曼聯領隊費格遜爵士取得今屆英超冠軍（第十三次）後，對記者發表講話，全無退休之意，但喺上星期四就突然宣佈退休，即時轟動，豈止國際球壇注意，英國首相金馬倫都要立即為此發言，金融時報將新聞放上頭版，曼聯股價在紐約交易時間初段跌咗4.8%。一位足球教練兼領隊辭職或退休，閒過立秋啦，但費格遜爵士係特殊人物中之特殊人物，佢在任二十七年後（自1986年起計），離開曼聯，升上董事局，就係世界性新聞。
歐美各國之大型球賽，每個球季結束前後，都有球會領隊被炒魷或辭職，強如摩連奴，十年來已在車路士、國際米蘭、皇家馬德里三家巨型球會浮游，雖則屢獲冠軍獎牌，始終唔能夠大聲講：「呢間球會由我打造。」費格遜爵士就有資格講啦，自一九八六年起，佢就不斷打造曼聯，不斷轉型，年年成為英超前四名強隊，邊個要攞冠軍，總要問過費格遜先，能夠將一隊球隊推上高峯唔算太難，但將皇朝維持起碼二十年，就係體壇奇跡，過程中需要（一）交出好成績，令董事會信任，（二）不斷發掘培養青訓新星，同眼光銳利，在轉會市場買入球星而唔會入錯貨，（三）長期維持一眾球星嘅鬥志，不會鬆懈，（四）操控球星自如，不被超級球星操控，敢膽踢走或在適當時候賣走超級球星而不損害戰鬥力。
試比較阿仙奴嘅雲格，雲格地位牢不可破，但阿仙奴這八年交白卷，無力爭冠，主因就係雲格不懂留用舊人，唯利是圖，在球員廿七八歲巔峯時就將佢地賣走，例如韋拉、肯利、費比加斯，但補入之新貨，好多貨不對辦，守門員與中堅最差，反映出雲格買球員功力比費格遜差幾皮。費格遜可以留用三十幾歲嘅史高斯、傑斯，趕走碧咸，買入卡力克，任用十九歲二十歲嘅拉菲爾、菲臘鍾斯嗰份眼光與膽識，英超無人能及，大企業管理其實可以向費格遜偷師，留用老經驗人才，向外挖角聘請一流人物，兼且大膽擢升有潛質有前途新人。假如呢套運用得宜，企業可以長期保持朝氣、競爭力，那怕時間考驗。
