ZKIZ Archives


新地家變首席爆內幕 郭炳湘:阿聯唔鐘意我

2010-10-28  NM




新鴻基地產前主席郭炳湘,一個充滿傳奇的人物。

曾經是全港最大地產發展商的掌舵人,坐擁五百億身家,兼且形象低調內斂,兄弟相親相愛,家庭幸福美滿。

按這個劇本走下去,他的人生堪稱圓滿。

只是十三年前開始,郭炳湘的下半生便改寫。他被張子強綁架,關在木箱內一週,身心已大受打擊。近年,不斷有消息傳出他患上躁狂症,坊間又散播他胡亂投資, 要安插紅顏知己入局,擾亂新地公司管治的負面消息不絕。○八年他被逼退主席職位,三兄弟決裂,今年新地再而宣布,他不再是這家發展商的一千五百億家產受益 人。

這一切一切,郭炳湘兩年來並未親身對外透露片言隻字。本週一他終肯坐下來,獨家全面剖白箇中的內幕。家變內幕

二○○八年二月十八日,新鴻基地產突然出現人事巨變。出任主席十七年的郭炳湘,由即日起休假,其間不會履行職務,亦不會代表新地作出任何承諾,職務由兩名同為副主席的弟弟郭炳江及郭炳聯分擔。

通告一出,有關郭炳湘的負面新聞即時接踵而來,弟弟郭炳聯指美國精神科醫生Dr. Jose Maldonado,證實他患有躁狂抑鬱症,不宜當新地主席。郭炳湘曾作出反擊,入稟要求禁制,最後敗訴,被董事局議決罷免其主席職位,由郭老太鄺肖卿接 任。郭炳湘淪為非執行董事,一直被「流放在外」至今,一齣由兄弟不和燃起的豪門家變由此開始上演。

壹:記者郭:郭炳湘

壹:你出任新地主席已十七年,外間看三兄弟之間合作一直相安無事,何時開始出現變化?

郭:係○八年初,佢哋要我辭去主席及執行董事職位。我好surprise!非常surprise!佢哋理由係我精神有問題,話我bipolar(鬱躁症),我絕對無!

壹:幾兄弟私底下有冇傾過?

郭:有。當時我話請三個月假,如果搵到最好嘅醫生證明我無事就要返去。我搵咗麥列菲菲,佢係港大嘅。但佢哋(指董事局)睇都唔睇,就咁放埋一邊。

話完我精神有問題,我證明咗無,佢哋就話我做事唔得,跟住話我投資錯誤,最後話埋我喺公司出現會影響士氣!

壹:諗番轉頭,被迫辭去主席職位前,三兄弟間其實有冇先兆或爭拗?

郭:幾兄弟早已有爭拗,係積少成多,俗語有話:冰封三尺,非一日之寒。我認為公司某些人做事不規範,例如建築部。當初我太多嘢要管,唔再親自睇建築部時, 我成立咗一個工程監察組,並請來陸宏廣John Luk幫手,直接報告俾我聽,有關落標、招標、規範、起樓質素等,呢個監察組都會巡視。建築部(注:現由郭炳湘弟弟郭炳江管轄)做事咁有問題,一向都唔鍾 意我。

我哋一路有磨擦。又好似公司買地,新界嘅農地有咩理由,會由一個人去搞晒?有唔妥當我認為就要糾正!○六年有啲董事勇咗,要去國內大搞地產。我一路有返大陸做嘢,知裡面好複雜,好多地雷,所以好緊張同反對。但公司有好多既得利益者……搵個藉口啫!

壹:既然有咁多爭拗,點解喺○八年先爆發?

郭:喺○八年前嗰幾年,經濟唔好,自然會團結一致,同舟共濟,好似新地嘅口號——以心建家。到○八年初經濟好番,新地要起嘅樓多咗,自然磨擦亦多咗好多。

壹:點樣評價兩個弟弟?聽新地內部員工講,炳聯是否較有野心,比較aggressive?

