📖 ZKIZ Archives

[貼圖]鄧耀昇

1 : GS(14)@2011-04-11 22:10:10

---

2 : GS(14)@2011-04-11 22:10:23

證婚中心奇妙姻典喺十幾日前突然執笠， 300對準新人徬徨無助，忽然有救星願意出手打救，用優惠價幫佢哋完成人生大事。呢招高明，就算無人幫襯，亦都贏到掌聲，免費為自己宣傳。諗出呢條橋嘅救星係鄧耀昇，佢嘅拉斐特婚禮統籌現時趕緊裝修，準備喺 5月 1日開張。
「做 research嗰陣發現呢行有利可圖，面對嘅最大風險係場地問題。」咁夠膽勇闖呢個成日有人執笠嘅行業，除咗要打清楚個算盤，亦因為佢有一個唔會對佢迫遷嘅業主─佢爸爸、「舖王」鄧成波（波叔）。

鄧耀昇係舖王波叔個仔
「頭一年投資 500萬，入貨加埋交租。一樓成層一萬呎，月租 30萬，市面平均價係 25萬。」點解仲貴過街客？鄧耀昇話：「令業主開心嘛！」揀今年開張，係因為好多人鍾意揀兔年龍年結婚，生兔仔龍仔。現時未開張，已經接咗 50單生意，每日最多可以為廿對新人證婚；婚禮統籌套餐豐儉由人，由 5000蚊到 15萬都有。
開張之前遇上對手結業，鄧耀昇除咗諗住送場地畀 100對奇妙姻典客人行禮，仲諗緊點樣可以接收埋佢哋，如無意外喺聽日（星期二）公佈。
有一萬呎地方，鄧耀昇覺得似乎未夠。佢話，業主已經預留二樓全層畀佢，佢諗緊做曬婚禮統籌，抑或一半用嚟做同 BB相關業務，可以搞 playgroup、託兒、賣 BB用品。婚嫁淡年同淡月（例如農曆七月），個場都用得著，「其實係一年四季都用到，準備搞 wedding planner課程，學員每日都可實習，唔同街外嗰啲課程。」

想婚禮託兒租房一條龍
結婚、生仔兩件大事，都可以幫襯鄧耀昇，咁成家立室點都要有瓦遮頭，租樓又好、買樓又好，佢話佢都幫到手！
鄧耀昇話，自己鍾意投資物業，早幾年買嗰批物業已經升曬，但亦因為樓價升得太高，家佢都無入貨，反之，佢發掘到一門生意──出租套房。「香港嘅年輕人，人工好難追上樓價，所以用種種慳錢方法儲首期，政府係應該搞啲類似套房、年輕人宿舍之類嘅嘢，年輕人唔需要咁大地方，廚房、廁所可以公用……我自己就做好多套房，港九新界都有，將 50個物業改裝，因為屋企經營賓館有經驗，所以啲套房係跟足賓館條例間嘅（即係符合消防條例，同埋靚啲），家有 200幾個客，都係啲想搬出嚟住，又或者剛結婚儲緊錢買樓嘅新婚一族。」
家陣咁好景，咪要發大嚟做？「暫時唔會。第一，樓價太貴；第二，等緊措施（指政府政策），明朗之後會繼續做，長遠一定要做。樓價不斷咁向上，年輕人係租唔到一個真正嘅單位，一係咗分租，一係咗間套房。」係嘅，住屋問題，從來都係香港人頭痕嘅問題，年輕人又好，中年人又好，家陣都好多租唔起一個單位自住嘅。
記者：何凱兒
攝影：梁鑑章

---

3 : GS(14)@2011-04-11 22:10:34

週一人物：舖王撐孻仔「唔會被迫遷」
2011年04月11日

鄧耀昇係舖王鄧成波嘅第五仔，亦係孻仔。孻仔有冇拉心肝？唔知，但至少拉郁爸爸嘅身體。專訪喺拉斐特正在裝修嘅總部進行，波叔呢個大業主，特登過嚟陪個仔影張相打氣。
「照情照理，佢有心機做嘅，係唔會唔得，佢做呢行，至少唔會被人迫遷。」波叔講緊嘅，係最近發生嘅奇妙姻典結業事件。「對發展商嚟講，有新租客畀到好價錢，唔同原租客續租無可厚非；咁佢（鄧耀昇）無呢個顧慮，我照市值租金租畀佢 o架，都叫做一盤生意。」鄧耀昇係唔會被人迫遷嘅，但就要均均真真每個月交租。
波叔有無同囝囝分享嚇營商心得？「無話咩心得，佢呢行，每年都有咁多人結婚，年年婚紗展，人哋都生存到……我唔識呢一行，所以無得講咩心得。」
鄧耀昇 4個哥哥，一個經營飲食業、一個行醫、一個經營裝修建築工程、一個經營眼鏡生意，孻仔鄧耀昇家除咗擁有自己嘅第一盤生意，亦繼續幫波叔做物業買賣、改裝同管理。
近年鮮有露面嘅波叔忙個不亦樂乎，「家啲嘢好貴，但有買嘢 o架，買一幢幢嘅工廈囉！政府要活化工廈，不過唔係每一區嘅工廈都會買，有啲區，政府係唔會活化 o架！」

---