美國將在更長時間內保持低利率政策的消息，令美元受到狙擊，繼續尋底，推動大宗商品市場造好，原油、金銀期貨走強，其中白銀大漲，逼近1980年以來高位。 美國最新公佈的經濟數據好壞不一，3月份成屋簽約銷量大升，遠超預期，但經濟增長明顯放慢，首季GDP增長只有1.8%，差過前一季的3.1%，以及市預期的2%，上周首次申領失業救濟人數也意外地增加，創了今年1月以來新高。 不過，由於聯儲局宣佈如期執行其6000億美元國債購買計畫，亦承諾將到期債券的本息重投市場，意味著市場流動性唔會因QE2結束而有所減少，加上美企業績基本上令人鼓舞，美股繼續炒上，杜指再創近自2008年5月份以來收市新高，收報12764點，漲73點；標普500指數升5點，造1360點。杜指期貨最新報12712點，較現貨低水52點。 港股美國預託證券造好， ADR港比指數報23880點，比香港收市高74點或0.3%。匯控收84.99元，比香港收市高0.5%，中移動收71.44元，比香港收市高4仙。 美國聯邦公開市場委員會(FOMC)週三表示會保持寬鬆貨幣政策，利息會維持一段長時間不變。意味著聯儲局繼續推行其弱美元政策，投資者即時將美元推至三年新低，兌六隻主要貨幣的美匯指數昨日一度跌穿73水平，最新報73.31，歐元、日圓及英磅兌美元齊齊向上，兌美金最新報1.4838美元、81.56日圓及1.6642美元。 大宗商品市場升勢更淩厲，黃金白銀及其他貴金屬齊走高，鉑期貨漲1.1%，鈀期貨漲2.3%。黃金再創新高，每安士升至1535美元，白銀最勁，大漲3.4%至每安士47.52美元，最新報48.28美元，逼近1980年1月的高位48.7美元。 最近美元急跌，外匯和商品熱炒，股市波動不大，不少散戶走咗去炒匯炒商品，連過去比較冷門的石油、白銀、粟米都有散戶去炒。 我同金融界老行尊傾起，佢話好多本地經紀行都有孖展戶口俾人炒匯、炒金、炒商品，好多經紀行其實並無將散戶落的盤射出街，只是自己和散戶對賭。佢地咁做皆因散戶炒作經常走錯位，長線輸多過贏，經紀行同散戶對賭一般都有著數。 但近排商品市、匯市基本上走單邊向上的市場，散戶死揸較易贏錢。老行尊話，按散戶的習性，經紀行在這種單邊市同散戶對賭，的確有可能輸錢，散戶贏到錢唔出奇，但長賭落去又係另一回事，因為散戶有可多習慣，會令佢地最終會輸錢。 佢舉一兩個例子，以白銀為例，由年初30美元一安士，升到而家48美元，升咗60%，但散戶唔會贏足60%，散戶係「贏粒糖，輸間廠」。假設有個老散在30美元買咗白銀，升2%、3%佢都走唔切，賺1個幾毫就食糊，因為佢放低3、5%按金，升3%都已經賺對開，好開心，所以佢地唔會坐貨。白銀連升4個月，散戶可能只係走幾轉，夾埋都未必贏到5%。 至於「輸間廠」，就唔使等到大跌時，而家亦有人輸，老行尊見到個客，買3000安士白銀，一買即回，佢反手沽番1000安士白銀(理論上係平咗三分一倉)，但佢只當對沖，到銀價升番上去，去番高佢買入價個幾美元時，佢將3000安士好倉平倉，但呢1000安士淡倉就保留，原因不明，或者佢平3000安士好倉時覺得銀價要回，但事實銀價當時展開一個升浪，所以呢1000安士淡倉一直輸，佢就一直加按金補倉，而家輸緊10幾美元一安士。過程中呢個散戶久不久都買吓白銀，亦賺到啲錢，但呢1000安士淡倉就一直唔郁一直輸，夾埋贏錢的都唔夠補輸錢呢份。 呢個散戶堅持揸住1000安士白銀淡倉唔放，係因為佢相信最後白銀一定會跌番落去。但佢又經常做好倉，一次啄1、2美元。所以都搞唔清佢係好友還是淡友，或者佢係「短線好友、長線淡友」，佢呢個睇法可能啱，但佢呢種手法就錯哂。老行尊話，呢個散戶唔記得，長揸逆市倉，會有頂唔順的時候，白銀愈升，佢要補倉就愈多，如果白銀最後真係升到70、80美元，佢估呢個散戶都未必夠錢補倉，而且後段愈升愈急，一日升3%，第二日又升5%，普通人唔會有咁多現金在手日日等住補倉，所以佢估若白銀升到60、70美元時，呢個散戶的淡倉就補唔到倉要打靶，佢可能黑到一打靶白銀就見頂崩盤。 老行尊話，散戶的習慣令佢地贏得短，輸得長。而家佢地若順勢炒黃金、白銀，每次見回吐都撲入去，每次都得，到金銀真係見頂回落之日，例如高位回5%、10%，佢地一定照撲入去，買完再跌，佢地唔會平倉，只會加注溝淡，並且不斷補倉，最後若白銀崩盤，佢地就會輸獲甘。證券行而家或者要輸俾散戶，但最後一舖會番哂來。假設白銀在80美元見頂，狂插之後，最後得番10幾美元，高位唔走唔見80%，你話殺死幾多人呢? 唔好覺得我講得誇張，早兩年08年油價高見147美元，最後插落來見番30美元，真係跌咗80%。我唔係叫大家唔炒，係叫大家在喪炒市要萬分小心，要敢贏，要部份食糊，要定死止蝕，有幾招在手，才有機會打破散戶的宿命。炒作呢家嘢，唔係計你呢刻賺咗幾多，係計你離場時仍然有幾多。 (我不在香港，暫停答問)