郭:(不住點頭)即係……即係……佢對我好有意見,因為我反對佢。講真,圍住佢身邊嘅人,只會讚佢,無人會話佢唔好。只有我同阿媽會講佢唔啱,佢梗係唔鍾意。

壹:係咪孻仔孻心肝被縱壞?

郭:係啦,不嬲佢係最細,有個梨佢會爭來食,仲要食最大份嘅!至於阿江則比較隨和。

愛情事業兩考驗

在新地家變中,郭炳湘紅顏知己唐錦馨成為焦點,被指影響着郭炳湘從而參與新地業務,令郭老太不滿,一錘定音要將大仔「out」出局。

壹:被踢出局關唔關唐錦馨事?

郭:(略帶激動)佢哋屈我話要將唐小姐(指唐錦馨)放入董事局,根本無咁嘅事。唐小姐從來無理公司嘅嘢,佢有自己生意,與人無爭。最好笑話邱太(指前新地 郭氏基金總幹事邱李賜恩)係佢(唐小姐)嘅人,刻意安插入新地工作。根本邱太只係我朋友,佢兩個都唔識嘅。唐小姐我已識咗二十幾年,點解突然喺呢兩年攞嚟 講?係都一早講啦!早幾年炳江仲同佢一齊打波,一早知!

郭氏三兄弟檔案

淡薄兄弟情

郭炳湘今年五十九歲,在英國倫敦大學帝國理工學院土木工程系碩士畢業,二十四歲便回來新地工作,並由爸爸郭得勝鋪路接班。兩名弟弟炳江及炳聯分別五十八及 五十七歲,較郭炳湘小一至兩歲,加上郭炳聯在哈佛修讀工商管理碩士,至一九七九年才返新地,較郭炳湘遲五年。從小到大,郭炳湘與兩名弟弟都有一段距離。

壹:三兄弟是否一齊玩大?

郭:我記得我小學五年級時,佢哋只係一、二年班。我睇緊電視嘅時候,佢哋仲玩緊波子。我讀碩士時,佢哋先入大學,大家玩嘅嘢都唔同。

壹:爸爸郭得勝有否抽時間維繫家庭及兄弟間感情?

郭:佢就算好忙,都會抽時間同家人相處。佢最鍾意游水,放暑假就日日帶我哋幾個去泳棚。當時爸爸有十個八個朋友志同道合,就喺南灣一齊租個泳棚游水。當時呢個泳棚係最大的,四叔李兆基、馮景禧(新鴻基證券創辦人)等幾家人都有一齊嚟。

壹:進入新地後,三兄弟是如何分工?

郭:我在新地由則樓開始做起,跟住爸爸將建築部交俾我,之後愈做愈多,其後升為總經理,負責策略嘅嘢。炳聯就讀法律嘅,會理法律、財務多啲。而炳江,我做到咁上下,就索性將建築部交俾佢做,放晒手。

信託無得分終極分家

這個分工合作的局面,在○八年郭炳湘被逼退主席職位後,已被打破。到今年十月四日,新地主席郭老太鄺肖卿,透過新地發言人公布,持有逾十點八億新地股份的 郭氏家族酌情信託基金已落實重組。重組將受益方分為三部分,三分一權益由郭炳湘家人作為受益人,另外兩名兒子炳江、炳聯及二人的家人,分別為另外三分一權 益的受益人。重組落實郭炳湘本人在新地這千億家產中無得分。

郭炳湘隨即反擊,重申他與母親聯繫後,確認其本人仍為受益人,但新地堅決否認。與此同時,亦傳出郭炳湘與其他家族成員達成共識,將收取二百億元另起爐灶,不過郭炳湘同樣否認。而他亦聯絡證監會及港交所,要求新地交代信託基金的最新安排。新地此舉,有如趕盡殺絕。

壹:一直以來,都是郭老太透過新地發言人對外發布消息,其本人並無現身作清晰交代,究竟你有否與母親聯繫了解?

郭:一直都有。我噚日(本週日)先見過媽媽,上星期仲見咗兩次。仲有上星期五都有問過四叔李兆基,佢係三劍俠之一(另兩人為郭得勝及馮景禧),佢最清楚爸爸遺願。我媽媽同四叔,都親口同我講,我都係受益人。

壹:但新地發言人堅稱你不是受益人之一,可否具體透露基金現況?

