ZKIZ Archives


搭上半年斷正 僑豐證券董事Tony嗌離婚 佘詩曼勾人老公

2011-5-12  NM




今年三月約滿無綫,北上賺人仔的 佘詩曼不單換豪宅換老闆,同時亦火速換上新男友。日前被拍到在九龍新地標ICC 101樓的「龍璽」食飯撐枱腳,有指新歡是在北京做生意的富二代,但原來阿佘新男友Tony蕭是僑豐證券上市公司董事,已婚兼有兩個女,太太林賽盈 (Mandy)在行內同樣出名,任職僑豐證券董事總經理,不時上電視分析市況走勢。據了解,今年初,Tony經生意拍檔,兼老友陳欣健女兒陳早茵介紹認識 阿佘,明知男方有家室,依然勾住愈玩愈埋,加上近日阿佘只有一部戲在身,大部分時間留在香港,二人感情更突飛猛進。Tony日前終向太太坦白有第三者並提 出離婚,要佘唔要妻。

5月4日晚,阿佘幾乎素顏同Tony在龍璽食飯,被記者撞到正,二人即彈開,俾人影慣的阿佘依舊保持笑容,Tony則表現驚青,最後由老友陳早茵救駕,齊搭的士離開。

搵人掩護

上週三(五月四日)晚十點左右,佘詩曼跟男友Tony蕭在新蒲點「龍璽」食飯被記者撞到正,本來孖住行的二人即有默契彈開。當晚有份食飯,跟Tony蕭十 分老死的生意拍檔陳早茵,亦醒目幫忙掩護,先送阿佘搭的士,然後再陪住Tony一齊離開,刻意擾亂視線。「係Joanne(陳早茵)介紹Tony俾阿 佘,Tony不嬲都鍾意羣埋啲artist玩,識到阿佘,佢梗係唔放過機會,咁啱兩個爛玩又鍾意劈(酒),所以好快就撻着咗,不過佢哋玩得好小心,好多時 都會叫埋Joanne做電燈膽。」知情者說。

春風滿面

爭仔有前科,○八年介入鄭嘉穎、周麗淇六年情,爭贏咗的阿佘翌年亦告甩拖,直至日前被指跟平頭裝男友撻着近半年,滿面春風的阿佘亦繼續死撐二人只是朋友關 係。阿佘的「新仔」出身小康,在加拿大約克大學(York University)畢業後,跟當年仍是女朋友的老婆林賽盈齊齊返香港工作,二人先後在敦沛證券做過幾年,現職僑豐證券公司董事;老婆林賽盈在財經界頗 有名氣,出名勤力的她,不時被邀上有線、Now以及亞視財經節目做預測分析,二人育有分別四歲及五歲的女兒。一家四口住在九龍豪宅凱旋門,擁有兩部價值過 百萬的寶馬及豐田七人車。偷食初期,為要保密戀情,未打算離開屋企唔要老婆的Tony,多數會搵老友陳早茵與楊黛詩一啤做電燈膽掩護,不過自從阿佘近月無 需返內地開工,加上只有一部戲在身,二人見面愈來愈頻密,下定決心離婚的他,已經唔再刻意隱瞞老婆。

有Tony錫的阿佘,近日放在微博的相片全部春風滿面,除擺自己的靚相外,又將接吻熊的相放在微博,更要加上註腳「Sooooo Sweet」,甜爆。

Tony贊成偷食

決定離婚的Tony不斷在facebook自爆個人心聲,甚至將跟林賽盈的婚姻比喻為「唔鍾意你的時候送嚿金俾佢都係臭」,完全冇顧及老婆感覺。

紙包唔住火

「Tony最初都會搵藉口,成日話有生意傾出咗去,搞到半夜三更先返屋企,近排就愈來愈過分,好多時甚至唔返屋企瞓。Mandy係有為呢啲嘢同佢嘈過交, 女人嘅直覺好準嘅,亦都知道佢有第二個女人,但佢唔敢問Tony,怕件事踢爆咗更加冇彎轉,始終為咗兩個細路,佢都想挽救呢段婚姻。不過Tony俾人影到 同阿佘一齊食飯之後,知道紙包唔住火,索性要求離婚,佢話自己唔可以冇咗阿佘,Mandy表面好似冇乜嘢,繼續返工出鏡講股巿,不過個樣就落晒形。其實佢 傷心咗好耐,早幾個月已經開始匿埋喺屋企喊,佢份人好硬淨,唔想俾人知道佢有問題,所以近排Tony見晒報,佢返工都扮到冇事發生咁。」知情者說。

