馮仁昭四圍超：馬天佑小便搵千語睇水道歉林峯拍拖睇醫生 父母傍實
1 :
GS(14)@2016-05-08 01:56:16【女友陪伴】■戴住口罩嘅林峯患感冒，噚日同女友千語BB喺養和醫院等睇醫生。
林峯噚日同女友吳千語（Karena）現身跑馬地養和醫院，連林峯嘅爸爸媽媽都拎埋嘢食去咗陪佢，等千語BB同助手畀錢兼拎埋藥之後，佢哋一家大細坐七人車走人。
【父母出動】■林峯嘅爹哋媽咪都有同行陪住囝囝睇醫生。
【服侍周到】■林峯同爹哋坐埋一邊，千語BB就幫手畀錢同拎藥。
■馬天佑日前當街小便，搵千語睇水。
馬天佑：對唔住
問林峯係咪攰得滯病咗？佢就話：「感冒啫！」當問到馬天佑當街小便嗰件事，林峯話：「回應咗喇喎！唔講喇！」不過問多兩句之後，佢就話冇嬲，得個笑字囉！反而千語BB全程冇出聲，一直跟喺男友後面行，然後一支箭上車走人。講番馬天佑件事，事關噚日有周刊報道，影到馬天佑日前同老死林峯嘅女友千語BB去咗數碼港公園放狗，點知人有三急，佢竟然拉咗千語BB去草叢幫手睇水，再背住千語放尿。噚日馮仁昭搵馬天佑問番呢件事，佢話：「對今次發生呢件事，感到十分十分十分十分十分抱歉，真係……係第一次同最後一次。希望呢件事唔好影響到任何人，包括我朋友，所以真係對唔住。」講到千語幫手睇水？馬天佑就勁尷尬咁話：「嗰刻咁啱得咁蹺佢喺度，佢幫手……喺公眾地方做呢樣嘢係唔恰當，一人做事一人當，冇得怪Karena，全部都係自己責任。」撰文：馮仁昭
來源:
http://hk.apple.nextmedia.com/entertainment/art/20160505/19598044