郭:一路以來,都只係新地發言人話全權代表郭老太。我媽媽年紀咁大,咩都唔識,信託基金嘅嘢佢點識處理?總之而家有三個版本,一個係我阿媽同四叔都講話我 仲係受益人,一個係新地發言人話我唔係,一個係從證監會記錄,見到我家人,即兩個仔都未有呢三分之一權益,我到而家都搞唔清楚!

九七年時值香港地產市道高峰,新地一眾成員開完股東會後,在總部齊齊吃飯,一片和氣,在飯枱上包括有後排的李兆基(左一)、何添(左二)、郭炳湘(左三)、李天穎(左四)、郭老太(左五),前排為郭炳江及老臣子陳啟銘(右),但此情已不復見。(《蘋果日報》圖片)

壹:有否如外間所言,有收過二百億?又或傾過「分錢」?

郭:(頓了頓)確實係有傾過。大家係有坐低傾,但我無應承。因為要我將咁多年嘅權益同埋心血,就咁用二百億元就放棄,我覺得要再商討吓。

壹:即係傾唔掂數?

郭:要我放棄晒所有權益,傾唔掂。呢個offer已經expired(超過限期)咗,佢哋無中間人,係親自傾,都有誠意嘅。而家我哋仲商討緊。

壹:信託基金由你爸爸一手成立,真的可以這麼兒戲,話變就變?

郭:(搖頭)基金有嘢改變,trustee(受託人)要通知原來嘅受益人嘅,要受益人同意先可以改,但到而家都無人通知我,我想攞資料佢哋又唔俾!按法規,股權變動要喺三日內通知證監會,但佢哋話有豁免,我所知係無的。

我最近搵咗涂謹申議員,幫我問專責管理我們家族信託基金嘅孖士打律師行攞資料,但佢哋話只係阿媽先係client(客戶),兄弟姊妹唔係,所以唔會俾資料。呢啲嘢老人家唔熟,有人指使佢啦!

壹:除了這個信託基金由郭老太話事,現時新地仍由她出任主席,萬一她百年歸老,你認為誰人可接管?

郭:(回答時遲遲未能說話,眉頭亦皺起來,顯得十分煩惱)所以我都想快啲可搞清楚呢件事,我諗到時會由董事局選一個合適人選。

壹:你有否想過重掌這職位?

郭:我一直有關心新地嘅嘢,始終一手由我發大,仲係好關心……但佢哋唔想。

一切由綁架開始

郭炳湘本出生大富之家,掌管千億王國新鴻基地產,要風得風,要雨得雨,直至十三年前,他的下半生徹底改寫。一九九七年九月二十九日,有「大富豪」之稱的張 子強,與黨羽在深水灣道郭家大宅前,將自行駕車的郭炳湘強行綁架帶走,並禁錮於新界一村屋。當時張子強要求郭炳湘致電回家拿贖金,但他不從,結果被張子強 拳打腳踢,郭炳湘在四日後致電妻子李天穎,要求準備十四億元贖金。

據悉,被綁期間,郭炳湘遭脫去衣服,蜷曲身體困於小木箱中,每日只供予叉燒飯及食水,三餐與大小便都在木箱中解決。經多番斡旋,郭家才肯付數億元贖金讓郭炳湘獲釋。傳聞其兩名弟弟對金額有意見。此役令他身心受創,他曾承認因此患抑鬱症,經逾一年時間才康復。

阿媽一直好支持我!

壹:十幾年前遇到咁唔愉快嘅經歷,你嘅家人有冇支持你?

郭:(遲疑了一會)我阿媽一直都好支持我嘅!