勾引我老公

Tony變本加厲,日前在Facebook轉載了一段關於老夫老妻不能同諧到老,要搞離婚的故事,抒發「唔夾不如離婚」心聲,大前日,更索性將「謝謝你, 勾引我老公」為標題的一段老公嫌棄老婆,偷食有理的歪理文字放上Facebook:「再好的老婆處久了,也還是想知道別的女人的風韻。」完全唔放老婆在眼 內。記者致電林賽盈,在電話中稱呼她蕭太,問報導中跟佘詩曼約會的男人,是否就是她的丈夫Tony蕭,她呆了數秒沒有否認:「我唔識你,唔知點答你。」記 者再問佘詩曼是否他們離婚的第三者,她只拋下一句:「你哋問番佘詩曼。」隨即掛線。

金融財子

年約40歲的Tony Shiu,現任僑豐證券有限公司董事,99年於加拿大約克大學(York University)經濟系畢業。年薪約數百萬,雖精於理財,但財政大權落在太太林賽盈手上,包括般咸道寧養台物業以及兩部車,由蕭太持有,而兩部車的 車牌則取其兩愛女名字Jenny及Janet。活躍於金融界的Tony曾出席王冠一財經頻道活動,認識唔少圈中人,現跟陳欣健女兒陳早茵合作生意。

敢愛敢恨

在單親家庭成長的佘詩曼,性格獨立剛強,連對待愛情,亦顯出其敢愛敢恨的作風。

陳浩民一刀切

陳浩民是阿佘的緋聞男友中,戀情維持最長的一個。02年合拍電影《飄忽男女》撻着,翌年阿佘以五百多萬購入北角海景台千二呎單位自住,有傳背後陳浩民有份 出錢置業及供樓。可惜因男方性格花弗,令阿佘決心將長達六年的感情斬纜,就算男方為箍煲,刻意在海景台租住另一單位接近阿佘,她仍表現決絕,復合無望。

吳卓羲敢於表態

06年與吳卓羲合拍劇集《歲月風雲》後,有指阿佘在夜店Basement公然坐吳卓羲大髀,之後送上近廿萬的愛彼錶給男方,甚至有傳她為吳卓羲訂了價值二百多萬的保時捷911 GT3 RS跑車,敢愛作風兼出手闊綽,花旦中只有阿佘一個做得到。

鄭嘉穎愛得勇

08年,視帝鄭嘉穎被踢爆劈腿背周麗淇偷食阿佘,為保乖仔形象,鄭嘉穎一直不肯公開承認戀情,反而阿佘背着姣佘之罪,仍勇於半公開情侶關係。之後公司有意 撮合二人組情侶檔接騷?銀,但遭男方反對,09年阿佘終於頂唔順鄭嘉穎無風度兼小男人作風,主動提出分手,二人再見不是朋友。

專吼有婦之夫

雖然圈內圈外單身男人眾多,但不少女星仍然鍾意跟有婦之夫扯上關係,但最終修成正果少,搞到形象插水,自食惡果多!

袁小曼

08年落選亞姐袁小曼,去年一月被踢爆與已婚地產代理CEO廖偉強於北角同居,男方聲稱正辦理離婚手續,又傳出二人將於今年六月結婚。從此袁小曼跟男友愛得高調,並搬入貝沙灣跟正印廖太為鄰。玩到咁寸,終令廖太忍無可忍出來炮轟袁小曼。

吳亭欣

04年落選港姐吳亭欣,於08年被拍得與顧美華妹夫,上市公司副主席馮潮澤密會,並一同返嘉亨灣香閨。雖然吳亭欣否認是第三者,但09年顧美華胞妹自殺,吳亭欣形象亦即時跌到谷底,要退出娛圈。

郭羨妮

99年港姐冠軍郭羨妮緋聞不斷,但最重創是07年與陶大宇合拍劇集《學警出更》後啜出真感情,令男方與結婚七年的老婆阿寶離婚。而阿寶更公開承認郭是第三者,郭羨妮從此背上狐妮之名。直至早前與內地武指朱少杰拍拖,狐味才淡化。


上半年 上半 斷正 僑豐 證券 董事 Tony 離婚 佘詩曼 勾人 老公
PermaLink: https://articles.zkiz.com/?id=25009

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019