚柳包，明明係一整塊芝士，後來先減半；亦有人自稱喺老麥打過工，話舊時整包係一塊芝士咁話。老麥與其花咁多公關資源去解畫，不如畀多啲選擇大家，推出加錢可要求整塊芝士、甚至Double Cheese魚柳包，咪好囉！有得揀，先至係老闆。費清＃要生計，也要生活＃毋忘初衷
來源:
http://hk.apple.nextmedia.com/news/art/20150105/18991854