對於這段往事,郭炳湘似不願提及,猶如不能觸碰的傷口,其後他好友、前自由黨主席李鵬飛,以電話訪問形式補充,李鵬飛的「師傅」鍾士元爵士在新地任獨立非 執董有十多年,與郭氏家族關係密切,家變後他不欲做「磨心」而離任,但替郭炳湘不值。李鵬飛說:「郭炳湘一向為人好友善,可惜出現咗張子強事件,好唔開 心。我唔覺佢性格有咩唔同。佢被綁架期間,係有討論咗一段時間。(是否郭家斡旋太耐?)我唔知佢哋點傾,總之好唔抵。佢困咗喺個箱成個星期……應該整個家 族好團結嘛!

「無主席做已好慘,而家仲唔俾家產佢,希望郭老太同兩個細佬重新諗吓,圓滿解決件事。郭炳江係非常虔誠嘅基督教徒,今次對大佬好似硬晒心腸咁。大家同一條腸出嚟,公平公正最緊要。」

新地崛起太子繼位

被綁前郭炳湘的前半生的確風光。身為郭氏家族的長子,父親郭得勝對他特別嚴厲,並悉心栽培他為新地的接班人。在三兄弟中,只有他是鴻昌進出口有限公司的董 事,鴻昌就是郭得勝早年經營洋雜的公司(即是賣外國貨),郭得勝被稱為洋雜大王,其後代理YKK拉鏈一樣成功。後來他與李兆基、馮景禧合組永業並涉足地 產,被稱為三劍俠,並成為新鴻基地產的「雛形」。郭得勝與友人在生意上的合作,甚至在做人都有一套獨特的理念,郭炳湘亦深受父親的薰陶,把這些理念用於管 治新地之上;此時此刻,回憶起郭得勝那份對人謙厚,不怕蝕底的性格,郭炳湘即滔滔不絕,與他談起家族中人事事對他「趕盡殺絕」的心情,形成強烈對比。

你俾人一個favour,人哋會還番俾你!

壹:可否談談你父親郭得勝的發跡史及經營之道?

郭:我father祖家係中山,後來去廣州做洋雜生意,四九年大陸解放,就去咗澳門,住咗有成五、六年,之後先再搬來香港,喺香港成立鴻昌做洋雜生意, 呢,就係YKK拉鏈嘅總代理。最初做地產就係以永業呢間公司來做,公司裡面有十個拍乸,不過我father好有眼光,睇中四叔(李兆基)同埋馮景禧最識做 嘢,咁就三個人成立新鴻基地產。佢仲成日強調「多、快、好、省」,多係勤力,快係快捷,好即做得好啦,省就係物盡其用,人盡其才。佢一直強調知人善任,唔 好用人唯親!

壹:咁你爸爸同馮景禧及李兆基如何分工?

郭:馮景禧係財務金融專家,就專注財務,四叔係買地、計數最叻,我爸爸就睇overall嘅,即係策略。

我father年紀雖然比四叔大十幾廿年,但係佢都叫四叔做「四哥」,叫馮景禧做「禧哥」。甚至鄭裕彤、李嘉誠佢都叫「彤哥」、「嘉誠哥」。我爸爸個人好 謙厚,不會搶人風頭,佢成日話同人家合作搞嘅地盤,更加要做得好啲,不會是是但但,佢食飯都係私人扲荷包,唔會話出公數嘅,亦好肯聽人講,不會主觀,唔似 得有啲人係要叻過人,好勝!

壹:你爸爸有咩教誨你係最深刻的?

郭:佢話做人唔好怕蝕底!有時蝕底,其實係着數,因為人哋會永遠記住你。你俾人哋一個favour(好處),人哋係會還番俾你的!

壹:一路以來,你爸爸都視你為接班人?

郭:咁佢無好明咁講,我一畢業,就去咗爸爸好朋友胡應湘度實習兩年。我暑假期間都喺合和做暑期工,爸爸一直好欣賞佢,覺得佢風趣敢言。Gordon好有 型,揸部積架,又唔著西裝,著便服返工。做咗兩年學滿師,我就入新地由則樓做起,之後做埋建築部。當時建築部好多陋習,老臣子打骰用人唯親,我爸爸同阿媽 好支持我改革,結果亦成功。

我記得有一日佢話:「啲屋契你自己簽名啦!」我開心到呢!後來payment(開支)都係我簽,不斷俾好多authority(實權)我。逐步逐步來,後來升做總經理、公司董事,最後係董事總經理。

十七年光輝歲月

自此郭炳湘一直平步青雲,由九一年開始出任新地主席,其間新地盈利暴升。

壹:有咩代表作?

