樂香園：配股熱烈另有因由
1 :
GS(14)@2012-09-11 23:01:13http://hk.apple.nextmedia.com/financeestate/art/20120911/18013204
上星期歐洲央行決定買債，市場即刻沖喜式爆升；中國政府亦參多腳，批准1萬億基建項目上馬，話要刺激經濟喎。我估市場並唔係真心相信呢啲動作可以解決到問題，不過大家都已經沽咗成年，實在唔介意借呢啲消息炒作一下。上市公司亦睇準呢個時機蜂擁抽水，金融股尤其受歡迎。好似友邦（1299），串到用溢價批股，建行（939）、太保（2601）折讓都僅得2%。聽講建行批舊股，反應好到本book只開咗半個鐘，就已經夠曬飛鳴金收兵。唔通真係諗得過？
海迪覺得，上星期幾單block trade反應好，唔少係技術因素影響，多過係基本因素考慮。以友邦為例，成單deal根本市場已經expected，早幾日偷步沽空曬，有批股當然就爭攞貨。至於建行，交易size佔H股股本0.3%都唔夠，只要有幾個原有股東想低價溝嚇貨，已經搶爆啦。
講開又講，中國上一舖4萬億開水喉救市，後遺症已經顯然，地方政府財政一團糟，內銀貸款質素惡化。投資者要明白，就算你再放幾多水，好多行業仍然係受到結構和產能過剩困擾，內銀股要走出來，長路漫漫。
海迪