郭:有好多,如灣仔新鴻基中心、中環廣場,及IFC與ICC。新鴻基中心係七十年代尾,father買地叫我負責起的,呢棟建築物係當時全港最高,比置地嘅康樂大廈剛好高一呎。當時爸爸話置地四百四十九呎,咁我哋起五百呎啦!

中環廣場係同信和合作,當時Robert Ng(信和主席黃志祥)同我講話:「不如一齊做啦!」咁我同father傾,佢話咁大單,佢哋又成日咁勇,都好嘅!記得去到大會堂舉手投地,舉到最後三十幾億咁高,Robert捉住我隻手話:「今次得嘅,實投到嘅!」

至於IFC同ICC,前者招標時市況唔係咁好,我哋幾兄弟仲計緊數,咁啱落標前一日我同四叔打golf,佢話點呀,一齊合作啦。我都猶豫緊,大家合作又勇 啲啦,結果投到後四叔全權俾新地搞,IFC就成為地標。到ICC,市況仲差,董事局好多人反對,但我覺得全香港只剩嗰度可以起商業、酒店、住宅等綜合性項 目,效果一定好。呢次阿媽好支持我,結果投到後成公司都拍晒手掌,新地股價都升!而家IFC同ICC喺維港兩邊,好似維港門廊咁,證明我決定係啱。

壹:無得做主席,對新地業務仍好關心?

郭:係,尤其酒店,由爸爸叫我搞第一間帝苑酒店開始,已經係我一手一腳做,後來係內地嘅中國大酒店,跟住帝京、四季同W酒店等。今年新地仲攞咗亞洲酒店論 壇嘅年度最佳酒店業主大獎,好成功,我好開心。由酒店設計、管理同入場食肆我都親自打理,到而家我都成日去酒店同伙記及大廚傾吓偈,我哋已當大家係朋友, 老友記了!

分家已成事實

家變發生了兩年多,郭炳湘已不能再跟兩名弟弟坐下來傾偈,對於老父當日希望他們兄弟同心,其利斷金的想法已有另一番見解。

合作唔可以勉強。

壹:爸爸郭得勝的遺願是三兄弟相親相愛,現時事與願違,有咩要同兩個細佬講?

郭:(認真地想了數秒)我自己都反省一下啦。當然三兄弟合作到就最理想,但好多成功嘅家族不一定合作到,分出來都好成功,好似羅康瑞、李嘉誠嘅family咁。我以前都諗,一定要三兄弟合作,呢兩年我轉咗諗法,我諗合作係緊要,但理念不一致,都係唔可以勉強。

當然我唔排除,佢兩個(指兩名弟弟)改變態度,肯真誠合作都可以o架,但不能兩個弟弟話晒事,bypass我囉!

最近我聽一個好成功嘅人講,兄弟、family係無得選擇嘅,但做事嘅partner可以自己搵,家庭不一定要合作,好多嘢唔可以夾硬嚟!

後記

記者在訪問前,對郭炳湘的狀況甚為擔憂,受坊間消息影響,既怕他情緒不穩定,又怕他行事飄忽,說話若然一句起兩句止,記者便無功課交。怎料郭炳湘全程思路 清晰,暢所欲言,幾乎「有佢講無人講」。當公關說訪問只餘十分鐘,郭炳湘搶着答:「十五分鐘都得!」公關提醒他約了人午膳要走,他即說:「我推遲咗佢!」 結果原訂四十五分鐘的訪問,最後一個半小時才完成。到尾聲希望他正正經經望着鏡頭拍一張照片,攝影師提醒他:「笑吓啦!」備受家變困擾的郭炳湘竟然識搞 gag,眼定定、聳聳肩說:「我笑唔出呀!」

 


PermaLink: https://articles.zkiz.com/?id=18907

Next Page

ZKIZ Archives @ 2019